¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿Tuku xlakata natlatni tiku xalak tanu pulataman kuenta natlawakgo tachuwin nema chuwinankgo xkamanan?

Max kamanan nakatsikgo tachuwin nema chuwinankan k’escuela o atanu tachuwin. Natlatni xlilaksakatkan komo naʼankgo kcongregación niku chuwinankan tachuwin xala ama kachikin o niku chuwinankan tachuwin nema kalimakgastakka. Talakaskin nalakputsananikgo niku tlan naʼakgatekgskgo xkamanan xlakata tlakg natatliwakglha xtakanajlakan. Natlatni tlakg xlakaskinka akxilhkgo xtakanajlakan xkamanankan nixawa tuku xlakan lakaskinkgo (w17.05, págs. 10-13).

Akxni Jesús kgalhskilh Pedro: «¿Pi tlakg kimpaxkiya ni xawa yu wilakgo?». ¿Tiku xkilhchanima akxni wa «yu wilakgo»? (Juan 21:15)

Max xlichuwinama skiti nema anta xwilakgolh o taskujut xlakata kskitinan. Akxni xninita Jesús, Pedro tsukupa liskuja la skitina. Kstalaninanin Cristo nalilakpuwankgo la xlilakaskinka akxilhkgo xtaskujutkan (w17.05, págs. 21-23).

¿Tuku xlakata Abrahán wanilh xpuskat pi xwa pi kaj xtala xwanit? (Gén. 12:10-13)

Xlikana pi Sara xtutala xwanit Abrahán. Komo Sara xwa pi xpuskat xwanit, Abrahán max xmakgnika, chu nila xʼama kgantaxtu tuku Dios xmalaknuninit (wp17.3-S, págs. 14-15).

¿Tuku maklakaskilh Elias Hutter xlakata nakamakgtaya tiku xkamakgalhtawakgema nakatsinikgo tachuwin hebreo?

Xla xlakaskin pi tiku xkamakgalhtawakge liwana xkatsikgolh tuku xkilhchanima akgatunu tachuwin xahebreo nema wi kBiblia la natamalakxtumikgo tachuwin nema kstala chu nema xlimakgkgatsikan. Xalakgtsitsakga wili akgatunu tachuwin nema tlakg xlakaskinka chu ni xlitalakgpalit pero tachuwin nema kstala chu nema xlimakgkgatsikan ni xalakgtsitsakga xwili. Traducción del Nuevo Mundo de las Santas Escrituras (nema limin referencias) xtachuna limaklakaskin anta niku limin notas (wp17.4-S, págs. 11-12).

¿Tuku kuenta xlitlawat kstalanina Cristo komo nakgalhi akgtum likan nema limakgninankan xlakata nitu natlawanikgo latamanin?

Xlatamatkan latamanin lu xasanto liʼakxilha Jehová. Jesús ni kawanilh kstalaninanin komo xkgalhikgolh akgtum espada xlakata nalitamakgtayakgo (Luc. 22:36, 38). Xlakskujnin Dios «xʼespadajkan [...] nalitlawakgo arado chu xlanzas». Xlatamat chatum lataman tlakg lanka xtapalh nixawa tuku atanu. Nakamaxkiyaw kakni xtalakapastaknikan amakgapitsin chu naliskujaw xlakata tlan liʼakxilhtit nalitaxtuyaw xpalakatakan (2 Cor. 4:2) (w17.07, págs. 31-32).

¿Tuku xlakata tanu tanu la lichuwinankgo libro xla Mateo chu Lucas xlakata xapulana kata la latamalh Jesús?

Mateo lichuwinan xlakata tuku titaxtulh José. Lichuwinan la akxni katsilh pi María x’ama kgalhi skgata. Chu akxni ángel wanilh José k’akgtum tamanixnat pi xkatatsalalh xfamilia k’Egipto chu alistalh xtaspitpa. Lucas tlakg lichuwinan xlakata María. Lichuwinan tuku lalh akxni kilakgapaxialhnalh Elizabet chu la makgkatsilh akxni Jesús tamakgxtakgcha ktemplo (w17.08, pág. 32).

¿Tuku katuwa wilinit Biblia chuna la titaxtutilhanit kata?

Makgapitsi tachuwin nema maklakaskinkan anta kBiblia talakgpalitilha chuna la titaxtutilha kilhtamaku. Chuna la talakgpalitilhakgo mapakgsinanin tlawa pi nachuna natalakgpali tachuwin. Wi tiku lakatakikgo xlakata namatitaxtikan Biblia kʼatanu tachuwin (w17.09, págs. 19-21).

¿Kgalhiyaw chatum ángel tiku kinkakuentajtlawayan?

Ni. Xlikana pi Jesús lichuwinalh pi xʼángeles kstalaninanin ankgalhin akxilhkgo xlakapun Dios (Mat. 18:10). Pero uma ni kilhchanima pi chatunu akinin kgalhiyaw chatum ángel tiku kinkakuentajtlawayan, wata ángeles kakuentajtlawakgo putum kstalaninanin Cristo (wp17.5-S, pág. 5).

¿Tuku tlakg xlakaskinka kgalhi tapaxkit?

Akxni lichuwinankan tachuwin agápe uma tapaxkit takilhtinit kxaʼakgstitum xtastakyaw Dios. Anta nalimasiyaya pi xlikana paxkinana, akxni wi tuku natlawaya kxpalakatakan amakgapitsin chu ni kaj xlakata komo wi tuku lakaskina namaspitnikana (w17.10, pág. 7).