1, 2. 1) ¿Tuku talakgalhin, chu la tlan namakgatlajayaw? (Na kaʼakxilhti niku wan «Tuku lu xlakaskinka»). 2) ¿Tuku nalichuwinanaw kʼuma artículo chu kʼatanu artículos nema limin uma revista? (Na kaʼakxilhti «Tuku kawanikan tiku likgalhtawakgakgo» nema min kʼuma revista).

 ¿KATSIPUTUNA la xlilhuwa paxkiyan Jehová? Xlakata tlan nakatsiya, talakaskin nalakputsananiya tuku xla tlawanit xlakata nalakgmaxtuyan ktalakgalhin chu klinin. Talakgalhin a xtachuna la chatum talatlawana tiku nipara chatum akinin tlan kiʼakstukan xmakgatlajaw. Putum latamanin chali chali tlawayaw tuku nitlan, makglakgalhinanin akinin chu wa xlakata niyaw (Rom. 5:12). Pero anan xatlan tamakatsinin: liwana katsiyaw pi xlakata Jehová nakinkamakgtayayan tlan namakgatlajayaw talakgalhin.

² Titaxtunita max 6,000 kata lata Jehová kamakgtayama latamanin natalatlawakgo talakgalhin. ¿Tuku xlakata chuna tlawa? Xlakata lu kinkapaxkiyan. Lata kamalakatsukilh latamanin lu kapaxkinit, chu wa xlakata lhuwa tuku tlawanit xlakata nakamakgtaya natalatlawakgo talakgalhin. Dios katsi pi talakgalhin linan klinin chu xla ni lakaskin pi nipara chatum nani, wata lakaskin pi kalatamaw putum kilhtamaku (Rom. 6:23). Chu Jehová lakaskin pi wix nalatapaya putum kilhtamaku. Kʼuma artículo nakgalhtiyaw akgtutu takgalhskinin: 1) ¿tuku tlawalh Jehová xlakata xkinkamaxkin akgtum takgalhkgalhin?, 2) ¿tuku xtlawakgo latamanin xalamakgasa xlakata xmakgapaxuwakgolh Jehová chu tlan xtalalinkgolh maski makglakgalhinanin xwankgonit?  chu 3) ¿tuku tlawalh Jesús xlakata xkalakgmaxtulh latamanin ktalakgalhin chu kkalinin?

¿TUKU TLAWALH JEHOVÁ XLAKATA XKINKAMAXKIN AKGTUM TAKGALHKGALHIN?

3. ¿Tuku xlakata Adán chu Eva makglakgalhinanin litaxtukgolh?

³ Akxni Jehová kamalakatsukilh Adán chu Eva, xlakaskin pi xpaxuwakgolh. Wa xlakata kawililh niku kalilakgatit xwanit, kamamakgaxtokgli chu kamaxkilh akgtum lu stlan taskujut, xmalakgatsamakgolh Katiyatni chu akgtum paraíso xtlawakgolh chuna la xwanit jardín xaʼEdén. Kajwatiya kawanilh pulaktum tuku ni xlitlawatkan xwanit chu kawanilh pi komo ni xkgalhakgaxmatkgolh, xʼamakgo nikgo. Putum akinin katsiyaw tuku lalh: chatum ángel tiku nitlan xlikatsi, tiku ni xpaxki Jehová chu ni xkapaxki Adán chu Eva, kaʼakgskgawilh chu tlawalh pi xmakglakgalhinankgolh. Xlakan ni lipawankgolh xapaxkina xTlatkan, wata tlawakgolh tuku kawanilh uma ángel chu makglakgalhinankgolh. Xlakata Adán chu Eva ni kgalhakgaxmatnankgolh, kgantaxtulh tuku Jehová xkawaninit. Lata ama kilhtamaku, Adán chu Eva tsukukgolh kgolonkgo chu nikgolh (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Tuku xlakata Jehová xkajni talakgalhin, chu tuku xlakata kinkamakgtayayan natalatlawayaw? (Romanos 8:​20, 21).

⁴ Putum uma tuku lichuwinamaw lu nitlan, pero Jehová matsokgninalh kBiblia xlakata naʼakgatekgsaw tuku xlakata lu xkajni talakgalhin. Talakgalhin tlawa pi natamakgatliniyaw kinTlatkan chu kinkalinan kkalinin (Is. 59:2). Wa uma tuku xlakata Satanás paxki talakgalhin, chu wa xlakata kaʼakgskgawilh Adán chu Eva chu chuntiya kinkaʼakgskgawiputunan akinin. Max akxni kaʼakgskgawilh Adán chu Eva kjardín xaʼEdén, Satanás lakpuwa pi xlaktlawayawanit tuku Jehová xlakpuwanit xpalakata latamanin. Pero ni xʼakgatekgsa la xlilhuwa kapaxki Jehová latamanin. Dios nikxni lakgpalilh tuku xlakpuwanit xpalakata xkamanan Adán chu Eva. Xla lu kapaxki latamanin chu wa xlakata lakapala wi tuku tlawalh xlakata xkamaxkilh akgtum takgalhkgalhin (kalikgalhtawakga Romanos 8:​20, 21). Jehová xkatsi pi makgapitsin latamanin xʼamakgo paxkikgo chu xʼamakgo putsakgo xtamakgtay xlakata xmakgatlajakgolh talakgalhin. Chu xlakata Jehová wa Malakatsukina chu chatum xatlan Tlat, xla xʼama kamakgtaya latamanin xlakata xtalakatsuwinikgolh chu xmakgatlajakgolh talakgalhin chu linin. ¿Pero tuku xʼama tlawa?

5. ¿Tuku tlawalh Jehová xlakata xkamaxkilh takgalhkgalhin latamanin? (Génesis 3:15).

⁵ (Kalikgalhtawakga Génesis 3:15). Jehová tunkun wa tuku xʼama akgspula Satanás, chu chuna kamaxkilh akgtum takgalhkgalhin latamanin. Lichuwinalh pi «xkam» puskat xʼama aktayami Satanás chu xʼama lakkaxtlawa putum tuku nitlan tlawalh Satanás kjardín xaʼEdén (1 Juan 3:8). Pero xKam uma puskat na xʼama patinan xlakata Satanás xʼama makgni. Uma lu xʼama makgalipuwan Jehová, pero xla xkatsi pi maski lu nitlan xlimakgkatsilh uma, lu tlan xʼama kitaxtu xlakata chuna tlan xkalakgmaxtuka lhuwa latamanin ktalakgalhin chu klinin.

¿TUKU XTLAWAKGO TIKU XALA MAKGASA XLAKATA TLAN XMAKGAPAXUWAKGOLH DIOS?

6. ¿Tuku tlawakgolh makgapitsi lakchixkuwin chuna la Abel chu Noé xlakata tlan xtalalinkgolh Jehová?

⁶ ¿Tuku tlan xtlawakgolh latamanin xlakata tlan xtalalinkgolh Jehová maski makglakgalhinanin litaxtukgo? Chuna la titaxtulh kilhtamaku Jehová tsinu tsinu lichuwinantilhalh tuku tlan xtlawakgolh. Akxni Adán chu Eva xtatalakatawakakgonita Jehová, xapulana lataman tiku limasiyalh pi xkanajlani Jehová wa Abel, xlichatiy xkgawasakan Adán chu Eva. Abel xpaxki Jehová, xmakgapaxuwaputun  chu tlan xtalalimputun. Wa xlakata tlawanilh tamakamastan. Xlakata Abel xkakuentajtlawa borregos, makamaxkilh Jehová «xanapuxkun xborregos». ¿Chu la akxilhli Jehová? «Makgamakglhtinalh Abel chu xtamakamastan» (Gén. 4:4). Alistalh, Jehová na makgamakglhtinalh tamakamastan nema tlawanikgolh latamanin tiku xpaxkikgo chu xlipawankgo, chuna la Noé (Gén. 8:​20, 21). Uma limasiyalh pi latamanin tlan xmakgapaxuwakgolh chu xtalalinkgolh Jehová, b maski makglakgalhinanin xwankgonit.

7. Xlakata Abrahán xʼama makamasta xkgawasa, ¿tuku kinkamasiyaniyan uma?

⁷ Atanu chixku tiku limasiyalh takanajla wa Abrahán. Jehová skinilh Abrahán pi xtlawalh tuku lu tuwa: xmakamastalh xkgawasa, Isaac. Abrahán max lu tuwa makgkatsilh natlawa uma. Maski chuna, xatapaxuwan kgalhakgaxmatnalh. Akxni xʼamaja makgni xkgawasa, Jehová malakgachokgolh. Pero tuku xʼama tlawa wi tuku lu xlakaskinka kamasiyani putum tiku kgalhikgo takanajla: Jehová xatapaxuwan xʼama makamasta xKgawasa xlakata lu kapaxki latamanin (Gén. 22:​1-18).

8. ¿Tuku limasiyakgolh tamakamastan nema kskin Limapakgsin nema maxkika Moisés? (Levítico 4:​27-29; 17:11).

⁸ Akxni xtitaxtunita akglhuwa ciento kata, akxni Jehová kamaxkilh Limapakgsin israelitas, kawanilh pi xtalakaskin xmakamastakgolh animales xlakata xkatapatika xtalakgalhinkan (kalikgalhtawakga Levítico 4:​27-29; 17:11). Umakgolh tamakamastan limasiyakgolh pi Jehová xʼama tlawa tlakg xatlan tamakamastan xlakata makgtuminika xkalakgmaxtulh latamanin ktalakgalhin. Dios kamaklakaskilh xpalakachuwinanin xlakata xlichuwinankgolh pi xKam puskat nema xlichuwinankanit pi xʼama min, xachastum xKgawasa Dios, xʼama patinan chu xʼama niy. Xʼamaka makamastakan chuna la tantum borrego (Is. 53:​1-12). Kalilakpuwanti: Jehová xʼama makamasta xKgawasa tiku tlakg xpaxki xlakata xkinkalilakgmaxtun ktalakgalhin chu klinin.

¿TUKU TLAWALH JESÚS XLAKATA XKALAKGMAXTULH LATAMANIN?

9. ¿Tuku lichuwinalh Juan Mununa? (Hebreos 9:22; 10:​1-4, 12).

⁹ Kkata 29, akxni Juan Mununa akxilhli Jesús xalak Nazaret, wa: «¡Kaʼakxilhti, xBorrego Dios, tiku xapa xtalakgalhinkan latamanin!» (Juan 1:29). Tuku wa Juan limasiyalh pi Jesús wa xKam puskat nema Dios xwanit pi xʼama min. Jesús xʼama makamasta xlatamat, chu chuna latamanin xgalhikgolh takgalhkgalhin pi xmakgatlajakgolh talakgalhin chu linin (kalikgalhtawakga Hebreos 9:22; 10:​1-4, 12).

10. ¿La limasiyalh Jesús pi wa milh katasani tiku tlawakgo talakgalhin?

¹⁰ Jesús lu xkalilakgaputsa tiku lu nitlan xlimakgkatsikgo xtalakgalhinkan chu xkawani pi kstalanikgolh. Xkatsi pi talakgalhin wa tuku tlawa pi latamanin napatinankgo. Wa xlakata ni xkgalhkgalhi pi latamanin xtalakatsuwinikgolh, wata xla xkatalakatsuwini lakchixkuwin chu lakpuskatin tiku xkalilakgapaskan xlakata xtlawakgonit talakgalhin. Jesús wa: «Latamanin tiku ni tatatlakgo ni maklakaskinkgo makuchina, pero tiku tatatlakgo maklakaskinkgo makuchina». Chu wampa: «Ni kminit katasani tiku xaʼakgstitum, wata wa tiku tlawakgo talakgalhin» (Mat. 9:​12, 13). Chu tuku tlawalh limasiyalh pi umakgolh tachuwin xlikana. Akgtum liʼakxilhtit, limasiyanilh talakgalhaman chu tapatilh puskat tiku lituchakgelh xlakgaxtajat (Luc. 7:​37-50). Chu maski xkatsi pi samaritana tiku tatanokglhli kpozo xtlawama talakgxtumit nema ni xlitatlawat, masiyanilh tuku lu xlakaskinka  nema xmin kTatsokgni (Juan 4:​7, 17-19, 25, 26). Linin wa tuku kitaxtu xlakata makglakgalhinanin akinin, pero Jehová maxkilh litliwakga Jesús xlakata xkamalakastakwanilh lakchixkuwin, lakpuskatin chu kamanan (Mat. 11:5).

11. ¿Tuku xtlawa pi latamanin tiku xtlawakgonit talakgalhin xtalakatsuwiniputunkgolh Jesús?

¹¹ Asta latamanin tiku xtlawakgonit laklanka talakgalhin xtalakatsuwiniputunkgo Jesús. Chu chuna xtlawaputunkgo xlakata xla xkalimasiyani pi xkaʼakgatekgsni chu xkalakgalhaman (Luc. 15:​1, 2). Nachuna, akxni xlimasiyakgo pi xkanajlanikgo, Jesús xkawani pi lu tlan tuku xtlawamakgo chu tlan xkalikatsini (Luc. 19:​1-10). Jesús liwana limasiyalh pi xlakgalhamanan chuna la xTlat (Juan 14:9). Tuku xtlawa chu tuku xwan, kinkamasiyaniyan pi Jehová kinkapaxkiyan chu lu xalakgalhamana, chu kinkamakgtayaputunan xlakata namakgatlajayaw talakgalhin. Jesús xtlawa pi tiku xtlawakgonit talakgalhin xtalakgpaliputunkgolh chu kstalaniputunkgolh (Luc. 5:​27, 28).

12. ¿Tuku masiyalh Jesús xlakata xlinin?

¹² Jesús liwana xkatsi tuku xʼama akgspula. Makglhuwa kawanilh xtamakgalhtawakgen pi xʼamaka stamakgankan chu xʼamaka xtokgowakakan kkiwi (Mat. 17:22; 20:​18, 19). Na xkatsi pi xtamakamastan xʼama xapa xtalakgalhinkan latamanin, chuna la lichuwinankgolh Juan chu palakachuwinanin. Nachuna, masiyalh pi xtamakamastan xʼama tlawa pi «latamanin tiku tanu tanu xlakatsukutkan» xtalakatsuwikgolh (Juan 12:32). Tiku  xlimasiyakgolh pi xkanajlanikgo Jesús chu kstalanikgolh xliʼakxilhtit, tlan xmakgapaxuwakgolh Jehová chu chuna tlan “xkalakgmaxtuka xlakata nialh xlakskujnin talakgalhin xlitaxtukgolh” (Rom. 6:​14, 18, 22; Juan 8:32). Xlakata tlan xkinkalakgmaxtun, Jesús ni pekualh chu xatapaxuwan makamastalh xlatamat maski lu makgapatinanka (Juan 10:​17, 18).

13. ¿Tuku tlawanika Jesús, chu tuku kinkamasiyaniyan xlinin xlakata Jehová? (Na kaʼakxilhti dibujos).

¹³ Jesús stamakganka, chipaka, wanika laklixkajni tachuwin, limawakaka tuku ni xlikana chu makgapatinanka. Alistalh, soldados xtokgowakakgolh kkiwi xlakata xmakgnikgolh. Jesús tayanilh putum uma tuku patilh, chu Jehová lu katsanilh akxni akxilhli putum tuku xtitaxtuma xKgawasa. Maski lu xpaxki chu xkgalhi litliwakga xlakata xmakgtayalh, nichuna tlawalh. ¿Tuku xlakata? Xlakata kapaxkilh latamanin. Jesús wa: «Dios lu kapaxkilh latamanin xalak kakilhtamaku, wa xlakata mastalh kaj xachastum xKgawasa, xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni» (Juan 3:16).

14. ¿Tuku masiyaniyan xtamakamastan Jesús?

¹⁴ Xtamakamastan Jesús wa tuku tlakg limasiya la xlilhuwa kapaxki Jehová putum xkamanan Adán chu Eva. Chuna limasiya la xlilhuwa paxkiyan wix. ¿La limakgkatsiya akxni lilakpuwana tuku Dios xatapaxuwan tlawalh chu lipatinalh xlakata tlan xlakgmaxtun ktalakgalhin chu klinin? (1 Juan 4:​9, 10). Xla kinkamakgtayaputunan putum akinin natalatlawayaw talakgalhin chu namakgatlajayaw.

15. ¿Tuku kilitlawatkan xlakata tlan nalitamakgtayayaw xtamakamastan Jesús?

¹⁵ Akxni Dios makamastalh xachastum xKgawasa kinkamaxkin akgtum tamaskiwin nema tlawa pi tlan nakinkatapatikanan kintalakgalhinkan. Pero talakaskin pi wi tuku natlawayaw. Juan Mununa chu Jesucristo lichuwinankgolh tuku kilitlawatkan: «Kamakgxtakgtit mintalakgalhinkan, xlakata Tamapakgsin xalak akgapun talakatsuwinit» (Mat. 3:​1, 2; 4:17). Wa xlakata, komo talatlawaputunaw talakgalhin chu talakatsuwiniputunaw xapaxkina kinTlatkan xalak akgapun, lu xlakaskinka pi namakgxtakgaw kintalakgalhinkan. Pero ¿tuku kilhchanima namakgxtakgaw kintalakgalhinkan, chu la kinkamakgtayayan uma namakgapaxuwayaw Jehová maski makglakgalhinanin akinin? Kʼatanu artículo nema nalikgalhtawakgayaw nalichuwinanaw uma.