1, 2. 1) ¿La latatalakxtumi tapaxkit chu takanajla? 2) ¿Tuku takgalhskinin nakgalhtiyaw?

JEHOVÁ kinTlatkan wan pi nakasikulunatlawa kskujnin tiku ni makgxtakgkgo. Chuna kinkalimasiyaniyan xtapaxkit. Chu akinin paxkiyaw Dios «sampi pulh wa nkinkapaxkin» (1 Juan 4:19). Tapaxkit akxtum talanit takanajla. Komo tlakg napaxkiyaw Dios, tlakg tliwakga nawan kintakanajlakan nema kgalhiniyaw chu tlakg liwana nakanajlayaw pi Jehová nakasikulunatlawa tiku kapaxki (kalikgalhtawakga Hebreos 11:6).

² Jehová kasikulunatlawaputun kskujnin. Wa uma tayat nema kgalhi chu chuna likatsi. Chu talakaskin liwana nakanajlayaw pi Jehová nakasikulunatlawa tiku putsakgo xliputum xnakujkan xlakata kintakanajlakan xatakgatsin nawan. ¿Tuku xlakata chuna wanaw? Xlakata «ntakanajla, wa ntu aktanks likatsiyaw xpalakata makgapitsin ntu ni tasiyuj» (Heb. 11:1). Kgalhikan takanajla wamputun lipawankan pi Dios nakasikulunatlawa tiku ni makgxtakgkgo. ¿La kinkamakgtayayan xlakata katsiyaw pi namakglhtinanaw tasikulunalin? ¿La kasikulunatlawalh  kskujnin xala makgasa? ¿La tlawa la uku? Ka’akxilhwi.

3. ¿Tuku tamalaknun kinkawaniyan Dios kMalaquías 3:10?

³ Jehová wanit pi nakasikulunatlawa kskujnin tiku ni makgxtakgkgo. Xla kinkawaniyan pi nakinkasikulunatlawayan komo namaxkiyaw tuku tlakg xatlan nema kgalhiyaw. Jehová kinkawaniyan «kakiliʼakxilhtit uma, katlawatit litlan» chu alistalh na wa: «komo ni nakkamalakkiniyan akgapun chu nakkamakaniyan akgtum tasikulunalin asta akxni nialhtu nakatsankganiyan» (Mal. 3:10). Akxni makgamaklhtinanaw xʼinvitación, limasiyayaw pi paxtikatsiniyaw Dios.

4. ¿Tuku xlakata tlan nakanajlayaw tuku wa Jesús kMateo 6:33?

⁴ Jesús kawanilh kstalaninanin pi Dios x’ama kamaxki putum tuku xmaklakaskinkgolh komo pulana xwilikgolh Tamapakgsin kxlatamatkan (kalikgalhtawakga Mateo 6:33). Jesús chuna kawanilh xlakata xkatsi pi Dios putum makgantaxti tuku wan (Is. 55:11). Chu akinin na tlan nakanajlaniyaw. Komo nalimasiyaniyaw kintakanajlakan Jehová, namakgantaxti uma xtachuwin: «Akit nikxni ktimakgxtakgni» (Heb. 13:5, Traducción del Nuevo Mundo). Uma tamalaknun kinkamakgtayayan nakanajlayaw tuku wa Jesús kMateo 6:33.

5. ¿Tuku xlakata kinkamatliwakglhan takgalhtin nema Jesús maxkilh Pedro?

⁵ Pedro kgalhskilh Jesús: «Nkin, paks kmakgaxtakgnitaw  lantla kkastalaninitan, pus ¿xatu ya kintaskgawkan nakinkamaxkikanan alistalh?» (Mat. 19:27). Jesús ni kilhnilh Pedro xlakata tlawanilh uma takgalhskinin. Wata kawanilh kstalaninanin pi Jehová x’ama kasikulunatlawa xlakata tuku xtlawakgolh. Xlikana pi kkilhtamaku nema aku mima, apóstoles chu amakgapitsi kstalaninanin Cristo tiku ni makgxtakgkgolh natamapakgsinankgo Jesús k’akgapun. Pero Jesús na lichuwinalh pi na x’ama tawila tasikulunalin kkinkilhtamakujkan: «Na kaxati kawa nti xmakgaxtakgli xchik, su xnatalan, su xtlat, su xtsi, su xpuskat, su xlakgskgatan, su xtiyat nkaj xpalakata kintukuwini, [...] liwaka namakgamakglhtinan, chu na nakgalhiy latamat wa ntu xaliakgalhin» (Mat. 19:29). La uku, kimputumkan tekgsaw kcongregación natlatni, natsetni, kamanan, natalan. Xlikana pi umakgolh tasikulunalin nitu tuku tatalakxtumi xlakata xTamapakgsin Dios.

6. ¿La kinkamakgtayayan nakatsiyaw pi Jehová kasikulunatlawa kskujnin tiku ni makgxtakgkgo?

⁶ Akxni katsiyaw pi Jehová nakasikulunatlawa kskujnin tiku ni makgxtakgkgo kinkamakgtayayan natayaniyaw akxni kgalhiyaw ta’akglhuwit. Ni kaj uku katikgalhiw lhuwa tasikulunalin, na nakgalhiyaw lhuwa tasikulunalin kkilhtamaku nema aku mima (1 Tim. 4:8). Akxni liwana kanajlakan pi Jehová «lakgalhamankgoy xlipaks tiku putsakgoy chu lipawankgoy» kinkamakgtayayan ni namakgxtakgaw (Heb. 11:6, TXS, [1999]).

7. ¿Tuku xlakata wanaw pi takgalhkgalhin xtachuna «xkgatxtokgat putakutnu»?

⁷ Anta kTaʼakgchuwin xalak Sipi, Jesús wa: «Kalipaxuwatit, na cha paxuwana nkalilatapatit, sampi wa mintatlajankan anta nkakgapun, lu[...] lhuwa; sampi na chuna ntisokgalikgoka xpalakachuwinanin Dios nti xlamakgo xalipulana akxni wixin ni naj xananatit» (Mat. 5:12). Makgapitsi kskujnin Dios namakgamakglhtinankgo tasikulunalin k’akgapun. Chu amakgapitsi namakgamakglhtinankgo tasikulunalin kKatiyatni. Uma na tlawa pi lu napaxuwayaw (Sal. 37:11; Luc. 18:30). Pero takgalhkgalhin «xtachuna xkgatxtokgat putakutnu ntu lakatanks, chu lu[...] tliwakglh liwiliy nkianimajkan» (Heb. 6:17-20). Xtachuna la «xkgatxtokgat putakutnu» chu tlawa pi nitu nalani akxni lhuwa unan kpupunu, takgalhkgalhin kinkamakgtayayan natayaniyaw chu kinkamaxkiyan litliwakga akxni kgalhiyaw taʼakglhuwit.

8. ¿La kinkamakgtayayan takgalhkgalhin xlakata ni lu nalilakgaputsayaw?

⁸ Akxni kgalhiyaw takgalhkgalhin na kinkamakgtayayan ni lu nalakgaputsayaw. Nachuna la bálsamo nema mapaksa kimaknikan, xtamalaknun Dios tlan namamakgkatsini kinakujkan. Tlan makgkatsiyaw akxni katsiyaw pi Jehová nakinkakuentajtlawayan akxni wa  maxkiyaw putum tuku lilakgaputsayaw (Sal. 55:22). Liwana katsiyaw pi Jehová «ntlan namalakastuka xlipaks nkatuwa ntu maski tlakg laktlanka ni xawa wa ntu skinaw» (Efes. 3:20). Uma wamputun pi Jehová lhuwa tuku natlawa kimpalakatakan nixawa tuku skiniyaw.

9. ¿Tuku kilitlawatkan komo makglhtinamputunaw xtasikulunalin Jehová?

⁹ Xlakata namakgamakglhtinanaw xtasikulunalin Jehová, tliwakga nakgalhiyaw kintakanajlakan chu nakgalhakgaxmataw. Moisés kawanilh israelitas: «Jehová xlikana nasikulunatlawayan ktiyat nema Jehová mi Dios maxkiman la tuku lakgchanan xlakata wix nakgalhiya, pero kajwatiya komo liwana nakgalhakgaxpata xtachuwin Jehová mi Dios chu lu liwana natlawaya putum uma limapakgsin tuku kwaniman uku. Xlakata Jehová mi Dios xlikana nasikulunatlawayan chuna la wanit» (Deut. 15:4-6). ¿Xlikana kanajlayaw pi Jehová nakinkasikulunatlawayan komo chuntiya ni namakgxtakgaw? Lhuwa tuku likatsiyaw pi chuna nala.

10, 11. ¿La sikulunatlawalh Jehová José?

¹⁰ Biblia tsokgka xlakata nakinkamakgtayayan. Anta tlan nalikgalhtawakgayaw la Jehová kasikulunatlawalh kskujnin xalamakgasa tiku ni makgxtakgkgolh (Rom. 15:4). José lu tlan liʼakxilhtit. Pulana, xnatalan stakgolh la skujni. Alistalh, xpuskat xmalana limawakalh takgsanin, wa xlakata José tamaknuka kpulachin kʼEgipto. ¿Tlawalh pi xmakgxtakgli Jehová? Ni. Biblia wan: «Jehová, chuntiya xmakgtayama José chu chuntiya limasiyanilh xtalakgalhaman nema ni kinkamininiyan». Chu alistalh wan: «Jehová xmakgtayama José chu putum tuku xtlawa, Jehová xtlawa pi tlan xkitaxtulh» (Gén. 39:21-23). Asta maski lu tuwa tuku xtitaxtuma, José katsilh kgalhkgalhi Jehová xlakata xmakgtayalh.

¹¹ ¿La sikulunatlawalh Jehová José? Akxni xtitaxtunita makgapitsi kata, Faraón maxtulh kpulachin. Xapulana, José kaj skujni xlitaxtu pero alistalh xlichatiy mapakgsina litaxtulh kʼEgipto (Gén. 41:1, 37-43). José kgalhilh chatiy kamanan. Xapulana xkgawasa wanilh Manasés, xlakata xwan: «Dios tlawanit pi nialh naklakapastaka tuku lu nitlan ktitaxtulh chu putum xchik kintlat». Chu xlichatiy, Efraín wanilh, «xlakata xwan: Dios tlawanit pi lhuwa tuku nakkgalhi ktiyat niku nitu xakkgalhi» (Gén. 41:51, 52). Jehová sikulunatlawalh José xlakata ni makgxtakgnalh. Xlakata uma, José kalakgmaxtulh ktatsinkstat israelitas chu egipcios. Liwana xkatsi pi putum uma tuku xlama wa xtasikulunalin Jehová (Gén. 45:5-9).

12. ¿Tuku makgtayalh Jesús xlakata ni namakgxtakgnan?

¹² Jesús na kgalhakgaxmatli Dios maski tuwa tuku titaxtulh. Pero alistalh Jehová sikulunatlawalh. ¿Tuku makgtayalh Jesús xlakata ni namakgxtakgnan? Xtachuwin Dios kinkamaxkiyan xatakgalhtin: «Xlakata tapaxuwan nema xwi kxlakatin tayanilh tapatin kkgantum kiwi, lakgmakgalh tamaxana»  (Heb. 12:2). Xlikana pi Jesús paxuwalh xlakata masantujlilh xtukuwani Dios. Jehová makgamakglhtinalh tuku tlawalh chu maxkilh lhuwa atanu tasikulunalin. Biblia wan pi Jesús «paxtutawilanit kxpakgstakat kxlaktawilh Dios». Chu na wan pi «xkatsit matalhmanilh Dios» chu «na maxkilh akgtum ntapakuwit wa cha ntu ntlakg tlanka ni xawa amakgapitsin tapakuwit» (Filip. 2:9).

13, 14. ¿La akxilha Jehová tuku tlawayaw xlakata naskujnaniyaw?

¹³ Liwa katsiyaw pi Jehová lhuwa xtapalh akxilha tuku tlawayaw xpalakata. Kinkaʼakgatekgsniyan akxni ni liwana katsiyaw tuku natlawayaw o akxni lakpuwanaw pi wi tuku nila katitlawaw. Na kinkalakgalhamanan akxni tlakgwanitaw xlakata taskujut o max ni katsiyaw la nakuentajtlawayaw kifamiliajkan. Chu kinkaʼakgatekgsniyan komo kgalhiyaw tajatat xla talipuwan o wi atanu tuku tlawa pi ni lhuwa natlawayaw xlakata xtaskujut Dios la xapulana. Liwana katsiyaw pi Jehová lhuwa xtapalh akxilha xlakata ni makgxtakgaw maski kgalhiyaw taʼakglhuwit (kalikgalhtawakga Hebreos 6:10, 11).

¹⁴ Na kalakapastakwi pi Jehová xkgaxmatna «oración». Liwana katsiyaw pi kinkakgaxmatniyan akxni tlawaniyaw oración (Sal. 65:2). Jehová tiku «xmakilhtsukina talakgalhaman, chu xmastana xlipaks ntakgtsiyajni» nakinkamaxkiyan putum tuku lakaskinaw xlakata xatapaxuwan nalatamayaw. Max nakalimaklakaskin kinatalankan xlakata nakinkalimakgtayayan (2 Cor. 1:3). Jehová paxuwa akxni kalakgalhamanaw amakgapitsin chu kamakgtayayaw. Biblia wan: «Wantiku makgtaya tiku nitu kgalhi, masakwanima Jehová, chu Wa nalakgxokgoni» (Prov. 19:17; Mat. 6:3, 4). Wa xlakata akxni tlan likatsiyaw chu kamakgtayayaw kinatalankan, Jehová akxilha la komo kaj masakuanimaw chu wan pi nakinkasikulunatlawayan.

15. ¿Chu wix tuku tasikulunalin makglhtinamputuna? (Kaʼakxilhti xapulana dibujo).

¹⁵ Tiku xatalaksakni kgalhikgo takgalhkgalhin, nakamaxkikan «xpalakata ntu ntalulokgtat», akgtum tamaskiwin nema nakamaxki Jesús (2 Tim. 4:7, 8). Pero komo akinin atanu takgalhkgalhin kgalhiyaw, na nakinkamaxkikanan tasikulunalin. Lhuwa millones atanu kskujnin Jesús xatapaxuwan kgalhkgalhimakgolh latamat nema ni kgalhi xlisputni kParaíso kKatiyatni, niku «ixlakan nawan ama lilakgatit pulataman, xlakan ana snun lipaxaw natalatamaj» (Juan 10:16; Sal. 37:11).

16. ¿La kinkamamakgkatsiniyan xtachuwin 1 Juan 3:19, 20?

¹⁶ Max namin kilhtamaku nalakpuwanaw pi ni lhuwa tuku tlawamaw xlakata la skujnanimaw Jehová. O max nakinkakgalhskinkanan komo Jehová makgapaxuwa tuku tlawayaw. O max nalakpuwanaw pi ni kinkamininiyan nakinkamaxkikanan ama tasikulunalin. Pero kililakapastakatkan pi «xaliwaka ntlanka Dios, ni xawa nkintapuwankan, chu na lakgapasa xlipaks nkatuwaj» (kalikgalhtawakga 1 Juan 3:19, 20). Komo skujnanimaw Jehová xlakata kanajlaniyaw chu paxkiyaw, tlan liwana nakatsiyaw pi xla nakinkasikulunatlawayan maski lakpuwanaw pi tuku tlawayaw ni lhuwa xtapalh (Mar. 12:41-44).

17. ¿Tuku makgapitsi tasikulunalin kgalhiyaw la uku?

 ¹⁷ Jehová na kasikulunatlawa kskujnin la uku maski kxaʼawatiya kilhtamaku lamaw kxalixkajni xkakilhtamaku Satanás. ¿La kinkasikulunatlawayan? Jehová kinkamaxkiyan lhuwa liwat xla kintakanajlakan chu takaksni. Nachuna, kinkalisikulunatlawanitan akgtum familia nema wilakgolh kxlikalanka katiyatni tiku kinkapaxkikgoyan, chuna la wa Jesús (Is. 54:13; Mar. 10:29, 30). Dios na kalisikulunatlawa takaksni chu tapaxuwan tiku liskujkgo xlakata naputsakgo (Filip. 4:4-7).

18, 19. ¿La makgkatsiyaw kskujnin Jehová akxni lakapastakaw tasikulunalin nema kinkamaxkiyan?

¹⁸ Jehová, kinTlatkan, lu kaks kinkamalakawaniyan la kasikulunatlawanit kskujnin xlikalanka kkatiyatni. Akgtum liʼakxilhtit, chatum tala xalak Alemania tiku wanikan Bianca wan: «Ni kkatsi la nakpaxtikatsini Jehová xlakata la kimakgtayanit kkintaʼakglhuwit chu xlakata akxtum kintatawila chali chali. Kakilhtamaku ni xaʼakgstitum la wi chu lu nitlan. Pero lu tlan kmakgkatsi xlakata kintawi Jehová akxni kskujnani. Akxni wi tuku kmakgxtakga kaj xlakata Jehová xla kimaxki akgtum ciento tasikulunalin».

¹⁹ Na kalilakpuwaw Paula, chatum tala xalak Canadá tiku kgalhi 70 kata. Xla lhuwa tuku nila tlawa xlakata kgalhi tuwa tajatat kstipulukut. Ni la lhuwa tatsuwi, pero wan pi uma ni wamputun pi nila nalichuwinan Dios. Xla wan: «Klichuwinan Dios kteléfono chu niku kkatatanokglha latamanin. Xlakata nakimatliwakglhkan, kkgalhi maktum cuaderno niku ktsokgwili textos xalak Biblia o tuku wan makgapitsi kilikglahtawakgakan, nema ni lakgmakgasna klikgalhtawakga. Kwani «Kincuaderno nema klilakgtaxtutilha». Ni makgas makgapala taxlajwanit akxni akxilhlakachanaw xtamalaknun Jehová. Xla putum kilhtamaku skgalalh wi xlakata nakinkamakgtayayan, maski katuwa tuku titaxtumaw». Max tuku titaxtumaw nichuna la titaxtumakgolh Bianca chu Paula. Pero max min kkintalakapastaknikan lhuwa tasikulunalin nema Jehová kinkamaxkinitan chu tiku kalakgapasaw. Putum kskujnin Dios kinkamatliwakglhan akxni lakapastakaw la Jehová nakinkasikulunatlawayan la uku chu la natlawa kkilhtamaku nema aku mima.

20. ¿Tuku liwana katsiyaw komo chuntiya naliskujaw natlawayaw xtalakaskin Jehová?

²⁰ Kalakapastakwi pi Jehová xatapaxuwan nasikulunatlawa kioracioneskan. Tlan nakanajlayaw pi namakgamakglhtinanaw «ntamalaknun» komo tlawanitaw «xtalakaskin Dios» (Heb. 10:35, 36). Wa xlakata chuntiya kamatliwakglhwi kintakanajlakan chu chuntiya kaskujnaniw Jehová asta niku tlan matlaniyaw. Komo chuna natlawayaw, tlan nakanajlayaw pi Jehová nakinkasikulunatlawayan (kalikgalhtawakga Colosenses 3:23, 24).