ARTÍCULO NEMA NATALIKGALHTAWAKGA 32
Kataktujuw chu kalimasiyaw pi ni putum matlaniyaw
«Kalimasiya pi ni putum matlaniya kxlakatin miDios» (MIQ. 6:8).
TAKILHTLIN 31 Akxtum katapi Jehová
TUKU NATALICHUWINAN *
1. ¿Tuku wa David xlakata la Jehová limasiya pi taktuju?
¿XLIKANA tlan nawanaw pi Jehová taktuju? Chuna, David wa: «Wix nakimaxkiya miʼescudo xla lakgtaxtut, chu xlakata taktujuya wa tuku tlawa pi lanka nakwan» (2 Sam. 22:36; Sal. 18:35). Akxni tsokgli umakgolh tachuwin, max David xlakapastakma akxni palakachuwina Samuel kilalh kxchik xlakata nalaksaka tiku mapakgsina xʼama litaxtu kʼIsrael. David xlikgalhtsayan xkamanan Jesé xwanit chu maski wa tiku tlakg xaʼaktsujku xlitaxtu, Jehová laksakli xlakata xlakgxokgo xtawi mapakgsina Saúl (1 Sam. 16:1, 10-13).
2. ¿Tuku nalichuwinanaw kʼuma artículo?
2 David nachuna xlakpuwan tuku tsokgli chatum salmista xlakata Jehová: «Xla takilhputa xlakata na’akxilha lata tu anama nak akgapun y nak katiyatni. Xla nak pokgxni maki ti pobre, [...] xlakata [...] nakatawili mapakgsinanin» (Sal. 113:6-8, Salmos Ixtatlincan ti Talipawan Dios, SXP). Kʼuma artículo nalichuwinanaw pulaklhuwa la limasiyalh Jehová pi taktujut chu naʼakxilhaw tuku kinkamasiyaniyan. Alistalh, naʼakxilhaw tuku kinkamasiyaniyan xliʼakxilhtit mapakgsina Saúl, palakachuwina Daniel chu la limasiyalh Jesús pi ni putum xmatlani.
¿TUKU KINKAMASIYANIYAN XLIʼAKXILHTIT JEHOVÁ?
3. ¿La kinkalikatsiniyan Jehová chu tuku limasiya uma?
3 Chuna la kalikatsini Jehová xlakskujnin tiku kgalhikgo talakgalhin limasiya pi xla taktuju. Ni kajwatiya makgamakglhtinan kintakakninkan, wata na xʼamigos kinkaliʼakxilhan (Sal. 25:14). Tlan talalinaw xlakata xla pulana makamastalh xKgawasa xpalakata kintalakgalhinkan. ¡Lu limasiyalh xtalakgalhaman!
4. ¿Tuku kinkamaxkinitan Jehová chu tuku xlakata?
4 Kaʼakxilhwi atanu tuku limasiya pi Jehová taktuju. Akxni kinkamalakatsukin tlan xtitlawalh pi ni kiʼakstukan xlaksakwi tuku natlawayaw. Pero nichuna tlawalh. Kinkatlawan chuna la xla chu tlawalh pi kiʼakstukan xlaksakwi tuku natlawayaw. Maski xla tlakg lanka nixawa akinin, xla lakaskin pi kaskujnaniw xlakata paxkiyaw chu xlakata katsiyaw pi akxni kgalhakgaxmataw tlan kinkakitaxtuniyan (Deut. 10:12; Is. 48:17, 18). Lu paxtikatsiniyaw Jehová xlakata lu taktuju.
Jesús akxtum katawi kʼakgapun 144,000, chu kaʼakxilhmakgo lhuwa ángeles. Makgapitsi ángeles ankgo kKatiyatni xlakata namakgantaxtikgo tuku kalakgayawakanit. Jehová kamaxkinit limapakgsin putum tiku tasiyakgo kʼuma dibujo (Kaʼakxilhti párrafo 5).
5. ¿La kinkamasiyaniyan Jehová xlakata nataktujuyaw? (Kaʼakxilhti xmakni revista).
5 Jehová kinkamasiyaniyan la nataktujuyaw xlakata la kalikatsini tuku kamalakatsukinit. Maski xla wa tiku tlakg kgalhi liskgalala xlikalanka kakilhtamaku, masta talakaskin namakgtayakan. Akgtum liʼakxilhtit, maxkilh talakaskin xKgawasa pi xmakgtayalh akxni malakatsukilh putum tuku anan (Prov. 8:27-30; Col. 1:15, 16). Chu maski Jehová kgalhi putum litliwakga, kamaxki limapakgsin amakgapitsin. Akgtum liʼakxilhtit, lakgayawalh Jesús xlakata Mapakgsina xlitaxtulh kxTamapakgsin chu na nakamaxki tsinu limapakgsin 144,000 latamanin tiku natamapakgsinankgo Jesús (Luc. 12:32). Masiyanilh Jesús xlakata Mapakgsina chu xaPuxku Sacerdote nalitaxtu (Heb. 5:8, 9). Na kamasiyani tiku natamapakgsinankgo xKgawasa, pero akxni nakamaxki taskujut ni katikatsiputulh putum tuku natlawakgo. Wata nakalipawan pi natlawakgo xtalakaskin (Apoc. 5:10).
Akxni kamasiyaniyaw amakgapitsin chu kalakgayawayaw taskujut, stalaniyaw xliʼakxilhtit Jehová (Kaʼakxilhti párrafos 6 chu 7). *
6, 7. ¿La tlan nastalanikgo xliʼakxilhtit kinTlatkan xalak akgapun tiku kgalhikgo limapakgsin?
6 Maski kinTlatkan xalak akgapun ni maklakaskin tamakgtay xla kamaxki limapakgsin amakgapitsin, akinin tlakg chuna kilitlawatkan. Akgtum liʼakxilhtit, ¿la tlan nachuna natlawakgo tiku pulalinkgo familias chu lakgkgolotsin xalak congregación? Nakalakgayawakgo taskujut amakgapitsin chu ni nakatsiputunkgo putum tuku natlawakgo. Komo chuna natlawakgo, ni kajwatiya katitlawakgolh pi namakgantaxtikgo taskujut, wata nakamasiyanikgo amakgapitsin, chu nakamakgtayakgo nakatsikgo pi tlan taskujut natlawakgo (Is. 41:10). ¿Tuku tlakg nakatsinikgo xpalakata Jehová tiku kgalhikgo limapakgsin?
7 Biblia masiya pi Jehová lilakgaputsa tuku lakpuwankgo ángeles (1 Rey. 22:19-22). ¿La tlan nachuna nalikatsikgo natlatni? Akxni xlilat, tlan nakakgalhskinkgo xkamanankan tuku lakpuwankgo xlakata la xlitatlawat akgtum taskujut. Chu komo tlan akxilhkgo tlan natlawakgo tuku wankgo.
8. ¿La kalimasiyanilh Jehová Abrahán chu Sara pi ni lakapala sitsi?
8 Jehová na limasiya pi taktuju akxni ni lakapala sitsi. Akgtum liʼakxilhtit, xla ni lakapala kasitsini xlakskujnin akxni wi tuku ni akgatekgskgo. Kalakapastakwi akxni liwana kgaxmatnilh Abrahán akxni xla litachuwinalh xlakata la xʼamaka kamasputukan kachikin Sodoma chu Gomorra (Gén. 18:22-33). Chu kalakapastakwi tuku tlawalh akxni Sara, xpuskat Abrahán, litsilh akxni kgaxmatli pi xʼama kgalhi skgata maski xla xlina kata. Jehová ni sitsinilh, wata tlan likatsinilh (Gén. 18:10-14).
9. ¿Tuku tlan nakatsinikgo natlatni chu lakgkgolotsin xlakata xliʼakxilhtit Jehová?
9 Komo wix chatum tlat o kgolotsin litaxtuya kcongregación, ¿tuku tlan nakatsiniya xlakata xliʼakxilhtit Jehová? Kalilakpuwanti tuku tlawaya akxni tiku mapakgsiya o tiku pulalipina kgalhskinan tuku xlakata wi tuku chuna laksaka. ¿Lakapala stakyawaya? ¿O akgatekgsa tuku xlakata chuna waniman? Xlikana pi familias chu congregaciones lu tlan kakitaxtuni akxni tiku kgalhikgo limapakgsin stalanikgo xliʼakxilhtit Dios. Asta la uku lichuwinanitaw xliʼakxilhtit Jehová xlakata la taktuju. La uku kalichuwinaw xliʼakxilhtitkan tiku kalichuwinan Biblia chu kaʼakxilhwi la limasiyakgolh pi ni putum xmatlanikgo.
¿TUKU KINKAMASIYANIKGOYAN XLIʼAKXILHTITKAN AMAKGAPITSIN?
10. ¿La tlawa Jehová xlakata wi tuku nakinkamasiyaniyan?
10 Xlakata Jehová wa “Tlakg xaLanka kiMakgalhtawakgenakan”, anta kxTachuwin matsokgninalh liʼakxilhtit nema lhuwa tuku kinkamasiyanikgoyan (Is. 30:20, 21). Tlan nakalilakpuwanaw tiku kalichuwinan Biblia nema limasiyakgolh tayat nema Dios lakgati, chu la limasiyakgolh pi nila putum xmatlanikgo chu tuku kaʼakgspulalh tiku ni limasiyakgolh uma tayat (Sal. 37:37; 1 Cor. 10:11).
11. ¿Tuku kinkamasiyaniyan nixatlan xliʼakxilhtit Saúl?
11 Kalilakpuwaw tuku akgspulalh mapakgsina Saúl. Akxni kgawasaku xwanit, limasiyalh pi nila putum xmatlani chu xmakgkatsi pi nitu xlitaxtu asta tuwa makgkatsilh namakglhtinan tlakg xlakaskinka taskujut (1 Sam. 9:21; 10:20-22). Pero ni makgas kilhtamaku titaxtulh lata tsukulh mapakgsinan, lanka tsukuka makgkatsikan chu asta tlawalh tuku ni xlakgchan natlawa. Akgtum kilhtamaku, nialh kgalhkgalhiputulh asta akxni xchilh palakachuwina Samuel. Ni limasiyalh pi ni putum xmatlani chu ni lipawa pi Jehová xʼama makgtaya xkachikin, wata tlawalh tamakamastan maski ni wa xlakgchan chuna natlawa. Wa xlakata, Jehová lakgmakgalh chu alistalh nialh mapakgsina litaxtulh (1 Sam. 13:8-14). Lu tlan kitaxtu akxni katsiniyaw xlakata uma liʼakxilhtit, chu ni natlawayaw tuku ni kinkalakgchanan.
12. ¿Tuku lu xatlan liʼakxilhtit kinkawilinin Daniel?
12 Palakachuwina Daniel kinkawilinin lu xatlan liʼakxilhtit, nichuna la mapakgsina Saúl. Putum kxlatamat limasiyalh pi xtaktuju chu limasiyalh pi ni putum xmatlani akxni putsalh pi wa xpulalilh Jehová. Akgtum liʼakxilhtit, akxni Dios maklakaskilh xlakata xwa tuku xkilhchanima xtamanaxnat Nabucodonosor, Daniel ni lakpuwa pi wa xʼakstu chuna xtlawanit, wata limasiyalh pi ni putum xmatlani chu wa malankilh Jehová (Dan. 2:26-28). Uma kinkamasiyaniyan pi komo namastayaw akgtum taʼakgchuwin nema natalan nalakgatikgo o xlakata tlan kinkakitaxtuniyan akxni lichuwinanaw Dios, wa Jehová tiku kilimalankitkan. Kalitayaw pi nila putum matlaniyaw chu kakatsiw pi nila tuku xtlawaw komo ni wa xkinkamakgtayan (Filip. 4:13). Komo chuna natlawayaw nalimasiyayaw pi stalaniyaw xliʼakxilhtit Jesús. Kaʼakxilhwi tuku xlakata chuna wanaw.
13. ¿Tuku kinkamasiyaniyan xtachuwin Jesús nema talhkatawilanit kJuan 5:19, 30?
13 Maski Jesús wa xKgawasa Dios tiku ni xkgalhi talakgalhin, putum kilhtamaku lipawa Jehová (kalikgalhtawakga Juan 5:19, 30). Nikxni lakpuwa namakglhti limapakgsin nema kgalhi xTlat xala kʼakgapun. Filipenses 2:6 wan pi Jesús «nikxni lakpuwa namakglhti tuku lakgchan Dios chu xtachuna xlitaxtuputulh». Xkatsi la xlilhuwa limapakgsin xkgalhi, xmaxki kakni xTlat chu xkgalhakgaxmata.
Jesús xlakgapasa chu nikxni lakatsalalh xlimapakgsin xTlat (Kaʼakxilhti párrafo 14).
14. ¿Tuku tlawalh Jesús akxni skinika pi xtlawalh tuku ni wa xlakgchan natlawa?
14 Kalilakpuwaw tuku tlawalh Jesús akxni xtsekan Santiago chu Juan, skinilh pi xlakgkgawasan xtawilakgolh kxpaxtunin anta kxTamapakgsin. Jesús kgalhtinalh pi kajwatiya xTlat xalak akgapun lakgchan nalaksaka tiku tlan nakgalhi uma talakgalhaman (Mat. 20:20-23). Chuna limasiyalh pi ni xlakatsala xTlat. Limasiyalh pi ni putum xmatlani chu nikxni lakatsalalh tuku xlimapakgsinit Jehová (Juan 12:49). ¿La tlan nastalaniyaw lu xatlan xliʼakxilhtit?
¿La tlan nastalaniyaw xatlan xliʼakxilhtit Jesús xlakata la limasiyalh pi ni putum xmatlani? (Kaʼakxilhti párrafos 15 chu 16). *
15, 16. ¿La tlan nalilatamayaw limapakgsin nema lichuwinan 1 Corintios 4:6?
15 Limasiyayaw pi ni putum matlaniyaw chuna la Jesús akxni kgalhakgaxmataw limapakgsin nema lichuwinan 1 Corintios 4:6 niku wan: «Ni xlilat namalakatsaliyatit tuku tatsokgnit». Wa xlakata, akxni wi tiku nakinkaskiniyan akgtum tastakyaw, nikxni kawaniw tuku kiʼakstukan lakpuwanaw, chu ni kawaniw tuku pulana namin kkintalakapastaknikan. Wata kawaniw tuku lichuwinan xtastakyaw Biblia chu kilikgalhtawakgakan. Chuna nalimasiyayaw pi ni putum matlaniyaw, xlakata katsiyaw pi nila tlawayaw tuku ni kinkalakgchanan chu pi xtastakyaw Jehová tlakg tlan nixawa tastakyaw nema akinin xmastaw (Apoc. 15:3, 4).
16 Chuna la akxilhnitaw, akxni taktujuyaw chu limasiyayaw pi ni putum matlaniyaw, malankiyaw Jehová. La uku naʼakxilhaw pi umakgolh laktlan tayat na kinkamakgtayayan napaxuwayaw chu tlan nakatalalinaw amakgapitsin.
TLAN KITAXTU AKXNI TAKTUJUYAW CHU LIMASIYAYAW PI NI PUTUM MATLANIYAW
17. ¿Tuku xlakata paxuwakgo tiku taktujukgo chu katsikgo pi ni putum matlanikgo?
17 Komo taktujuyaw chu limasiyayaw pi ni putum matlaniyaw, uma natlawa pi napaxuwayaw. ¿Tuku xlakata? Xlakata akxni katsiyaw pi nila putum matlaniyaw, napaxtikatsiniyaw tamakgtay nema nakinkamaxkikanan. Kalakapastakwi akxni Jesús kamapaksalh kgalhakaw tiku xkgalhikgo lepra. Kajwatiya chatum taspitli xlakata napaxtikatsini pi xmapaksanit. Uma chixku xkatsi pi nila xʼakstu xpaksli, wa xlakata paxtikatsinilh chu malankilh Dios (Luc. 17:11-19).
18. Chuna la wan Romanos 12:10, ¿la kinkamakgtayayan tlan nakatalalinaw amakgapitsin komo taktujuyaw chu limasiyayaw pi ni putum matlaniyaw?
18 Latamanin tiku taktujukgo chu katsikgo pi ni putum matlanikgo tlan katalalinkgo amakgapitsin chu kgalhikgo laktlan amigos. ¿Tuku xlakata? Xlakata katsikgo pi amakgapitsin kgalhikgo laktlan tayat chu kalipawankgo. Nachuna, lipaxuwakgo akxni akxilhkgo pi amakgapitsin tlan kakitaxtunima la skujnanimakgo Jehová chu kawanikgo pi tlawamakgo lu tlan taskujut chu kamaxkikgo kakni (kalikgalhtawakga Romanos 12:10).
19. ¿Tuku xlakata ni lanka namakgkatsiyaw?
19 Tiku lanka makgkatsikan tuwa makgkatsi nakawani amakgapitsin pi lu tlan taskujut tlawamakgo chu kgalhkgalhikgo pi wa kakawanika laktlan tachuwin. Ankgalhin tamalakxtumikgo tuku xlakan tlawakgo chu tuku tlawakgo amakgapitsin, chu latlajaputunkgo. Xlakan putum tlawaputunkgo chu ni kamasiyaniputunkgo amakgapitsin xlakata lakpuwankgo pi kajwatiya tlan nataxtu taskujut chuna la xlakan lakpuwankgo pi tlan. Nachuna, mastakgo talakaskin pi wa nakamakgatlaja tuku kgalhiputunkgo chu la kalakgkatsalakankgo amakgapitsin (Gál. 5:26). Ni makgapala la katalalinkgo amakgapitsin. Wa xlakata, komo akxilhaw pi lanka makgkatsiyaw, katasaskiniw Jehová pi kakinkamakgtayan nalakgpaliyaw kintalakapastaknikan xlakata uma tayat ni natamakgxtakga kkinakujkan (Rom. 12:2).
20. ¿Tuku xlakata kilitaktujutkan chu nalimasiyayaw pi ni putum matlaniyaw?
20 Lu paxtikatsiniyaw Jehová xlakata kinkawiliniyan lu xatlan liʼakxilhtit xlakata xla taktuju. Tlan naʼakxilhaw la limasiya uma tayat xlakata la kalikatsini xlakskujnin, chu akinin stalaniputunaw xliʼakxilhtit. Na stalaniputunaw xliʼakxilhtitkan tiku kalichuwinan Biblia nema limasiyakgolh pi ni putum xmatlanikgo chuna la kskujnanimakgo Dios. Ankgalhin kamaxkiw kakni chu lilanka nema lakgchan Jehová (Apoc. 4:11). Komo chuna natlawayaw, tlan x’amigo nalitaxtuyaw Jehová putum kilhtamaku xlakata xla kapaxki tiku taktujukgo chu limasiyakgo pi ni putum matlanikgo.
TAKILHTLIN 123 Kakgalhakgaxmatwi xkachikin Jehová
^ párr. 5 Tiku taktuju kalimasiyani talakgalhaman amakgapitsin. Wa xlakata, tlan nawanaw pi Jehová taktuju. Kʼuma artículo naʼakxilhaw la nakinkamakgtayayan xliʼakxilhtit Jehová xlakata tlakg nataʼaktujuyaw. Na naʼakxilhaw xliʼakxilhtit mapakgsina Saúl, palakachuwina Daniel chu la limasiyalh Jesús pi ni putum xmatlani.
^ párr. 58 TUKU TASIYA KDIBUJO: Chatum kgolotsin limaxtu kilhtamaku xlakata namasiyani chatum tala kgawasa la namaklakaskin tarjeta xla niku nalichuwinankan Dios xalak congregación. Alistalh, ni katsiputun putum tuku tlawa uma tala, wata maxki talakaskin xʼakstu natlawa taskujut nema lakgayawanit.
^ párr. 62 TUKU TASIYA KDIBUJO: Chatum tala puskat kgalhskin chatum kgolotsin komo tlan namakglhtinan akgtum invitación xlakata naʼan niku natamakgaxtokgkan nema natlawakan kʼakgtum pusikulan. Kgolotsin ni wani tuku lakpuwan, wata masiyani xtastakyaw Biblia.
