1. ¿Tuku talakgalhaman kgalhiyaw?

AKGTUM lanka talakgalhaman pi makgtapakgsiyaw kxcongregación Jehová. Putum akinin kgalhiyaw takaksni chu lipaxuwayaw paraíso xaʼespiritual. Pero ¿tuku tlan natlawayaw chatunu akinin kcongregación?

2. ¿Tuku liʼakxilhtit maklakaskilh apóstol Pablo kcartas nema tsokgli?

² Kcartas nema tsokgli apóstol Pablo maklakaskilh akgtum liʼakxilhtit nema lhuwa tuku kinkamasiyaniyan xlakata uma. Lichuwinalh pi congregación xtachuna la makni chu tiku makgtapakgsikgo anta, xtachuna tuku litakgatsi makni (Rom. 12:4-8; 1 Cor. 12:12-27; Efes. 4:16).

3. ¿Tuku pulaktutu naʼakxilhaw kʼuma artículo?

³ Chatunu akinin lu xlakaskinka litaxtuyaw kxcongregación Jehová. Kimputumkan tlan namatliwakglhaw congregación. Maski tanu tanu kincolorkan, kinkachikinkan, kinkilhtsukutkan, maski kgalhiyaw o ni kgalhiyaw tumin chu maski kgalhtawakganitaw o ni, kimputumkan xlakaskinka litaxtuyaw kcongregación. Kʼuma artículo nalichuwinanaw pulaktutu tuku kinkamasiyaniyan liʼakxilhtit nema lichuwinalh Pablo. Pulana, naʼakxilhaw pi chatunu akinin wi tuku tlan natlawayaw kxcongregación Jehová. Xlipulaktiy, nalichuwinanaw tuku natlawayaw komo tuwa makgkatsiyaw naʼakxilhaw pi wi tuku tlan natlawayaw kcongregación. Chu xlipulaktutu, naʼakxilhaw tuku xlakata naliskujaw namakgantaxtiyaw tuku kinkalakgayawanitan Jehová.

4. ¿Tuku kinkamasiyaniyan tuku lichuwinan Romanos 12:4, 5?

⁴ Tuku pulana katsiniyaw xlakata liʼakxilhtit nema lichuwinalh Pablo wa pi chatunu akinin wi tuku tlan natlawayaw kxfamilia Jehová. Akxni maklakaskilh uma li’akxilhtit, Pablo wa: «Xlakata chuna la akgtum makni lhuwa tuku litakgatsi pero ni putum watiya taskujut tlawakgo, nachuna akinin, maski kilhuwakan, kaj akgtum makni litaxtuyaw xpalakata Cristo, pero chatunu akinin tiku litakgatsi makni latapakgsiniyaw» (Rom. 12:4, 5). Tuku xwamputun Pablo wa pi chatunu akinin tanu tanu tuku tlan natlawayaw kcongregación, pero kimputumkan xlakaskinka litaxtuyaw.

5. ¿Tuku “tamaskiwin” maxkinit Jehová congregación?

⁵ Akxni lilakpuwanaw tiku wi tuku tlan tlawakgo kcongregación, max tunkun kalakapastakaw tiku pulalinkgo (1 Tes. 5:12; Heb. 13:17). Xlikana pi Jehová maklakaskinit Cristo xlakata nakalaksaka lakchixkuwin tiku litaxtukgo la “akgtum tamaskiwin” (Efes. 4:8). Uma na kakilhchanima natalan tiku makgtapakgsikgo Lakgkgolotsin tiku Pulalinkgo xtatayananin Jehová, tiku makgtapakgsikgo kComités de Sucursal, superintendentes de circuito, tiku kamakgalhtawakgekgo tiku tlakg nalichuwinankgo Dios, lakgkgolotsin xalak congregación chu siervos ministeriales. Putum umakgolh natalan kalilaksakkanit espíritu santo xlakata nakakuentajtlawakgo xborregos Jehová chu namatliwakglhkgo congregación (1 Ped. 5:2, 3).

6. Chuna la wan 1 Tesalonicenses 2:6-8, ¿tuku liskujkgo natlawakgo natalan tiku kalilaksakkanit espíritu santo?

⁶ Natalan kalilaksakkan espíritu santo xlakata natlawakgo tanu tanu taskujut. Xtachuna la makan, tantun chu atanu tuku litakgatsi makni tlawakgo taskujut nema makgtaya putuminika makni, natalan tiku wi tuku lakgayakgo kcongregación na tlawakgo taskujut nema makgtaya putuminika congregación. Ni putsakgo pi amakgapitsin nakamaxkikgo kakni, wata liskujkgo xlakata nakamatliwakglhkgo chu nakamakgpuwantinikgo xnatalankan (kalikgalhtawakga 1 Tesalonicenses 2:6-8). Lu paxtikatsiniyaw Jehová xlakata kcongregación wilakgolh natalan tiku tliwakga kgalhikgo xtakanajlakan chu wa pulana wilikgo tuku maklakaskinkgo amakgapitsin.

7. ¿Tuku tasikulunalin lipaxuwakgo precursores chu misioneros?

⁷ Max kkincongregacionkan wilakgolh misioneros, precursores especiales o precursores regulares. Kxlikalanka katiyatni wilakgolh natalan tiku lichuwinankgo Dios putum kilhtamaku chu liskujkgo nakamakgtayakgo latamanin xlakata kstalaninanin Cristo nawankgo. Chu lhuwa tiku kamakgtayakgonit xlakata chuna natlawakgo. Maski umakgolh natalan ni lhuwa tuku kgalhikgo, Jehová kamaxkinit akgtum latamat nema lu lipaxuwakgo (Mar. 10:29, 30). ¡Lu tlan limakgkatsiyaw pi kkincongregacionkan wilakgolh umakgolh natalan!

8. ¿Tuku xlakata Jehová lu xlakaskinka kaʼakxilha tiku lichuwinankgo xtachuwin?

⁸ ¿Kajwatiya natalan tiku wi tuku lakgayakgo kcongregación chu tiku skujnanimakgolh Jehová putum kilhtamaku tlan wi tuku natlawakgo kcongregación? Nichuna. Chatunu natalan lu xlakaskinka litaxtu kxlakatin Jehová chu kcongregación (Rom. 10:15; 1 Cor. 3:6-9). Uma chuna xlakata putum congregación liskujkgo xlakata nakamakgtayakgo latamanin kstalaninanin Cristo nalitaxtukgo (Mat. 28:19, 20; 1 Tim. 2:4). Putum tiku lichuwiankgo Dios, maski tamununita o nina, liskujkgo xlakata uma taskujut wa tuku tlakg xlakaskinka nalitaxtu kxlatamatkan (Mat. 24:14).

9. ¿Tuku xlakata xlakaskinka kaʼakxilhaw kinatalankan lakpuskatin?

 ⁹ ¿Tuku tlan nawanaw xlakata natalan lakpuskatin? Jehová wi tuku lu xlakaskinka kalakgayawanit kcongregación. Xla lu xlakaskinka kaʼakxilha lakpuskatin tiku makgaxtokgkgo, tiku kgalhikgo kamanan, tiku nikgonita xchixkukan chu laktsuman tiku nina makgaxtokgkgo chu ni makgxtakgkgo Jehová. Biblia kalichuwinan xatlan xliʼakxilhtitkan lakpuskatin tiku makgapaxuwakgolh Dios xlakata limasiyakgolh liskgalala, takanajla, tapaxuwan, limasiyakgolh pi ni xpekuankgo, xatapaxuwan tuku xmastakgo chu xtlawakgo tuku tlan (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Kcongregaciones wilakgolh natalan lakpuskatin tiku limasiyakgo umakgolh tayat. Lu paxtikatsiniyaw Jehová xlakata kinkatawilakgon umakgolh natalan.

10. ¿Tuku xlakata xlakaskinka kaʼakxilhaw natalan tiku linkgoya kata?

¹⁰ Na akgtum tasikulunalin liʼakxilhaw pi wilakgolh lhuwa natalan tiku linkgoya kata. Makgapitsi putum kilhtamaku skujnanikgonit Jehová chu ni makgxtakgkgonit. Max makgapitsin nina makgas lakgapaskgonit tuku xaxlikana. Max titaxtumakgo tuku tuwa xlakata linkgoya kata chu nialh lhuwa tuku tlan tlawakgo kcongregación chu la lichuwinankgo Dios. Maski chuna, tlawakgo putum tuku matlanikgo xlakata nalichuwinankgo Dios chu namaklakaskinkgo xlitliwakgakan xlakata nakamakgpuwantinikgo chu nakamasiyanikgo amakgapitsin. ¡Lhuwa tuku kinkamasiyaniyan xlakata tuku titaxtukgonit! Xlikana pi Jehová lu xlakaskinka kaʼakxilha chu akinin na xlakaskinka kakxilhaw (Prov. 16:31).

11, 12. ¿La makgpuwantiniyan wix xliʼakxilhtitkan kamanan xalak congregación?

¹¹ Na kakalichuwinaw kamanan. Chuna la stakkgo titaxtukgo lhuwa taʼakglhuwit kʼuma kakilhtamaku niku akgchipanit Akgskgawini chu xtalakapastakni (1 Juan 5:19). Pero lu kinkamakgpuwantiniyan akxni kaʼakxilhaw pi mastakgo xtakgalhtinkan ktamakxtumit chu akxni lichuwinankgo Dios, chu akxni katsiyaw pi ni pekuankgo akxni kgalhmakgtayakgo xtakanajlakan.  Kamanan, lu xlakaskinka litaxtuyatit kxcongregación Jehová (Sal. 8:2).

¹² Makgapitsin kinatalankan tuwa makgkatsikgo naʼakgatekgskgo pi wi tuku tlan natlawakgo kcongregación. ¿Tuku tlan nakinkamakgtayayan naʼakxilhaw pi chatunu akinin wi tuku tlan natlawayaw kcongregación? Kaʼakxilhwi.

13, 14. ¿Tuku xlakata max makgapitsin nalakpuwankgo pi nitu litaxtukgo kcongregación?

¹³ Xlipulaktiy tuku kinkamasiyaniyan liʼakxilhtit nema lichuwinalh Pablo kinkamalakpuwaniyan taʼakglhuwit nema lhuwa tiku kgalhikgo la uku, xlakata tuwa makgkatsikgo nakanajlakgo pi xlakaskinka litaxtukgo kcongregación. Pablo tsokgli: «Lapi xwa [tantun]: “Sampi ni makan nkit, ni wa ktapakgsiniy ntiyatliwa,” ¿[wa] xpalakata, ni katilitapakgsinilh ntiyatliwa? Chi lapi xwa ntakgen: “Sampi ni lakgastapu nkit, ni wa ktapakgsiniy ntiyatliwa,” ¿[wa] xpalakata, ni katilitapakgsinilh ntiyatliwa?» (1 Cor. 12:15, 16). ¿Tuku kinkamasiyaniyan umakgolh tachuwin?

¹⁴ Komo natsukuyaw tamalakxtumiyaw tuku tlawayaw chu tuku tlawakgo amakgapitsin natalan xalak congregación, max ni katiʼakxilhwi pi xlakaskinka litaxtuyaw. Makgapitsi natalan lu tlan makgalhtawakgenankgo, lu tlan tuku lakkaxwilikgo chu lu tlan pulalinankgo. Chu max nalakpuwanaw pi akinin nila chuna tlawayaw. Uma limasiya pi taktujuyaw chu katsiyaw pi ni putum matlaniyaw (Filip. 2:3). Pero kuenta katlawaw. Komo putum kilhtamaku kajwatiya natamalakxtumiyaw tuku tlawayaw chu tuku tlawakgo amakgapitsin, nakinkamaxlajwaniyan. Chuna la wa Pablo, max asta nalakpuwanaw pi nitu tlawayaw kcongregación. ¿Tuku tlan nakinkamakgtayayan nichuna nalakpuwanaw?

15. Chuna la wan 1 Corintios 12:4-11, ¿la kiliʼakxilhatkan tuku tlan tlawayaw?

¹⁵ Kalilakpuwaw uma: kxapulana siglo, Jehová kamaxkilh xʼespíritu santo makgapitsi kstalaninanin Cristo xlakata xtlawakgolh tuku nila xtamakanajli, pero ni putum watiya  tuku xtlawakgo (kalikgalhtawakga 1 Corintios 12:4-11). Maski Jehová tlawalh pi kstalaninanin Cristo tanu tanu tuku tlan xtlawakgolh, putum xlakaskinka xlitaxtukgo. Xlikana pi la uku akinin nila tlawayaw tuku nila tamakanajli, pero ni talakgpali la kinkaʼakxilhan Jehová. Max ni watiya tuku tlan tlawayaw, pero kimputumkan xlakaskinka litaxtuyaw kxlakatin Jehová.

16. ¿Tuku xtastakyaw Pablo kilistalanitkan?

¹⁶ Ni katamalakxtumiw tuku tlan tlawayaw chu tuku tlawakgo amakgapitsin, wata kastalaniw xtastakyaw Pablo: «Pero chatunu chatunu kuenta katlawalh tuku tlawa, chu chuna nalipaxuwa tuku xla tlawanit, chu nikxni katitamalakxtumilh tuku tlawakgo amakgapitsin» (Gál. 6:4).

17. ¿La nakinkamakgtayayan komo nastalaniyaw xtastakyaw Pablo?

¹⁷ Komo nastalaniyaw xtastakyaw Pablo chu nalakputsananiyaw tuku tlawayaw, max natsukuyaw akxilhaw pi wi tuku tlan tlawayaw nema amakgapitsin nila chuna tlawakgo. Akgtum liʼakxilhtit, max chatum kgolotsin ni lu tlan masiya akxni akgchuwinan, pero lu tlan kamakgalhtawakge latamanin. O max ni lu tlan tuku lakkaxwili chuna la amakgapitsin lakgkgolotsin xalak congregación, pero max lilakgapaskan pi lu xapaxkina chu natalan putsakgo xlakata naskinikgo tastakyaw xalak Biblia. O max lilakgapaskan pi tlan kamakgamakglhtinan amakgapitsin (Heb. 13:2, 16). Akxni nakatsiyaw tuku tlan tlawayaw, naʼakxilhaw pi wi tuku xlakata nalipaxuwayaw xlakata wi tuku tlan tlawayaw kcongregación. Chu uma natlawa pi ni nakalakgsitsilakaniyaw tuku tlan tlawakgo amakgapitsi.

18. ¿La tlakg tlan makgalhtawakgenanin nawanaw?

¹⁸ Maski tanu tanu tuku tlawayaw kcongregación, kimputumkan kililakkaxwilitkan xlakata tlakg tlan naskujnaniyaw Dios chu namakgalhtawakgenanaw. Xlakata uma, Jehová maklakaskin xkachikin xlakata nakinkamasiyaniyan. Akgtum liʼakxilhtit, ktamakxtumit xla itat semana kinkamasiyanikanan la tlakg tlan nalichuwinanaw Dios. ¿Tlawamaw chuna la kinkamasiyanikanan?

19. ¿Tuku tlan natlawayaw xlakata tlan naʼanaw kʼEscuela xla Tiku lichuwinankgo xTamapakgsin Dios?

¹⁹ Atanu niku kinkamasiyanikanan wa kʼEscuela xla Tiku lichuwinankgo xTamapakgsin Dios, niku tlan naʼankgo natalan lakchixkuwin chu lakpuskatin tiku skujnanimakgolh Dios putum kilhtamaku chu kgalhikgo 23 asta 65 kata. ¿Lakpuwanaw pi nikxni katiʼaw? Ni katlawaw akgtum lista tuku xlakata nila naʼanaw, wata katlawaw akgtum lista niku nawan tuku xlakata amputunaw. Chu alistalh katlawaw tuku nakinkamakgtayayan tlan namakgantaxtiyaw. Jehová nakinkamakgtayayan chu komo naliskujaw, tuku xtasiya pi nila xʼamaw makgantaxtiyaw tlan natlawayaw.

20. ¿Tuku kinkamasiyaniyan Romanos 12:6-8?

²⁰ Xlipulaktutu tuku kinkamasiyaniyan liʼakxilhtit nema lichuwinalh Pablo talichuwinan kRomanos 12:6-8 (kalikgalhtawakga). Unu, Pablo lichuwinampara pi putum tiku xalak congregación tanu tanu tuku tlan tlawayaw. Pero la uku lichuwinan pi chatunu chatunu xlimaklakaskinat tuku tlan tlawa xlakata nakamakgpuwantini chu nakamatliwakglha tiku xalak congregación.

21, 22. ¿Tuku kinkamasiyaniyan tuku titaxtukgolh Robert chu Felice?

²¹ Kaʼakxilhwi tuku titaxtulh chatum tala kgolotsin tiku nalimapakuwiyaw Robert. Akxni kskujma alakatanu país, malakgachaka kBetel xalak xpaís. Maski wanika pi xlakgpalimaka ni xlakata wi tuku nitlan xtlawanit, xla wa: «Akglhuwa papaʼ lu nitlan kmakgkatsilh,  xakmakgkatsi pi nitu xaklitaxtu. Milh kilhtamaku akxni xakmakgkatsi pi xaktaxtuputun kBetel». ¿Tuku makgtayalh napaxuwapara? Chatum kgolotsin malakapastakalh pi tuku Jehová kinkamasiyaninitan ktaskujut nema xkinkalakgayawanitan, kinkamakgtayayan tlakg tlan natlawayaw taskujut nema lakgayaw la uku. Robert akgatekgsli pi nialh xlilakapastakat xwanit tuku xmakgxtakgnit, wata wa xʼakxilhli tuku tlan xtlawalh la uku.

²² Nachuna titaxtulh tala Felice Epíscopo. Xla chu xpuskat kilakgolh kʼGalaad kkata 1956 chu skujkgolh la superintendente de circuito anta kBolivia. Kkata 1964 kgalhikgolh chatum skgata. Felice wan: «Lu tuwa kmakgkatsiw nakmakgxtakgaw taskujut nema xaktlawayaw. Tlan nakwan pi kmakgatsankgalh akgtum kata xlakata nitlan xakmakgkatsi. Pero xlakata Jehová kimakgtayalh, klakgpalilh tuku xaklakpuwan chu kliskujli xlakata tlan tlat xaklitaxtulh». ¿Nachuna makgkatsiyaw la Robert o Felice? ¿Taxlajwaninitaw xlakata nialh kgalhiyaw taskujut nema xkgalhiyaw xapulana? Komo chuna, tlakg napaxuwayaw komo wa nalilakpuwanaw tuku tlan tlawayaw la uku xlakata naskujnaniyaw Jehová chu kinatalankan. Kamaklakaskiw tuku tlan tlawayaw xlakata nakamakgtayayaw amakgapitsin. Chu napaxuwayaw akxni nakamakgpuwantiniyaw natalan xalak congregación.

23. 1) ¿Tuku nalimaxtuyaw kilhtamaku? 2) ¿Tuku naʼakxilhaw kʼatanu artículo?

²³ Jehová lu xlakaskinka kaʼakxilha chatunu chatunu xlakskujnin. Xla lakaskin pi kamakgkatsiw pi makgtapakgsiyaw kxfamilia. Komo nalimaxtuyaw kilhtamaku xlakata nalilakpuwanaw tuku tlan tlawayaw xlakata nakamakgpuwantiniyaw kinatalankan chu naliskujaw xlakata namakgantaxtiyaw, uma nakinkamakgtayayan naʼakxilhaw pi wi tuku tlan tlawayaw kcongregación. Pero ¿la kaʼakxilhaw amakgapitsin? ¿La tlan nalimasiyayaw pi xlakaskinka kaliʼakxilhaw? Kʼatanu artículo naʼakxilhaw uma tuku lu xlakaskinka.