1. ¿Tuku lakaskin Jehová?

 JEHOVÁ kamalakatsukilh latamanin xlakata xʼakstukan xlaksakkgolh tuku xtlawaputunkgolh. Chali chali maklakaskinaw uma tamaskiwin akxni wi tuku laksakaw. Tuku tlakg xlakaskinka laksaka chatum lataman, wa pi natamakamastani Jehová chu namakgtapakgsi kxfamilia. Jehová lakaskin pi putum latamanin kalaksakkgolh chuna natlawakgo. ¿Tuku xlakata? Xlakata kapaxki chu lakaskin pi tlan kakakitaxtunilh. Lakaskin pi tlan katalalinkgolh chu kalatamakgolh putum kilhtamaku (Deut. 30:​19, 20; Gál. 6:​7, 8).

2. ¿Tuku lakaskin Jehová pi katlawakgolh tiku tlawakgonit akgtum lanka talakgalhin chu nina makgxtakgkgo xtalakgalhinkan? (1 Juan 2:1).

² Jehová niti mafuerzajlini naskujnani, wata masta talakaskin pi chatunu nalaksaka tuku natlawa. Pero ¿tuku la akxni chatum kstalanina Cristo tlawa akgtum lanka talakgalhin? Komo ni makgxtakga xtalakgalhin, xlilat natamakxtukan kcongregación (1 Cor. 5:13). Pero maski chuna, Jehová lakaskin xliputum xnaku pi uma lataman kalakgtaspitli. Pulaktum tuku xlakata mastalh talakgmaxtut, wa pi tlan xkatapatilh tiku makgxtakgkgo xtalakgalhinkan (kalikgalhtawakga 1 Juan 2:1). KiDioskan lu xapaxkina, chu wa xlakata kamakgpuwantini tiku tlawakgonit akgtum talakgalhin pi kamakgxtakgkgolh  xtalakgalhinkan (Zac. 1:3; Rom. 2:4; Sant. 4:8).

3. ¿Tuku naʼakxilhaw kʼuma artículo?

³ Jehová lakaskin pi kaʼakxilhwi talakgalhin chuna la xla akxilha chu kakalikatsiniw tiku tlawakgo akgtum lanka talakgalhin chuna la xla kalikatsini. Uma artículo nakinkamakgtayayan nalikatsiyaw chuna la Jehová. Pulana nalichuwinanaw tuku tlawaka kxapulana siglo akxni chatum chixku tiku xtapakgsi kcongregación xalak Corinto tlawalh akgtum lanka talakgalhin. Alistalh nalichuwinanaw tuku kawanilh apóstol Pablo pi xtlawakgolh akxni uma chixku makgxtakgli xtalakgalhin. Chu xaʼawatiya, naʼakxilhaw la kaʼakxilha Jehová tiku tlawakgonit akgtum lanka talakgalhin.

TUKU TLAWAKA KXAPULANA SIGLO AKXNI CHATUM CHIXKU TLAWALH AKGTUM LANKA TALAKGALHIN

4. ¿Tuku xlama kcongregación xalak Corinto? (1 Corintios 5:​1, 2).

⁴ (Kalikgalhtawakga 1 Corintios 5:​1, 2). Akxni Pablo xlimakgtutu kilichuwinantapulilh Dios, katsilh pi wi tuku lu nitlan xlama kcongregación xalak Corinto: chatum kstalanina Cristo xtatalakgxtumima xtutse. Pablo lichuwinalh pi uma talakgalhin «nipara xalak alakatanu kachikinin» tiku ni xkakninanikgo Jehová chuna xtlawakgo. Congregación ni kajwatiya tlan xʼakxilha tuku xtlawama uma chixku, wata max na asta xlitlankajwanan. Max makgapitsin xlakpuwankgo pi uma xlimasiya pi Dios xalakgalhamana chu akgatekgsa pi latamanin makglakgalhinanin. Pero Jehová nipara tsinu lakgati pi xkachikin natlawa talakgalhin. Tuku xtlawama uma chixku xmamaxanima congregación. Chu max tuku nitlan xtlawama xkamapasilh natalan xalak congregación. Wa xlakata, ¿tuku kawanilh Pablo pi xlitlawatkan xwanit?

5. ¿Tuku katsokgnanilh congregación xalak Corinto, chu tuku xlakata chuna kawanilh? (1 Corintios 5:13; na kaʼakxilhti dibujo).

⁵ (Kalikgalhtawakga 1 Corintios 5:13). Dios malakpuwanilh Pablo xlakata xkatsokgnanilh pi xtamakxtuka kcongregación uma chixku tiku ni xmakgxtakgma xtalakgalhin. ¿La xtalakaskin xlikatsinikgolh natalan xalak congregación? Pablo kawanilh pi nialh xtalalinkgolh chu ni para kaj xtawayankgolh (1 Cor. 5:11). Akxni wi tiku tawayanaw, tsukuyaw tachuwinanaw chu tsinu tsinu tlakg limaxtuyaw kilhtamaku xlakata akxtum natatawilayaw. Wa xlakata, tuku Pablo xkamaʼakgatekgsniputun natalan xalak congregación wa pi nialh xtalalinkgolh uma chixku. Uma xmakgtayanalh xlakata congregación ni xkapasalh tuku nitlan xtlawama uma chixku (1 Cor. 5:​5-7).  Nachuna, max xmalakpuwanilh uma chixku pi nitlan xmamakgkatsininit Jehová, pi xlimaxanalh tuku nitlan xtlawanit chu xmakgxtakgli xtalakgalhin.

6. ¿La makgamakglhtinalh congregación tatsokgni nema Pablo kamalakgachanilh, chu tuku tlawalh chixku tiku xtlawama talakgalhin?

⁶ Akxni Pablo xkamalakgachaninita xtatsokgni congregación xalak Corinto, tsukulh lilakpuwan tuku xʼamakgo tlawakgo natalan xala anta. Ni lhuwa kilhtamaku titaxtulh, Tito wi tuku lu tlan makatsinilh: natalan tlan makgamakglhtinankgolh xtatsokgni chu xtlawakgonit tuku apóstol xkawaninit (2 Cor. 7:​6, 7). Nachuna, ni lhuwa kilhtamaku titaxtulh lata Pablo malakgachalh xtatsokgni, uma chixku tiku xtlawama talakgalhin, nitlan limakgkatsilh xtalakgalhin chu makgxtakgli. Lakgpalilh xtayat chu xtapuwan, chu tsukulh kgalhakgaxmata xlimapakgsin Jehová (2 Cor. 7:​8-11). ¿Tuku xʼama kawani Pablo congregación pi xtlawakgolh?

 ¿LA XTALAKASKIN XLIKATSINIKGOLH CONGREGACIÓN CHIXKU TIKU XMAKGXTAKGNIT XTALAKGALHIN?

7. ¿Tuku tlan kitaxtulh xlakata tamakxtuka kcongregación tiku xtlawama talakgalhin? (2 Corintios 2:​5-8).

⁷ (Kalikgalhtawakga 2 Corintios 2:​5-8). Pablo wa: «Tlantiya chuna la mimputumkan palha stakyawanitantit ama chixku». Tuku Pablo xwamputun wa pi tastakyaw nema maxkika uma chixku tlan kitaxtulh: nitlan limakgkatsilh xtalakgalhin chu makgxtakgli (Heb. 12:11).

8. ¿Tuku kawanilh apóstol Pablo pi xtlawakgolh natalan xalak congregación?

⁸ Alistalh Pablo kawanilh la xlikatsinikgolh tala tiku xmakgxtakgnit xtalakgalhin: «Xliputum minakujkan katapatitit chu tlan kamamakgkatsinitit». Chu kawanipa: «Kkastakyawayan pi kalimasiyanitit pi paxkiyatit». Pablo ni kajwatiya xlakaskin pi xmaxkikgolh talakaskin pi xtaspitpa kcongregación, wata na xlimasiyanikgolh pi xlikana xtapatikgonit chu xpaxkikgo. Komo chuna xtlawakgolh, uma chixku tiku xmakgxtakgnit xtalakgalhin, xʼakxilhli pi natalan xlipaxuwakgo xlakata xla xtaspitnit.

9. ¿Tuku xlakata max makgapitsi tuwa makgkatsikgolh natapatikgo chixku tiku xmakgxtakgnita xtalakgalhin?

⁹ Maski Biblia ni lichuwinan, max makgapitsi natalan tuwa makgkatsikgolh xatapaxuwan namakgamakglhtinankgo uma chixku tiku xmakgxtakgnita xtalakgalhin. ¿Tuku xlakata? Xlakata tuku xtlawanit, xmamaxaninit putuminika congregación. Chu max xwilakgo makgapitsi tiku xkatlawaninit tuku nitlan. Max makgapitsin xlakpuwankgo pi ni xlilat xmakgamakglhtinanka uma chixku tiku xtlawanit tuku lu nitlan, xlakata xlakan lu xliskujkgonit nakgalhakgaxmatkgo xlimapakgsin Jehová (katamalakxtupi Lucas 15:​28-30). Pero ¿tuku xlakata lu xlakaskinka xwanit pi xlimasiyanikgolh tapaxkit uma tala tiku xtaspitnit kcongregación?

10, 11. ¿Tuku max xkitaxtulh komo lakgkgolotsin ni xtapatiputunkgolh chixku tiku xmakgxtakgnita xtalakgalhin?

¹⁰ ¿Tuku xkitaxtulh komo lakgkgolotsin ni xmaxkikgolh talakaskin uma chixku nataspita kcongregación o komo natalan ni xlimasiyanikgolh tapaxkit? Max uma chixku tiku xmakgxtakgnita xtalakgalhin lu “xlipuwa asta nialhla xtayanilh”. Chu asta nialh xliskujli xlakata tlan xtalalimpa Jehová.

¹¹ Chu ni kajwatiya uma. Komo natalan xalak congregación ni xtapatiputunkgolh, na xlaktlawakgolh chuna la xtalalinkgo Jehová. ¿Tuku xlakata? Xlakata ni xlikatsikgolh chuna la Jehová, tiku xatapaxuwan katapati tiku makgxtakgkgo xtalakgalhinkan, wata xlikatsikgolh chuna la Satanás, tiku lixkajni likatsi chu ni lakgalhamanan. Akgskgawini tlan xkamaklakaskilh xlakata uma chixku nialhla xmatliwakglhli xtakanajla (2 Cor. 2:​10, 11; Efes. 4:27).

12. ¿La tlan xlimasiyalh congregación xalak Corinto pi xlikatsi chuna la Jehová?

¹² ¿La tlan xlimasiyalh congregación xalak Corinto pi xlikatsikgo chuna la Jehová chu nichuna la Satanás? Xtalakaskin xlikatsikgolh chuna la Jehová kalikatsini tiku makgxtakgkgo xtalakgalhinkan. Kalilakpuwaw tuku wankgolh xpalakata Jehová makgapitsi tiku tsokgwilikgolh Biblia. David wa: «Tlan likatsiya chu lu tapatinamputuna» (Sal. 86:5). Miqueas tsokgwililh: «¿Tiku Dios likatsi chuna la wix, tiku tapatinan tuku nitlan tlawakanit [...]?» (Miq. 7:18). Nachuna, Isaías wa: «Tiku nitlan likatsi kamakgxtakgli xtiji chu chixku tiku nitlan tuku tlawa kamakgxtakgli xtalakapastakni; kalakgtaspitli Jehová, tiku nalakgalhaman, kalakgtaspitli kiDioskan, xlakata xla lu tapatinan» (Is. 55:7).

13. ¿Tuku xlakata xlilat xwanit xmakgamakglhtinanka uma chixku kcongregación? (Kaʼakxilhti recuadro « ¿Tuku kilhtamaku makgamakglhtinanka kcongregación chixku xalak Corinto?»).

 ¹³ Xlakata congregación xalak Corinto xlimasiyalh pi xlikatsi chuna la Jehová, xtalakaskin pi xatapaxuwan xmakgamakglhtinankgolh chixku tiku xmakgxtakgnita xtalakgalhin chu xlimasiyanikgolh pi lu xpaxkikgo. Pablo wa pi komo xtapatikgolh uma chixku, xlimasiyakgolh pi “xkgalhakgaxmatkgo putum tuku xkawaninit” (2 Cor. 2:9). Xlikana pi nina lhuwa papaʼ xtitaxtunit lata xtamakxtukanit congregación, pero tastakyaw nema maxkika makgtayalh nalakgmakgan xtalakgalhin. Wa xlakata ni xtalakaskin pi lakgkgolotsin xkgalhkgalhikgolh lhuwa kilhtamaku xlakata xmaxkikgolh talakaskin nataspita kcongregación.

TUKU KINKAMASIYANIYAN XTALAKGALHAMAN JEHOVÁ CHU CHUNA LA TLAWA TUKU XAʼAKGSTITUM

14, 15. ¿Tuku kinkamasiyaniyan chuna la lakkaxtlawaka akxni chatum chixku xalak Corinto tlawalh akgtum lanka talakgalhin? (2 Pedro 3:9; na kaʼakxilhti dibujo).

¹⁴ Jehová tlawalh pi xtsokgwilika kxTachuwin tuku lalh kcongregación xalak Corinto “xlakata wi tuku nakinkamasiyaniyan” (Rom. 15:4). Tuku lalh masiya pi Jehová ni lakgati pi xkachikin natlawa laklanka talakgalhin. Makgapitsi lakpuwankgo pi xlakata xla xalakgalhamana, masta talakaskin pi tiku tlawama talakgalhin chuntiya namakgtapakgsi  kcongregación. Pero uma ni xlikana. Jehová xalakgalhamana, pero ni masta talakaskin pi nalakatsalakan xlimapakgsin o nialh xlakaskinka naliʼakxilhkan (Jud. 4). Chu komo Jehová xmastalh talakaskin pi tiku tlawama talakgalhin chuntiya xmakgtapakgsilh kxkachikin, ni xlimasiyalh pi xla xalakgalhamana xlakata uma xlaktlawalh putuminika congregación (Prov. 13:20; 1 Cor. 15:33).

¹⁵ Tuku lalh kCorinto, na kinkamasiyaniyan pi Jehová ni lakaskin pi wi tiku nalakgsputa. Xla lakaskin pi putum latamanin kalakgtaxtukgolh. Kalimasiyani talakgalhaman tiku lakgpalikgo xtapuwankan chu lu liskujkgo xlakata tlan natalalimparakgo (Ezeq. 33:11; kalikgalhtawakga 2 Pedro 3:9). Wa xlakata, akxni chixku xalak Corinto nitlan limakgkatsilh xtalakgalhin chu makgxtakgli tuku nitlan xtlawama, Jehová maklakaskilh Pablo xlakata xkawanilh congregación pi xtapatikgolh chu xatapaxuwan xmakgamakglhtinamparakgolh.

16. ¿Tuku kinkamakgpuwantiniyan natlawayaw akxni lilakpuwanaw la likatsinika chixku tiku xtlawanit talakgalhin kcongregación xalak Corinto?

¹⁶ Tuku katsininitaw tuku lalh kcongregación xalak Corinto kinkamakgtayanitan naʼakxilhaw pi Jehová xapaxkina chu xaʼakgstitum tuku tlawa (Sal. 33:5). Akxni lilakpuwanaw xtayat kiDioskan, kinkamakgtayayan tlakg namalankiputunaw, xlakata katsiyaw pi putum akinin makglakgalhinanin chu lakaskinaw pi kakinkatapatikan. Lu paxtikatsiniyaw Jehová xlakata talakgmaxtut nema tlawa pi tlan nakinkatapatikanan kintalakgalhinkan. Lu tlan limakgkatsiyaw xlakata katsiyaw pi Jehová xlikana kapaxki kskujnin chu lakaskin pi tlan kakakitaxtunilh.

17. ¿Tuku nalichuwinanaw kʼatanu artículos?

¹⁷ ¿Chu tuku tlawakan la uku? Komo wi tiku tlawa akgtum lanka talakgalhin, ¿tuku tlan natlawakgo lakgkgolotsin xlakata nastalanikgo xliʼakxilhtit Jehová chu namakgtayakgo tiku tlawama talakgalhin nitlan nalimakgkatsi tuku tlawama chu namakgxtakga? ¿Chu tuku kilitlawatkan akxni lakgkgolotsin lakkaxwilikgo pi wi tiku natamakxtukan kcongregación o namakgamakglhtinamparakan? Naʼakxilhaw xatakgalhtin umakgolh takgalhskinin kʼatanu artículos.