1. ¿Tuku tlawa chatum lataman tiku makgxtakgnit tuku nitlan xtlawama?

 AKXNI tlawayaw tuku nitlan, lu xlakaskinka namakgxtakgaw tuku nitlan tlawamaw. Chuna la wan Biblia, lataman tiku makgxtakga tuku nitlan tlawama tsuku xkajni tuku nitlan tlawalh, lakgpali xlatamat chu liwana lakpuwan nialh natlawapara tuku nitlan tlawanit (kaʼakxilhti Glosario niku wan «makgxtakgkan tuku nitlan tlawakan»).

2. ¿Tuku xlakata putum latamanin kilikatsitkan tuku wamputun makgxtakgkan tuku nitlan tlawakan? (Nehemías 8:​9-11).

² Putum latamanin kilikatsinitkan tuku wamputun makgxtakgkan tuku nitlan tlawakan. ¿Tuku xlakata? Xlakata chali chali makglakgalhinanaw. Xlakata akinin xkamanan Adán chu Eva, putum makglakgalhinanaw chu niyaw (Rom. 3:23; 5:12). Wa xlakata talakaskin namakgxtakgaw tuku nitlan tlawamaw. Asta lakchixkuwin tiku xkgalhikgo tliwakga xtakanajlakan, chuna la apóstol Pablo, xtalakaskin xliskujkgolh xlakata ni xmakglakgalhinankgolh (Rom. 7:​21-24). Pero uma ni wamputun pi putum kilhtamaku nalilipuwanaw xlakata akinin makglakgalhinanin. Jehová lu xalakgalhamana chu lakaskin pi kapaxuwaw. Kalilakpuwaw judíos tiku latamakgolh kxkilhtamaku Nehemías (kalikgalhtawakga Nehemías 8:​9-11). Jehová ni xlakaskin pi lu xlilipuwankgolh talakgalhin nema xtlawakgonit makgasata, wata xlakaskin pi xatapaxuwan kskujnanikgolh. Xla katsi pi akxni makgxtakgaw tuku nitlan tlawamaw kinkamakgapaxuwayan, chu wa xlakata kinkamasiyaniyan tuku wamputun makgxtakgkan tuku nitlan tlawakan. Liwana katsiyaw pi kinTlatkan lu xalakgalhamana chu nakinkatapatiyan komo akinin namakgxtakgaw tuku nitlan tlawamaw.

3. ¿Tuku naʼakxilhaw kʼuma artículo?

³ Kʼuma artículo tlakg nalichuwinanaw xlakata makgxtakgkan tuku nitlan tlawakan. Pulana, naʼakxilhaw tuku Jehová kamasiyanilh  israelitas xlakata makgxtakgkan tuku nitlan tlawakan. Alistalh, nalichuwinanaw la Jehová kamakgtayalh latamanin namakgxtakgkgo tuku nitlan xtlawamakgo. Chu xaʼawatiya, nalichuwinanaw tuku katsinikgolh kstalaninanin Jesús xlakata makgxtakgkan tuku nitlan tlawakan.

JEHOVÁ MASIYANILH ISRAEL XLAKATA MAKGXTAKGKAN TUKU NITLAN TLAWAKAN

4. ¿Tuku kamasiyanilh Jehová israelitas xlakata makgxtakgkan tuku nitlan tlawakan?

⁴ Akxni Jehová kamaxkilh xLimapakgsin israelitas, xlakan litayakgolh pi xʼamakgolh kgalhakgaxmatkgo. Jehová kamalaknunilh pi xʼama kakuentajtlawa chu ankgalhin xkasikulunatlawalh komo xlakan xkgalhakgaxmatkgolh xLimapakgsin. Chu kawanilh: «Umakgolh limapakgsin nema klimapakgsiman la uku ni lu snun laktuwa, chu tlan namakgantaxtiya» (Deut. 30:​11, 16). Pero komo xlakatakikgolh Jehová chu xkakninanikgolh atanu dioses, nitlan xʼama kakitaxtuni chu Jehová nialh xʼama kakuentajtlawa. Komo chuna xtlawakgolh, ¿xwamputun uma pi nialhla xtalalimparakgolh Dios? Nichuna, xlakata Limapakgsin xwan pi tlan xlakgtaspitkgolh Jehová chu xkgalhakgaxmatkgolh (Deut. 30:​1-3, 17-20). Uma wamputun pi tlan xmakgxtakgkgolh tuku nitlan xtlawamakgolh. Chu komo chuna xtlawakgolh, Jehová tlan xkamakgamakglhtinampa chu xkasikulunatlawapa.

5. ¿La limasiyalh Jehová pi ni xlakpuwan pi xkachikin nikxni xʼama talakgpali? (2 Reyes 17:​13, 14).

⁵ Kachikin nema Jehová xkalaksaknit makglhuwa lakatakikgolh. Na kakninanikgolh atanu dioses, chu tlawakgolh atanu tuku lu lixkajni. Chu wa xlakata titaxtukgolh lhuwa tuku nitlan. Pero Jehová ni lakpuwa pi nila xʼamakgo talakgpalikgo, wata makglhuwa kamalakgachalh xpalakachuwinanin xlakata xkawanilh xkachikin pi xmakgxtakgkgolh tuku nitlan xtlawamakgo chu xlakgtaspitkgolh (kalikgalhtawakga 2 Reyes 17:​13, 14).

6. ¿La kamaklakaskilh Jehová palakachuwinanin xlakata xkamasiyanilh xkachikin pi lu xlakaskinka xmakgxtakgkgolh tuku nitlan? (Na kaʼakxilhti dibujo).

⁶ Jehová makglhuwa kamalakgachalh xpalakachuwinanin xlakata xkastakyawalh xkachikin chu xlakata xkawanilh tuku xʼama kaʼakgspula komo ni xtalakgpalikgolh. Akgtum liʼakxilhtit, maklakaskilh palakachuwina Jeremías xlakata xwa: «Kataspitti, xatsakat Israel […]. Ni ktikasitsinin, xlakata  akit ni kmakgxtakgnan […]. Ni putum kilhtamaku ktikasitsinin. Kalitaya pi tlawanita tuku nitlan, xlakata talalakatawakanita Jehová miDios» (Jer. 3:​12, 13). Chu maklakaskilh palakachuwina Joel xlakata xwa: «Kakilalakgtaspitwi xliputum minakujkan» (Joel 2:​12, 13). Tlawalh pi palakachuwina Isaías xlichuwinalh: «Kataskulunkitit; kamapanutit kkilakatin tuku nitlan tlawapatit; nialh katlawatit tuku nitlan» (Is. 1:​16-19). Chu limaklakaskilh Ezequiel xlakata xkakgalhskilh: «¿Kimakgapaxuwa pi nani tiku nitlan likatsi? ¿Ni tlakg tlan komo xmakgxtakgli nixatlan xtiji chu chuntiya xlatamalh?». «Ni kimakgapaxuwa pi wi tiku nani. Wa xlakata kakilalakgtaspitwi chu kalatapatit» (Ezeq. 18:​23, 32). Jehová lu paxuwa akxni latamanin makgxtakgkgo xtalakgalhinkan xlakata xla lakaskin pi kalatamakgolh putum kilhtamaku. Pero chuna la lichuwinanitaw, xla ni kgalhkgalhi asta akxni makglakgalhina nalakpuwan nalakgtaspita chu asta akxniku maxki xtamakgtay. Kalichuwinaw atanu liʼakxilhtit.

7. ¿Tuku xkamasiyaniputun Jehová xkachikin akxni maklakaskilh tuku xtitaxtumakgo Oseas chu xpuskat?

⁷ Jehová maklakaskilh palakachuwina Oseas chu xpuskat, Gómer, xlakata wi tuku xkamasiyanilh xkachikin. Gómer akgskgawilh Oseas chu makgxtakgli, kataʼalh atanu lakchixkuwin. ¿Lakpuwa Jehová pi nialhla xʼama talakgpali Gómer? Xla tlan akxilha tuku wi kxnaku chatum lataman, wa xlakata wanilh Oseas: «Kapimpara, kapaxki puskat tiku paxki atanu chixku chu tlawama talakgxtumit nema ni xlitatlawat, chuna la Jehová paxki kachikin Israel maski xlakan stalanimakgo atanu dioses chu lu lakgatikgo tortas nema litlawakanit pasas» (Os. 3:1; Prov. 16:2). Kalakapastakwi pi Gómer chuntiyaku xtlawama tuku nitlan. Pero Jehová wanilh Oseas pi xʼalh putsa, xtapatilh chu xtatawilapa. a Jehová limaklakaskilh uma xlakata xkamasiyanilh xkachikin pi xla chuntiya xkamakgtayaputun xlakata xtalakgpalikgolh. Maski chuntiya xtlawamakgolh laklanka talakgalhin, xla chuntiya xkapaxki, chuntiya xkamalakgachanima xpalakachuwinanin chu xkamakgtayaputun xlakata xmakgxtakgkgolh tuku nitlan xtlawamakgo chu xlakgpalikgolh xlatamatkan. ¿Wamputun uma pi Jehová, tiku tlan «kalakputsanani naku», namakgtaya chatum tiku chuntiya tlawama talakgalhin xlakata namakgxtakga tuku nitlan tlawama? (Prov. 17:3). Kaʼakxilhwi.

¿LA KAMAKGTAYA JEHOVÁ MAKGLAKGALHINANIN NAMAKGXTAKGKGO TUKU NITLAN TLAWAMAKGO?

8. ¿Tuku tlawalh Jehová xlakata xmakgtayalh Caín namakgxtakga tuku nitlan xtlawama? (Génesis 4:​3-7; na kaʼakxilhti dibujo).

⁸ Caín wa xapulana xkgawasakan Adán chu Eva, chu wa xlakata matitaxtinikgolh talakgalhin. Nachuna, Biblia wan pi Caín «lu lixkajni tuku xtlawa» (1 Juan 3:12). Max wa uma tuku xpalakata akxni tlawanilh akgtum tamakamastan Jehová, xla «ni makgamakglhtinalh Caín chu nipara xtamakamastan». Pero Caín ni lakgpaliputulh xtayat, «lu sitsilh chu lu nitlan limakgkatsilh». ¿Tuku tlawalh Jehová? Tachuwinalh (kalikgalhtawakga Génesis 4:​3-7). Jehová limasiyanilh tapaxkit Caín akxni tachuwinalh chu wanilh pi tlan xkgalhipa xtasikulunalin. Na wanilh tuku nitlan xʼama kitaxtu komo ni xlakgpalilh nixatlan xtayat. Pero Caín ni kgaxmatnilh Jehová chu ni mastalh talakaskin pi xmakgtayaka namakgxtakga tuku nitlan xtlawama. ¿Tuku tlawalh Jehová akxni akxilhli pi Caín ni xkgaxmata? ¿Lakpuwa pi nikxni wi tiku xʼamapa makgtaya namakgxtakga tuku nitlan? ¡Nichuna!

9. ¿La makgtayalh Jehová mapakgsina David xlakata nitlan xlimakgkatsilh tuku xtlawanit?

⁹ Jehová lu xpaxki mapakgsina David. Akxni lichuwinalh maklakaskilh umakgolh tachuwin: «Chixku tiku makgapaxuwa kinaku» (Hech. 13:22). Pero David tlawalh laklanka talakgalhin. Lakgamakglhtilh  xpuskat atanu chixku chu makgninalh, chu Limapakgsin xwan pi tiku xtlawa uma xlakgchan namakgnikan (Lev. 20:10; Núm. 35:31). Pero xlakata Jehová lu tlan likatsi, malakgachalh xpalakachuwina, Natán, xlakata xtachuwinalh David maski xla ninapara tsinu xlimasiyanit pi nitlan xlimakgkatsi tuku nitlan xtlawanit. b Natán maklakaskilh akgtum liʼakxilhtit xlakata xlakgchalh xnaku David. Ama kilhtamaku mapakgsina akgatekgsli pi xlakgalhinanit kxlakatin Jehová chu nitlan limakgkatsilh (2 Sam. 12:​1-14). Tsokgwililh akgtum salmo nema limasiya pi lu nitlan xlimakgkatsi tuku xtlawanit (Sal. 51, tuku litsuku). Chuna la titaxtunit kilhtamaku, uma salmo tlan kamamakgkatsininit lhuwa latamanin tiku tlawakgonit talakgalhin chu kamakgpuwantinit namakgxtakgkgo tuku nitlan tlawamakgo. Lu tlan limakgkatsiyaw akxni katsiyaw pi Jehová makgtayalh kskujni xlakata nitlan xlimakgkatsilh tuku nitlan xtlawanit.

10. ¿La limakgkatsiya wix xlakata katsiya pi Jehová kinkakgalhkgalhiyan chu kinkatapatiyan?

¹⁰ Jehová ni lakgati nipara pulaktum talakgalhin, wata putum xkajni (Sal. 5:​4, 5). Pero xla katsi pi putum akinin makglakgalhinanin, chu xlakata kinkapaxkiyan, kinkamakgtayaputunan natalatlawayaw talakgalhin. Xla ankgalhin kamakgtaya asta tiku tlawakgonit laklanka talakgalhin namakgxtakgkgo tuku nitlan tlawamakgo chu natalakatsuwinikgo. ¡Lu tlan limakgkatsiyaw xlakata katsiyaw uma! Akxni lilakpuwanaw la kgalhkgalhinan Jehová chu la tapatinan, kinkamakgpuwantiniyan nikxni namakgxtakgaw chu na kinkamakgpuwantiniyan nitlan nalimakgkatsiyaw komo tlawanitaw akgtum talakgalhin chu tunkun namakgxtakgaw. Kalichuwinaw tuku katsinikgolh kstalaninanin Jesús xlakata nitlan limakgkatsikan talakgalhin chu makgxtakgkan.

¿TUKU KATSINIKGOLH KSTALANINANIN JESÚS XLAKATA MAKGXTAKGKAN TUKU NITLAN TLAWAKAN?

11, 12. ¿Tukuya parábola lichuwinalh Jesús xlakata xlimasiyalh pi xTlat ankgalhin tapatinamputun? (Na kaʼakxilhti dibujo).

¹¹ Kxapulana siglo xchinita kilhtamaku xlakata xchilh Mesías. Chuna la lichuwinaw kxapulana artículo, Jehová kamaklakaskilh Juan Mununa chu Jesucristo xlakata xkamasiyanilh latamanin  pi lu xlakaskinka xwanit xmakgxtakgkgolh xtalakgalhinkan (Mat. 3:​1, 2; 4:17).

¹² Akxni Jesús xlama kKatiyatni, masiyalh pi xTlat ankgalhin tapatinamputun. Liwana limasiyalh uma akxni lichuwinalh parábola xla kgawasa tiku xtsankganit. Uma kgawasa makgxtakgli xchik chu lilh xaʼakglakgwa latamat. Pero titaxtulh kilhtamaku, «liwana lakapastaknalh» chu taspitli. ¿Tuku tlawalh xatlat? Jesús wan pi akxni kgawasa «lakgamakgatku xminacha, xtlat akxilhli chu lakgalhamalh, tokgosun lakgalh chu akgpixtilh chu lakatsukli». Kgawasa xʼama skini xtlat pi xmaxkilh talakaskin kskujni xlitaxtulh. Pero xatlat lu xtapatiputun xkgawasa chu xlakaskin pi xmakgtapakgsipa kxfamilia. Xatlat wa: «Uma kinkgawasa [...] xtsankganit chu tekgskanit» (Luc. 15:​11-32). Akxni Jesús nina xmin kKatiyatni, max makglhuwa akxilhli la Jehová xkalimasiyani talakgalhaman tiku xtlawakgonit talakgalhin pero nitlan xlimakgkatsikgo. Wa xlakata tlan lichuwinalh la lakgalhamanan kinTlatkan xalak akgapun.

13, 14. ¿Tuku katsinilh apóstol Pedro xlakata nitlan limakgkatsikan talakgalhin chu tuku masiyalh alistalh xlakata uma? (Na kaʼakxilhti dibujo).

¹³ Jesús lhuwa tuku masiyanilh apóstol Pedro xlakata nitlan limakgkatsikan talakgalhin chu tapatinankan. Pedro makglhuwa tlawalh tuku nitlan, chu Jesús ankgalhin xatapaxuwan tapatilh. Akgtum liʼakxilhtit, Pedro makgtutu wa pi ni xlakgapasa Jesús chu alistalh lu nitlan limakgkatsilh uma (Mat. 26:​34, 35, 69-75). Pero akxni Jesús xlakastakwananita tasiyanilh Pedro, max akxni xʼakstu xwi (Luc. 24:​33, 34; 1 Cor. 15:​3-5). Jesús xkatsi pi Pedro lu nitlan xlimakgkatsi tuku xtlawanit, wa xlakata max uma kilhtamaku tlan mamakgkatsinilh chu wanilh pi xtapatinit (kaʼakxilhti Marcos 16:7).

¹⁴ Pedro liwana xkatsi la tamakgkatsi nitlan nalimakgkatsiya mintalakgalhin chu la tamakgkatsi akxni natapatikana. Wa xlakata tlan kamasiyanilh amakgapitsin xlakata uma. Akxni xtitaxtunita Fiesta xla Pentecostés, mastalh akgtum taʼakgchuwin kxlakatin lhuwa judíos chu kawanilh  pi xlakan xmakgnikgonit Mesías, pero na kawanilh: «Wa xlakata, kamakgxtakgtit mintalakgalhinkan chu kataspittit xlakata nakaxapanikanatit mintalakgalhinkan, xlakata namin kilhtamaku akxni Jehová nakamaxkiyan takaksni» (Hech. 3:​14, 15, 17, 19). Akxni Pedro chuna wa, limasiyalh pi tiku nitlan limakgkatsi xtalakgalhin talakgaspita, uma wamputun pi lakgpali xtapuwan, makgxtakga nixatlan tiji chu tsuku tlawan kxatlan tiji chu tsuku tlawa tuku makgapaxuwa Dios. Apóstol wa pi Jehová xʼama xapa xtalakgalhinkan, makgtuminika xʼama mapanu. Chu akxni xtitaxtunita akglhuwa kata, lichuwinalh: «Jehová [...] kakgalhkgalhiman xlakata ni lakaskin pi wi tiku namalakgsputukan, wata lakaskin pi putum latamanin kamakgxtakgkgolh tuku nitlan tlawamakgolh» (2 Ped. 3:9). ¡Lu tlan limakgkatsiyaw akxni katsiyaw pi Jehová tlan makgtuminika nakinkatapatiyan, asta maski tlawanitaw lu laklanka talakgalhin!

15, 16. 1) ¿La katsilh Pablo pi Jehová tapatinan? (1 Timoteo 1:​12-15). 2) ¿Tuku nalichuwinanaw kʼatanu artículo?

¹⁵ Max ni lhuwa latamanin tlawakgonit tuku lu nitlan chuna la Saulo xalak Tarso. Xla kaputsastalanilh kstalaninanin Cristo chu lu nitlan kalikatsinilh. Wa xlakata, lhuwa kstalaninanin Cristo xlakpuwankgo pi nikxnila xʼama talakgpali. Pero Jesús nichuna xlakpuwan. Jesús chu xTlat akxilhkgolh xatlan xtayat Saulo. Jesús wa: «Klaksaknit uma chixku» (Hech. 9:15). Asta tlawalh akgtum milagro xlakata xmakgtayalh namakgxtakga tuku nitlan xtlawama (Hech. 7:58–8:3; 9:​1-9, 17-20). Titaxtulh kilhtamaku, akxni Saulo kstalanina Cristo xlitaxtuya chu xlilakgapaskan chuna la apóstol Pablo, makglhuwa kapaxtikatsinilh Jehová chu Jesús talakgalhaman nema limasiyanikgolh chu xlakata tlan xlikatsinikgonit (kalikgalhtawakga 1 Timoteo 1:​12-15). Pablo masiyalh: «Kxtalakgalhaman maxkiman talakaskin namakgxtakga tuku nitlan tlawapat» (Rom. 2:4).

¹⁶ Milh kilhtamaku, Pablo katsilh pi lu xlichuwinamaka tuku xlama kcongregación xalak Corinto xlakata wi tiku xtlawama talakgxtumit nema ni xlitatlawat. ¿Tuku tlawalh Pablo xlakata xlakkaxtlawalh uma taʼakglhuwit? Tuku tlawalh lhuwa tuku kinkamasiyaniyan xlakata la paxkinan chu la stakyawanan Jehová, chu na kinkamasiyaniyan la xlilakaskinka nalimasiyakan talakgalhaman. Kʼatanu artículo liwana nalichuwinanaw xlakata uma tuku lalh.