ARTÍCULO NEMA NATALIKGALHTAWAKGA 33
«Tiku nakgaxmatnikgoyan» nalakgtaxtukgo
«Kuentajkatlawa chuna la lipina milatamat chu tuku masiyaya. Chuntiya lu kaliskujti xlakata umakgolh nakamakgantaxtiya, komo chuna natlawaya nalakgtaxtuya wix chu nachuna tiku nakgaxmatnikgoyan» (1 TIM. 4:16).
TAKILHTLIN sjj 67 «Kalichuwinanti Dios»
TUKU NATALICHUWINAN *
1. ¿Tuku lakaskinaw pi xtlawakgolh tiku xalak kifamiliajkan?
CHATUM tala wanikan Pauline * lichuwinan: «Lata ktsukulh lakgapasa xaxlikana, xaklakaskin pi putum kifamilia xkintatawilakgolh kParaíso. Nachuna xaklakaskin pi kinchixku, Wayne, chu aktsu kinkgawasa akxtum xakskujniw Jehová». Komo chatum tiku xalak kifamiliajkan nina lakgapasa chu ni paxki Dios max makgkatsiyaw chuna la Pauline.
2. ¿Tuku takgalhskinin nakgalhtiyaw kʼuma artículo?
2 Nila fuerza kawaniyaw tiku xalak kifamiliajkan pi kamakgamakglhtinankgolh tuku xaxlikana. Pero tlan nakamakgtayayaw xlakata nakgaxmatputunkgo xtamakatsinin Biblia (2 Tim. 3:14, 15). ¿Tuku xlakata talakaskin nakalitachuwinanaw xlakata Biblia tiku xalak kifamiliajkan? ¿Tuku xlakata talakaskin namakgkatsiyaw tuku makgkatsikgo? ¿Tuku tlan natlawayaw xlakata napaxkikgo Jehová chuna la akinin? ¿Chu la tlan nakinkamakgtayakgoyan natalan xalak congregación?
¿TUKU XLAKATA TALAKASKIN NAKALITACHUWINANAW XLAKATA BIBLIA TIKU XALAK KIFAMILIAJKAN?
3. Chuna la wan 2 Pedro 3:9, ¿tuku xlakata talakaskin nakalitachuwinanaw xlakata Biblia tiku xalak kifamiliajkan?
3 Nialh makgas Jehová namasputu xkakilhtamaku Satanás. Kajwatiya nalakgtaxtukgo tiku xlikana makgamakglhtinamputunkgo latamat nema ni kgalhi xlisputni (Hech. 13:48). Limaxtuyaw lhuwa kilhtamaku xlakata nakalitachuwinanaw Dios tiku xalak kinkachikinkan, wa xlakata max na lakaskinaw pi kifamiliajkan na naskujnanikgo Jehová. Xapaxkina kinTlatkan «ni lakaskin pi wi tiku namalakgsputukan, wata lakaskin pi putum kamakgxtakgkgolh tuku nitlan tlawamakgolh» (kalikgalhtawakga 2 Pedro 3:9).
4. ¿Tuku ni kilitlawatkan akxni tachuwinanaw tiku xalak kifamiliajkan?
4 Kalakapastakwi pi talakaskin liwana nakatachuwinanaw latamanin. Max chatum tiku ni lakgapasaw lakatsuku natachuwinanaw, pero max tiku xalak kifamiliajkan nichuna likatsiniyaw. Uma ni chuna kilitlawatkan.
5. ¿Tuku kililakapastakatkan akxni nakatachuwinanaw tiku xalak kifamiliajkan?
5 Max akxni lakapastakaw la katachuwinaw tiku xalak kifamiliajkan, nitlan limakgkatsiyaw la katachuwinaw chu lakpuwanaw pi tlakg tlan xtitlawaw. Apóstol Pablo kamaxkilh uma tastakyaw kstalaninanin Cristo: «Putum kilhtamaku tlan katakgaxmatli mintachuwinkan, xtachuna la xlimakgamitit matsat, xlakata nakatsiyatit chuna la nakakgalhtiyatit chatunu chatunu lataman» (Col. 4:5, 6). Talakaskin nalakapastakaw umakgolh tachuwin akxni katachuwinanaw tiku xalak kifamiliajkan. Komo nichuna natlawayaw max ni katilakgapasputunkgolh tuku xaxlikana.
¿LA TLAN NAKAMAKGTAYAYAW TIKU XALAK KIFAMILIAJKAN?
Akxni makgkatsiyaw tuku makgkatsikgo tiku xalak kifamiliajkan chu tlan kalikatsiniyaw natlawa pi nakgaxmatputunkgo xlakata Biblia (Kaʼakxilhti párrafos 6 asta 8). *
6, 7. Kalichuwinanti akgtum liʼakxilhtit nema masiya tuku xlakata lu xlakaskinka namakgkatsiya tuku makgkatsi tiku tamakgaxtokga maski ni xtatayana Jehová.
6 Kamakgkatsiw tuku makgkatsikgo. Pauline, tiku lichuwinawa, wan: «Xapulana kajwatiya xaklitachuwinamputun kinchixku tuku xla kintakanajla. Ni wa xaklitachuwinan tuku xla xlichuwinamputun». Pero Wayne ni lhuwa tuku xkatsini xlakata Biblia chu ni xʼakgatekgsa tuku xlitachuwinan xpuskat. Xlakpuwan pi Pauline kajwatiya xlilakgaputsa tuku xla xtakanajla. Xpekuan komo xpuskat xmakgtanunit kʼakgtum takanajla nema xlakatawaka limapakgsin chu pi kaj xʼakgskgawimaka.
7 Pauline lichuwinan pi lhuwa kilhtamaku akxtum xkatala natalan, ktamakxtumit, akxni xʼankgo lichuwinankgo Dios chu akxni atanu tuku xtlawakgo. Lichuwinan: «Lakgachunin, akxni Wayne xchin kchiki nitu xakwilaw, chu xmakgkatsi pi xʼakstu xwi». Xla lu xkalakapastaka xpuskat chu xkgawasa. Ni xkalakgapasa latamanin tiku akxtum xkatala xpuskat chu asta lakpuwa pi Pauline tlakg xlakaskinka xkaʼakxilha xalaksasti xʼamigos nixawa xla. Wa xlakata wanilh pi xʼama makgxtakga. ¿Nixlikana pi xtalakaskin pi Pauline xlimasiyalh pi xmakgkatsi tuku xmakgkatsi xchixku?
8. Chuna la wan 1 Pedro 3:1, 2, ¿tuku tlakg kuentajtlawakgo tiku xalak kifamiliajkan?
8 Kamastaw talakaskin pi tuku tlawayaw nalimasiya la likatsiyaw. Lakgachunin tiku xalak kifamiliajkan wa kuentajtlawakgo tuku tlawayaw nixawa tuku wanaw (kalikgalhtawakga 1 Pedro 3:1, 2). Pauline alistalh akxilhli pi uma xlikana. Xla wan: «Xakkatsi pi Wayne xkinkapaxkiyan chu ni xkimakgxtakgputun. Pero tuku wa, kimalakpuwanilh pi xtalakaskin naktlawa tuku Jehová lakaskin. Ni kajwatiya xtalakaskin nakchuwinan, xtalakaskin naklimasiya». Wa xlakata, nialh fuerza wanilh xchixku pi xlichuwinankgolh xlakata Biblia wata tsukulh litachuwinan tuku xtlawa chali chali. Wayne akxilhli pi xpuskat tlakg tlan xlikatsi chu nachuna xkgawasa (Prov. 31:18, 27, 28). Akxni akxilhli pi Biblia xmakgtayama xfamilia tlakg lakgapasputulh Jehová (1 Cor. 7:12-14, 16).
9. ¿Tuku xlakata ni nataxlajwaniyaw?
9 Ni kataxlajwaniw. Jehová kinkawiliniyan xaliʼakxilhtit. Chali chali kamaxki talakaskin latamanin pi namakgamakglhtinankgo lakwan tamakatsinin chu chuna nakgalhikgo latamat (Jer. 44:4). Apóstol Pablo wanilh Timoteo pi chuntiya xkamakgtayalh amakgapitsin xlakata chuna tlan nalakgtaxtu chu nachuna nalakgtaxtukgo tiku xkgaxmatnikgolh (1 Tim. 4:16). Xlakata kapaxkiyaw tiku xalak kifamiliajkan, lakaskinaw pi xlakgapaskgolh tuku xaxlikana masiya Biblia. Xtachuwin chu xtayat Pauline, makgtayalh xfamilia. La uku lu paxuwa xlakata xchixku skujnanima Jehová, xchatiykan precursores chu Wayne kgolotsin xalak congregación.
10. ¿Tuku xlakata talakaskin nalimasiyayaw takgalhkgalhin?
10 Kalimasiyaw takgalhkgalhin. Akxni tsukuyaw lilatamayaw xtastakyaw Biblia, tiku xalak kifamiliajkan max tuwa namakgkatsikgo nalismanikgo tuku kanajlayaw chu la linaw kilatamatkan. Lakgachunin tuku pulana akxilhkgo wa pi nialh tlawayaw talismanin nema tlawakan chu ni makgtanuyaw kpolítica. Xapulana, max wi tiku nakinkalisitsiniyan (Mat. 10:35, 36). Pero ni nalakpuwanaw pi ni katitalakgpalikgolh. Komo nialh nakamakgtayayaw naʼakgatekgskgo tuku kanajlayaw, litaxtu la komo akinin kalakputsananinitaw chu laksaknitaw pi ni kalakgchan namakglhtinankgo latamat nema ni kgalhi xlisputni. Pero Jehová wa Jesús lakgayawanit nalakputsanan chu ni akinin (Juan 5:22). Komo limasiyayaw takgalhkgalhin, max alistalh tiku xalak kifamiliajkan nakgaxmatputunkgo xatlan tamakatsinin (kaʼakxilhti recuadro « Kamaklakaskiw kisitiojkan xla Internet»).
11-13. ¿Tuku katsiniyaw xlakata la kalikatsinilh Alice xnatlatni?
11 Tlan kalikatsi pero ni kamasta talakaskin pi tiku xalak mifamilia nalakgpalikgo tuku laksaknita (Prov. 15:2). Kalichuwinaw tuku titaxtulh Alice. Lakgapasli xaxlikana akxni ni anta xlama niku wilakgolh xnatlatni, tiku ateos xwankgonit chu lu xliskujkgo política. Akgatekgsli pi xtalakaskin tunkun nakalitachuwinan tuku xkatsinima. Xla wan: «Komo nakgalhkgalhiya xlakata nakawaniya mifamilia tuku xasasti mintakanajla, tlakg nitlan katimakgamakglhtinankgolh». Wa xlakata xkamalakgachani cartas xnatlatni niku xkakgalhskin tuku xlakan xlakpuwankgo xlakata pulaktum tuku xlichuwinan Biblia nema xlakan xlakgatikgolh, la komo tapaxkit (1 Cor. 13:1-13). Xkapaxtikatsini xlakata makgastakkgolh chu kuentajtlawakgolh, chu lakgachunin wi tuku xkamaskiwi. Akxni xʼan kalakgapaxialhnan, wi tuku xliskuja kxchik chu chuna xmakgtaya xtse. Xapulana, xnatlatni ni lakgatikgolh akxni kalitachuwinalh tuku xla xkanajla.
12 Akxni xwi kxchik xnatlatni, chuntiya xlikgalhtawakga Biblia chali chali. Alice lichuwinan pi uma makgtayalh xtse xlakata naʼakxilha pi xla lu xlakaskinka xliʼakxilha Biblia. Nachuna, xtlat na tsukulh katsini xlakata Biblia xlakata naʼakgatekgsa tuku xlakpuwan xtsumat chu xlakata natekgsa tuku nitlan xmasiyakgo. Alice wan: «Kmaxkilh maktum Biblia chu wi tuku ktsokgnanilh». ¿Tuku kitaxtulh? Xtlat ni tekgsli tuku nitlan, wata kaks lilakawa tuku katsinilh.
13 Talakaskin tlan nalikatsiyaw pero ni kamastaw talakaskin pi tiku xalak kifamiliajkan nalakgpalikgo tuku laksaknitaw maski natitaxtuyaw tuku tuwa (1 Cor. 4:12b). Akgtum liʼakxilhtit, xtse Alice sitsinilh. Xla lichuwinalh: «Akxni ktamunulh, kintse kiwanilh pi nitlan tsumat xaklitaxtu». ¿Tuku tlawalh Alice? Xla lichuwinan: «Lakatitum kwanilh pi xaklaksaknit xtatayana Jehová naklitaxtu chu ni xakama lakgpali tuku klaksakli. Kwanilh pi lu xakpaxki. Kinchatiykan ktasaw chu alistalh ktlawanilh lu xakgama liwat. Lata ama kilhtamaku, kintse akxilhli pi Biblia xkimakgtayanit tlakg tlan tsumat nakwan».
14. ¿Tuku xlakata ni namastayaw talakaskin pi kifamiliajkan nakinkamatlawiputunkgoyan tuku lakaskinkgo?
14 Max kifamiliajkan tuwa namakgkatsikgo naʼakgatekgskgo pi lu xlakaskinka akxilhaw naskujnaniyaw Jehová. Akgtum liʼakxilhtit, akxni Alice laksakli pi precursora nalitaxtu chu ni wa nakgalhtawakga tuku xnatlatni xlaksakkgonit, xtse tsukupa tasa. Pero Alice ni lakgpalilh tuku xlaksaknit. Xla wan: «Komo makgtum natlawaya tuku lakaskinkgo, max mifamilia namatlawiputumparakgoyan atanu. Pero komo lakatitum nakawaniya tuku kanajlaya, max wi tiku nakgaxmatnikgoyan». Wa uma tuku titaxtulh Alice. La uku xnatlatni precursores litaxtukgo, chu xtlat kgolotsin litaxtu.
¿LA TLAN NAKINKAMAKGTAYAKGOYAN NATALAN XALAK CONGREGACIÓN?
¿La tlan nakamakgtayakgo natalan xalak congregación kifamiliajkan tiku ni xtatayana Jehová? (Kaʼakxilhti párrafos 15 chu 16). *
15. Chuna la wan Mateo 5:14-16 chu 1 Pedro 2:12, ¿la nakamakgtaya tiku xalak kifamiliajkan «xatlan [x]taskujutkan» xlakskujnin Jehová?
15 Jehová maklakaskin «xatlan [x]taskujutkan» xlakskujnin xlakata tlan nakalimin latamanin kxkachikin (kalikgalhtawakga Mateo 5:14-16; 1 Pedro 2:12). Komo tiku tamakgaxtokga ni xtatayana Jehová, ¿kalakgapasa tiku xalak congregación? Pauline, tiku lichuwinawa, xkawani natalan pi xʼankgolh kxchik xlakata Wayne xkalakgapaskgolh. Wayne lakapastaka la makgtayalh chatum tala. Xla wan: «Uma tala ni alh skuja akgtum kilhtamaku xlakata akxtum nakakxilhaw futbol. Uma kimakgtayalh nakakxilha pi xla nachuna la akit».
16. ¿Tuku xlakata nakawaniyaw tiku xalak kifamiliajkan pi kaʼankgolh ktamakxtumit?
16 Pulaktum la tlan nakamakgtayayaw tiku xalak kifamiliajkan wa nakawaniyaw pi kaʼankgolh ktamakxtumit (1 Cor. 14:24, 25). Kxapulana tamakxtumit niku Wayne kilalh wa akxni lakapastakkan Cristo, xlakata uma tlawaka akxni xtaxtunita kxtaskujut chu ni lhuwa kilhtamaku xmakgapala. Xla lichuwinan: «Ni putum kʼakgatekgsli tuku lichuwinanka pero klakapastaka la kilikatsinikgolh natalan. Kilakgtalakatsuwikgolh chu xatapaxuwan kimakatiyakgolh. Kaʼakxilhli pi xlikana xpaxkinankgo». Akgtum tamakgaxtokgat xalak congregación lu xmakgtayakgonit Pauline xlakata nakuentajtlawakgo xkgawasa akxni xʼan ktamakxtumit chu akxni xʼan lichuwinan Dios. Akxni Wayne lakpuwa pi xtalakaskin nalakgapasa tuku kanajla Pauline, skinilh uma tala pi xmakgalhtawakgelh.
17. ¿Tuku talakaskin ni nalakpuwanaw chu tuku xlakata chuntiya nakamakgtayayaw tiku xalak kifamiliajkan?
17 Lakaskinaw pi putum tiku xalak kifamiliajkan kskujnanikgolh Jehová. Pero liwana katsiyaw pi maski lu naliskujaw xlakata nakamakgtayayaw, max nikxni katimakgtapakgsikgolh kxkachikin Jehová. Komo chuna nala, ni kalakpuwaw pi akinin linaw kuenta xlakata tuku laksakkgolh. Kalakapastakwi pi nila fuerza tlawayaw pi kamakgamakglhtinankgolh kintakanajlakan. Liwana katsiyaw pi max nakamakgpuwantini komo naʼakxilhkgo pi lu lipaxuwayaw la skujnaniyaw Jehová. Katlawaw oración xpalakatakan, lakatsuku kakalitachuwinaw xlakata Biblia chu chuntiya kakamakgtayaw (Hech. 20:20). Kalipawaw pi Jehová nasikulunatlawa la liskujaw xlakata nakamakgtayayaw. Chu komo tiku xalak kifamiliajkan nakinkakgaxmatnikgoyan, nalakgtaxtukgo.
TAKILHTLIN sjj 57 Putum latamanin kalitachuwinanaw Dios
^ párr. 5 Lakaskinaw pi putum kifamiliajkan xlakgapaskgolh Jehová, pero wa kalakgchan nalaksakkgo komo naskujnanikgo o ni. Kʼuma artículo, naʼakxilhaw tuku natlawayaw xlakata nakinkakgaxmatniputunkgoyan.
^ párr. 1 Makgapitsi tukuwani kalakgpalikanit.
^ párr. 53 TUKU TASIYA KDIBUJO: Chatum kgawasa makgtaya xtlat tiku ni xtatayana Jehová nakaxtlawa xputlaw. Chu alistalh masiyani akgtum video xla jw.org®.
^ párr. 55 TUKU TASIYA KDIBUJOS: Chatum tala liwana kgaxmatni xchixku tiku ni xtatayana Jehová akxni xla litachuwinan tuku xla tlawalh uma kilhtamaku. Alistalh, akxtum katalawi xchixku chu xkgawasa.
^ párr. 57 TUKU TASIYA KDIBUJOS: Uma tala kawaninit natalan xalak congregación pi kaʼankgolh kxchik. Xlakan tachuwinankgo xchixku uma tala. Alistalh, xchixku tala taʼan akxni lakapastakkan Cristo.
