ARTÍCULO NEMA NATALIKGALHTAWAKGA 35
TAKILHTLIN 123 Kakgalhakgaxmatwi xkachikin Jehová
¿La kamakgtayakan tiku katamakxtukanit kcongregación?
«Tlakg naʼanan tapaxuwan kʼakgapun akxni chatum tiku xtlawa talakgalhin makgxtakga tuku nitlan xtlawama, nixawa tatipuxamakunajatsa tiku ni tlawamakgolh talakgalhin» (LUC. 15:7).
TUKU NAʼAKXILHAW
Naʼakxilhaw tuku xlakata talakaskin pi makgapitsi nakatamakxtukan kcongregación chu tuku tlan natlawakgo lakgkgolotsin xlakata nakamakgtayakgo namakgxtakgkgo xtalakgalhinkan chu tlan natalalimparakgo Jehová.
1, 2. 1) ¿La kaʼakxilha Jehová tiku tlawakgo akgtum talakgalhin chu ni makgxtakgputunkgo? 2) ¿Tuku lakaskin Jehová?
JEHOVÁ ni lakgati natlawayaw talakgalhin; xla xkajni kaxatukawa talakgalhin (Sal. 5:4-6). Xla lakaskin kakgalhakgaxmatwi limapakgsin nema wi kBiblia. Pero na katsi pi makglakgalhinanin akinin chu max namin kilhtamaku natlawayaw tuku nitlan (Sal. 130:3, 4). Pero Jehová ni kaʼakxilhputun tiku likilhankgo xtalakgalhaman nema ni anan xtachuna xlakata natlawakgo tuku ni xlilat chu ni lakamaxanankgo (Jud. 4). Biblia wan pi nakamalakgsputukan kʼArmagedón «latamanin tiku lixkajni likatsikgo» (2 Ped. 3:7; Apoc. 16:16).
2 Pero Jehová ni lakaskin pi wi tiku namalakgsputukan. Chuna la lichuwinaw kxapulana artículos, Biblia liwana wan pi xla «lakaskin pi putum latamanin kamakgxtakgkgolh tuku nitlan tlawamakgolh» (2 Ped. 3:9). Lakgkgolotsin stalanikgo xliʼakxilhtit Jehová chu xatapaxuwan kamakgtayakgo tiku tlawamakgo akgtum talakgalhin xlakata namakgxtakgkgo tuku nitlan tlawamakgo chu tlan natalalimparakgo Jehová. Pero ni putum xatapaxuwan makgamakglhtinankgo uma tamakgtay (Is. 6:9). Wi tiku ni talakgpaliputunkgo maski lakgkgolotsin makglhuwa katachuwinankgo xlakata kamakgtayaputunkgo namakgxtakgkgo xtalakgalhinkan. ¿Tuku xlitatlawat akxni chuna la?
«KATAMAKXTUTIT KCONGREGACIÓN TIKU LIXKAJNI LIKATSI»
3. 1) ¿Tuku wan Biblia pi xlitatlawat akxni chatum lataman ni makgxtakgputun xtalakgalhin? 2) ¿Tuku xlakata wanaw pi tiku ni makgxtakgputun xtalakgalhin, xʼakstu laksaka natamakxtukan kcongregación?
3 Akxni wi tiku tlawanit talakgalhin chu ni makgxtakgputun, lakgkgolotsin xlitlawatkan tuku wan 1 Corintios 5:13: «Katamakxtutit kcongregación ama chixku tiku lixkajni likatsi». a Tlan nawanaw pi xʼakstu laksaka natamakxtukan kcongregación; xlakata makgalama tuku nitlan tlawanit (Gál. 6:7). ¿Tuku xlakata chuna wanaw? Xlakata ni makgamakglhtinanit tamakgtay nema maxkikgonit lakgkgolotsin (2 Rey. 17:12-15). Tuku tlawa limasiya pi nialh kgalhakgaxmatputun xlimapakgsin Jehová (Deut. 30:19, 20).
4. ¿Tuku xlakata makatsininankan kcongregación akxni wi tiku tamakxtukan?
4 Akxni tamakxtukan kcongregación tiku ni makgxtakgputun xtalakgalhin, makatsininankan kcongregación pi uma lataman nialh xtatayana Jehová litaxtu. Ni mastakan uma tamakatsinin kaj xlakata namamaxanikan uma lataman. Wata chuna tlawakan xlakata natalan namakgantaxtikgo limapakgsin niku wan “pi nialh natalalinkgo chu nipara natawayankgo” (1 Cor. 5:9-11). Jehová liwana katsi tuku xlakata mastalh uma limapakgsin. Apóstol Pablo tsokgwililh: «Kaj aktsu limaxkutin, maxkuti putum harina» (1 Cor. 5:6). Komo tiku ni makgxtakgputun xtalakgalhin ni xtamakxtuka kcongregación, amakgapitsin natalan max nialh xliskujkgolh namakgantaxtikgo xlimapakgsin Jehová (Prov. 13:20; 1 Cor. 15:33).
5. ¿Tuku kililakpuwanitkan chatum lataman tiku tamakxtukanit kcongregación, chu tuku xlakata?
5 ¿Tuku kililakpuwanitkan tiku tamakxtukanit kcongregación? Maski nialh natalalinaw, ni lakpuwanaw pi nialhla katitalakgpalilh. Wata liʼakxilhaw xtachuna la tantum borrego nema tsankganit chu tlan nataspita. Kalakapastakwi pi milh kilhtamaku xla tamakamastanilh Jehová chu malaknunilh pi xʼama skujnani. Pero la uku ni makgantaxtima uma tamalaknun chu wa xlakata xlatamat kalipekua wi (Ezeq. 18:31). Pero xlakata ananku kilhtamaku chu Jehová chuntiya limasiyama talakgalhaman, kgalhkgalhimaw pi kamilh kilhtamaku xla nalakgtaspita Jehová. ¿Tuku tlan natlawakgo lakgkgolotsin xlakata namakgtayakgo tiku tamakxtukanit kcongregación?
¿LA KAMAKGTAYAKGO LAKGKGOLOTSIN TIKU KATAMAKXTUKANIT KCONGREGACIÓN?
6. ¿Tuku xlitlawatkan lakgkgolotsin xlakata namakgtayakgo tiku tamakxtukanit kcongregación?
6 Akxni wi tiku tamakxtukan kcongregación, ¿tuku tlawakgo lakgkgolotsin? ¿Xʼakstukan makgxtakgkgo chu nialh makgtayakgo nalakgtaspita Jehová? ¡Nichuna! Akxni chatum lataman makatsinikan pi nialh katimakgtapakgsilh kcongregación, comité de ancianos na wani tuku xlitlawat xlakata tlan nataspita. Pero ni kajwatiya uma, lakgkgolotsin na nawanikgo uma lataman pi tachuwinamputumparakgo ni lhuwa papaʼ alistalh xlakata naʼakxilhkgo komo lakgpalinit xtapuwan. Komo uma lataman nawan pi tlan, akxni lakgkgolotsin natachuwinamparakgo, namakgpuwantinikgo xlakata namakgxtakga xtalakgalhin chu nataspita kcongregación. Komo lakgkgolotsin naʼakxilhkgo pi uma kilhtamaku nina lakgpalinit xtapuwan, nalakkaxwilikgo pi natachuwinamparakgo alistalh.
7. ¿La limasiyakgo lakgkgolotsin pi stalanikgo xliʼakxilhtit Jehová chu lakgalhamanankgo akxni tachuwinankgo tiku tamakxtukanit kcongregación? (Jeremías 3:12)
7 Lakgkgolotsin xliskujatkan xlakata nastalanikgo xliʼakxilhtit Jehová chu nalimasiyakgo talakgalhaman akxni tachuwinankgo tiku tamakxtukanit kcongregación. Akgtum liʼakxilhtit, akxni israelitas ni xkgalhakgaxmatnankgo, Jehová ni xkgalhkgalhi pi xʼakstukan xlakpuwankgolh nalakgtaspitkgo. Wata wa xkatalakatsuwini asta maski xlakan ninapara tsinu xlimasiyakgo pi nitlan xlimakgkatsikgo xtalakgalhinkan. Chuna la lichuwinaw kxliʼakgtiy artículo xla uma revista, Jehová limasiyalh pi lu xalakgalhamana akxni wanilh palakachuwina Oseas pi xtatawilapa xpuskat maski xla xtlawamajku talakgalhin (Os. 3:1; Mal. 3:7). Xtachuna la Jehová, lakgkgolotsin lakaskinkgo pi tiku tlawanit tuku nitlan kalakgtaspitli Jehová. Chu makgtayakgo xlakata chuna natlawa (kalikgalhtawakga Jeremías 3:12).
8. ¿La kinkamakgtayayan parábola xla kgawasa tiku xtsankganit liwana naʼakgatekgsaw pi Jehová xalakgalhamana? (Lucas 15:7).
8 Na kalakapastakwi parábola xla kgawasa tiku xtsankganit nema lichuwinaw kxliʼakgtiy artículo. Akxni xatlat akxilhli pi xtaspitma kxchik «tokgosun lakgalh chu akgpixtilh chu lakatsukli» (Luc. 15:20). Xlakata xatlat lu xapaxkina xwanit, ni kgalhkgalhilh pi xkgawasa xwanilh pi xtapatilh, wata wa pulana talakatsuwilh. Lakgkgolotsin nachuna kalikatsinikgo tiku katamakxtukanit kcongregación chu kamakgtayaputunkgo nataspitkgo kxchikkan (Luc. 15:22-24, 32). ¡Lu anan tapaxuwan kʼakgapun chu kkatiyatni akxni chatum tiku tlawanit tuku nitlan makgxtakga xtalakgalhin chu lakgtaspita Jehová! (kalikgalhtawakga Lucas 15:7).
9. ¿Tuku kawani Jehová pi katlawakgolh tiku tlawakgonit akgtum lanka talakgalhin?
9 Putum tuku akxilhnitaw, kinkamasiyaniyan pi Jehová ni katimastalh talakaskin pi chatum tiku tlawanit talakgalhin chuntiya namakgtapakgsi kcongregación komo ni makgxtakgputun xtalakgalhin. Pero ni putuminika kalakgmakgan tiku lakgalhinankgonit. Xla lakaskin pi kalakgtaspitkgolh. Oseas 14:4 liwana masiya tuku kalakpuwani Jehová tiku nitlan limakgkatsikgo xtalakgalhinkan. Anta wan: «Nakkamaspita kxatlan tiji. Nakkapaxki xlakata chuna ktlawaputun, xlakata nialh kkasitsini». Umakgolh tachuwin limasiya pi lakgkgolotsin lu kuenta xlitlawatkan komo anan tuku limasiya pi chatum tiku tamakxtukanit kcongregación lakgtaspitputun Jehová. Chu tiku katamakxtukanit na kalimasiyani pi xliskujatkan xlakata nalakgtaspitkgo Jehová.
10, 11. ¿Tuku natlawakgo lakgkgolotsin xlakata namakgtayakgo tiku makgasata tamakxtukanit kcongregación?
10 ¿La tlan nakamakgtayakgo lakgkgolotsin tiku akglhuwata kata katamakxtukanit kcongregación? Komo chatum lataman akglhuwata kata tamakxtukanit kcongregación, max nialhtu tlawama talakgalhin nema limaxtuka o max nialhpara lakapastaka tuku xlakata tamakxtuka. Lakgkgolotsin xliskujatkan xlakata nakaputsakgo putum umakgolh latamanin chu nakatachuwinankgo. Akxni nakatachuwinankgo, asta tlan nakawanikgo pi katatlawaputunkgo oración chu nakamakgpuwantinikgo pi kataspitkgolh kcongregación. Komo uma lataman akglhuwata kata lata tamakxtukanit, lu taxlajwaninit xtakanajla. Wa xlakata, komo nawan pi taspitputumpara, lakgkgolotsin nalakkaxwilikgo pi wi tiku nalimakgalhtawakge Biblia maski nina taspita kcongregación, pero wa lakgkgolotsin nalaksakkgo tiku namakgalhtawakge.
11 Lakgkgolotsin stalanikgo xliʼakxilhtit Jehová akxni lakgalhamanankgo. Wa xlakata kaputsakgo chu kamakgtayaputunkgo putum tiku katamakxtukanit kcongregación xlakata nalakgtaspitkgo Jehová. Akxni chatum tiku tlawanit talakgalhin limasiya pi nitlan limakgkatsi xtalakgalhin chu makgxtakga tuku nitlan xtlawama, tlan tunkun natamaknuparakan kcongregación (2 Cor. 2:6-8).
12. 1) ¿Tuku lu kuenta xlitlawatkan lakgkgolotsin akxni wi tiku namakgamakglhtinamparakgo kcongregación? 2) ¿Tuku xlakata ni kililakpuwanatkan pi Jehová nila katikatapatilh makgapitsi makglakgalhinanin? (Na kaʼakxilhti nota).
12 Min kilhtamaku lakgkgolotsin tlakg kuenta xlitlawatkan tiku namakgamakglhtinamparakgo kcongregación. Akgtum liʼakxilhtit, xlilakpuwanatkan komo uma lataman kalikgamanalh laktsu kamanan, apóstata litaxtulh o komo lakkaxwililh nalakxtlawa akgtum tamakgaxtokgat. Lakgkgolotsin liwana xlikatsitkan komo uma lataman xlikana nitlan limakgkatsi tuku nitlan tlawalh chu makgxtakgnita tuku nitlan xtlawama (Mal. 2:14; 2 Tim. 3:6). Xlakan xlikuentajtlawatkan putum congregación. Pero na kililakapastakatkan pi Jehová tlan natapati tiku xtlawama tuku nitlan komo xlikana nalimasiya pi nitlan limakgkatsi xtalakgalhin chu namakgxtakga tuku nitlan xtlawama. Wa xlakata maski lakgkgolotsin lu kuenta tlawakgo tiku namakgamakglhtinankgo kcongregación, ni xlilakpuwanatkan pi Jehová nila katikatapatilh makgapitsi makglakgalhinanin (1 Ped. 2:10). b
¿TUKU TLAN NATLAWA CONGREGACIÓN?
13. ¿Tuku kilitlawatkan akxni wi tiku stakyawakan o censurarlikan kcongregación, chu tuku kilitlawatkan akxni wi tiku tamakxtukan kcongregación?
13 Chuna la lichuwinaw kʼatanu artículo, akxni makatsininankan pi chatum lataman stakyawakanit o censurarlikanit, tlan chuntiya natachuwinanaw o natalalinaw xlakata katsiyaw pi nitlan limakgkatsinit xtalakgalhin chu makgxtakgnita tuku nitlan xtlawama (1 Tim. 5:20). Chuntiyaku makgtapakgsi kcongregación chu talakaskin pi natalan namakgpuwantinikgo xlakata chuntiya natlawa tuku tlan (Heb. 10:24, 25). Pero akxni makatsininankan pi chatum lataman tamakxtukanit kcongregación, talakaskin pi “nialh natalalinaw chu nipara natawayanaw” (1 Cor. 5:11).
14. Komo chatum tiku tamakxtukanit kcongregación naʼan ktamakxtumit, ¿tuku xlilaksakat natlawa chatunu kstalanina Cristo? (Na kaʼakxilhti dibujos).
14 ¿Wamputun uma pi nila katiwaniw tiku tamakxtukanit kcongregación pi kaʼalh ktamakxtumit o nila katipakgachipaw komo naʼan ktamakxtumit? Nichuna. Xlikana pi ni katitalaliw, pero komo tiku tamakxtuka chatum xalak kifamiliajkan o chatum tiku xtalalinaw, tlan nawaniyaw pi kaʼalh ktamakxtumit. Chu komo naʼan, ¿la nalikatsiniyaw? Makgasa xlakpuwanaw pi ni xlilat xwaniw tlen. Pero la uku chatunu kstalanina Cristo xlilaksakat tuku natlawa, chuna la nawani xtalakapastakni nema listakyawanit Biblia. Makgapitsi natalan laksakkgo napakgachipakgo chu nawanikgo pi tlan pi anit ktamakxtumit. Pero uma ni wamputun pi natakgalhchuwinankgo chu natsukuparakgo talalinkgo.
Chatunu kstalanina Cristo xlilaksakat, chuna la nawani xtalakapastakni, komo nawani chatum tiku tamakxtukanit kcongregación pi kaʼalh ktamakxtumit o komo napakgachipa akxni uma lataman naʼan ktamakxtumit (Kaʼakxilhti párrafo 14).
15. ¿Tiku kakilhchanima 2 Juan 9-11? (Na kaʼakxilhti recuadro « Talakgalhin nema lichuwinalh Juan, ¿xtachuna talakgalhin nema lichuwinalh Pablo?»).
15 Pero max wi tiku nalakpuwankgo: «¿Ni wan Biblia pi tiku tachuwinan uma lataman tataya tuku nitlan tlawama?» (kalikgalhtawakga 2 Juan 9-11). Putuminika tuku lichuwinan uma capítulo masiya pi uma wa kakilhchanima apóstatas chu tiku kamakgpuwantinikgo amakgapitsin natlawakgo tuku nitlan (Apoc. 2:20). Wa xlakata, komo chatum lataman chuntiya masiyama xtapuwan apóstatas chu kamakgpuwantinima amakgapitsin natlawakgo tuku nitlan, lakgkgolotsin ni katilakkaxwilikgolh nalakgapaxialhnankgo. Xlikana pi ni katilakpuwankgolh pi nikxnila katitalakgpalilh, pero xlakata uma lataman chuntiya tlawama tuku nitlan ni katitachuwinaw chu nipara kaj katiwaniw pi kaʼalh ktamakxtumit.
KALAKGALHAMANAW CHUNA LA JEHOVÁ
16, 17. 1) ¿Tuku lakaskin Jehová pi katlawakgolh tiku tlawakgonit akgtum lanka talakgalhin? (Ezequiel 18:32). 2) ¿La nalimasiyakgo lakgkgolotsin pi akxtum taskujkgo Jehová?
16 ¿Tuku katsininitaw kʼumakgolh akgkitsis artículos? Katsininitaw pi Jehová ni lakaskin pi wi tiku nalakgsputa (kalikgalhtawakga Ezequiel 18:32). Xla lakaskin pi tiku tlawakgonit akgtum talakgalhin kalakgtaspitkgolh (2 Cor. 5:20). Wa xlakata, lata makgasa Jehová makglhuwa kawaninit tiku tlawakgonit tuku nitlan pi kamakgxtakgkgolh tuku nitlan tlawamakgo chu kalakgtaspitkgolh. Lakgkgolotsin kgalhikgo talakgalhaman nataskujkgo Jehová chu namakgtayakgo chatum makglakgalhina namakgxtakga xtalakgalhin (Rom. 2:4; 1 Cor. 3:9).
17 Lhuwa tapaxuwan anan kʼakgapun akxni chatum makglakgalhina makgxtakga xtalakgalhin. Kintlatkan Jehová lu lipaxuwa akxni chatum tiku xtlawanit talakgalhin taspita kcongregación. Chuntiya kalilakpuwaw chuna la lakgalhamanan Jehová chu la kinkalimasiyaniyan tapaxkit nema ni kinkalakgchanan, xlakata uma natlawa pi tlakg napaxkiyaw (Luc. 1:78).
TAKILHTLIN 111 Wantuku kinkamakgapaxuwayan
a Maski kʼuma artículo maklakaskiw tachuwin «chixku tiku lixkajni likatsi», putum tuku lichuwinanitaw na kakilhchanima lakpuskatin.
b Chuna la wan Biblia, lataman tiku Dios nila tapati wa tiku tlawa talakgalhin chu nipara tsinu nitlan limakgkatsi o nipara tsinu lakpuwan pi natalakgpali. Komo chatum lataman chuna likatsi, kajwatiya Jehová chu Jesús kalakgchan natalakkaxlakgo (Mar. 3:29; Heb. 10:26, 27).
