1. ¿Tuku tlawakgonita lhuwa lakkamanan la uku?

 AKGATUNU kata lhuwa lakkamanan tamunukgo. ¿Wix na aku tamunu? Komo chuna, mifamilia xaʼespiritual lu lipaxuwa, chu Jehová na lu paxuwa (Prov. 27:11). Kalilakpuwanti tuku tlawanita asta la uku. Akgtum liʼakxilhtit, makglhuwa likgalhtawakganita Biblia, max akglhuwata kata chuna tlawanita chu uma makanajlinitan pi wa xTachuwin Dios. Pero tuku tlakg xlakaskinka wa pi la uku lakgapasa chu paxkiya tiku matsokgninalh uma xasanto libro. Xlakata lu paxkiya Jehová laksakti namakamaxkiya milatamat chu natamunuya. ¡Lu tlan pi chuna tlawa!

2. ¿Tuku naʼakxilhaw kʼuma artículo?

 ² Max akxni nina xtamunuya lhuwa tuku titaxtu nema katuwa wililh mintakanajla. Pero chuna la natitaxtutilha kata atanu tuku natitaxtuparaya. Satanás natlawaputun pi kalakgmixli tapaxkit nema kgalhiniya Jehová chu katamakgatlini (Efes. 4:14). Ni kamasta talakaskin pi chuna natlawa. ¿Tuku namakgtayayan ni namakgxtakga Jehová chu namakgantaxtiya tuku malaknuninita? Talakaskin chuntiya namastakaya mintakanajla (Heb. 6:1). Kʼuma artículo naʼakxilhaw la natlawaya.

3. ¿Tuku xlitlawatkan putum kstalaninanin Cristo akxni tamunukgonita?

³ Akxni wi tiku tamunu, talakaskin nastalani xtastakyaw apóstol Pablo nema kamaxkilh kstalaninanin Cristo xalak Éfeso.  Kamakgpuwantinilh “tliwakga natawila xtakanajlakan” (Efes. 4:13). Xtachuna la komo xkawanilh «chuntiya kastaktit». Pablo tamalakxtumilh la tatliwakglhtilha kintakanajlakan chuna la staka chatum aktsu kgawasa. Natlatni lu lipaxuwakgo akxni kgalhikgo kskgatakan, pero ni putum kilhtamaku skgata katilitaxtulh. Chuna la natitaxtu kilhtamaku xlimakgxtakgat xliskgata (1 Cor. 13:11). Nachuna kitaxtu xpalakata kstalaninanin Cristo: akxni tamununitawa chuntiya natalakaskin namatliwakglhaw kintakanajlakan. Kaʼakxilhwi makgapitsi tuku tlan namakgtayayan.

4. ¿Tuku tayat nakinkamakgtayayan chuntiya namatliwakglhaw kintakanajlakan, chu tuku xlakata? (Filipenses 1:9).

⁴ Kamatliwakglhti tapaxkit nema kgalhiniya Jehová. Xlikana pi lu paxkiya Jehová. Pero uma tapaxkit tlan chuntiya nastaka. ¿La natlawaya? Apóstol Pablo lichuwinalh pulaktum, chu tekgsaw kFilipenses 1:9 (kalikgalhtawakga). Pablo skinilh Jehová pi tapaxkit nema xkgalhikgo filipenses “chuntiya tlakg xtalhuwitilhalh”. Uma wamputun pi tapaxkit nema kgalhiniyaw Dios tlan chuntiya nastaka. Pero talakaskin nalimatliwakglhaw «xatakgatsin takatsin chu xatlan talakapastakni». Uma wamputun, pi akxni nalakgapasaw Jehová, tlakg napaxkiyaw chu tlakg nalakgatiyaw xtayat chu chuna la skuja. Makgkatsiyaw pi tlakg makgapaxuwaputunaw chu ni makgalipuwamputunaw. Liskujaw xlakata nakatsiyaw tuku lakaskin natlawayaw chu lakputsayaw la natlawayaw.

5, 6. ¿Tuku atanu tlan natlawayaw xlakata napaxkiyaw Jehová?

⁵ Atanu la tlan namatliwakglhaw tapaxkit nema kgalhiniyaw Jehová wa liwana nalakgapasaw xKgawasa, tiku liwana limasiya xtayat xTlat (Heb. 1:3). Komo nalikgalhtawakgayaw pulaktati Evangelios chuna liwana nalakgapasaw Jesús. ¿Lismaninita nalikgalhtawakgaya Biblia chali chali? Komo ni chuna tlawaya, tlan namatsukiya. Akxni nalikgalhtawakgaya tuku tlawalh chu wa Jesús, kuenta katlawa la xlikatsi. Jesús ni tuwa xtalakatsuwinikan; chu asta xkachaxa laktsu kamanan (Mar. 10:13-16). Xʼapóstoles tlan xmakgkatsikgo akxni akxtum xtatawilakgo; wa xlakata xlakan ni tuwa xmakgkatsikgo nawanikgo tuku xlakpuwankgo (Mat. 16:22). Jesús chuna xlikatsi xlakata xTlat nachuna likatsi. Jehová ni tuwa talakatsuwinikan. Wa xlakata tlan tlawaniyaw oración chu tlan nawaniyaw putum tuku wi kkinakujkan. Chu liwana katsiyaw pi xla nikxni nitlan nakinkalakpuwaniyan. Xla kinkapaxkiyan chu kinkalilakgaputsayan (1 Ped. 5:7).

⁶ Jesús xkalakgalhaman latamanin. Apóstol Mateo kinkawaniyan: «Akxni kaʼakxilhli lhuwa latamanin, lu kalakgalhamalh, xlakata xtamakxutapuxtukgonit chu niti xkakuentajtlawama chuna la borregos nema ni kgalhikgo xmapuchwayaninakan» (Mat. 9:36). ¿Chu la kaʼakxilha Jehová latamanin? Akxni lichuwinalh xTlat, Jesús wa: «Ni lakaskin pi naniy maski kaj chatum kistalanina tiku xtachuna laktsu kamanan litaxtukgo» (Mat. 18:14). ¡Lu lipaxuwayaw akxni katsiyaw pi Jehová lu kinkapaxkiyan! Akxni tlakg lakgapasaw Jesús, tlakg paxkiyaw Jehová.

7. ¿Tuku xlakata tlan kitaxtu komo nakatalalipina tiku tliwakga kgalhikgo xtakanajlakan?

⁷ Anan atanu tuku tlan natlawaya xlakata tlakg napaxkiya Jehová chu nastaka mintakanajla. ¿Tuku uma? Miʼamigo nakalimaxtuya natalan tiku tliwakga xtakanajlakan. Kaʼakxilhti pi umakgolh natalan ankgalhin paxuwamakgolh. Ni lakpuwankgo pi nitlan chuna la skujnanimakgo Jehová. Kakawani pi kalitachuwinankgon tuku titaxtukgonit chuna la skujnanimakgolh Dios. Chu, akxni mililaksakat  nawan tuku lu xlakaskinka, kakatachuwinanti xlakata nakaskiniya akgtum tastakyaw. Wa xlakata Biblia liwana wan: «Tlan kitaxtu tuku tlawamaka akxni anan lhuwa stakyawananin» (Prov. 11:14).

8. ¿Tuku tlan natlawaya komo namin kilhtamaku ni liwana nakanajlaya tuku masiya Biblia?

⁸ Kalakputsanani tuku ni liwana katsiya. Chuna la akxilhwi  kpárrafo 2, Satanás natlawaputun pi ni kastakli mintakanajla. Pulaktum tuku maklakaskin wa tuku ni liwana katsiyaw. Xla lakaskin pi nialh kakanajlaw tuku masiya Biblia. Akgtum liʼakxilhtit, max wi tiku nakgaxpatniya tuku wan xlakata evolución, akgtum tamasiy nema maxkajwi xtukuwani Jehová. Max xapulana ni lu xlilakpuwana uma. Pero, xlakata uku staknitata max mimakgalhtawakgenanin masiyanikgoyan kʼescuela. Tuku wanikgoyan max tasiya pi xlikana chu makanajliputunkgoyan. Pero max nikxni lakputsanikgonit tuku limasiya pi xlikana anan chatum Malakatsukina. Kalakapastakti tuku wan Proverbios 18:17: «Tiku pulana lichuwinan tuku lanit tasiya pi xlikana tuku wan, asta akxni min atanu chu tsuku kgalhputsa». ¿Tuku tastakyaw tekgsaw kʼuma tachuwin? Pi ni putum milikanajlat tuku nawanikana kʼescuela. Wata, liwana kalakputsanani tuku wan xTachuwin Dios. Kaputsa tamakgtay kkilikgalhtawakgakan. Kakatachuwinanti natalan tiku xapulana xkanajlanikgo evolución chu kakakgalhskinti tuku kamakgtayalh nakanajlakgo pi anan chatum Malakatsukina tiku kinkapaxkiyan. b Tuku nawanikgoyan namakgtayayan nalilakpuwana tuku limasiya pi anan chatum Malakatsukina.

9. ¿Tuku katsiniya xlakata tuku titaxtulh Melissa?

⁹ Chatum tala tiku wanikan Melissa lu makgtayalh akxni lakputsananilh xlakata tamalakatsukin. c Xla wan: «Anta kʼescuela makgalhtawakgenanin masiyakgo xlakata evolución chuna la latamanin nakanajlakgo pi xlikana. Xapulana xakpekuan naklakputsanani tuku ni liwana xakkatsi. Xakpekuan tlakg naklakputsanani uma xlakata xaklakpuwan pi kintakanajla xʼama taxlajwani. Pero alistalh kkatsilh pi Jehová lakaskin liwana kakatsiw tuku xlakata wi tuku kanajlaniyaw. Klikgalhtawakgalh libro ¿Existe un Creador que se interese por nosotros? chu folletos ¿Es la vida obra de un Creador? chu El origen de la vida. Cinco cuestiones dignas de  análisis. Akxni kkalikgalhtawakgalh uma, kkatsilh pi wa tuku xakmaklakaskima. Lu nitlan pi ni chuna ktlawalh xapulana».

10, 11. ¿Tuku namakgtayayan akxni matlawiputunkana tuku nitlan? (1 Tesalonicenses 4:3, 4).

¹⁰ Kamakgatlaja tuku nitlan tlawaputuna. Xlakata kgawasaku o tsumatku wix, max makgkatsiya pi lu talakgxtumiputuna, chu max amakgapitsin natlawaputunkgo pi katlawa talakgxtumit nema ni xlitatlawat. Satanás lakaskin pi katlawa tuku nitlan tlawaputuna. ¿Tuku namakgtayayan xlakata ni natlawaya tuku matlawiputunkana? (Kalikgalhtawakga 1 Tesalonicenses 4:3, 4). Akxni natlawaniya oración Jehová, kawani la makgkatsiya chu kaskini litliwakga (Mat. 6:13). Kalakapastakti pi xla makgtayaputunan, ni kaj xlakata lakputsananiputunan (Sal. 103:13, 14). Biblia na tlan namakgtayayan. Melissa, tiku lichuwinaw kpárrafo 9, liskujli xlakata ni nalakpuwan tuku lixkajnit. Xla wan: «Ktayanilh xlakata chali chali xaklikgalhtawakga Biblia. Uma xkimalakapastaka pi kilatamat tapakgsini Jehová chu pi kskujniputun putum kilhtamaku» (Sal. 119:9).

¹¹ Ni talakaskin pi miʼakstu nalakkaxtlawaya mintaʼakglhuwit. Kakawani minatlatni tuku titaxtupat. Xlikana pi lu tuwa nakalitachuwinana minatlatni tuku ni lakaskina pi amakgapitsin nakatsikgo, pero lu xlakaskinka chuna natlawaya. Melissa lakapastaka: «Kskinilh Jehová pi xkimakgtayalh ni nakpekuan chu alistalh klitachuwinalh kintlat tuku xaktitaxtuma. Lu tlan kmakgkatsilh. Xakkatsi pi xakmakgapaxuwama Jehová».

12. ¿Tuku namakgtayayan tlan tuku nalaksaka?

¹² Kamasta talakaskin pi tastakyaw xalak Biblia napulalinan. Chuna la titaxtutilha kata, tlan nalaksaka tuku natlawaputuna. Pero la uku ni kapatsankga pi nina lhuwa tuku titaxtunita kmilatamat. ¿Tuku tlan natlawaya xlakata ni nalaktlawaya chuna la talalipina Jehová? (Prov. 22:3). Chatum tala tiku wanikan Kari lakapastaka tuku tlawalh xlakata tlakg tlan tuku nalaksaka. Akxilhli pi kstalaninanin Cristo tiku tliwakga kgalhikgo xtakanajlakan ni maklakaskinkgo akgtum limapakgsin xalak Biblia xpalakata putum tuku natitaxtukgo kxlatamatkan. Kari wan: «Xtalakaskin nakʼakgatekgsa tuku lakpuwan Jehová chu ni kaj xakstalanilh limapakgsin». Akxni nalikgalhtawakgaya Biblia, kalakpuwanti: «¿Tuku kimasiyani uma xlakata la lakpuwan Jehová? ¿Anan unu akgtum tastakyaw nema nakimakgtaya naktlawa tuku tlan? ¿Tuku nakitaxtu komo nakstalani uma tastakyaw?» (Sal. 19:7; Is. 48:17, 18). Komo nalikgalhtawakgaya Biblia chu nalilakpuwana xtastakyaw, tlakg ni tuwa katimakgkatsi nalaksaka tuku makgapaxuwa Jehová. Xlakata tlakg naʼakgatekgstilhaya, naʼakxilha pi ni talakaskin akgtum limapakgsin xlakata putum tuku naʼakgspulayan. Uma nalimasiya pi stakma mintakanajla.

13. ¿La tlan namakgtayakgoyan xalaktlan amigos? (Proverbios 13:20).

¹³ Kakatalalipi tiku paxkikgo Jehová. Chuna la akxilhwi kpárrafo 7, tiku katalalipina namakgtayakgoyan xlakata namatliwakglhtilhaya mintakanajla (kalikgalhtawakga Proverbios 13:20). Kaʼakxilhti tuku akgspulalh chatum tala tiku wanikan Sara. Nialh lu xpaxuwa chuna la kskujnanima Jehová, pero wi tuku lalh nema makgtayalh. Sara wan: «Ktekgsli amigos akxni lu xakmaklakaskima. Kiʼamiga chu akit akgatunu semana akxtum xaklikgalhtawakgayaw Makatsinina, chu chatum kimakgpuwantinilh nakmasta kintakgalhtin ktamakxtumit. Xlakata kiʼamigos lu kimakgtayakgolh, tlakg xlakaskinka kakxilhli kiʼakstu nakkgalhtawakga chu naktlawa oración. Tsinu tsinu tatliwakglhtilhalh la xaktalalin Jehová, chu ktsukupa paxuwa».

14. ¿Tuku tlawalh Julien xlakata nakgalhi laktlan amigos?

¹⁴ ¿Tuku tlan natlawayaw xlakata natekgsa laktlan amigos? Chatum tala tiku wanikan  Julien chu la uku kgolotsin litaxtu kcongregación lakapastaka: «Akxni aku xakstakma, lu tlan tiku ktsukulh kkatalalin akxni xaklichuwinan Dios. Lu xpaxuwakgo chu kimakgtayakgolh nakakxilha pi akxni naklichuwinan Dios tlan tlakg naklipaxuwa. Ktsukulh klilakpuwan nakskujnani Dios putum kilhtamaku. Na kakxilhli pi xlakata kajwatiya xakkatalalin tiku watiya kata xkgalhikgo chuna la akit, ni xakmastama talakaskin xakkatalalilh laktlan amigos. Nachuna, akxni ktanulh kBetel, na kkgalhilh laktlan amigos. Xlakan kimakgtayakgolh liwana naklaksaka tuku naklilakgastanan chu uma tlawalh pi tlakg tlan xaktalalilh Jehová».

15. ¿Tuku tastakyaw maxkilh Pablo Timoteo? (2 Timoteo 2:20-22).

¹⁵ ¿Chu komo naʼakxilha pi kcongregación wi chatum tiku komo natalalipina nitlan katikitaxtunin? Apóstol Pablo xkatsi pi anta kcongregación xla kstalaninanin Cristo xalak pulana siglo xwilakgolh latamanin tiku ni tliwakga takanajla xkgalhikgo. Wa xlakata wanilh Timoteo pi xkatamakgatlinilh (kalikgalhtawakga 2 Timoteo 2:20-22). Chuna la talalinaw kinTlatkan xalak akgapun lu xtapalh litaxtu chu lu liskujnitaw xlakata tlan natalalinaw. Wa xlakata ni lakaskinaw pi wi tiku nalaktlawa uma (Sal. 26:4).

16. ¿Tuku xlakkaxwili nema tlan xlakgchipi?

¹⁶ Kalakkaxwili tuku nalakgchipina nema namakgtayayan natatliwakglha mintakanajla. ¿Tuku umakgolh? Tuku namatliwakglha mintakanajla chu namakgtayayan tlakg tlan kstalanina Cristo nalitaxtuya (Efes. 3:16). Akgtum li’akxilhtit, akxni likgalhtawakgaya Biblia chu akxni mi’akstu kgalhtawakgaya tlan xlakkaxwili la tlakg tlan chuna xtlawa (Sal. 1:2, 3). O max tlan puntsunin natlawaniya oración Jehová xliputum minaku. Max natalakaskin tlakg kuenta natlawaya tuku nalilakgastanana chu liwana namaklakaskina minkilhtamaku (Efes. 5:15, 16). Jehová lu paxuwa akxni akxilha pi lu liskuja xlakata namatliwakglha mintakanajla.

17. ¿Tuku xlakata tlan nakitaxtuniyan komo nakamakgtayaya amakgapitsin?

¹⁷ Akxni kamakgtayaya amakgapitsin, tatliwakglha mintakanajla. Jesús wa: «Tlakg anan tapaxuwan akxni mastakan nixawa akxni makglhtinankan» (Hech. 20:35). Komo namaklakaskina minkilhtamaku chu  militliwakga xlakata nakamakgtayaya amakgapitsin, tlan nakitaxtuniyan. ¿Tuku tlan xtlawa xpalakatakan amakgapitsin? Akgtum li’akxilhtit, tlan nalakkaxwiliya xlakata nakamakgtayaya natalan tiku tatatlakgo o tiku linkgoya kata xlakata nakatamawaniya tuku maklakaskinkgo o nakamasiyaniya la namaklakaskinkgo dispositivos electrónicos. Komo wix kgawasaku chu tamununitata, tlan nalakkaxwiliya xlakata siervo ministerial nalitaxtuya, chu chuna tlan nakaskujnaniya natalan (Filip. 2:4). Na tlan nakalimasiyaniya tapaxkit tiku ni lakgapaskgo Jehová (Mat. 9:36, 37). Chu, komo matlaniya, tlan nalakkaxwiliya xlakata naskujnaniya Jehová putum kilhtamaku.

18. ¿La namakgtayayan nastaka mintakanajla komo putum kilhtamaku naskujnaniya Jehová?

¹⁸ Skujnanikan Jehová putum kilhtamaku tlan namaxkiyan talakaskin namatliwakglha mintakanajla. Komo precursor nalitaxtuya, tlan napina kʼEscuela xla Tiku lichuwinankgo xTamapakgsin Dios o kBetel, o tlan namakgtayanana niku tlawakan Pukgalhtawakga. Kaʼakxilhti tuku wan chatum precursora tiku wanikan Kaitlyn: «Akxni xaktamununita, xlakata tlan xtatliwakglhli kintakanajla lu kimakgtayalh akxtum xakkatalichuwinan Dios natalan tiku makgasata la skujnanimakgo Jehová. Xliʼakxilhtitkan kimakgpuwantinilh tlakg naklakputsanani akxni klikgalhtawakga Biblia chu tlakg tlan makgalhtawakgena naklitaxtu».

19. ¿Tuku tasikulunalin namakglhtinana komo chuntiya namatliwakglha mintakanajla?

¹⁹ Komo chuntiya namatliwakglha mintakanajla, Jehová namaxkiyan lhuwa tasikulunalin. Ni kalimaklakaskinti minkilhtamaku tuku nitu litaxtu (1 Juan 2:17). Komo nalaksaka tuku tlan ni katikgalhi taʼakglhuwit. Wata nakgalhiya tapaxuwan chu tlan nakitaxtuniyan kmilatamat (Prov. 16:3). Xatlan miliʼakxilhtit nakamakgpuwantini amakgapitsin natalan, kamanan chu natalan tiku linkgoya kata (1 Tim. 4:12). Chu tuku tlakg xlakaskinka wa pi nakgalhiya takaksni kmintalakapastakni chu tapaxuwan akxni nakatsiya pi Jehová tlan akxilhan chu pi xla miʼamigo (Prov. 23:15, 16).