1. ¿Tiku makgtayanankgolh xlakata tlan xlakatsukulh congregación xalak Filipos?

AKXNI Pablo, Silas, Lucas chu Timoteo chankgolh kFilipos, tekgskgolh lhuwa latamanin tiku lu xkgaxmatputunkgo tamakatsinin xla Tamapakgsin. Uma kgalhtati kstalaninanin Cristo makgtayanankgolh xlakata xʼanalh akgtum congregación kʼama kachikin. Putum tiku kstalaninanin litaxtukgolh, max tsukukgolh tamakxtumikgo kxchik chatum puskat tiku tlan xlikatsi xwanikan Lidia (Hech. 16:40).

2. ¿Tuku tuwa titaxtukgolh congregación xalak Filipos?

² Ama congregación nema aku xlakatsukunit titaxtukgolh tuku tuwa. Satanás tlawalh pi xtalatlawananin xlakatitayakgolh la xlichuwinamakgolh Dios ama kgalhtati kstalaninanin Cristo. Mapakgsinanin chipakgolh Pablo chu Silas, kalimakgsnokgkgolh kiwi chu katamaknukgolh kpulachin. Xlichali, katamakxtuka. ¿Tuku tlawakgolh akxni taxtukgolh? Kalakgapaxialhnankgolh chu kamatliwakglhkgolh xalaksasti kstalaninanin Cristo. Alistalh, akxtum taʼankgolh Timoteo, chu max Lucas tamakgxtakgli. ¿Tuku tlawakgolh xalaksasti kstalaninanin Cristo? Xlakata xtamakgtay espíritu santo chuntiya skujnanikgolh Jehová (Filip. 2:12). Pablo lu xpaxuwa xpalakatakan.

3. Chuna la wan Filipenses 1:9-11, ¿tuku kskin Pablo kxʼoración?

³ Akgkaw kata alistalh, Pablo katsokgnilh maktum carta. Akxni likgalhtawakgayaw, akxilhaw tapaxkit nema Pablo xkakgalhini natalan. Kawanilh «kkapaxkiyan chuna la Cristo Jesús» chu lu kkalakapastakan (Filip. 1:8). Nachuna  kawanilh pi xtlawa oración xpalakatakan. Kskini Jehová pi xtapaxkitkan chuntiya kstakli, xkatsikgolh tuku tlakg xlakaskinka, ni xtlawakgolh tuku nitlan, ni xkamaʼakgchakgxnikgolh amakgapitsin chu pi xtlawakgolh tuku tlan. Xlikana pi la uku nachuna tlan litamakgtayayaw tuku lichuwinalh Pablo (kalikgalhtawakga Filipenses 1:9-11). Kʼuma artículo, nalichuwinanaw tuku wa Pablo chu la tlan nalilatamayaw.

4. 1) Chuna la wan 1 Juan 4:9, 10, ¿la limasiyanit Jehová tapaxkit nema kinkakgalhiniyan? 2) ¿La xlilhuwa kilipaxkitkan Dios?

⁴ Jehová limasiyalh tapaxkit nema kinkakgalhiniyan akxni makamilh xKgawasa unu kKatiyatni xlakata nani kimpalakatakan (kalikgalhtawakga 1 Juan 4:9, 10). Uma tapaxkit tlawa pi na napaxkiyaw (Rom. 5:8). ¿La xlilhuwa napaxkiyaw Dios? Jesús mastalh xatakgalhtin akxni wanilh chatum fariseo: «Milipaxkit Jehová miDios xliputum minaku chu xliputum milatamat chu xliputum mintalakapastakni» (Mat. 22:36, 37). Paxkiputunaw Jehová xliputum kinakujkan. Lakaskinaw pi tapaxkit nema kgalhiniyaw tlakg tliwakga nawan. Pablo kawanilh filipenses pi xtapaxkitkan tlakg tliwakga xwa. ¿Tuku tlan natlawayaw xlakata namatliwakglhaw tapaxkit nema kgalhiniyaw Dios?

5. ¿Tuku natlawayaw xlakata tlakg natatliwakglha tapaxkit nema kgalhiniyaw Dios?

⁵ Xlakata napaxkiyaw Dios, talakaskin nalakgapasaw. Biblia wan: «Tiku ni paxkinan ni lakgapasa Dios, xlakata Dios tapaxkit» (1 Juan 4:8). Apóstol Pablo lichuwinalh pi kintapaxkitkan tatliwakglha akxni kgalhiyaw «xatakgatsin takatsin» xla Jehová chu «xatlan talakapastakni» xlakata la akxilha tuku titaxtuyaw (Filip. 1:9). Akxni tsukuw likgalhtawakgayaw Biblia, wi tuku katsiniw xlakata Dios chu tuku katsiniw tlawalh pi napaxkiyaw. Pero kintapaxkitkan tlakg tatliwakglhli akxni tlakg katsiw xpalakata chu xlakata xalakwan xtayat. Wa xlakata, lu xlakaskinka akxilhaw nalikgalhtawakgayaw chu nalilakpuwanaw xTachuwin Dios (Filip. 2:16).

6. Chuna la wan 1 Juan 4:11, 20, 21, ¿tiku atanu na nakapaxkiyaw xlakata tlakg tliwakga nawan kintapaxkitkan?

⁶ Tapaxkit nema Dios kinkakgalhiniyan natlawa pi nakapaxkiyaw natalan (kalikgalhtawakga 1 Juan 4:11, 20, 21). Max lakpuwanaw pi uma tapaxkit kaj xalan namakgkatsiyaw, xlakata skujnaniyaw Jehová chu limasiyaputunaw xtayat. Nachuna, stalaniyaw xliʼakxilhtit Jesús, tiku lu kinkapaxkiyan chu mastalh xlatamat kimpalakatakan. Pero lakgachunin tuwa makgkatsiyaw nalapaxkiyaw chatunu chatunu. Kaʼakxilhwi tuku lalh kcongregación xalak Filipos.

7. ¿Tuku kinkamasiyaniyan tastakyaw nema Pablo kamaxkilh Evodia chu Síntique?

⁷ Evodia chu Síntique chatiy natalan tiku «taskujkgolh» Pablo. Pero max mastakgolh talakaskin pi tuku ni akxtum xlakapastakkgo xkamapapitsilh. Pablo kamapakuwilh kxcarta chu tliwakga kastakyawalh. Kawanilh pi «watiya talakapastakni [x]kgalhikgolh» (Filip. 4:2, 3). Pablo na xlakaskinka akxilhli nakawani putum congregación: «Xliputum tuku natlawayatit ni kataʼakglhuwitit chu ni kalatalatlawatit» (Filip. 2:14). Xlikana pi uma tastakyaw makgtayanalh xlakata namatliwakglhkgo tapaxkit nema xlakgalhinikgo uma natalan chu putum congregación.

8. ¿Tuku max natlawa pi tuwa namakgkatsiyaw nakapaxkiyaw kinatalankan chu tuku kilitlawatkan xlakata nialh chuna natlawayaw?

⁸ Chuna la kaʼakgspulalh Evodia chu Síntique, komo kajwatiya naʼakxilhaw tuku nitlan tlawakgo amakgapitsin natalan tuwa  namakgkatsiyaw nakapaxkiyaw. Kimputumkan chali chali tlawayaw tuku nitlan. Komo ankgalhin wa naʼakxilhaw tuku nitlan tlawakgo amakgapitsin, natlawa pi nialh nakapaxkiyaw. Kawiliw akgtum liʼakxilhtit. Chatum tala nialh lakapastaka pi nakinkamakgtayayan nakaxakayaw kPukgalhtawakga, wa xlakata max sitsiniyaw. Pero komo kajwatiya nalakapastakaw tuku nitlan tlawalh, tlakg natsukuyaw sitsiyaw chu nialh katipaxkiw. ¿Chuna titaxtumaw? Komo chuna, kalakapastakwi pi Jehová akxilha tuku nitlan tlawayaw akinin chu tuku nitlan tlawakgo amakgapitsin, pero maski chuna kimputumkan chuntiya kinkapaxkiyan. Wa xlakata, talakaskin nachuna natlawayaw chu kajwatiya naʼakxilhaw tuku tlan tlawakgo amakgapitsin. Komo naliskujaw xlakata nakapaxkiyaw kinatalankan tlakg nakatalakatsuwiniyaw (Filip. 2:1, 2).

9. ¿Tuku tlakg xlakaskinka xwanit nema Pablo katsokgnanilh filipenses?

⁹ Pablo katsokgnanilh kstalaninanin Cristo xalak Filipos pi wa xtlawakgolh «tuku tlakg xlakaskinka» (Filip. 1:10). Tuku tlakg xlakaskinka xwanit wa natamasantujli xtukuwani Dios, nakgantaxtu xtalakaskin, naʼanan takaksni chu makxtum xtawilalh congregación (Mat. 6:9, 10; Juan 13:35). Akxni wa uma tlakg xlakaskinka akxilhaw kkilatamatkan, limasiyayaw pi paxkiyaw Jehová.

10. ¿Tuku kilitlawatkan xlakata Jehová xaʼakgstitum nakinkaʼakxilhan?

¹⁰ Pablo nachuna lichuwinalh pi «xa’akgstitum nalata[mayaw]». Uma ni kilhchanima pi nialh nakgalhiyaw talakgalhin. Akinin nila litaxtuyaw chuna la Jehová, tiku ni kgalhi talakgalhin. Pero kxlakatin Jehová xaʼakgstitum nalitaxtuyaw komo natlawayaw putum tuku matlaniyaw xlakata tlakg napaxkiyaw chu wa natlawayaw tuku tlakg xlakaskinka. Pulaktum la nalimasiyayaw tapaxkit, wa naliskujaw xlakata nikxni nakamakgchakgxniyaw amakgapitsin.

11. ¿Tuku xlakata ni nakamakgchakgxniyaw amakgapitsin?

¹¹ Limapakgsin xlakata nikxni nakamakgchakgxniyaw amakgapitsin ni kaj takgaman. Tuku lilakgastananaw, chuna la lhakgananaw chu asta kintaskujutkan max nakamakgchakgxnikgo amakgapitsin. Max ni tlawayaw tuku nitlan, pero max nitlan katikitaxtulh komo tuku nalaksakaw amakgapitsin nitlan naʼakxilhkgo chu nakamakgchakgxni. Jesús lichuwinalh pi tlakg tlan xwa komo xkinkapixchiwakakan akgtum lanka chiwix chu xkinkamakankan kpupunu nixawa komo namakgchakgxniyaw chatum xlakskujni (Mat. 18:6).

12. ¿Tuku kinkamasiyaniyan tuku tlawakgolh akgtum tamakgaxtokgat tiku precursores xwankgonit?

¹² Kaʼakxilhwi tuku tlawakgolh akgtum tamakgaxtokgat tiku precursores xwankgonit xlakata ni nakamakgchakgxnikgo amakgapitsin. Kcongregación niku xtamakxtumikgo, xwilakgolh akgtum tamakgaxtokgat tiku nina makgas la xtamunukgonit chu kstakkgonit kʼakgtum familia niku lhuwa tuku ni xmastakan talakaskin natlawaya. Umakgolh natalan xlakpuwankgo pi kstalaninanin Cristo ni xliʼanatkan kcine, chu nipara xliʼakxilhatkan akgtum película. Wa xlakata, nitlan akxilhkgolh akxni katsikgolh pi precursores xʼakxilhkgonit akgtum película. Xlakata uma tuku lalh, precursores lakkaxwilikgolh ni naʼankgo kcine asta akxni umakgolh natalan tiku aku xtamunukgonit, xlistakyawakgolh Biblia xtalakapastaknikan chu xkatsinikgolh  tuku tlan chu tuku nitlan (Heb. 5:14). Chuna limasiyakgolh pi xtapaxkitkan xaxlikana xwanit chu ni kaj xman xlichuwinankgo (Rom. 14:19-21; 1 Juan 3:18).

13. ¿La xtlawaw pi chatum tala xtlawalh akgtum talakgalhin?

¹³ Nachuna tlan nakamakgchakgxniyaw amakgapitsin komo nakamatlawiputunaw tuku nitlan. Kaʼakxilhwi la chuna xlalh. Kalilakpuwaw pi chatum tiku limakgalhtawakgemaka Biblia lu liskujli xlakata nialh nawa kuchu. Chu liwana lakpuwanit pi nipara tsinu nawa kuchu. Ni makgas kilhtamaku lhuwa talakgpalit tlawa chu tamunu. Akgtum kilhtamaku, chatum tala kawani pi xla chu amakgapitsi natalan kaʼankgolh kxchik. Chu maski ni matlawiputun akgtum talakgalhin, wani pi kawalh tsinu kuchu chu wani: «Tamununitata chu kgalhiyata xtamakgtay Jehová. Kalakapastakti pi pulaktum xtawakat espíritu santo wa namachokgoya tuku nitlan tlawaputuna. Wa xlakata komo namachokgoya tuku tlawaputuna ni lhuwa kuchu katiwa». Ni talakaskin nalichuwinanaw tuku nakitaxtu komo tiku aku tamununit nakgaxmata uma nixatlan tastakyaw.

14. ¿La kinkamakgtayayan tamakxtumit namakgantaxtiyaw xtastakyaw Filipenses 1:10?

¹⁴ Pulaklhuwa la kinkamakgtayayan tamakxtumit xlakata namakgantaxtiyaw tastakyaw nema wi kFilipenses 1:10. Pulana, kinkamalakapastakayan tuku Jehová tlakg xlakaskinka akxilha. Xlipulaktiy, kinkamasiyaniyan nalilatamayaw tuku katsiniyaw  chu ni natlawayaw talakgalhin. Chu xlipulaktutu, kinkamasiyaniyan la nalimasiyayaw tapaxkit chu natlawayaw tuku tlan (Heb. 10:24, 25). Akxni natalan kinkawanikgoyan lakwan tachuwin, tlakg kapaxkiyaw chu nachuna paxkiyaw Dios. Komo xliputum kinakujkan kapaxkiyaw Jehová chu kinatalankan, nitu natlawayaw xlakata namakgchakgxniyaw chatum tala.

15. ¿Tuku kilhchanima kgalhikan «xaʼakgstitum tatlaw»?

¹⁵ Pablo tasaskinilh Jehová pi tiku xalak Filipos xkgalhikgolh «xaʼakgstitum tatlaw» (Filip. 1:11). Liwana katsiyaw pi uma xaʼakgstitum tatlaw xmakgtanuma xtapaxkit nema xkgalhinikgo Jehová chu xkachikin. Nachuna xtalakaskin nakalitachuwinankgo amakgapitsin xlakata la xkanajlanikgo Jesús chu xlakata xatlan takgalhkgalhin. Nachuna, Pablo wa pi xmaxkgakgenankgo la «xkgakganat kkakilhtamaku» (Filip. 2:15). Uma lu tlan liʼakxilhtit, xlakata Jesús wa pi kstalaninanin xlitaxtukgo «xkgakganat xalak kakilhtamaku» (Mat. 5:14-16). Nachuna kawanilh pi xkaputsakgolh latamanin tiku kstalaninanin xlitaxtukgolh chu kawanilh pi nalichuwinankgo xpalakata «kxlikalanka katiyatni» (Hech. 1:8; Mat. 28:18-20). Kgalhiyaw «xaʼakgstitum tatlaw» akxni lu liskujaw uma lu xlakaskinka taskujut.

16. ¿La limasiya Filipenses 1:12-14 pi tlan namaxkgakgenanaw maski natitaxtuyaw tuku tuwa? (Kaʼakxilhti xmakni revista).

¹⁶ Maski katuwa tuku natitaxtuyaw, tlan namaxkgakgenanaw la xkgakganat. Min kilhtamaku tuku tlawa pi nila nalichuwinanaw Dios, alistalh tlan kitaxtu. Wa uma tuku titaxtulh apóstol Pablo. Akxni katsokgnanilh filipenses, xlakgachinukanit kʼakgtum chiki kRoma. Pero maski chuna, xla chuntiya kalitachuwinalh  tuku xla Dios tiku xkuentajtlawamakgolh chu tiku xlakgapaxialhnankgo. Xliʼakxilhtit kamakgtayalh natalan ni napekuankgo chu kamakgpuwantinilh chuntiya «xlichuwinankgolh xtachuwin Dios» (kalikgalhtawakga Filipenses 1:12-14; 4:22).

17. Kalichuwinanti akgtum liʼakxilhtit xlakata la tlan lichuwinankan Dios maski tuwa tuku titaxtumaw.

¹⁷ Lhuwa natalan chuna la Pablo tlan nalimasiyakgo pi ni pekuankgo. Lamakgolh kkachikin niku ni mastakan talakaskin nalichuwinankan Dios niku lhuwa tsamakan chu kʼakgatunu chiki, wa xlakata putsakgo la natlawakgo (Mat. 10:16-20). Kʼakgtum kachikin, chatum superintendente xla circuito kawanilh natalan pi xlichuwinankgolh Dios «anta niku wilakgolh»: xtalilakgapasnikan, tiku lakatsu katawilakgolh, tiku kataʼankgo kʼescuela, tiku kataskujkgo chu amakgapitsin. Kaj akgtiy kata titaxtulh, uma congregaciones xalak uma circuito lu lakapala stakli. Max akinin kgalhiyaw talakaskin nalichuwinanaw Dios. Maski chuna, wi tuku xlakaskinka katsiniyaw xlakata umakgolh natalan: kaputsaw la tlakg nalichuwinanaw Dios, chu kalipawaw pi Jehová nakinkamaxkiyan litliwakga nema namaklakaskinaw xlakata natayaniyaw tuku tuwa natitaxtuyaw (Filip. 2:13).

18. ¿Tuku lakkaxwilinitaw natlawayaw?

¹⁸ Kʼuma xakatuwa kilhtamaku, kalakkaxwiliw namakgantaxtiyaw tastakyaw nema Pablo katsokgnanilh filipenses. Kakatsiw tuku tlakg xlakaskinka, kaliskujwi xlakata ni natlawayaw tuku nitlan, ni kakamakgchakgxniw amakgapitsin chu katlawaw tuku xaʼakgstitum. Chuna, kintapaxkitkan tlakg nastaka chu namalankiyaw xapaxkina kinTlatkan, Jehová.