ARTÍCULO NEMA NATALIKGALHTAWAKGA 31
«Ni ktlakgwanaw»
«Wa xlakata, ni ktlakgwanaw» (2 COR. 4:16).
TAKILHTLIN sjj 128 Katayaniw asta akxni namin lisputni
TUKU NATALICHUWINAN *
1. ¿Tuku xlitlawatkan kstalaninanin Cristo xlakata namakglhtinankgo latamat nema ni kgalhi xlisputni?
AKININ kstalaninanin Cristo xtachuna la komo kgosnamanaw xlakata namakglhtinanaw latamat nema ni kgalhi xlisputni. Komo aku matsukimaw o lhuwata kata lata skujnanimaw Jehová, talakaskin chuntiya nakgosnanaw asta nalakgchanaw tuku lakgchamputunaw. Tastakyaw nema Pablo kamaxkilh kstalaninanin Cristo xalak Filipos tlan nakinkamakgtayayan namakglhtinanaw latamat. Makgapitsi tiku xmakgtapakgsikgo kʼama congregación xalak pulana siglo lhuwata kata la kskujnanimakgolh Jehová akxni kamaxkika xcarta Pablo. Maski tlan tuku xtlawamakgolh, Pablo kamalakapastakalh pi xtalakaskin chuntiya natayanikgo. Xla xlakaskin pi kstalanikgolh xliʼakxilhtit xlakata xmakglhtinankgolh latamat nema ni kgalhi xlisputni (Filip. 3:14).
2. ¿Tuku xlakata lu kamakgtayalh filipenses tastakyaw nema Pablo kamaxkilh?
2 Xtastakyaw Pablo lu kamakgtayalh ama kilhtamaku. Congregación xalak Filipos lu kaputsastalanika akxni lakatsukulh. Putum uma tsukulh kkata 50, akxni Pablo chu Silas chankgolh kʼama kachikin xlakata Dios kawanilh pi xʼankgolh kMacedonia (Hech. 16:9). Anta tekgskgolh chatum puskat tiku liwana kakgaxmatnilh xwanikan Lidia. Jehová makgtayalh xlakata xkgaxmatli xatlan tamakatsinin (Hech. 16:14). Ni makgas kilhtamaku xla chu putum tiku xwilakgolh kxchik tamunukgolh. Pero Akgskgawini ni lakgatilh. Makgapitsi lakchixkuwin xwatalinkgolh Pablo chu Silas kxlakatin mapakgsinanin chu kalimawakaka pi xkamakglhuwimakgolh latamanin. Wa xlakata Pablo chu Silas kawilinika, katamaknuka kpulachin chu kawanika pi xtaxtukgolh kʼama kachikin (Hech. 16:16-40). ¿Taxlajwanikgolh? Ni chuna. ¿Chu natalan xalak ama congregación nema aku xlakatsukunit? Lu kaks malakawaninan tuku tlawakgolh xlakata na tayanikgolh. Xlikana pi lu kamakgpuwantinilh xatlan xliʼakxilhtitkan Pablo chu Silas.
3. ¿Tuku liwana xkatsi Pablo chu tuku takgalhskinin nakgalhtiyaw?
3 Pablo liwana xlakpuwanit ni natlakgwan (2 Cor. 4:16). Pero liwana xkatsi pi chuntiya xlilakpuwa tuku xlakgchamputun xlakata xkgalhilh latamat nema ni kgalhi xlisputni. ¿Tuku kinkamasiyaniyan xliʼakxilhtit? ¿Tuku liʼakxilhtit xalak kinkilhtamakujkan kinkamasiyaniyan pi talakaskin chuntiya natayaniyaw maski natitaxtuyaw tuku tuwa? ¿Chu la kinkamakgtayayan takgalhkgalhin nema kgalhiyaw xlakata nikxni natlakgwanaw?
TUKU KINKAMASIYANIYAN XLIʼAKXILHTIT PABLO
4. ¿Tuku tlawalh Pablo maski tuwa tuku xtitaxtuma?
4 Kaʼakxilhwi tuku xtitaxtuma Pablo akxni katsokgnanilh xalak Filipos chu tuku xtlawama. Xlakgachinukanit kʼakgtum chiki kRoma, wa xlakata nila xʼan lichuwinan Dios. Maski chuna, xkalitachuwinan Dios tiku xlakgapaxialhnankgo chu xkatsokgnani cartas congregaciones nema makgat xwilakgolh. Nachuna, la uku lhuwa kstalaninanin Cristo tiku nila taxtukgo kxchikkan kalitachuwinankgo Dios tiku ankgo kalakgapaxialhnankgo. Nachuna katsokgnanikgo cartas latamanin tiku nila kalakgapaxialhnankgo.
5. Chuna la wan Filipenses 3:12-14, ¿tuku makgtayalh Pablo ni xmalaktlawilh la kskujnanima Jehová?
5 Pablo ni mastalh talakaskin pi tuku tlan xtlawanit chu tuku nitlan xtlawanit xmalaktlawilh la kskujnanima Jehová. Xla lichuwinalh pi komo «nialh [nalakapastakaw] tuku xapulana» nakinkamakgtayayan xlakata nalakgchanaw tuku namin, uma wamputun, namasputuyaw kintaskujutkan la kstalaninanin Cristo (kalikgalhtawakga Filipenses 3:12-14). ¿Tuku max xmalaktlawilh? Pulana, putum tuku tlan xkitaxtuninit kjudaísmo. Pero xla xʼakxilha xtachuna la «lhuwa palhma» o basura (Filip. 3:3-8). Xlipulaktiy, tuku nitlan xmakgkatsi xlakata xkaputsastalaninit kstalaninanin Cristo. Pero ni mastalh talakaskin pi uma xmaxlajwanilh. Chu xlipulaktutu, tuku xtlawanit xlakata la kskujnaninit Jehová. Lu tlan kitaxtunilh maski xtamaknukanit kpulachin, xwilinikanit chu asta xʼaktalakanit, katuwa xwilinit xlatamat kpupunu chu ni xkgalhi tuku nawa chu tuku nalhakga. Pero nikxni lakpuwa pi lhuwata tuku xtlawanit (2 Cor. 11:23-27). Maski lhuwa tuku tlan xtlawanit chu xpatinanit, xkatsi pi chuntiya kskujnanilh Jehová. Chu akinin nachuna kilitlawatkan.
6. ¿«Tuku xapulana» nema makgxtakgnitaw talakaskin nialh nalakapastakaw?
6 ¿La tlan «nialh [nalakapastakaw] tuku xapulana» chuna la tlawalh Pablo? Max makgapitsi akinin kinkasakgaliyan kintalakapastaknikan xlakata talakgalhin nema tlawaw makgasa. Komo chuna makgkatsiyaw, ¿tlan xlimaxtuw kilhtamaku nalakputsananiyaw xlakata talakgmaxtut? Komo nakgalhtawakgayaw, nalilakpuwanaw chu natlawayaw oración xlakata uma, nakinkamakgtayayan nialh lu nalilakgaputsayaw tuku tlawaw makgasa. Chu asta nialh katililakgaputsaw talakgalhin nema Jehová kinkatapatinitana. Kaʼakxilhparaw atanu tuku kinkamasiyaniyan xliʼakxilhtit Pablo. Makgapitsi xtatayananin Jehová makgxtakgkgonit xtaskujutkan niku tlan xkaxokgonikan xlakata tlakg naskujnanikgo Jehová. Komo chuna tlawanitaw, nialh nalakapastakaw tuku xapulana na kilhchanima ni nalilakpuwanaw tuku makgxtakgwi (Núm. 11:4-6; Ecl. 7:10). «Tuku xapulana» nema makgxtakgnitaw na makgtanuma makgapitsi tuku tlawanitaw kxkachikin Jehová o tuku tuwa titaxtunitaw. Xlikana, akxni lakapastakaw la kinkamakgtayanitan chu kinkasikulunatlawanitan kinTlatkan chuna la titaxtutilhanit kata tlakg talakatsuwiniyaw. Wa xlakata nikxni kalakpuwaw pi lhuwata tuku tlawanitaw chu nialh talakaskin tlakg natlawayaw (1 Cor. 15:58).
Xlakata tlan namakglhtinanaw latamat, talakaskin kuenta natlawayaw xlakata ni nalakanaw tuku natlawa pi nialh nachanaw niku champutunaw (Kaʼakxilhti párrafo 7).
7. 1) Chuna la wan 1 Corintios 9:24-27, ¿tuku talakaskin natlawayaw xlakata nakgalhiyaw latamat nema ni kgalhi xlisputni? Kawili akgtum liʼakxilhtit.
7 Pablo liwana xʼakgatekgsa umakgolh xtachuwin Jesús: «Lu kaliskujtit» (Luc. 13:23, 24). Xla xkatsi pi chuna la Cristo, xtalakaskin lu xliskujli asta akxni xnilh. Wa xlakata tamalakxtumilh xlatamat chatum kstalanina Cristo la niku kgosnankan (kalikgalhtawakga 1 Corintios 9:24-27). Tiku kgosnankgo kajwatiya akxilhkgo niku champutunkgo chu ni wa akxilhkgo tuku nakamalaktlawi. Akgtum liʼakxilhtit, tiku kgosnankgo kʼakgtum lanka tiji niku wilakgolh pustan chu atanu. ¿Tiku kgosnamakgolh natachokgokgo kaj xlakata naʼakxilhkgo tuku stamaka? Xlikana pi ni, xlakata tlajanamputunkgo. Nachuna, xlakata nakgalhiyaw latamat nema ni kgalhi xlisputni talakaskin nitu nakinkamalaktlawiyan. Komo kajwatiya naʼakxilhaw tuku lakgchamputunaw chu naliskujaw chuna la tlawalh Pablo, namakglhtinanaw latamat.
NI KATLAKGWAW MASKI NATITAXTUYAW TUKU TUWA
8. ¿Tuku pulaktutu nalichuwinanaw?
8 Kalichuwinaw pulaktutu tuku max nakinkalaktlawayan. Wa akxni ni lakapala kgantaxtu tuku kgalhkgalhimaw, akxni nialh lu kgalhiyaw litliwakga chu akxni kgalhiyaw taʼakglhuwit nema lhuwa kilhtamaku makgapala. Akxni naʼakxilhaw tuku tlawakgonit makgapitsi xlakskujnin Dios wi tuku nakatsiniyaw (Filip. 3:17).
9. ¿Tuku max nakinkaʼakgspulayan komo ni lakapala nakgantaxtu tuku kgalhkgalhimaw?
9 Akxni ni lakapala kgantaxtu tuku kgalhkgalhimaw. Akinin lakaskinaw pi kakgantaxtulh tuku malaknunit Dios. Akxni palakachuwina Habacuc wanilh Jehová pi xmasputulh tuku nitlan xlama kJudá, Jehová wanilh pi xkgalhkgalhilh (Hab. 2:3). Pero max nialh lu katilipaxuwaw tuku tlawayaw komo ni lakapala kgantaxtu tuku kgalhkgalhimaw. Chu asta max nataxlajwaniyaw (Prov. 13:12). Wa uma tuku lalh akxni xtsukuma siglo veinte. Ama kilhtamaku, lhuwa tiku xatalaksakni xkgalhkgalhimakgolh naʼankgo kʼakgapun kkata 1914. ¿Tuku tlawakgolh tiku ni xmakgxtakgkgo Jehová akxni ni kgantaxtulh tuku xkgalhkgalhimakgolh?
Takgalhkgalhin nema xkgalhikgo Royal chu Pearl Spatz ni kgantaxtulh kkata 1914, pero akglhuwa kata chuntiya skujnanikgolh Jehová (Kaʼakxilhti párrafo 10).
10. ¿Tuku tlawalh akgtum tamakgaxtokgat akxni ni kgantaxtulh tuku xkgalhkgalhimakgolh?
10 Kaʼakxilhwi tuku titaxtukgolh chatiy natalan tiku ni makgxtakgkgolh Jehová, Royal chu Pearl Spatz. Tala Spatz tamunulh kkata 1908, akxni xkgalhi akgpuxam kata. Lu liwana xkatsi pi nialh makgas xʼama an kʼakgapun. Wa xlakata, akxni wanilh Pearl pi xtatamakgaxtokgli kkata 1911, wanilh: «Katsiyata tuku nala kkata 1914. Komo natamakgaxtokgaw, lakapala katamakgaxtokgwi». ¿Taxlajwanikgolh uma tamakgaxtokgat xlakata ni ankgolh kʼakgapun kkata 1914? Ni chuna, xlakata wa xliskujmakgolh ni namakgxtakgkgo Dios, ni wa komo wi tuku xkamaxkika. Liwana xlakpuwankgonit chuntiya naskujnanikgo Dios chu ni nataxlajwanikgo. Chu chuna tlawakgolh. Chuntiya skujnanikgolh Jehová chu ni makgxtakgkgolh asta akxni nikgolh. Xlikana pi akxilhputunaw akxni Jehová namasantujli xtukuwani chu akxni namakgantaxti tuku malaknunit. Liwana katsiyaw pi uma nakgantaxtu kkilhtamaku akxni xla lakkaxwilinit. La uku chuntiya kaliskujwi xlakata nalichuwinanaw Dios chu ni kamastaw talakaskin pi xlakata nina kgantaxtu tuku kgalhkgalhimaw nakinkamaxlajwaniyan.
Maski xlina kata, Arthur Secord chuntiya xmatliwakglhputun xtakanajla (Kaʼakxilhti párrafo 11).
11, 12. ¿Tuku xlakata ni taxlajwaniyaw maski nialh lu lhuwa tuku tlan tlawayaw chuna la xapulana? Kawili akgtum liʼakxilhtit.
11 Akxni nialh lu kgalhiyaw litliwakga. Chatum tiku kgosnan talakaskin nakgalhi lhuwa litliwakga, pero akinin ni talakaskin xalakgtliwakga nawanaw xlakata tlan namatliwakglhaw kintakanajlakan chu ni namakgxtakgaw Jehová. Lhuwa tiku nialh lu kgalhikgo litliwakga chuna la xapulana, liwana lakpuwankgonit chuntiya namatliwakglhkgo xtakanajlakan (2 Cor. 4:16). Kaʼakxilhwi xliʼakxilhtit tala Arthur Secord. * Akgtum kilhtamaku, akxni xkgalhi 88 kata chu 55 kata lata xwi kBetel, chatum enfermera tiku kuenta xtlawa wanilh: «Tala Secord, wix lu lhuwata skujnaninita Jehová». Pero Arthur ni kajwatiya xlilakpuwan tuku xtitaxtunit. Xla lakaʼakxilhli, talitsilh chu wanilh: «Chuna, xlikana. Pero tuku tlakg xlakaskinka ni wa tuku tlawanitaw makgasa, wata wa tuku natlawayaw la uku».
12 ¿Lhuwata kata skujnaninitaw Jehová chu la uku nialh lu lhuwa tuku tlan tlawayaw chuna la xapulana? Komo chuna, ni kataxlajwaniw. Liwana kakatsiw pi Jehová lanka xtapalh akxilha tuku tlawanitaw makgasa (Heb. 6:10). Kalakapastakwi pi Jehová ni wa akxilha komo lhuwa la skujnaniyaw. Wata wa akxilha komo ni taxlajwaniyaw chu tlawayaw putum tuku matlaniyaw (Col. 3:23). Xla katsi tuku tlan chu tuku nila tlawayaw chu nikxni kinkaskiniyan tuku nila tlawayaw (Mar. 12:43, 44).
Anatoly chu Lidiya Melnik ni makgxtakgkgolh Jehová maski titaxtukgolh tuku tuwa (Kaʼakxilhti párrafo 13).
13. ¿Tuku titaxtukgolh Anatoly chu Lidiya, chu la kinkamakgtayayan xliʼakxilhtitkan chuntiya naskujnaniyaw Jehová maski lhuwa kilhtamaku natitaxtuyaw tuku tuwa?
13 Taʼakglhuwit nema lhuwa kilhtamaku makgapala. Makgapitsi xlakskujnin Jehová titaxtukgonit tuku tuwa chu lhuwa kilhtamaku kaputsastalanikanit. Kaʼakxilhwi xliʼakxilhtit Anatoly Melnik, * xalak Moldavia. Kaj akgkutiy kata xkgalhi akxni mapakgsinanin tamaknukgolh kpulachin xtlat chu linkgolh kSiberia nema xwi 7,000 kilómetros xlilakgamakgat lata xwi xfamilia. Titaxtulh akgtum kata, Anatoly, xtse chu xnatlatni xtse na kamalakgachaka kSiberia. Titaxtulh kilhtamaku, tlan ankgolh ktamakxtumit, pero xlakata tlan xchankgolh xtalakaskin natlawankgo 30 kilómetros niku xma miki chu lu xlonkgnan. Alistalh, tala Melnik akgtutu kata tamaknuka kpulachin, chu ni kaʼakxilhli xpuskat Lidiya chu xtsumat tiku kajku akgtum kata xkgalhi. Maski akglhuwa kata lhuwa tuku tuwa titaxtukgolh, Anatoly chu xfamilia ni taxlajwanikgolh. La uku, Anatoly kgalhi 82 kata chu makgtapakgsi kcomité xla sucursal xalak Asia central. Chuna la Anatoly chu Lidiya, katlawaw putum tuku matlaniyaw chu chuntiya kaskujnaniw Jehová (Gál. 6:9).
KAJWATIYA KALILAKGAPUTSAW KINTAKGALHKGALHINKAN NEMA AKU NAMIN
14. ¿Tuku xkatsi Pablo pi xlitlawat xwanit xlakata tlan xmakglhtinalh latamat?
14 Pablo liwana xkatsi pi xʼama lakgchan latamat. Xlakata xatalaksakni xwanit, xkgalhkgalhima talakgalhaman naʼan kʼakgapun. Wa xlakata liwana xkatsi pi xtalakaskin chuntiya naliskuja xlakata tlan namakglhtinan (Filip. 3:14). Xlakata nakamakgtaya xalak Filipos, Pablo maklakaskilh akgtum lu xatlan liʼakxilhtit xlakata ankgalhin nalakapastakkgo latamat nema xʼamakgolh makglhtinankgo.
15. ¿La maklakaskilh Pablo tachuwin makgtapakgsikan xlakata nakamakgpuwantini xalak Filipos chuntiya naliskujkgo xlakata namakglhtinankgo latamat?
15 Pablo kamalakapastakalh filipenses pi xmakgtapakgsikgo kʼakgapun (Filip. 3:20). ¿Tuku xlakata xtalakaskin pi ankgalhin xlakapastakkgolh? Ama kilhtamaku, lu xlakaskinka xʼakxilhkan namakgtapakgsikan kRoma. * Pero tiku xatalaksakni xwankgonit lu lanka xtapalh xwanit niku xmakgtapakgsikgo, xlakata xkamaxki talakaskin lhuwa tuku tlan nalipaxuwakgo. Pero, makgtapakgsikan kRoma ni lhuwa xtapalh xwanit. Wa xlakata, Pablo kalimakgpuwantinilh filipenses umakgolh tachuwin: «Kalatapatit chuna la lakgchan xatlan tamakatsinin xpalakata Cristo» (Filip. 1:27, nota). La uku, tiku xatalaksakni wilikgo akgtum lu tlan liʼakxilhtit, xlakata chuntiya liskujmakgolh xlakata tlan namakglhtinankgo latamat nema ni kgalhi xlisputni anta kʼakgapun.
16. Chuna la wan Filipenses 4:6, 7, ¿tuku chuntiya natlawayaw komo kgalhiyaw talakgalhaman nalatamayaw kʼakgapun o kKatiyatni?
16 Talakaskin chuntiya naliskujaw xlakata tlan namakglhtinanaw latamat nema ni kgalhi xlisputni anta kʼakgapun o unu kKatiyatni akxni akgtum Paraíso nawan. Maski kaxatukuya tuku titaxtumaw ni wa kuenta katlawaw, ni kamastaw talakaskin pi wa natlawa nialh naskujniyaw Jehová (Filip. 3:16). Max nalakpuwanaw pi tuku kgalhkgalhimaw ni lakapala kgantaxtu o max nialh kgalhiyaw litliwakga chuna la makgasa. Max lhuwa kata tayaninitaw tuku tuwa chu taputsastalanit. Maski chuna nitu kalilakgaputsaw, wata kawaniw Dios tuku makgkatsiyaw. Xla nakinkamaxkiyan takaksni nema ni xlakpuwanitaw (kalikgalhtawakga Filipenses 4:6, 7).
17. ¿Tuku nalichuwinanaw kʼatanu artículo?
17 Chuna la chatum tiku kgosnan chan niku xlichanat, akinin nachuna kajwatiya kuenta tlawayaw xlakata namakgantaxtiyaw uma taskujut chu namakglhtinanaw latamat nema ni kgalhi xlisputni. Chuna la kinkamaxkiyan talakaskin kilitliwakgakan chu la wi kilatamatkan, chuntiya kamatliwakglhwi kintakanajlakan chu kaliskujwi xlakata namakglhtinanaw tasikulunalin nema nakinkamaxkikanan. ¿Tuku kilitlawatkan xlakata chuntiya kuenta natlawayaw chu ni natlakgwanaw? Artículo nema aku mima nakinkamakgtayayan kuenta natlawayaw «tuku tlakg xlakaskinka» (Filip. 1:9, 10).
TAKILHTLIN sjj 79 Kakamatliwakglhti
^ párr. 5 Maski lhuwata kata la skujnanimaw Jehová, chuntiya lakaskinaw pi natatliwakglha kintakanajlakan. Apóstol Pablo kamakgpuwantinilh kskujnin Dios xlakata nikxni natlakgwankgo. Carta nema kamalakgachanilh filipenses kinkamakgpuwantiniyan natayaniyaw chuna la kgosnamanaw xlakata namakglhtinanaw latamat. Kʼuma artículo, naʼakxilhaw la nalilatamayaw xtastakyaw Pablo.
^ párr. 11 Xbiografía tala Secord, «Mi participación en adelantar la adoración correcta», taxtulh krevista la Atalaya 1 xla noviembre kata 1965.
^ párr. 13 Xbiografía tala Melnik, «Me enseñaron desde niño a amar a Dios», taxtulh krevista ¡Despertad! 22 xla octubre kata 2004.
^ párr. 15 Xlakata Filipos anta xtapakgsi kRoma, tiku anta xlamakgolh tlakg lhuwa tuku xkamaxkikan xlakata anta xmakgtapakgsikgo. Wa xlakata, kstalaninanin Cristo xalak Filipos liwana xʼakgatekgskgo uma liʼakxilhtit.
