1. Chuna la wan 1 Tesalonicenses 5:11, ¿tuku taskujut makgtlawayaw kimputumkan?

 ¿MAKGTAYANANIT mincongregación niku tlawakan o kaxtlawakan akgtum Pukgalhtawakga? Komo chuna, max lakapastaka xapulana tamakxtumit. Minaku lu xpaxtikatsinima Jehová. Max lu xpaxuwapat chu asta max tuwa makgkatsi nakilhtliya xapulana takilhtlin. Xlikana, xalakstlan kimPukgalhtawakgakan malankikgo Jehová. Pero anan atanu tuku tlakg kinkamakgapaxuwayan chu tlakg malanki Jehová nixawa makgtlawakan akgtum chiki: nakamakgtayakan tiku tamakxtumikgo kʼumakgolh chiki. Wa uma tuku apóstol Pablo xlichuwinama akxni tsokgli tuku wan texto niku takilhtinit uma artículo, 1 Tesalonicenses 5:11 (kalikgalhtawakga).

2. ¿Tuku naʼakxilhaw kʼuma artículo?

² Xlakata tlan nakamatliwakglhaw kinatalankan, tlan naʼakxilhaw la tlawalh apóstol Pablo. Xla xʼakgatekgsa tuku xtitaxtukgo amakgapitsin. Kʼuma artículo naʼakxilhaw la kamakgtayalh xnatalan natayanikgo tuku tuwa xtitaxtumakgo, nakatakgalhikgo takaksni amakgapitsin chu nakamatliwakglhni xtakanajlakan. Kaʼakxilhwi la tlan nastalaniyaw xliʼakxilhtit (1 Cor. 11:1).

3. ¿Tuku tlakg xlakaskinka xliʼakxilha Pablo kxlatamat?

³ Pablo lu xkapaxki xnatalan. Chu, xlakata xla lhuwa tuku xtitaxtunit, xkalakgalhaman chu xkaʼakgatekgsni tiku tuwa tuku  xtitaxtumakgo. Akgtum kilhtamaku, ni xkgalhi tumin chu talakaskilh naskuja xlakata nakgalhi tuku xmaklakaskin chu tuku xmaklakaskinkgo xnatalan (Hech. 20:34). Xtlawa laktsu chiki xla xuwa. Akxni chalh kCorinto akxtum kataskujli Áquila chu Priscila, tiku na watiya taskujut xkgalhikgo. Pero «akgatunu Sábado» xkalitachuwinan Dios judíos chu griegos. Chu, akxni minkgolh Silas chu Timoteo, «Pablo limaxtulh putum xkilhtamaku xlakata nalichuwinan xtachuwin Dios» (Hech. 18:2-5). Pablo liwana xkatsi pi tuku tlakg xlakaskinka xliwanat xwanit kxlatamat wa naskujnani Jehová. Xla lu xaskujni xwanit chu tlan xkamakgpuwantini xnatalan xlakata ni xmastakgolh talakaskin pi tuku tuwa titaxtukan klatamat chu tuku maklakaskin familia nialh xkamaxkilh talakaskin kuenta xtlawakgolh tuku tlakg xlakaskinka, putum tuku makgtanuma kkintakakninkan (Filip. 1:10).

4. ¿La kamakgtayakgolh Pablo chu Timoteo xnatalan xlakata natayanikgo taputsastalanit?

⁴ Akxni nina makgas la xtawilanit congregación xalak Tesalónica, tsukuka kaputsastalanikan umakgolh kstalaninanin Cristo. Akxni latamanin tiku nitlan xlikatsikgo ni tekgskgolh Pablo chu Silas, «kalinkgolh kxlakatin mapakgsinanin» makgapitsi natalan. Xwankgo: «Putum umakgolh lakatakikgo xlimapakgsin César» (Hech. 17:6, 7). ¿Lilakpuwanaw la xpekuankgonit umakgolh xalaksasti kstalaninanin Cristo akxni akxilhkgolh pi latamanin nitlan xkalikatsinikgo? Uma max xtlawalh pi nialh xatapaxuwan kskujnanikgolh Jehová. Pero Pablo ni xlakaskin pi chuna xlalh. Maski xla chu Silas nialh anta xwilakgolh, lakkaxwilikgolh pi xasasti congregación tlan xtawilalh. Alistalh, Pablo kamalakapastakalh natalan xalak Tesalónica: «Kkamalakgachanin Timoteo, […] xlakata xkamatliwakglhni chu tlan xkamamakgkatsinin xpalakata mintakanajlakan» (1 Tes. 3:2, 3). Max Timoteo xputsastalanikanit akxni xlama kListra. X’akxilhnit la Pablo kamatliwakglhli kstalaninanin Cristo xalak uma kachikin chu la Jehová kamakgtayalh. Wa xlakata tlan xkawani xalaksasti xnatalan pi Jehová x’ama kamakgtaya (Hech. 14:8, 19-22; Heb. 12:2).

5. ¿La makgtayalh Bryant tuku tlawalh chatum kgolotsin?

⁵ ¿Tuku atanu tlawapa Pablo xlakata nakamatliwakglha xnatalan? Akxni xla chu Bernabé taspitkgolh kListra, k’Iconio chu k’Antioquía, «kalaksakkgolh makgapitsi lakchixkuwin xlakata lakgkgolotsin xlitaxtukgolh kʼakgatunu congregación» (Hech. 14:21-23). Xlikana pi, umakgolh lakchixkuwin lu kamakgpuwantinikgolh congregaciones, chuna la tlawakgo lakgkgolotsin xala uku. Kalichuwinaw tuku wan chatum tala tiku wanikan Bryant: «Akxni kmakgatsilh 15 kata, kintlat kinkaʼakgxtakgwilin chu kintse tamakxtuka kcongregación. Xakmakgkatsi pi kiʼakstu xakwi». ¿Tuku makgtayalh akxni chuna xtitaxtuma? Xla wan: «Chatum kgolotsin tiku wanikan Tony xkintachuwinan ktamakxtumit chu atanu kilhtamaku. Xkilitachuwinan tuku tuwa xtitaxtukgonit makgapitsi natalan chu la ni xmakgatsankgakgonit tapaxuwan. Xkilikgalhtawakgani Salmo 27:10 chu makglhuwa kilitachuwinalh xlakata Ezequías, tiku ni makgxtakgli Jehová maski xtlat nitlan liʼakxilhtit wilinilh». ¿La makgtayalh Bryant uma? Xla wan: «Xlakata Tony kimakgpuwantinilh, titaxtulh kilhtamaku ktsukulh skujnani Jehová putum kilhtamaku, chu uma lu kimakgapaxuwanit». Lakgkgolotsin, kuenta katlawatit natalan, tiku chuna la Bryant, maklakaskinkgo «akgtum tlan tachuwin» nema tlan mamakgkatsininan (Prov. 12:25).

6. ¿La maklakaskilh Pablo tuku titaxtukgolh xlakskujnin Dios xala makgasa xlakata nakamakgpuwantini amakgapitsin?

 ⁶ Pablo kamalakapastakalh xnatalan pi lhuwa natalan tiku litaxtukgo la akgtum «lanka puklhni» xtayanikgonit tuku lu tuwa xlakata Jehová xkamaxkinit litliwakga (Heb. 12:1). Xkatsi pi tuku xtitaxtukgonit xlakskujnin Dios xala makgasa tiku ni makgxtakgkgolh xʼama kamakgtaya xlakata ni xpekuankgolh chu kajwatiya xlilakpuwankgolh «xkachikin xastakna Dios» (Heb. 12:22). Chu akinin na tlan nakinkamakgtayakgoyan. ¿Tiku ni litamakgtayanit akxni likgalhtawakga la Jehová kamakgtayalh Gedeón, Barac, David, Samuel chu amakgapitsin? (Heb. 11:32-35). Chu akinin na litamakgtayayaw xliʼakxilhtitkan natalan xala uku. Anta niku pulalinkan kintaskujutkan chanit lhuwa xcartas kinatalankan tiku makgkatsikgo pi tatliwakglhnit xtakanajlakan akxni likgalhtawakgakgonit xbiografía chatum tala xala uku tiku ni namakgxtakga Jehová.

7. ¿Tuku kinkamasiyaniyan xtastakyaw Pablo nema tatekgsa kRomanos 14:19-21?

⁷ Atanu la tlan nakamakgtayayaw kinatalankan wa akxni liskujaw pi kaʼanalh takaksni kcongregación. Ni kamastaw talakaskin pi xlakata tanu tanu tuku lakpuwanaw nakinkamapapitsiyan chu ni fuerza kawaw pi chuna kalalh tuku lakpuwanaw komo ni lakatsala akgtum tastakyaw xalak Biblia. Kalichuwinaw tuku lalh kcongregación xalak Roma, niku xwilakgolh kstalaninanin Cristo tiku judíos xwankgonit chu xalak atanu kachikin. Xlakata Limapakgsin nema xmaxkikanit Moisés nialh xkgalhi xtapalh, tlantiya xwakan kaxatukawa liwat (Mar. 7:19). Makgapitsi judíos tiku kstalaninanin Cristo xwankgonit xwakgo kaxatukawa liwat. Pero amakgapitsi tiku na judíos wankgonit uma nitlan xʼakxilhkgo. Chu uma tlawalh pi xmapapitsilh congregación. Pablo lichuwinalh pi lu xlakaskinka xwanit naʼanan takaksni chu kawanilh: «Tlakg tlan ni nawaya liway o nawaya vino o natlawaya katuwa tuku nalimaʼakgchakgxniya mintala» (kalikgalhtawakga Romanos 14:19-21). Tuku kawanilh kamakgtayalh xnatalan naʼakxilhkgo pi umakgolh taʼakglhuwit nitlan tuku xʼama katlawani chu nachuna congregación. Xla na lakgpalilh xtayat xlakata ni nakamakgchakgxni amakgapitsin (1 Cor. 9:19-22). Chuna la Pablo, akinin na tlan nakamatliwakglhaw amakgapitsin chu namakgtayananaw naʼanan takaksni komo ni nalitalatlawananaw tuku kaj akinin lakgatiyaw.

8. ¿Tuku tlawalh Pablo akxni wi tuku xmapapitsiputun congregación?

⁸ Pablo wililh akgtum lu tlan liʼakxilhtit xlakata la makgtayanankan naʼanan takaksni akxni amakgapitsin tanu tanu tuku lakpuwankgo. Kcongregación xalak pulana siglo xʼanankgo tiku xafuerza xwankgo pi lakchixkuwin tiku ni judíos xwankgonit chu kstalanina Cristo xlitaxtukgo xkaʼakstilichukunika kxuwa xlichixkukan, max xlakata latamanin nitu xkawanilh (Gál. 6:12). Maski Pablo nitlan xʼakxilha uma, nitu wa pi nichuna xlitatlawat xwanit, wata tataktujut tlawalh pi xlilh uma kxlakatinkan apóstoles chu lakgkgolotsin xalak Jerusalén (Hech. 15:1, 2). Chuna la lakkaxtlawalh taʼakglhuwit, makgtayanalh pi xʼanalh takaksni kcongregación (Hech. 15:30, 31).

9. ¿Tuku tlan natlawayaw xlakata nastalaniyaw xliʼakxilhtit Pablo?

⁹ Komo naʼanan akgtum taʼakglhuwit, tlan namakgtayananaw kaʼanalh takaksni komo naputsayaw xtamakgtaykan natalan tiku Jehová kalaksaknit  xlakata nakuentajtlawakgo congregación. Makglhuwa, anta kkilikgalhtawakgakan chu tuku kinkawaniyan xkachikin Dios pi kilitlawatkan natekgsaw tapulalit nema takilhtinit kBiblia. Komo nastalaniyaw umakgolh tastakyaw chu ni wa tuku akinin lakpuwanaw, namakgtayananaw xlakata naʼanan takaksni kcongregación.

10. ¿Tuku atanu tlawapa Pablo xlakata xʼanalh takaksni kcongregación?

¹⁰ Pablo atanu la makgtayanalh xlakata xʼanalh takaksni. Lichuwinalh xalaktlan xtayatkan natalan, chu ni wa tuku nitlan xtlawakgo. Akgtum liʼakxilhtit, akxni nina xmasputu tuku katsokgnanilh natalan xalak Roma, kalichuwinalh lhuwa natalan, chu makglhuwa lichuwinalh tuku tlan xtlawakgo. ¿La tlan nastalaniyaw xliʼakxilhtit? Nakalitachuwinanaw amakgapitsin laktlan tayat nema kgalhikgo natalan. Komo chuna natlawayaw, namakgtayananaw xlakata natalan tlakg nalapaxkikgo chu tlakg tlan nalatalalinkgo.

11. ¿La tlan namakgtayananaw xlakata naʼanampara takaksni akxni tawila taʼakglhuwit?

¹¹ Max namin kilhtamaku asta natalan tiku tliwakga takanajla kgalhikgo ni lakxtum tuku katilakpuwankgolh o asta nakatakgalhikgo taʼakglhuwit amakgapitsin. Wa uma tuku kaʼakgspulalh Pablo chu Bernabé, tiku lu tlan xlatalalinkgo. Tuku lalimakglhuwikgolh wa komo xlinkgolh Marcos o ni anta niku xʼamakgo lichuwinankgo Dios. ¿Tuku kitaxtulh? Biblia wan: «Xlakata uma, lu lakilhnikgolh, wa xlakata xlakan tapapitsikgolh» (Hech. 15:37-39). Pero Pablo, Bernabé chu Marcos lakkaxtlawakgolh xtaʼakglhuwitkan. Chuna limasiyakgolh pi tuku tlakg xlakaskinka xʼakxilhkgo wa pi xʼanalh takaksni chu makxtum xtawi congregación. Titaxtulh kilhtamaku, Pablo tlan kalichuwinalh Bernabé chu Marcos (1 Cor. 9:6; Col. 4:10). Akinin na tlan nakatalakkaxtlawayaw taʼakglhuwit nema katakgalhiyaw natalan xalak congregación chu wa naʼakxilhaw laktlan xtayatkan. Chuna namakgtayananaw xlakata makxtum natawilayaw chu naʼanan takaksni (Efes. 4:3).

12. ¿Tuku tuwa titaxtukgo kinatalankan?

¹² Na kamakgtayayaw kinatalankan akxni kamatliwakglhniyaw xtakanajlakan. Makgapitsi tayanikgo la kalikgalhkgamanankgo xfamiliajkan tiku ni xtatayananin Jehová, tiku kataskujkgo o kataʼankgo kʼescuela. Amakgapitsi lu tatatlakgo o tayanimakgo tuku nitlan katlawanikanit. Chu amakgapitsi max makgasa la tamunukgonit chu kgalhkgalhimakgo pi kachilh lisputni. Putum uma tlawa pi naliʼakxilhkan xtakanajla chatum kstalanina Cristo. Tiku xmakgtapakgsikgo kcongregación xalak pulana siglo na watiya tuku titaxtukgolh. ¿Tuku tlawalh Pablo xlakata xkamatliwakglhli?

13. ¿La kamakgtayalh Pablo tiku xkalikgalhkgamanankan xlakata kstalaninanin Cristo xlitaxtukgo?

¹³ Pablo maklakaskilh Biblia xlakata nakamatliwakglha xnatalan. Akgtum liʼakxilhtit, max kstalaninanin Cristo tiku judío xwankgonit ni xkatsikgo la nakgalhtinankgo akxni tiku xalak xfamilia xkawanikgo pi takanajla nema xkgalhikgo judíos wa tlakg tlan xwanit. Max carta nema Pablo katsokgnanilh hebreos lu kamatliwakglhli (Heb. 1:5, 6; 2:2, 3; 9:24, 25). Umakgolh kstalaninanin Cristo tlan xmaklakaskinkgolh tuku xlimalakpuwaninan Pablo xlakata xlimasiyakgolh pi tiku nitlan xkalichuwinankgo ni xlikana tuku xwankgo. ¿Chu akinin? ¿La tlan nakamakgtayayaw natalan tiku kalikgalhkgamanankan? Nakamasiyaniyaw la tlan namaklakaskinkgo kilikgalhtawakgakan xlakata nakgalhmakgtayakgo tuku kanajlakgo. Akgtum liʼakxilhtit, chuna la folletos ¿Es la  vida obra de un Creador? chu El origen de la vida. Cinco cuestiones dignas de análisis tlan nakamakgtayayaw laktsuman chu lakgkgawasan natekgskgo tuku tlan nalimasiyakgo tuku xlakata kanajlakgo pi latamat malakatsukika.

14. ¿Tuku tlawalh Pablo maski ni lhuwa kilhtamaku xkgalhi xlakata xlichuwinan Dios chu xmasiya?

¹⁴ Pablo kamakgpuwantinilh xnatalan nalimasiyakgo tapaxkit akxni tlawakgo «xalaktlan tatlaw» (Heb. 10:24). Ni kajwatiya kalimakgtayalh xtachuwin, na wi tuku tlawalh. Akgtum liʼakxilhtit, akxni kstalaninanin Cristo xalak Judea titaxtukgolh tatsinksni, Pablo na lakgayawaka xlakata nakalini tuku xmaklakaskinkgo (Hech. 11:27-30). Maski Pablo, ni lhuwa kilhtamaku xkgalhi xlakata xlichuwinan Dios chu xmasiya, ankgalhin xputsa la tlan nakamakgtaya natalan tiku ni lhuwa tumin xkgalhikgo (Gál. 2:10). Chuna xkamakgtaya natalan xlakata xlipawankgolh pi Jehová xʼama kakuentajtlawa. La uku, na kamatliwakglhniyaw xtakanajlakan kinatalankan akxni limaklakaskinaw kinkilhtamakujkan, kilitliwakgakan chu tuku katsiniyaw tlawayaw akxni makgtayananaw akxni wi tuku masputunan chu akxni ankgalhin mastayaw kintuminkan nema maklakaskinkan xlakata natatlawa taskujut kxlikalanka katiyatni. Chuna, kamakgtayayaw kinatalankan nalipawankgo pi Jehová nikxni katikamakgxtakgli.

15, 16. ¿La nakalikatsiniyaw tiku taxlajwanikgonit xtakanajlakan?

¹⁵ Pablo ni lakpuwa pi nialh xʼama kamakgtaya tiku xtaxlajwanikgonit. Wata kalimasiyanilh talakgalhaman chu xatapaxuwan katachuwinalh (Heb. 6:9; 10:39). Akgtum liʼakxilhtit, tuku katsokgnanilh Hebreos, makglhuwa maklakaskilh tachuwin «akinin», chu ni «wixin», xlakata nalimasiya pi xla na xtalakaskin nalilatama tastakyaw nema xmasta (Heb. 2:1, 3). Chuna la Pablo, akinin na ni kalakgmakganaw tiku taxlajwanikgonit xtakanajlakan. Wata kalimasiyaniyaw pi  kalilakgaputsayaw xlakata nakamatliwakglhaw chu nakalimasiyaniyaw tapaxkit. Kalakapastakwi pi tuku wanaw lu xlakaskinka, pero na lu xlakaskinka nalimasiyayaw talakgalhaman chu tapaxkit akxni chuwinanaw.

¹⁶ Pablo kamalakapastakalh xnatalan pi Jehová ni xpatsankganit tuku xtlawakgonit (Heb. 10:32-34). Akinin na tlan chuna natlawayaw akxni namakgtayayaw chatum tala tiku taxlajwaninit xtakanajla. Tlan nawaniyaw pi kakinkalitachuwinan la lakgapasli xaxlikana o namakgtayayaw xlakata nalakapastaka akxni Jehová makgtayalh. Kamaklakaskiw uma kilhtamaku xlakata nawaniyaw pi Jehová ni patsankga tapaxkit nema limasiyalh makgasa chu nikxni katimakgxtakgli (Heb. 6:10; 13:6). Umakgolh takgalhchuwin tlan nakamakgtaya kinatalankan xlakata chuntiya naskujnaniputunkgo Jehová.

17. ¿La tlakg tlan nakatsiniyaw kamatliwakglhaw amakgapitsin?

¹⁷ Chuna la titaxtu kilhtamaku chatum tiku katsini tlawa chiki liwana katsinitilha la natlawa xtaskujut. Akinin na tlan nakatsinitilhayaw la nakamatliwakglhaw amakgapitsin. Kakalitachuwinaw kinatalankan la tayanikgolh amakgapitsi xlakskujnin Jehová xlakata tlan nakamatliwakglhaw chu tlan natayanikgo taputsan nema natitaxtukgo. Kamakgtayanaw xlakata naʼanan takaksni akxni wanaw tuku tlan tlawakgo amakgapitsin, kakuentajtlawaw akxni kalipekua natawila chu kamakgtayanaw kaʼanampa akxni anan taʼakglhuwit. Chu chuntiya kamatliwakglhwi xtakanajlakan kinatalankan akxni kalitachuwinanaw tuku lu xlakaskinka lichuwinan Biblia, kalakputsaw la tlan nakamakgtayayaw chu kakamakgtayaw tiku taxlajwanikgonit xtakanajlakan.

18. ¿Tuku lakkaxwilinita wix natlawaya?

¹⁸ Tiku makgtlawakgo Pukgalhtawakga lu tlan limakgkatsikgo chu paxuwakgo. Akinin na tlan chuna namakgkatsiyaw akxni makgtayananaw xlakata natatliwakglha xtakanajlakan kinatalankan. Tuku tlan kitaxtu akxni chuna makgtayananaw putum kilhtamaku makgapala, nixtachuna akxni makgtlawakan akgtum chiki nema lakxla chuna la titaxtu kilhtamaku. Wa xlakata kaliskujwi nalilatamayaw tachuwin nema tatekgsa k1 Tesalonicenses 5:11: «Chuntiya kalamatliwakglhtit chu kalamakgtayatit chatunu chatunu».