¿LAKASKINAW pi xkinkalakgayawakan akgtum taskujut kcongregación nema la uku max nila makgantaxtiyaw? Max akgtum taskujut nema lakgaya chatum tala o max akgtum taskujut nema xlakgayaw makgasa. Pero max nialhla makgantaxtiyaw xlakata linawa kata, xlakata tumin o max xlakata kifamiliajkan. Nachuna xlakata talakgpalit nema tlawa xkachikin Jehová max talakaskilh namakgxtakgaw akgtum taskujut nema akglhuwa kata liskujwi. Maski chuna, max nalakpuwanaw pi ni putum tlawamaw tuku lakaskinaw xlakata naskujnaniyaw Jehová. Akxni chuna tatakgsaw, max lu nalilakgaputsayaw. Pero, ¿tuku talakaskin natlawayaw xlakata ni nataxlajwaniyaw, ni nalilipuwanaw chu ni nalisitsiyaw? ¿Tuku nakinkamakgtayayan chuntiya nakgalhiyaw tapaxuwan?

Xliʼakxilhtit Juan tiku xmununan wi tuku lu xlakaskinka kinkamasiyaniyan. Uma xlakskujni Dios lakgayawaka lhuwa taskujut. Pero max nikxni lilakpuwa tuku x’ama titaxtu kxlatamat, pi lhuwa kilhtamaku x’ama lichuwinan Dios pero tlakg lhuwa kilhtamaku x’ama tanu kpulachin. Maski chuna, ankgalhin paxuwalh. ¿Tuku makgtayalh? Chu, ¿la tlan chuntiya napaxuwayaw maski ni nakgantaxtu tuku akinin lakpuwanaw?

Abril kkata 29, Juan tsukulh kawani latamanin pi Mesías x’ama min, chuna la xwaninit Jehová. Xlichuwinan: «Kamakgxtakgtit tuku nitlan tlawapatit, xlakata tamapakgsin xalak akgapun talakatsuwinit» (Mat. 3:2; Luc. 1:12-17). Lhuwa tiku kgaxmatkgolh. Chu asta lhuwa latamanin tiku xalak alakatanu minkgolh xlakata nakgaxmatkgo uma tamakatsinin, chu lhuwa latamanin makgxtakgkgolh tuku nitlan xtlawamakgolh chu tamunukgolh. Juan nachuna liwana kawanilh lakgaputiyunanin tiku xpulalinanin takanajla tuku nitlan x’ama kaʼakgspula komo ni xlakgpalikgolh xtayatkan (Mat. 3:5-12). Kkata 29 tlawalh lu xlakaskinka taskujut, munulh Jesús. Lata ama kilhtamaku, kamaʼakgpuwantinilh latamanin nastalanikgo Jesús, Mesías tiku xwankanit pi namin (Juan 1:32-37).

Xlakata lu tlan taskujut xtlawanit Juan, Jesús lichuwinalh: «Xlikana kkawaniyan, niti lakachinit tiku tlakg xlakaskinka nixawa Juan tiku Mununa» (Mat. 11:11). Xlikana pi Juan lu lanka xtapalh akxilhli putum tuku tlawalh xpalakata Jehová chu lu lipaxuwalh putum tuku makglhtinalh. Chuna la xla,  kstalaninanin Cristo xala uku tiku skujnanikgonit Jehová xliputum xnakujkan lipaxuwakgo lhuwa tasikulunalin. Kʼakxilhwi tuku titaxtumakgolh Terry chu xpuskat, Sandra, tiku liwakaya 50 kata akxtum skujnanimakgolh Jehová. Terry wan: «Lhuwa taskujut kilakgayawakanit. Xakskujma la precursor regular, betelita, precursor especial chu superintendente de circuito chu xla distrito, chu la uku kliskujmapa la precursor especial». Xlikana pi kinkaliminiyan tapaxuwan akxni kgalhiyaw akgtum taskujut kxkachikin Jehová. Pero xliʼakxilhtit Juan nakinkamasiyaniyan pi ni talakaskin nakinkalakgayawakanan akgtum taskujut kxkachikin Jehová xlakata napaxuwayaw chu pi talakaskin naliskujaw xlakata ankgalhin nakgalhiyaw tapaxuwan.

Pulaktum tuku makgtayalh Juan xlakata chuntiya napaxuwa wa pi ankgalhin limasiyalh pi lanka xtapalh xliʼakxilha taskujut nema xlakgayawakanit. Akgtum liʼakxilhtit, akxni Jesús tamunulh, nialh lu lhuwa tiku tsukukgolh stalanikgo Juan chu tlakg tsukuka stalanikan Jesús. Kstalaninanin Juan lilakgaputsakgolh uma tuku xlama, chu asta wanikgolh: «Kaʼakxilhti [...] xla mununama chu putum latamanin lakgamakgolh» (Juan 3:26). Juan kakgalhtilh: «Litatawilat tsumat wa tapakgsini litatawilat kgawasa. Pero xʼamigo litatawilat kgawasa, akxni lakatsu ya chu kgaxmata xtachuwin lu lipaxuwa xlakata chuwinan litatawilat kgawasa. Wa xlakata akit lu klitsama uma tapaxuwan» (Juan 3:29). Juan ni xtalamakgasitsina xliʼakxilha Jesús chu ni lakpuwa pi xtaskujut ni lanka xtapalh xlitaxtu xlakata xtaskujut Jesús tlakg xlakaskinka xwanit. Wata chuntiya paxuwalh xlakata lanka xtapalh xʼakxilha pi «xʼamigo litatawilat kgawasa» xlitaxtu.

Chuna la Juan xakxilha xtaskujut makgtayalh napaxuwa maski tuwa xwanit taskujut nema xlakgayawakanit. Akgtum liʼakxilhtit, xlakata nazareo xwanit lata lakachilh, ni xliwat xwanit vino (Luc. 1:15). Jesús lichuwinalh xlakata xlatamat Juan: «Juan ni wayan chu ni way vino». Pero Jesús chu kstalaninanin ni xkaskinikan pi xlatamakgolh chuna la chatum nazareo chu tlakg tlan xlatamakgo (Mat. 11:18, 19). Nachuna, maski Juan nikxni tlawalh milagros, xkatsi pi kstalaninanin Jesús tlan xtlawakgo, chu asta tiku max xapulana wa kstalanikgonit (Mat. 10:1; Juan 10:41). Pero Juan ni wa kuenta tlawalh uma, wata wa liskujli taskujut nema Jehová xlakgayawanit.

Komo akinin na lanka xtapalh liʼakxilhaw taskujut nema kinkalakgayawakanitan la uku, chuntiya napaxuwayaw. Terry, tiku lichuwinawa, wan: «Wa ktsukulh liskuja taskujut nema xkilakgayawakan». Akxni lakapastaka la kskujma xliputum kilhtamaku, lichuwinan: «Ni klakpuwan pi nitlan tuku ktlawama. La uku lu klilakpuwan».

Chuntiya nakgalhiyaw tapaxuwan komo nalilakpuwanaw tuku tlawa pi akgtum taskujut nema kinkalakgayawakanan lanka xtapalh nawan wa pi «xtaskujnin Dios» litaxtuyaw (1 Cor. 3:9). Kawiliw akgtum liʼakxilhtit. Kalilakpuwaw pi kgalhiyaw tuku lu lhuwa xtapalh nema makgasata kgalhi kifamiliajkan, komo ankgalhin nakuentajtlawayaw chu naxakayaw, maski natitaxtu kilhtamaku chuntiya lilakgatit natasiya. Xtachuna la uma, komo nalilakpuwanaw pi lu lanka xtapalh skujnanikan Jehová, nixatlan talakpuwan ni katitlawalh pi nialh napaxuwayaw. Ni katamalakxtumiw tuku tlawamaw akinin chu tuku tlawakgo amakgapitsin, chu nipara kalakpuwaw pi taskujut nema kinkalakgayawakanitan nitu litaxtu nixawa tuku kalakgayawakanit amakgapitsin (Gál. 6:4).

Max Juan xkatsi pi xtaskujut ni makgas xʼama makgapala, pero max ni xlilakpuwan pi kaj lakapala xʼama sputa (Juan 3:30). Kkata 30, mapakgsina Herodes matamaknuninalh kpulachin akxni kaj akgchaxan papaʼ lata xmununit Jesús. Maski chuna, chuntiya liskujli xlakata nalichuwinan Dios (Mar. 6:17-20). ¿Tuku makgtayalh xlakata nakgalhi tapaxuwan maski titaxtulh putum uma? Wa lilakpuwa tuku xla xtakanajla.

Anta kpulachin, makatsinika Juan putum tuku xtlawama Jesús akxni xlichuwinama Dios (Mat. 11:2; Luc. 7:18). Liwana xkatsi pi Jesús wa Mesías tiku xwankanit pi namin, pero max xlilakpuwan komo xʼama makgantaxti putum tuku xlichuwinankanit xlakata Mesías. Akgtum liʼakxilhtit, xlakata xwankanit  pi Mesías mapakgsina xʼama litaxtu, ¿tunkun xʼama mapakgsinan? ¿Xʼama tamakxtu kpulachin? Juan liwana xkatsiputun tuku xʼama tlawa Jesús, wa xlakata kamalakgachalh chatiy kstalaninanin xlakata nakgalhskinkgo: «¿Wix Tiku xʼama Min, o nakkgalhkgalhiyaw atanu?» (Luc. 7:19). Akxni taspitkgolh, Juan max liwana kgaxmatli tuku wanikgolh xlakata milagros nema xtlawama Jesús chu tuku wa Jesús: «Tiku lakgaxokgo xwankgonit lakawanankgo, tiku nila xtlawankgo tlan tlawankgo, tiku xkgalhikgo lepra paksmakgolh, tiku akgatapa xwankgonit tlan kgaxmatkgo, tiku xnikgonit kamalakastakwanimaka, chu limaxkgenin kalitachuwinamaka xatlan tamakatsinin» (Luc. 7:20-22).

Xlikana pi uma lu matliwakglhli Juan. Xlimasiyani pi Jesús xmakgantaxtima tuku xlichuwinankanit xlakata Mesías. Maski Jesús ni xʼama tamakxtu kpulachin, Juan liwana xkatsi pi lanka xtapalh litaxtulh taskujut nema tlawalh. Maski titaxtulh tuku tuwa, tlan xpaxuwa.

Komo wa nalilakpuwanaw tuku xla kintakanajlakan chuna la tlawalh Juan, xatapaxuwan natayaniyaw (Col. 1:9-11). Komo ankgalhin nalikgalhtawakgayaw Biblia chu nalilakpuwanaw nakinkamakgtayayan chuna natlawayaw, xlakata kinkamalakapastakayan pi taskujut nema tlawayaw lanka xtapalh litaxtu (1 Cor. 15:58). Sandra, tiku lichuwinawa, lichuwinan: «Akxni klikgalhtawakga Biblia maski kaj akgtum capítulo kimakgtaya tlakg naktalakatsuwini Jehová chu wa naklilakpuwan, ni akit». Nachuna tlan naʼakxilhaw taskujut nema tatlawama xlikalanka katiyatni. Komo chuna natlawayaw, ni lu wa katililakgaputsaw tuku titaxtumaw chu wa nalilakpuwanaw tuku tlawama Jehová. Sandra lichuwinampara: «Programas xla JW Broadcasting^® lu kinkamakgtayanitan, kmakgkatsiyaw pi makxtum ktawilaw xkachikin Jehová chu kkgalhiyaw tapaxuwan la kskujmaw».

Juan tiku xMununan makgantaxtilh taskujut nema xlakgayawakanit, xkgalhi «litliwakga xtachuna la Elías». Chu, chuna la Elías, «nachuna xmakgkatsi chuna la akinin» (Luc. 1:17; Sant. 5:17). Komo lanka xtapalh liʼakxilhaw tuku xla kintakanajlakan chuna la Juan, chuntiya napaxuwayaw kkintaskujutkan nema lakgayaw, maski natitaxtuyaw tuku tuwa.