ARTÍCULO NEMA NATALIKGALHTAWAKGA 34
TAKILHTLIN 107 Dios kinkamasiyanin nalapaxkiyaw
¿La kalimasiyanikan tapaxkit chu talakgalhaman tiku tlawakgo akgtum lanka talakgalhin?
«Kxtalakgalhaman maxkiman talakaskin namakgxtakga tuku nitlan tlawapat» (ROM. 2:4).
TUKU NA’AKXILHAW
Nalichuwinanaw tuku tlawakgo lakgkgolotsin xalak congregación xlakata nakamakgtayakgo tiku tlawakgonit akgtum lanka talakgalhin.
1. Akxni wi tiku tlawa akgtum lanka talakgalhin, ¿tuku max tlan tlawakan xpalakata?
KXLIPULAKTUTU artículo, akxilhwi pi Pablo kawanilh congregación xalak Corinto tuku xlitlawatkan xwanit akxni chatum chixku tlawalh akgtum lanka talakgalhin. Xlakata uma chixku ni xmakgxtakgnit tuku nitlan xtlawama, talakaskilh xtamakxtuka kcongregación. Pero chuna la wan texto nema litsuku uma artículo, min kilhtamaku na tlan makgtayakan tiku tlawama tuku nitlan namakgxtakga xtalakgalhin (Rom. 2:4). ¿La kamaklakaskin Jehová lakgkgolotsin xlakata namakgtaya tiku tlawama talakgalhin namakgxtakga tuku nitlan tlawama?
2, 3. ¿Tuku kilitlawatkan komo nakatsiyaw pi chatum tala tlawanit akgtum lanka talakgalhin, chu tuku xlakata chuna kilitlawatkan?
2 ¿Tuku kilitlawatkan komo nakatsiyaw pi chatum tala tlawanit akgtum lanka talakgalhin? Xlakata lakgkgolotsin tlan namakgtayakgo, pulana xlikatsitkan tuku tlawanit. Wa xlakata kamakgpuwantiniw nakatachuwinan lakgkgolotsin chu nakaskini xtamakgtaykan (Is. 1:18; Hech. 20:28; 1 Ped. 5:2).
3 Pero ¿tuku natlawayaw komo xla ni katachuwinamputun lakgkgolotsin? Komo lakaskinaw pi kamakgtayaka, akinin nakawaniyaw lakgkgolotsin tuku tlawanit. Uma nalimasiya pi paxkiyaw kintalakan, xlakata katsiyaw pi lakgkgolotsin tlan namakgtayakgo. Komo xla ni makgxtakga xtalakgalhin, tlakg nalaktlawa chuna la talalin Jehová chu max namamaxani congregación. Wa xlakata maski tuwa namakgkatsiyaw natlawayaw uma, ni napekuanaw chu nakatachuwinanaw lakgkgolotsin xlakata paxkiyaw Jehová chu paxkiyaw kintalakan (Sal. 27:14).
LA KAMAKGTAYAKGO LAKGKGOLOTSIN TIKU TLAWAKGONIT AKGTUM LANKA TALAKGALHIN
4. ¿Tuku lakaskinkgo lakgkgolotsin pi kakitaxtulh akxni tachuwinankgo tiku tlawanit akgtum lanka talakgalhin?
4 Akxni chatum tala tlawa akgtum lanka talakgalhin, putum lakgkgolotsin xalak congregación kalaksakkgo kgalhtutu lakgkgolotsin xlakata natlawakgo akgtum comité a chu natachuwinankgo tiku tlawanit talakgalhin. Xlakan xlitaktujutkan chu xliʼakgatekgsatkan pi ni putum tlan tlawakgo, uma wamputun pi maski namakgtayaputunkgo tala xlakata namakgxtakga xtalakgalhin, nila mafuerzajlinikgo natalakgpali (Deut. 30:19). Akgatekgskgo pi ni putum tiku tlawanit talakgalhin namakgxtakgputun tuku nitlan tlawama, chuna la tlawalh mapakgsina David (2 Sam. 12:13). Wilakgolh tiku laksakkgo ni nakgalhakgaxmatkgo xtastakyaw Jehová (Gén. 4:6-8). Maski chuna, lakgkgolotsin liskujkgo xlakata namakgtayakgo tiku tlawanit akgtum lanka talakgalhin namakgxtakga xtalakgalhin. ¿Tuku tastakyaw kamakgtaya lakgkgolotsin akxni tatamakxtumikgo tiku tlawanit talakgalhin?
5. ¿Tuku tastakyaw xlilakapastakatkan lakgkgolotsin akxni tatamakxtumikgo tiku tlawanit akgtum lanka talakgalhin? (2 Timoteo 2:24-26; na kaʼakxilhti dibujo).
5 Lakgkgolotsin akxilhkgo tiku tlawanit talakgalhin chuna la tantum xborrego Jehová nema tsankganit (Luc. 15:4, 6). Xlakan limasiyakgo pi chuna liʼakxilhkgo akxni tatamakxtumikgo. Ni palha tachuwinankgo chu ni kilhnikgo. Chu ni tatamakxtumikgo kaj xlakata chuna xlitlawatkan. Xlakan limasiyakgo tayat nema lichuwinan 2 Timoteo 2:24-26 (kalikgalhtawakga). Putum kilhtamaku tlan likatsinikgo, limasiyanikgo tsatata naku chu ni lakapala sitsikgo xlakata tuku nawanikgo nalakgchan kxnaku.
Chuna la mapuchwayaninanin xala makgasa, lakgkgolotsin lu liskujkgo xlakata nakamakgtayakgo tiku tlawakgonit akgtum lanka talakgalhin (Kaʼakxilhti párrafo 5).
6. ¿La putsakgo xtapulalit Jehová lakgkgolotsin akxni nina tatamakxtumikgo tiku tlawanit talakgalhin? (Romanos 2:4).
6 Lakgkgolotsin xlimaxtutkan kilhtamaku xlakata naputsakgo xtapulalit Jehová. Kuenta tlawakgo tuku wa Pablo: «Kxtalakgalhaman maxkiman talakaskin namakgxtakga tuku nitlan tlawapat» (kalikgalhtawakga Romanos 2:4). Wa xlakata liskujkgo nalikatsinikgo tiku tlawanit talakgalhin chuna la Jehová kalikatsini. Xlilakapastakatkan pi mapuchwayaninanin litaxtukgo chu xlistalanitkan tuku wa Cristo chu xlitlawatkan tuku xla tlawalh (Is. 11:3, 4; Mat. 18:18-20). Akxni nina tatamakxtumikgo tiku tlawanit talakgalhin, comité tlawani oración Jehová xlakata naskinikgo pi kakamakgtayalh xlakata namakgtayakgo tiku tlawanit tuku nitlan namakgxtakga xtalakgalhin. Lakputsananikgo Biblia chu makgapitsi kilikgalhtawakgakan, chu skinikgo Jehová pi kakamaxkilh liskgalala xlakata naʼakgatekgsnikgo tiku tachuwinamakgo chu liwana naʼakgatekgskgo tuku lama. Lakgkgolotsin likgalhchuwinankgo tuku tlawalh pi uma tala chuna xlakpuwa chu xtlawalh uma lanka talakgalhin (Prov. 20:5).
7, 8. ¿La tlan nastalanikgo lakgkgolotsin xliʼakxilhtit Jehová akxni natatamakxtumikgo tiku tlawanit akgtum lanka talakgalhin?
7 Lakgkgolotsin stalanikgo xliʼakxilhtit Jehová chu ni lakapala sitsikgo. Kuenta tlawakgo la kalikatsinilh Jehová latamanin tiku latamakgolh makgasa chu tlawakgolh talakgalhin. Akgtum liʼakxilhtit, akxni Jehová tachuwinalh Caín ni sitsinilh chu wanilh pi xla tlan xtalalimpa, pero wanilh tuku xʼama kitaxtu komo xla ni xlakgpalilh xtalakapastakni (Gén. 4:6, 7). Atanu kilhtamaku, Jehová malakgachalh palakachuwina Natán xlakata kstakyawalh mapakgsina David. Natán limaklakaskilh akgtum liʼakxilhtit xlakata tuku xwanilh xlakgchalh xnaku David (2 Sam. 12:1-7). Nachuna, Jehová makglhuwa kamalakgachanilh xpalakachuwinanin kachikin Israel, xlakata ni xkgalhakgaxmatnankgo (Jer. 7:24, 25). Jehová ni kgalhkgalhilh pi xlakskujnin pulana xmakgxtakgkgolh tuku nitlan xtlawamakgo xlakata xkamakgtayalh, wata akxni xtlawamakgojku talakgalhin kaskinilh pi nitlan xlimakgkatsikgolh tuku nitlan xtlawamakgo chu xmakgxtakgkgolh xtalakgalhinkan.
8 ¿Tuku tlawakgo lakgkgolotsin xlakata nastalanikgo xliʼakxilhtit Jehová akxni makgtayakgo tiku tlawanit akgtum lanka talakgalhin? Chuna la wan 2 Timoteo 4:2, xlakaskinka “ni lakapala nasitsikgo”. Putum kilhtamaku xliskujatkan xlakata ni nasitsikgo akxni natachuwinankgo xlakata namakgpuwantinikgo natlawa tuku tlan. Komo lakgkgolotsin ksitsikgolh, tiku tlawanit talakgalhin max nialh katikakgaxmatniputulh chu asta max ni katimakgxtakgputulh tuku nitlan tlawama.
9, 10. ¿Tuku tlan natlawakgo lakgkgolotsin xlakata namakgtayakgo tala tiku tlawanit talakgalhin naʼakgatekgsa pi nitlan tuku tlawanit?
9 Lakgkgolotsin xlikatsitkan tuku tlawalh pi uma tala xtlawalh akgtum lanka talakgalhin. Akgtum liʼakxilhtit, ¿tsinu tsinu taxlajwaninit xlakata nialh kgalhtawakgalh chu nialh lichuwinalh Dios? ¿Nialh tlawanilh oración Jehová? ¿Mastanit talakaskin pi nixatlan talakapastakni nastaka kxnaku? ¿Max tiku xkatalalin o tuku xlilakgastanan matlawilh uma tuku nitlan? ¿Akgatekgsa pi tuku laksaknit chu tlawanit, nitlan mamakgkatsinilh xTlat, Jehová?
10 Lakgkgolotsin liwana nalakpuwankgo tuku takgalhskinin natlawanikgo, pero ni katikgalhskinkgolh tuku ni xlikatsitkan. Komo tlan nalikatsinikgo, namakgtayakgo uma tala nawan tuku makgkatsi chu na’akgatekgsa tuku matlawilh talakgalhin (Prov. 20:5). Nachuna, chuna la tlawalh Natán akxni tachuwinalh David, tlan nalimaklakaskinkgo liʼakxilhtit xlakata namakgtayakgo tala naʼakgatekgsa tuku xlakata uma tuku tlawalh nitlan. Max lata akxni xlimakgtumku natatamakxtumikgo, uma tala lu nitlan natsuku limakgkatsi tuku tlawanit chu asta max namakxgtakgputun xtalakgalhin.
11. ¿La kalikatsinilh Jesús tiku xtlawamakgo talakgalhin?
11 Lakgkgolotsin liskujkgo xlakata nalikatsikgo chuna la Jesús. Akgtum liʼakxilhtit, akxni Jesús tachuwinalh Saulo xalak Tarso kgalhskilh: «Saulo, Saulo, ¿tuku xlakata kimputsastalanipat?». Chuna wanilh xlakata xmakgtayalh naʼakgatekgsa pi nitlan tuku xtlawama (Hech. 9:3-6). Chu kʼApocalipsis 2:20, 21 lichuwinalh chatum puskat tiku wanikan «Jezabel», chu wa: «Kmaxkilh kilhtamaku xlakata namakgxtakga tuku nitlan tlawama».
12, 13. ¿Tuku xlitlawatkan lakgkgolotsin xlakata tiku tlawanit talakgalhin nakgalhi kilhtamaku namakgxtakga xtalakgalhin? (Na kaʼakxilhti dibujos).
12 Chuna la Jesús, lakgkgolotsin ni tunkun lakpuwankgo pi tiku tlawanit talakgalhin ni katimakgxtakgli tuku nitlan tlawama. Wilakgo tiku makgxtakgkgo xtalakgalhinkan akxni xlimakgtumku katatamakxtumikan, pero wilakgo tiku maklakaskinkgo tlakg lhuwa kilhtamaku. Wa xlakata lakgkgolotsin ni kaj makgtum xlitachuwinatkan tiku tlawanit talakgalhin. Max akxni xapulana tatamakxtumikgonita, tiku tlawanit talakgalhin, nalilakpuwan tuku wanika, nataktuju chu naskini Jehová pi katapatilh (Sal. 32:5; 38:18). Max akxni natatamakxtumiparakgo lakgpalinita nawan xtapuwan.
13 Xlakata namakgtayakgo tiku tlawanit lanka talakgalhin namakgxtakga tuku nitlan tlawama, lakgkgolotsin xlimasiyanitkan pi akgatekgsnikgo chu tlan nalikatsinikgo. Naskinikgo Jehová pi kasikulunatlawalh tuku liskujmakgo chu ni nalakpuwankgo pi tiku tlawanit talakgalhin nikxni katimakgxtakgputulh tuku nitlan tlawama (2 Tim. 2:25, 26).
Lakgkgolotsin makglhuwa xlitachuwinatkan makglakgalhina xlakata xla nakgalhi kilhtamaku namakgxtakga tuku nitlan tlawama (Kaʼakxilhti párrafo 12).
14. Akxni chatum makglakgalhina makgxtakga xtalakgalhin, ¿tiku lakgchan namalankinkan, chu tuku xlakata?
14 Akxni chatum tiku xmakglakgalhinama makgxtakga xtalakgalhin, lu kinkamakgapaxuwayan (Luc. 15:7, 10). Pero ¿xlilat nakalimalankikan lakgkgolotsin uma? Kalakapastakwi pi Pablo wa pi «max Dios nakamaxki talakaskin namakgxtakgkgo tuku nitlan tlawamakgolh» tiku makglakgalhinamakgo (2 Tim. 2:25). Wa xlakata, wa Jehová tiku lakgchan namalankikan xlakata uma tiku xtlawama tuku nitlan lakgpalilh nixatlan xtapuwan chu xtayat. Alistalh, Pablo lichuwinalh tuku tlan kitaxtu akxni wi tiku makgxtakga xtalakgalhin: tlawa pi tlakg liwana nalakgapasa xaxlikana, liwana nalakapastaknan chu natsalani Akgskgawini (2 Tim. 2:26).
15. ¿La tlan chuntiya namakgtayakgo lakgkgolotsin tiku makgxtakgnita xtalakgalhin?
15 Komo uma lataman namakgxtakga tuku nitlan xtlawama, lakgkgolotsin chuntiya nalakgapaxialhnankgo xlakata namatliwakglhnikgo xtakanajla, xlakata natayani ni natlawa tuku nitlan chu xlakata titum natlawan ktiji nema xatlan (Heb. 12:12, 13). Maski lakgkgolotsin ni katilichuwinankgolh tuku tlawalh uma tala, ¿tuku tlan xwa pi xmakatsininankgolh kcongregación?
«KXLAKATIN CONGREGACIÓN PALHA KAKASTAKYAWA»
16. ¿Tuku xwamputun apóstol Pablo akxni wa k1 Timoteo 5:20 kastakyawananti «kxlakatin congregación»?
16 (Kalikgalhtawakga 1 Timoteo 5:20). Pablo wanilh Timoteo, tiku na chatum kgolotsin xlitaxtu, pi palha xkastakyawalh «kxlakatin congregación» tiku xmakglakgalhinankgo. ¿Tuku xwamputun apóstol Pablo? Ni xwamputun pi putum congregación xkamakatsinika tuku xlanit, kajwatiya xtalakaskin xkamakatsinika natalan tiku akxilhkgolh akxni makglakganinalh uma tala, o tiku xla kawanilh pi xmakglakgalhinanit. Lakgkgolotsin nalakputsakgo la nakawanikgo umakgolh natalan pi tachuwinankaja chu stakyawakaja uma tala.
17. Akxni putum congregación katsikgo tuku talakgalhin tlawakanit o max nakatsikgo, ¿tuku tamakatsin namastakan, chu tuku xlakata?
17 Min kilhtamaku, putum congregación katsikgo talakgalhin nema tlawalh tala o max nakatsikgo. Akxni chuna la, tachuwin «kxlakatin congregación», kilhchanima pi nakamakatsinikan putum congregación. Wa xlakata chatum kgolotsin namakatsininan kcongregación pi tala chixku o tala puskat, stakyawakanit o censurarlikanit. ¿Tuku xlakata chuna tlawakan? Pablo wa pi «xlakata amakgapitsin nalipekuankgo» chu ni natlawakgo lanka talakgalhin.
18. ¿Tuku tlawakgo lakgkgolotsin akxni chatum tiku tamununita pero nina makgatsi 18 kata, tlawa akgtum lanka talakgalhin? (Na kaʼakxilhti dibujo).
18 ¿Tuku nala komo tiku makglakgalhinan tamununita, pero nina makgatsi 18 kata? Putum lakgkgolotsin xalak congregación nakalaksakkgo chatiy lakgkgolotsin xlakata nakatatamakxtumikgo tiku makglakgalhinalh chu xnatlatni tiku na xtatayananin Jehová litaxtukgo. b Umakgolh lakgkgolotsin nakakgalhskinkgo xanatlatni tuku tlawamakgo xlakata namakgtayakgo xkgawasakan o xtsumatkan namakgxtakga xtalakgalhin. Komo kgawasa o tsumat kakgalhakgaxmatma xnatlatni chu makglhtinama xtamakgtaykan, lakgkgolotsin tlan nalaksakkgo pi ni talakaskin pi akgtum comité nakatachuwinan. Xlakan katsikgo pi Dios kalakgayawanit natlatni nakastakyawakgo xkamanankan (Deut. 6:6, 7; Prov. 6:20; 22:6; Efes. 6:2-4). Alistalh, lakgkgolotsin nakatachuwinamparakgo xanatlatni xlakata nakatsikgo komo chuntiya makgtayamakgo xkgawasakan o xtsumatkan. Pero ¿tuku natlawakgo komo kgawasa o tsumat ni makgxtakgputun xtalakgalhin chu ni lakgpaliputun xtayat? Comité de ancianos nakatatamaxtumikgo xla chu xnatlatni tiku na xtatayananin Jehová litaxtukgo.
Akxni tiku tlawa talakgalhin nina kgalhi 18 kata, chatiy lakgkgolotsin natatamakxtumikgo xla chu xnatlatni tiku na xtatayananin Jehová (Kaʼakxilhti párrafo 18).
«JEHOVÁ LU XAPAXKINA CHU XALAKGALHAMANA»
19. ¿La stalanikgo lakgkgolotsin xliʼakxilhtit Jehová akxni kamakgtayakgo tiku tlawakgonit lanka talakgalhin?
19 Lakgkgolotsin tiku makgtayanankgo kʼakgtum comité de ancianos, liskujkgo xlakata congregación skulunku natawila, xlakata wa uma tuku Jehová kalakgayawanit (1 Cor. 5:7). Pero na liskujkgo xlakata namakgtayakgo tiku tlawanit akgtum talakgalhin xlakata namakgxtakga tuku nitlan tlawama, chu wa xlakata nikxni lakpuwankgo pi tiku lakgalhinanit ni katilakgpalilh xtayat. Akxni chuna tlawakgo, stalanikgo xliʼakxilhtit Jehová, tiku «lu xapaxkina chu xalakgalhamana» (Sant. 5:11). Kaʼakxilhwi tuku tsokgwililh apóstol Juan akxni xlina kata: «Laktsu kinkamanan, kkatsokgnaniman umakgolh xlakata ni natlawayatit talakgalhin. Pero komo wi tiku lakgalhinan, kgalhiyaw chatum makgtayana tiku akxtum tawi xaTlat: Jesucristo, tiku xaʼakgstitum» (1 Juan 2:1).
20. ¿Tuku nalichuwinanaw kxaʼawatiya artículo xla uma revista?
20 Lu nitlan, pero min kilhtamaku tiku tlawanit lanka talakgalhin ni makgxtakgputun tuku nitlan tlawama. Akxni chuna la, talakaskin natamakxtukan kcongregación. ¿La lakkaxtlawakgo lakgkgolotsin uma taʼakglhuwit? Nalichuwinanaw uma kxaʼawatiya artículo xla uma revista.
TAKILHTLIN 103 Tiku pulalinkgo congregación xtamaskiwin Dios
a Makgasa, umakgolh lakgkgolotsin tiku xlakkaxtlawakgo ta’akglhuwit xkalimapakuwiyaw comités judiciales. Pero nialh chuna katikalimapakuwiw xlakata xlakan ni kajwatiya lakputsanankgo. Lata uma kilhtamaku, nakalimapakuwiyaw comités de ancianos.
b Tuku kawanikan pi xlitlawatkan xanatlatni nachuna xlitlawatkan tiku kuentajtlawamakgo chatum tiku nina makgatsi 18 kata.
