1. ¿Tuku xlakata Jesús skinilh Jehová pi xkakuentajtlawalh kstalaninanin?

 KATSISNI akxni nina xniy, Jesús wi tuku lu xlakaskinka skinilh xTlat xalak akgapun, pi xkakuentajtlawalh kstalaninanin (Juan 17:15, 20). Xlikana pi Jehová ankgalhin kakuentajtlawanit xlakskujnin. Pero Jesús liwana xkatsi pi Satanás lu nitlan tuku xʼama katlawani kstalaninanin, wa xlakata xʼamakgo maklakaskinkgo xtamakgtay Jehová.

2. Chuna la wan Salmo 33:18-20, ¿tuku xlakata ni kilipekuanitkan taʼakglhuwit?

² Xkakilhtamaku Satanás wi tuku lu xafuerza kamatlawiputun xaxlikana kstalaninanin Cristo. Taʼakglhuwit max tlan nakinkamakglhtiyan litliwakga chu asta nataliʼakxilha komo makgxtakgaw Jehová o ni. Chuna la naʼakxilhaw kʼuma artículo, ni anan tuku nalipekuanaw. Jehová ankgalhin kinkakuentajtlawayan, uma wamputun, pi ankgalhin akxilha tuku titaxtuyaw chu ankgalhin kinkamakgtayaputunan. Nalichuwinanaw pulaktiy tuku lichuwinan Biblia nema limasiya pi «Jehová kaʼakxilhma tiku pekuanikgo» (kalikgalhtawakga Salmo 33:18-20).

3. ¿Tuku kilhtamaku max namakgkatsiyaw pi kiʼakstukan wilaw?

³ Maski makgtapakgsiyaw kʼakgtum lanka familia xaʼespiritual, max min kilhtamaku makgkatsiyaw pi kiʼakstukan wilaw. Akgtum liʼakxilhtit, max kamanan makgkatsikgo pi xʼakstukan wilakgo akxni talakaskin nawankgo tuku kanajlakgo xlakatinkan xcompañeros o akxni kamalakgachakan kʼatanu congregación. Max makgapitsi akinin lu lipuwamaw chu makgkatsiyaw pi nitu litaxtuyaw, chu max lakpuwanaw pi ni anan tiku kinkamakgtayayan. Max niti litachuwinamputunaw tuku makgkatsiyaw xlakata  lakpuwanaw pi niti kintikaʼakgatekgsnin. Chu max namin kilhtamaku nalakpuwanaw pi niti kinkalilakgaputsayan. Komo makgkatsiyaw pi kiʼakstukan wilaw uma max natlawa pi namakgkatsiyaw pi nila tuku tlawayaw chu lu nalakgaputsayaw. Pero Jehová ni lakaskin chuna namakgkatsiyaw. ¿Tuku xlakata chuna wanaw?

4. ¿Tuku xlakata palakachuwina Elías wa «kiʼakstu kwi»?

⁴ Kalichuwinaw xliʼakxilhtit palakachuwina Elías. Uma kskujni Dios tiku ni xmakgatsankganani xtsalapula liwaka 40 kilhtamaku xlakata Jezabel xmakgniputun (1 Rey. 19:1-9). Tatsekgli kʼakgtum lhuku niku wanilh Jehová: «kiʼakstu kwi» (1 Rey. 19:10). Xlakpuwan pi kajwatiya xla palakachuwina xwanit kʼuma país, pero nichuna xwanit. Abdías xkamakgtayanit liwaka 100 palakachuwinanin xlakata Jezabel ni xkamakgnilh (1 Rey. 18:7, 13). Pero ¿tuku xlakata Elías xmakgkatsi pi xʼakstu xwi? Max xlakpuwan pi xkamakgnikanit putum palakachuwinanin tiku Abdías xkamakgtayanit. O max xmakgkatsi pi xʼakstu xwi akxni akxilhli pi niti tatayalh Jehová akxni limasiyalh ksipi Carmelo pi wa xaxlikana Dios xwanit. Atanu tuku xlakata chuna xmakgkatsima wa xlakata max xlakpuwan pi niti xkatsi tuku xtitaxtuma o niti xlilakgaputsa. Biblia ni liwana kinkawaniyan putum tuku xtitaxtuma, pero tuku katsiyaw wa pi Jehová xʼakgatekgsa tuku xlakata Elías xmakgkatsi pi xʼakstu xwi chu liwana xkatsi la tlan xmakgtayalh.

5. ¿Tuku tlawalh Jehová xlakata nalimasiyani Elías pi ni xʼakstu xwi?

⁵ Jehová pulaklhuwa tuku tlawalh xlakata namakgtaya Elías. Akgtum liʼakxilhtit, makgpuwantinilh nalichuwinan tuku xtitaxtuma. Makgtiy kgalhskilh: «¿Tuku tlawapat unu Elías?» (1 Rey. 19:9, 13). Chu uma makgtiy Jehová liwana kgaxmatnilh Elías putum tuku wanilh. Alistalh kgalhtilh nema limasiyanilh pi anta xwi chu pi xla chatum Dios tiku kgalhi lhuwa litliwakga. Na wanilh pi kʼIsrael chuntiya xʼanan lhuwa latamanin tiku xtatayakgo xaxlikana takaknin (1 Rey. 19:11, 12, 18). Max Elías lu tlan makgkatsilh akxni xlitachuwinanita Jehová tuku xmakgkatsi chu la Jehová kgalhtilh. Nachuna, Jehová lakgayawalh pulaklhuwa lu xlakaskinka taskujut: xlilaksakat xwanit Hazael la mapakgsina  xalak Siria, Jehú la mapakgsina xalak Israel chu Eliseo la palakachuwina (1 Rey. 19:15, 16). Akxni Jehová lakgayawalh umakgolh taskujut, makgtayalh kajwatiya nalilakpuwan tuku lu xlakaskinka chu na maxkilh xatlan xmakgtayana, Eliseo. ¿Tuku tlan natlawayaw komo makgkatsiyaw pi kiʼakstukan wilaw chu maklakaskinaw xtamakgtay Jehová?

6. ¿Tuku tlan nawaniyaw Jehová akxni makgkatsiyaw pi kiʼakstukan wilaw? (Salmo 62:8).

⁶ Jehová kinkamakgpuwantiniyan nawaniyaw kʼoración putum tuku makgkatsiyaw. Xla akxilha la makgkatsiyaw chu liwana kinkawaniyan pi tlan natlawaniyaw oración kaxatukawa kilhtamaku chu pi xla nakinkakgaxmatniyan (1 Tes. 5:17). Xla lu lanka xtapalh liʼakxilha akxni kakgaxmatni kskujnin (Prov. 15:8). ¿Tuku tlan nawaniyaw Jehová akxni makgkatsiyaw pi kiʼakstukan wilaw? Tlan nawaniyaw putum tuku makgkatsiyaw chuna la tlawalh Elías (kalikgalhtawakga Salmo 62:8). Kalitachuwinaw tuku lilakgaputsayaw chu la makgkatsiyaw. Kaskiniw pi kakinkamakgtayan naʼakxilhaw tuku kilitlawatkan. Akgtum liʼakxilhtit, komo wix kgawasa o tsumat, ¿tuku tlan natlawaya komo makgkatsiya pi miʼakstu wila chu lu pekuana nalichuwinana xlakata Jehová anta kʼescuela? Tlan naskiniya pi kamaxkin liskgalala chu pi kamakgtayan xlakata ni napekuana akxni nalichuwinana tuku kanajlaya (Luc. 21:14, 15). ¿Chu tuku tlan natlawaya komo makgkatsiya pi nitu litaxtuya? Kaskini Jehová pi kamakgtayan xlakata natachuwinana chatum tala tiku tliwakga wi xtakanajla chu pi na kamakgtayalh uma tala naʼakgatekgsa tuku wix makgkatsiya. Ni katimakgkatsiw pi kiʼakstukan wilaw komo nawaniyaw Jehová putum tuku makgkatsiyaw, komo kuenta natlawayaw la Jehová kgalhti kioracionkan chu komo namastayaw talakaskin pi amakgapitsin nakinkamakgtayakgoyan.

7. ¿Tuku katsiniya wix xlakata tuku titaxtulh Mauricio?

⁷ Kimputumkan Jehová wi tuku lu xlakaskinka kinkalakgayawayan. Xla lanka xtapalh akxilha putum tuku tlawayaw kcongregación chu akxni lichuwinanaw Dios (Sal. 110:3). Akxni lhuwa kilitlawatkan kxtaskujut Jehová kinkamakgtayayan ni namakgkatsiyaw pi kiʼakstukan wilaw. ¿Tuku xlakata? Kaʼakxilhwi tuku titaxtulh chatum kgawasa tiku wanikan Mauricio. b Akxni nina makgas la xtamununit, chatum xʼamigo tsinu tsinu tamakgatlinilh Jehová. Xla wan: «Akxni kakxilhli pi kiʼamigo tsinu tsinu xtamakgatlinima xaxlikana, ktsukulh klilakpuwan komo akit tlan xakmakgantaxtilh tuku xakmalaknunit chu chuntiya xakmakgtapakgsilh kxfamilia Jehová. Xakmakgkatsi pi kiʼakstu xakwi chu xaklakpuwan pi niti la xkiʼakgatekgsnilh». ¿Tuku makgtayalh ni nataxlajwani? Xla wan: «Akxni tlakg xaklichuwinan Dios kimakgtayalh xlakata ni lu nakililakgaputsakan chu ni naklakpuwan pi nitu klitaxtu. Akxni akxtum xakkatalichuwinan Dios amakgapitsi natalan, lu xakpaxuwa chu nialh lu xakmakgkatsi pi kiʼakstu xakwi». Uma nachuna kitaxtu maski nila akxtum  anaw katalichuwinanaw Dios natalan. Akxni akxtum katalichuwinanaw Dios kteléfono o kcartas uma na lu kinkamatliwakglhan. ¿Tuku atanu makgtayalh Mauricio? Xla lakapastaka tuku tlawalh: «Tlakg ktsukulh kmakgtayanan kcongregación. Kliskujli xlakata liwana naklakkaxtlawa kintaʼakgchuwin chu liwana nakmasta. Xlakata uma, kmakgkatsilh xtapaxkit Jehová chu natalan».

8. ¿Tuku max namakgkatsiyaw akxni natitaxtuyaw taʼakglhuwit?

⁸ Kimputumkan katsiyaw pi nakgalhiyaw taʼakglhuwit kxaʼawatiya kilhtamaku (2 Tim. 3:1). Pero max kaj xalan nakinkalakgminan akgtum taʼakglhuwit. Max taʼakglhuwit xlakata tumin, akgtum lixkajnit tajatat, o xlakata max nani tiku lu paxkiyaw. Max uma kilhtamaku lu nalakgaputsayaw chu ni katikatsiw tuku natlawayaw, liwaka akxni makgkatsiyaw pi tanu tanu taʼakglhuwit titaxtuyaw o lhuwa taʼakglhuwit kinkalakgchinan. Pero kalakapastakwi pi Jehová katsi tuku titaxtumaw chu pi tlan natitaxtuyaw kaxatukawa taʼakglhuwit xlakata xla nakinkamakgtayayan.

9. ¿Tuku tuwa titaxtulh Job?

⁹ Kaʼakxilhwi tuku titaxtulh Job. Ni xmakgasni uma chixku pulaklhuwa taʼakglhuwit titaxtulh. Kaj akgtum kilhtamaku katsilh pi xkamakgatsankgakgonit xʼanimales, xlakskujnin chu tuku tlakg nitlan, xkamanan (Job 1:13-19). Ni makgas kilhtamaku alistalh, akxni chuntiyaku xlipuwama, chipalh akgtum lu xalixkajnit tajatat (Job 2:7). Tuku xtitaxtuma lu nitlan xwanit chu asta wa: «Lu kxkajni kilatamat, nialh klatamaputun» (Job 7:16).

10. ¿Tuku tlawalh Jehová xlakata namakgtaya Job tuku tuwa titaxtulh? (Kaʼakxilhti xmakni revista).

¹⁰ Jehová liwana xkatsi putum tuku xtitaxtuma Job. Chu xlakata xpaxki, maxkilh putum tuku xmaklakaskin xlakata natayani chu ni namakgxtakga. Jehová tachuwinalh Job chu litachuwinalh la xlilhuwa liskgalala kgalhi chu la xatapaxuwan kakuentajtlawa putum tuku malakatsukinit. Kalichuwinalh lhuwa animales nema kaks malakawaninankgo (Job 38:1, 2; 39:9, 13, 19, 27; 40:15; 41:1, 2). Nachuna, Jehová malakgachalh Elihú xlakata namakgpuwantini chu namakgoxomixi Job. Uma kgawasa tiku ni xmakgxtakgnan malakapastakalh pi Dios ankgalhin kasikulunatlawa tiku tayanikgo chu chuntiya skujnanikgo. Pero Jehová na xlakaskin pi Elihú xmaxkilh makgapitsi tastakyaw. Xatapaxuwan, Elihú makgtayalh Job naʼakgatekgsa tuku ni liwana xʼakgatekgsa, malakapastakalh pi Jehová, tiku Malakatsukilh putum kakilhtamaku, lu lanka nixawa latamanin (Job 37:14). Jehová na lakgayawalh akgtum taskujut Job: natlawa oración xpalakata kgalhtutu xʼamigos tiku xtlawakgonit tuku nitlan (Job 42:8-10). Chu la uku, ¿la kinkamakgtayayan Jehová akxni titaxtuyaw tuku tuwa?

11. ¿La kinkamakgpuwantiniyan Biblia akxni titaxtuyaw tuku tuwa?

¹¹ Jehová ni kinkatachuwinanan chuna la tachuwinalh Job. Pero maklakaskin xTachuwin, Biblia, xlakata nakinkatachuwinanan (Rom. 15:4). Kinkamatliwakglhan xlakata kinkamaxkiyan akgtum takgalhkgalhin. Kaʼakxilhwi makgapitsi tuku lichuwinan Biblia nema tlan kinkamamakgkatsiniyan akxni titaxtuyaw taʼakglhuwit. Anta kBiblia, Jehová liwana kinkawaniyan pi nipara taʼakglhuwit, «natlawa pi Dios nialh nakinkapaxkiyan» (Rom. 8:38, 39). Na kinkawaniyan pi «lakatsu katawi putum tiku kilhanimakgo», uma wamputun, pi kakgaxmatni xʼoraciones (Sal. 145:18). Jehová kinkawaniyan pi, komo nalipawanaw, tlan natayaniyaw kaxatukawa tuku tuwa natitaxtuyaw chu asta napaxuwayaw akxni patinanaw (1 Cor. 10:13; Sant. 1:2, 12). Nachuna, xTachuwin Dios  kinkamalakapastakayan pi tuku tuwa natitaxtuyaw ni katimakgapalalh nixawa latamat nema Jehová nakinkamaxkiyan (2 Cor. 4:16-18). Jehová liwana kinkamalaknuniyan pi namasputu niku lakatsuku kintaʼakglhuwitkan: Satanás chu putum tiku likatsikgo chuna la xla (Sal. 37:10). ¿Katsininita makgapitsi textos nema namakgpuwantiniyan akxni natitaxtuya tuku tuwa?

12. ¿Tuku tlan natlawayaw xlakata tlan nalitamakgtayayaw tamakgtay nema Jehová kinkamaxkiyan kxTachuwin?

¹² Jehová kgalhkgalhi pi kalismaniw nalikgalhtawakgayaw Biblia chu nalilakpuwanaw tuku likgalhtawakgayaw. Komo nalilatamayaw tuku katsiniyaw, kintakanajlakan chu la talalinaw tlakg natatliwakglha. Chu uma nakinkamakgtayayan xlakata tlan natayaniyaw. Nachuna, komo nalipawanaw xTachuwin, Jehová nakinkamaxkiyan xʼespíritu santo. Chu uma espíritu, nakinkamaxkiyan «litliwakga tuku latamanin nila kgalhikgo» xlakata tlan natayaniyaw kaxatukawa taputsan nema natitaxtuyaw (2 Cor. 4:7-10).

13. Taway nema matliwakglha kintakanajlakan nema masta «skujni xatalipaw chu xaskgalala», ¿la kinkamakgtayayan natayaniyaw?

¹³ Xlakata Jehová makgtayama, «skujni xatalipaw chu xaskgalala» kinkamaxkiyan lhuwa artículos, videos chu takilhtlin nema kinkamakgtayayan tliwakga natawila kintakanajlakan chu skgalalh natawilayaw (Mat. 24:45). Liwana kilimaklakaskinatkan putum uma tamaskiwin nema matliwakglha kintakanajlakan chu chinkgo akxni xlilat. Nina makgas, chatum tala puskat xalak Estados Unidos wa pi lu paxtikatsininan xlakata putum uma tamaskiwin. Xla wa: «Uma tipuxam kata chuna la kskujnanima Jehová makglhuwa liʼakxilhkanit kintakanajla». Uma tala lu tuwa tuku titaxtunit. Chatum chixku tiku xkgachi chu xmatlawanima xputlaw titiyalh xtata, xnatlatni nikgolh xlakata kachipalh laklixkajnit tajatat chu xla makgtiy chipanit cáncer. ¿Tuku makgtayalh natayani? Xla kinkawaniyan: «Jehová ankgalhin kinkuentajtlawanit. Taway nema matliwakglha kintakanajla nema masta skujni xatalipaw chu xaskgalala kimakgtayanit naktayani. Xlakata uma, tlan kwan chuna la Job: “¡Asta nakni nikxni nakmakgxtakga Dios!”» (Job 27:5).

14. ¿La kalimaklakaskin Jehová kinatalankan xlakata nakinkamakgtayakgoyan akxni titaxtuyaw tuku tuwa? (1 Tesalonicenses 4:9).

¹⁴ Jehová kamasiyaninit xlakskujnin nalapaxkikgo chu tlan nalamamakgkatsini chatunu chatunu akxni natitaxtukgo tuku tuwa (2 Cor. 1:3, 4; kalikgalhtawakga 1 Tesalonicenses 4:9). Kinatalankan litaxtukgo la Elihú, kinkamakgtayaputunkgoyan ni namakgxtakgaw Dios akxni  natitaxtuyaw tuku tuwa (Hech. 14:22). Chatum tala tiku wanikan Diane akxilhli uma. Akxni xchixku lu tatatlalh, congregación lu makgpuwantinilh chu makgtayalh tliwakga xtawilalh xtakanajla. Xla wan: «Lu tuwa tuku ktitaxtuw, pero putum uma kilhtamaku kakxilhwi la Jehová kinkamakgtayan chu kinkalimasiyanin tapaxkit. Congregación lu kinkamakgtayan, kinkamaxkikgon tuku xakmaklakaskinaw xlakata tlan xaktayaniw: kinkalakgapaxialhnankgon, kinkatachuwinankgon ktélefono, kinkaʼakgpixtiyakgon… Chu xlakata nila kmatlawani putlaw, putum xlakkaxwilikgo xlakata tlan xakkalh ktamakxtumit chu xakkalh lichuwinan Dios akxni xakmatlani». Akgtum lanka tasikulunalin makgtapakgsikan kʼakgtum familia xaʼespiritual niku lalimasiyanikan tapaxkit.

15. ¿Tuku xlakata liwana katsiyaw pi tlan natayaniyaw tuku tuwa titaxtuyaw?

¹⁵ Kimputumkan natitaxtuyaw tuku tuwa. Pero chuna la akxilhnitaw, ni kiʼakstukan wilaw. Chuna la chatum xapaxkina tlat, Jehová ankgalhin kinkakuentajtlawaman. Xla lakatsu kinkawilanin, chu kinkakgaxmatniputunan akxni tasaskiniyaw kakinkamakgtayan chu chuna tlawaputun (Is. 43:2). Liwana katsiyaw pi tlan natayaniyaw tuku tuwa titaxtuyaw xlakata Jehová lhuwa tuku kinkamaxkiyan xlakata natayaniyaw: oración, Biblia, lhuwa likgalhtawakga nema matliwakglha kintakanajlakan chu natalan tiku kinkalimasiyanikgoyan tapaxkit.

16. ¿Tuku kilitlawatkan xlakata Jehová chuntiya nakinkakuentajtlawayan?

¹⁶ Lu paxtikatsiniyaw pi kgalhiyaw chatum Tlat xalak akgapun tiku kinkakuentajtlawayan. «Xla makgapaxuwa kinakujkan» (Sal. 33:21). ¿La tlan nalimasiyaniyaw Jehová pi paxtikatsiniyaw pi kinkakuentajtlawayan? Liwana kamaklakaskiw putum tamakgtay nema kinkamaxkiyan. Xlakata Jehová chuntiya nakinkakuentajtlawayan, na talakaskin wi tuku natlawayaw. Talakaskin naliskujaw xlakata ankgalhin nakgalhakgaxmataw chu natlawayaw tuku xla lakgati. Komo chuna natlawayaw, xla putum kilhtamaku nakinkakuentajtlawayan (1 Ped. 3:12).