Apóstol Pablo kawanilh kstalaninanin Cristo xalak Tesalónica: «Komo wi tiku ni kgalhakgaxmata tuku kkawaninitan kʼuma tatsokgni, kuenta kakatlawakantit xpalakata uma lataman» (2 Tes. 3:14). Xapulana xlakpuwanaw pi wa lakgkgolotsin xkalakgchan xmakatsinikgolh congregación pi kuenta xlitlawatkan ni xtalalinkgolh tiku ni xkgalhakgaxmatnama. Komo wi tiku ni xkgalhakgaxmata xtastakyaw Biblia maski makglhuwata xwanikanit, lakgkgolotsin tlan xmastakgo akgtum taʼakgchuwin niku xkamakatsinikgo congregación pi kuenta xtlawakgolh chu nialh xtalalinkgolh tiku chuna xtlawama. Lata ama kilhtamaku natalan nialh xtalalinkgo uma tala, kajwatiya tlan xtachuwinankgo ktamakxtumit o akxni xʼankgo lichuwinankgo Dios.

Pero la uku akgatekgsaw pi xtastakyaw Pablo kilhchanima pi chatunu natalan xlilaksakatkan chuna natlawakgo. Wa xlakata ni talakaskin pi lakgkgolotsin namastakgo akgtum taʼakgchuwin niku namakatsininankgo xlakata uma. ¿Tuku xlakata nialh chuna katitlawaka? Kalichuwinaw tuku apóstol Pablo xlichuwinama kputuminika uma capítulo.

Pablo wa pi kcongregación xʼanankgo natalan tiku “ni xkgalhakgaxmatnankgo”. Ni xkgalhakgaxmatkgo xtastakyaw Dios nema xla xkalitachuwinanit. Akgtum xliʼakxilhtit, akxni kakilakgapaxialhnalh kawanilh: «Komo wi tiku ni skujputun, na ni kawayalh». Pero makgapitsin chuntiya ni kskujputunkgo, maski tlan chuna xtlawakgolh. Na xmakgtanumakgo kxlatamatkan amakgapitsin, maski nichuna xlitlawatkan xwanit. ¿La xtalakaskin xkalikatsinikgolh natalan umakgolh tiku ni xkgalhakgaxmatnankgo? (2 Tes. 3:​6, 10-12).

Pablo wa: «Kuenta kakatlawakantit xpalakata uma lataman». Tachuwin xagriego nema maklakaskinka kʼuma versículo maʼakgatekgsninan pi kilikatsitkan tiku ni kgalhakgaxmatnama, chu kuenta kilitlawatkan xlakata ni nakinkamapasiyan nixatlan xtapuwan. Uma tastakyaw xlimakgantaxtitkan xwanit putuminika congregación (2 Tes. 1:1; 3:6). Wa xlakata, komo chatum tala xʼakxilha pi achatum tala ni xkgalhakgaxmatma xtastakyaw Biblia, xʼakstu xlilaksakat xwanit nialh xtalalilh uma tala.

¿Xwamputun uma pi nachuna xlikatsinikgolh chuna la xlikatsinikgo tiku xtamakxtukanit kcongregación? Nichuna, xlakata Pablo lichuwinalh: «Chuntiya kastakyawatit chuna la chatum tala». Wa xlakata chatunu kstalanina Cristo tlan xtachuwinalh ktamakxtumit o akxni xʼankgolh lichuwinankgo Dios, pero ni xʼama limaxtu kilhtamaku xlakata wi tuku akxtum xtlawakgolh xlakata nalipaxuwakgo. Chu Pablo lichuwinalh tuku xlakata chuna xlitlawatkan xwanit: «Xlakata chuna namaxanan». Komo nialh xtalalinkgolh tiku ni xkgalhakgaxmatnan, max xlimaxanalh xtayat chu xtalakgpalilh (2 Tes. 3:​14, 15).

¿Chu akinin, la tlan namakgantaxtiyaw uma tastakyaw la uku? Pulana liwana kilikatsitkan komo uma tala xlikana “ni kgalhakgaxmatnama”, chuna la wa Pablo. Xla ni xkalichuwinama natalan tiku ni watiya laksakkgo tuku akinin laksakaw xlakata tanu tanu la wi kintalakapastaknikan chu ni lakxtum tuku lakgatiyaw. Chu na ni wa xkalichuwinama tiku kinkatlawanikgon o kinkawanikgon tuku nitlan kinkamamakgkatsinin. Wata wa xkalichuwinama natalan tiku kalistakyawaka Biblia, pero xlakan chuntiya ni kgalhakgaxmatnamputunkgo.

Komo naʼakxilhaw pi chatum tala ni kgalhakgaxmatma xtastakyaw Biblia, a kiʼakstukan nalaksakaw nialh natalalinaw o nialh nalimaxtuyaw kilhtamaku wi tuku akxtum natatlawayaw xlakata natapaxuwayaw. Xlakata chatunu akinin kinkalakgchanan nalaksakaw tuku natlawayaw, ni xlilat nakawaniyaw tiku ni xalak kinchikkan tuku laksaknitaw natlawayaw. Chu kajwatiya natachuwinanaw uma tala ktamakxtumit chu akxni anaw lichuwinanaw Dios. Komo nalakgpali xtayat, tlan natsukuparayaw talalinaw.