1. ¿Tuku xlakata tamunut lu xlakaskinka? (Kaʼakxilhti xapulana dibujo).

KATA kata, lhuwa tiku tsukukgo likgalhtawakgakgo Biblia tamunukgo. Lhuwa tiku chuna tlawakgo wa kamanan chu wa tiku laktsujku. Max kamakgastakkanit kfamilia niku xtatayananin Jehová litaxtukgo. Chu wix, ¿tamununitata? Komo chuna, lu tlan tuku tlawa. Wa uma tuku lu xlakaskinka xlitlawatkan putum kstalaninanin Cristo xlakata nalakgtaxtukgo (Mat. 28:19, 20; 1 Ped. 3:21).

2. ¿Tuku xlakata lu xlakaskinka ni napekuanaw akxni natamakamastaniyaw Jehová?

² Maski tamunut lhuwa tasikulunalin namaxkiyan, nachuna lu xlakaskinka tuku nalakgatayaya. ¿Tuku xlakata? Xlakata akxni tamunu, tlawanika uma takgalhskinin: «Xlakata xtamakamastan Jesucristo, ¿makgxtakgnitata tuku nitlan xtlawaya chu tamakamastaninita Jehová xlakata natlawaya xtalakaskin?». Chu wix kgalhtinanti pi tlan. Akxni tamunu limasiya pi tamakamastani Jehová, kilhchanima lu xlakaskinka tamalaknun nema tlawani pi napaxkiya chu natlawaya xtalakaskin maski kalalh  tuku nala. ¿Tlan nalakpuwana pi nitlan tuku tlawa? Nichuna. Natamakamastaniya Dios nikxni kalakpuwanti pi nitlan tuku laksakti. Kaj kalakpuwanti, ¿tuku atanu tlan natlawaya? Komo ni naskujnaniya Jehová, anta kxlimakgatliwakga Satanás natawilaya. Chu xla ni lilakgaputsa mi lakgtaxtut. Wata, xla lu xlakgatilh pi xmakgatsankga mi takgalhkgalhin xlakata tlan nalatapaya putum kilhtamaku kaj xlakata natatayaya chu nalakgmakgana xtamapakgsin Jehová.

3. ¿Tuku tasikulunalin makglhtinanita xlakata makamaxkinita mi latamat Jehová?

³ Kalilakpuwanti tasikulunalin nema makglhtinanita xlakata tamakamastaninita Jehová chu tamununita. Xlakata makamaxkinita milatamat Jehová, tlan nawana umakgolh tachuwin: «Kintikukan Dios kintalamaj, ni kjikuan. ¿Tuku tlan nakintatlawani lakchixkuwin?» (Sal. 118:6). Niʼanan tuku xtachuna natatayaya Dios chu tlan natalalipina.

4, 5. 1) ¿Tuku xlakata wanaw pi tamakamastanikan Jehová akgtum talakgatay nema kinchatunukan laksakaw? 2) ¿Tuku taʼakglhuwit titaxtuyaw maski linaw kata o nina?

⁴ Komo tamununita, nila talalipina Jehová kaj xlakata mintlat o mintse tlan talalinkgo. ¿Tuku xlakata lu xlakaskinka nalilakpuwana uma? Xlakata ni katsiya tuku taʼakglhuwit natitaxtuya kilhtamaku nema aku mima. Akgtum liʼakxilhtit, max tamunu akxni aktsujku xwanita. Pero, komo la uku aku stakpat, max tanu la makgkatsiya chu lhuwa tuku nalilakgaputsaya. Chatum tsumat lichuwinalh uma: «Akxni aktsujku wix, maski ni nawaya pastel akxni wi tiku makgatsi xkata anta kʼescuela uma ni tlawa pi nalisitsiya pi xtatayana Jehová wix. Pero, chuna la titaxtutilha kata chu max lu natlawaputuna talakgxtumit xalimaxana, mililakapastakat pi kgalhakgaxmatkan xlimapakgsin Dios wa tuku tlakg tlan».

⁵ Xlikana ni kaj watiya tiku lakkamanan kgalhikgo taʼakglhuwit kxlatamatkan. Tiku tamunukgo akxni laklankata nachuna titaxtukgo tuku tuwa xlakata xtakanajlakan. Max xlakata tamakgaxtokgat, tajatat o taskujut. Xlikana, maski linawa kata o nina, kimputumkan titaxtuyaw taʼakglhuwit nema katuwa wili la talalinaw Jehová (Sant. 1:12-14).

6. 1) ¿Tuku kilhchanima pi niti mafuerzajnin xlakata tamakamastaninita Jehová? 2) ¿Tuku masiyaniyan Filipenses 4:11-13?

⁶ Wa tuku tlan namakgtayayan xlakata nikxni namakgxtakga Jehová wa pi ankgalhin nalakapastaka pi niti mafuerzajnin xlakata tamakamastaninita. Uma kilhchanima pi malaknuninita Mapakgsina xlikalanka Katiyatni pi naskujnaniya maski kalalh tuku nala, o minatlatni chu mi amigos nialh naskujnanikgo (Sal. 27:10). Putum kilhtamaku tlan naskiniya Jehová pi kamakgtayan nakgalhiya litliwakga xlakata namakgantaxtiya tuku malaknunita (kalikgalhtawakga Filipenses 4:11-13).

7. ¿Tuku kilhchanima naliskuja xlakata nakgalhiya lakgtaxtut «ktapekua chu ktalhpipit»?

⁷ Jehová lakaskin pi xʼamigo nawana. Xlakata chuntiya tlan natalalipina chu naliskuja xlakata nalakgtaxtuya talakaskin litliwakga. Wa xlakata, Filipenses 2:12 wan: «Chuntiya kalimasiyatit tapekua chu talhpipit xlakata nakgalhiyatit lakgtaxtut». Umakgolh tachuwin masiya pi liwana nalakapastaka tuku natlawaya xlakata nakuentajtlawaya la talalipina Jehová chu xlakata nikxni namakgxtakga maski nakgalhiya taʼakglhuwit. Chu ni miʼakstu kalipawankanti. Kalakapastakti pi maski makgapitsi lhuwa kilhtamaku skujnanikgolh Dios kimakgatsankgakgonit. Wa xlakata, ¿tuku namakgtayayan chuntiya naliskuja xlakata nakgalhiya lakgtaxtut?

8. 1) ¿Tuku na makgtanuma akxni ki’akstukan kgalhtawakgayaw? 2) ¿Tuku xlakata lu xlakaskinka kgalhtawakgakan?

⁸ Xlakata tlan x’amigo Jehová nawanaw, talakaskin nakgaxmatniyaw chu natachuwinanaw. Pulaktum la tlan nakgaxmatniyaw tuku kinkawaniyan wa akxni ki’akstukan kgalhtawakgayaw. Uma na makgtanuma nalikgalhtawakgayaw Biblia, likgalhtawakga nema anta takilhtinit chu nalilakpuwanaw tuku likgalhtawakgayaw. Akxni chuna natlawaya, kalakapastakti pi likgalhtawakgakan Biblia ni kaj watiya limaklakaskinkan talakapastakni, la komo wi tuku xwili kmintalakapastakni nema lakapastakputuna xlakata akgtum examen xalak escuela. Wata, kilhchanima liwana nalakputsananiya chu natekgsa xalakwan xtayat Jehová. Komo chuna natlawaya namakgtayayan natalakatsuwiniya chu xla na natalakatsuwiniyan (Sant. 4:8).

9. ¿Tuku tamakgtay nema mastay xkachikin Jehová makgtayanitan akxni miʼakstu kgalhtawakgaya?

⁹ Xkachikin Jehová lhuwa tuku kinkamaxkinitan nema tlan namakgtayayan nalakkaxwiliya tukuya kilhtamaku nakgalhtawakgaya. Ka’akxilhwi makgapitsi li’akxilhtit nema tlan natekgsa ksitio jw.org. Niku wan «Jóvenes» natekgsa «Actividades para estudiar la Biblia» nema tlan namakgtayayan wi tuku nakatsiniya xlakata makgapitsi liʼakxilhtit nema lichuwinan Biblia. Watiya uma sección Tamakgtay xlakata nakgalhtawakgayaw «¿Tuku xlikana masiya Biblia?», nema namakgtayayan namatliwakglha mintakanajla chu xlakata nalichuwinana tuku kanajlaya. Chu krevista ¡Despertad! xla abril kata 2009 tlakg natekgsa tuku tlan natlawaya akxni kgalhtawakgaya kʼartículo «Los jóvenes preguntan ¿Cómo disfrutar la lectura de la Biblia?». Kgalhtawakgakan chu lilakpuwankan lu xlakaskinka xlakata nakgalhiya lakgtaxtut (kalikgalhtawakga Salmo 119:105).

10. ¿Tuku xlakata lu xlakaskinka natlawa oración kstalanina Cristo tiku tamununit?

¹⁰ Akxilhnitawa pi kgaxmatniyaw Jehová akxni likgalhtawakgayaw Biblia. Pero, komo tachuwinamputunaw talakaskin natlawaniyaw oración. Kstalaninanin Cristo ni kiliʼakxilhatkan oración la akgtum talismanin o kaj xlakata lakaskinaw pi tlan nakinkakitaxtuniyan. Oración wa tuku tlan  nalimaklakaskinaw xlakata natachuwinanaw Malakatsukina. Chu Jehová kgaxmatniputunan (kalikgalhtawakga Filipenses 4:6). Akxni wi tuku lilakgaputsapat, kalakapastakti pi Biblia maxkiyan uma tastakyaw: «Kamakamaxki Jehová mintakuka» (Sal. 55:22). ¿Xlikana kanajlaya pi uma namakgtayayan? Lhuwa natalan tlan nawanikgoyan pi uma lu kamakgtayanit. Chu wix na namakgtayayan.

11. ¿Tuku xlakata ankgalhin namaxkiya tapaxtikatsinit Jehová?

¹¹ Talakaskin ankgalhin natlawaniyaw oración Jehová, ni kaj watiya akxni lakaskinaw pi kakinkamakgtayan. Biblia wan: «Kamastatit mpaxkatsinit» (Col. 3:15). Max namin kilhtamaku lu nalilakgaputsayaw kintaʼakglhuwitkan chu nialh katilakapastakwi tasikulunalin nema makglhtinanitaw. ¿Tuku xlakata ni lakkaxwiliya chu lilakpuwana chali chali pulaktutu nema tlan nalipaxtikatsiniya Jehová? Chatum tsumat wanikan Abigail, tiku tamunulh akxni xkgalhi akgkutiy kata, wan: «Klakpuwan pi ni anan kxlikalanka katiyatni tiku lhuwa napaxtikatsiniyaw chuna la Jehová. Ankgalhin napaxtikatsiniyaw xlakata tuku kinkamaskiwinitan. Klakgati klakapastaka tuku kkgaxmatli akgtum kilhtamaku: “Kalilakpuwaw pi akxni xlakgaxkgakgaw tsisa kaj watiya xkgalhiw tuku likgotana lipaxtikatsiniw Jehová. ¿Lhuwa tuku xkgalhiw?”». *

12, 13. ¿Tuku xlakata lu xlakaskinka nalilakpuwana la akxilhnita kmilatamat pi Jehová tlan likatsi?

¹² Jehová makgtayalh mapakgsina David akxni titaxtulh tuku tuwa. Wa xlakata wa umakgolh tachuwin: «Kali’akxilhtit xlakata nakatsiyatit la ixlitlan katsi Kintikukan, lipaxaw lama ti wa lipawan» (Sal. 34:8). Uma texto masiya pi lu xlakaskinka wix naʼakxilha pi Jehová tlan likatsi. Akxni likgalhtawakgaya Biblia chu akxni pina ktamakxtumit, katsiniya lu xatlan liʼakxilhtit xlakata la kamakgtayanit Dios latamanin tiku nikxni makgxtakgkgolh. Pero chuna la staktilhapat talakaskin pi wix naʼakxilha la makgtayayan Jehová kmilatamat. ¿La akxilhnita wix kmilatamat pi Jehová tlan likatsi?

¹³ Wi pulaktum la akxilhnitaw putum kstalaninanin Cristo pi Jehová tlan likatsi. Jehová kinkawaniyan pi tlan nalakgtalakatsuwiyaw chu nachuna xKgawasa. Jesús lichuwinalh: «Sampi ni pala chatum tlan natsukuputun kilipawankoy, lapi ni pulh wa namapuwaniy kintlat» (Juan 6:44). ¿Kanajlaya pi wa Jehová liminitan kxkachikin? Max chatum kgawasa nalakpuwan: «Jehová kalimilh kinatlatni chu akit kaj kastalanilh». Pero, akxni tamakamastani Jehová chu tamunu, limasiya pi lu tlan talalipina Jehová. Chu la uku xla lakgapasan. Biblia kinkawaniyan: «Lapi wi nti mpaxkiy Dios, [...] Dios [lakgapasa]» (1 Cor. 8:3). Kaliskujti lhuwa xtapalh naʼakxilha xlakata makgtapakgsiya kxkachikin Jehová.

14, 15. ¿Tuku xlakata matliwakglha mintakanajla akxni lichuwinana Dios?

¹⁴ Nachuna, akxilha la Jehová tlan likatsi akxni makgtayayan nalichuwinana mintakanajla akxni lichuwinana Dios akgatunu chiki chu kʼescuela. Makgapitsi tuwa makgkatsikgo nakalitachuwinankgo xcompañeros xlakata Dios xlakata ni katsikgo komo nakgaxmatkgo. Max wa uma tuku akgspulanitan. Chu max tlakg tuwa namakgkatsiya komo chalhuwa tiku nakatachuwinana. ¿Tuku tlan namakgtayayan?

¹⁵ Pulana, kalilakpuwanti tuku xlakata liwana katsiya tuku kanajlaya. Anta kjw.org, wilakgolh tuku tlan namakgtayakgoyan ktanu  tanu tachuwin nema tlawakanit xlakata nalilakpuwana tuku kanajlaya, tuku xlakata kanajlaya chu la tlan nalichuwinana. ¿Tuku xlakata ni limaxtuya kilhtamaku xlakata naʼakxilha? Komo liwana katsiya tuku kanajlaya chu nakgalhtawakgaya, xatapaxuwan nalichuwinana xtukuwani Jehová (Jer. 20:8, 9).

16. ¿Tuku tlan namakgtayayan xlakata ni napekuana akxni nalichuwinana tuku kanajlaya?

¹⁶ Xlikana pi max chuntiya napekuana akxni nalichuwinana tuku kanajlaya maski liwana nalakkaxwiliya. Chatum tsumat tiku kgalhi akgkutsayan kata, tamunulh akxni xkgalhi akgkututu kata lichuwinan: «Kkatsi tuku kkanajla, pero min kilhtamaku tuwa kmakgkatsi naklichuwinan». ¿Tuku tlawa? Wan pi chuwinan chuna la lismaninit katachuwinan amakgapitsin. Wampara: «Kincompañeros ni maxanankgo akxni chuwinankgo. Na tlan chuna naktlawa. Wa xlakata, akxni wi tuku kkalitachuwinama kkawani: “Akxni xakmastama takgalhtawakga xalak Biblia chu...”. Alistalh, chuntiya kkalitachuwinan tuku xakkalitachuwinama. Maski tuku kkawani nitu tatalakxtumi xalak Biblia, makgapitsi katsiputunkgo chu min kilhtamaku kinkgalhskinkgo tuku ktlawa akxni kmasiya xalak Biblia. Akxni chuna ktlawa, tlakg nituwa kmakgkatsi kkatachuwinan. Chu lu tlan kmakgkatsi klichuwinan tuku xaxlikana».

17. ¿Tuku xlakata ni napekuanaw akxni nalichuwinanaw kintakanajlakan?

¹⁷ Komo kamaxkiya kakni amakgapitsin chu kalilakgaputsaya, xlakan nachuna nalikatsinikgoyan. Kaʼakxilhti tuku xlakpuwan Olivia, tiku kgalhi akgkutujun kata chu tamunulh akxni aktsujku xwanit: «Ankgalhin xakkapekuani latamanin xlakata xlakpuwankgolh pi kaj watiya xaklichuwinan Biblia». Pero alistalh tanu la tsukulh akxilha. Ni kaj watiya lilakpuwa xtapekua wata xla lakpuwa: «Lhuwa lakgkgawasan nitu katsikgo xlakata xtatayananin Jehová chu akinin kaj watiya tiku kinkalakgapaskanan. Wa xlakata chuna la nalikatsiyaw tlan namakgamakglhtinankgo tuku xaxlikana o ni. Komo lu maxananaw chu ni lu kalitachuwinanaw kintakanajlakan o kalitachuwinanaw pero lu pekuanaw, max nalakpuwankgo pi limaxananaw xlakata xtatayananin Jehová akinin. Asta max nitlan nakinkalikatsinikgoyan xlakata pekuanaw. Pero komo nalimasiyayaw pi xlikana katsiyaw tuku kanajlayaw chu liwana nakalitachuwinanaw, xlakan max nakinkakgaxmatnikgoyan».

18. ¿Tuku militlawat xlakata chuntiya nalimasiyaya milakgtaxtut?

¹⁸ Akxilhnitaw pi naliskuja xlakata nakgalhiya lakgtaxtut akgtum taskujut nema lu xlakaskinka. Talakaskin nalikgalhtawakgaya Biblia chu nalilakpuwana, natlawaniya oración Dios chu nalilakpuwana tasikulunalin nema maxkinitan. Uma namakgtayayan liwana nakatsiya pi Jehová xlikana miʼamigo. Chu uma namakgtayayan xlakata tlan nalichuwinana tuku kanajlaya (kalikgalhtawakga Salmo 73:28).

19. ¿Tuku xlakata tlan kitaxtu chuntiya nalimasiyayaw xlakata nakgalhiyaw lakgtaxtut?

¹⁹ Jesús wa: «Komo wi tiku kistalaniputun, xakstu kalakgmakganka chu katiyalh xkiwi nema nalimapatinikan chu kakistalanilh putum kilhtamaku» (Mat. 16:24). Xlikana stalanikan Jesús kilhchanima namakamaxkiyaw kilatamatkan Jehová chu natamunuyaw. Uma kinkamaxkiyan talakaskin namakglhtinanaw lhuwa tasikulunalin la uku chu latamat nema nikxni sputa kxasasti katiyatni nema Dios malaknunit. Wa xlakata chuntiya kaliskujwi xlakata tlan nalakgtaxtuyaw.