1, 2. ¿Tuku xlakata lilakgaputsakgo makgapitsi natlatni akxni xkamanankan tamakamastaputunkgo chu tamunuputunkgo?

AKGATUNU kata lhuwa tiku likgalhtawakgakgo Biblia tamakamastanikgo Jehová chu tamunukgo. Lhuwa tiku chuna tlawakgo wa kamanan tiku kamakgastakkan kfamilia niku kstalaninanin Cristo litaxtukan chu laksakkgonit tlan latamat nalinkgo (Sal. 1:1-3). Xlikana pi putum natlatni tiku xtatayananin Jehová lakaskinkgo pi kamilh kilhtamaku akxni xkamanankan tlan natamunukgo (katamalakxtupi 3 Juan 4).

² Pero max wi tuku lilakgaputsakgo uma natlatni. Max lakgapaskgonit makgapitsi kamanan tiku tamunukgolh pero alistalh tsukukgolh lakpuwankgo pi ni litamakgtayakgo komo nakgalhakgaxmatkgo xlimapakgsin Dios. Makgapitsi asta nialh skujnanikgolh Jehová. Wa xlakata natlatni max lilakgaputsakgo pi xkamanankan nalakgpalikgo la lakpuwankgo akxni tamunukgonita  nawan chu nialh nakgalhinikgo tapaxkit Jehová. Wa uma tuku kaʼakgspulalh congregación xalak Éfeso kxapulana siglo. Jesús kawanilh: «Makgaxtakgnita wa ntu xakgasiya mintapaxkit» (Rev. 2:4). ¿Tuku tlan natlawakgo natlatni xlakata nichuna natitaxtukgo chu xlakata xkamanan tlan nalakgtaxtukgo? (1 Ped. 2:2). Kaʼakxilhwi xliʼakxilhtit Timoteo.

3. 1) ¿Tukuya kilhtamaku kstalanina Cristo litaxtulh Timoteo chu la lilatamalh xlakata tuku katsinilh? 2) ¿Tuku pulaktutu wanilh Pablo Timoteo?

³ Timoteo max lakgapasli tuku xmasiya Jesús akxni kkata 47, akxni xapulana kilalh Pablo kkachikin Listra. Max ama kilhtamaku kajku kgawasa xwanit, xlikana lilatamalh tuku katsinilh, chu akgtiy kata alistalh tsukulh stalani Pablo niku xʼan. Akgkuchaxan kata alistalh, Pablo tsokgnanilh: «Tliwakglh katapini yuma ntu nkatsininita, chu na lu[...] lakatanks kanajlanita na lu[...] tlan likatsiya wa nti masiyuninitan. Chu lata akxni aktsinajku xwanita lakgapasti xasanto tatsokgni [Tatsokgni xaHebreo], nema tlan namaskgalaliyan xlakata nalakgtaxtuya xpalakata mintakanajla nema kgalhiniya Cristo Jesús» (2 Tim. 3:14, 15). Kalichuwinaw uma pulaktutu tachuwin nema limin: 1) «lakgapasti xasanto tatsokgni», 2) «lu[...] lakatanks kanajlanita» chu 3) «tlan namaskgalaliyan xlakata nalakgtaxtuya xpalakata mintakanajla nema kgalhiniya Cristo Jesús».

4. ¿Tuku makgtayanitan xlakata tlan nakamasiyaniya laktsu minkamanan? (Kaʼakxilhti xapulana dibujo).

⁴ Natlatni tiku kstalaninanin Cristo lakaskinkgo pi xkamanankan kalakgapaskgolh «xasanto tatsokgni», nema la uku kilhchanima Tatsokgni xaHebreo chu Tatsokgni xaGriego. Asta maski kajku laktsu kamanan, tlan nakatsinikgo xlakata tiku kalichuwinankan kBiblia chu liʼakxilhtit nema limin. Xkachikin Jehová tlawanit lhuwa libros, folletos chu videos klhuwa tachuwin nema natlatni tlan nakalimasiyanikgo chu nakalimakgtayakgo xkamanan. ¿Tlan nalichuwinana makgapitsi nema wi kmintachuwin? Kalakapastakwi pi tuku katsiyaw xalak Biblia xlakaskinka xlakata tlan natalalinaw Jehová.

5. 1) ¿Tuku kilhchanima tachuwin «lakatanks kanajlanita»? 2) ¿Tuku xlakata tlan wanaw pi Timoteo liwana xkanajla pi Jesús wa Mesías xwanit?

⁵ Xlakaskinka nakatsiyaw «xasanto tatsokgni». Pero ni kaj xman wa nakalixakgatliyaw kamanan tiku kalichuwinankan kBiblia chu liʼakxilhtit nema limin. Timoteo nachuna «lakatanks kanajlalh». Kʼakgtum tatsokgni griego xala makgasa, uma tachuwin kilhchanima «pi wi tuku kanajlaya» la komo «liwana nakanajlaya o nakatsiya pi wi tuku xaxlikana». Timoteo xlakgapasa Tatsokgni xaHebreo lata akxni aktsujku xwanit. Pero makgapitsi kata alistalh liwana katsilh pi Jesús wa Mesías xwanit. Xlikana lu liwana xkatsi, wa xlakata tamunulh chu stalanilh Pablo niku xʼan lichuwinantapuli Dios.

6. ¿La natlawa chatum xatlat namakgtaya xkgawasa xlakata «lakatanks nakanajla» tuku katsini xalak Biblia?

⁶ ¿La tlan natlawa chatum xatlat xlakata namakgtaya chatum xkgawasa lakatanks nakanajla chuna la Timoteo? Lu xlakaskinka xakgalhkgalhina nawana. Kgawasa ni kaj lakapala katikanajlalh chu nachuna ni katikanajlalh kaj xlakata xnatlatni kanajlakgo. Xlakata aktsu kgawasa liwana nakanajla tuku wan Biblia, talakaskin namaklakaskin xtalakapastakni (kalikgalhtawakga Romanos 12:1). Natlatni xlakaskinka namakgtayakgo xkamanankan akxni kajku laktsujku, liwaka akxni tlawakgo takgalhskinin. Kaʼakxilhwi akgtum liʼakxilhtit.

7, 8. 1) ¿La limasiya chatum xatlat pi xakgalhkgalhina akxni masiyani xtsumat? 2) ¿Tukuya kilhtamaku wix lakaskinti xakgalhkgalhina nawana kxpalakata minkamanan?

 ⁷ Chatum tala wanikan Thomas kgalhi chatum xtsumat tiku kgalhi akgkawitu kata. Xla lichuwinan pi lakgachunin tlawani takgalhskinin la umakgolh: «¿Jehová maklakaskilh evolución xlakata nakamalakatsuki putum tuku staknankgo?» chu «¿Tuku xlakata ni votarlinanaw xlakata tlakg tlan natawila kinkachikinkan?». Lakgachunin Thomas liwana kgalhti xlakata lakatanks nakanajla. Katsi pi tlakg tlan namakgatekgsninana komo namaklakaskin, lhuwa laktsu liʼakxilhtit xlakata namasiyaya tuku xaxlikana.

⁸ Lu xlakaskinka xakgalhkgalhinanin nawanaw akinin kstalaninanin Cristo. Chu Thomas katsi pi lakaskin uma tayat xlakata liwana namasiyani xtsumat (Col. 3:12). Katsi pi talakaskin lhuwa natachuwinan chu lhuwa kilhtamaku nalimaxtu. Talakaskin pi xla namakgatekgsni xtsumat xlakata liwana nakanajla pi tuku katsinima xalak Biblia wa xaxlikana. Lichuwinan: «Kimpuskat chu akit klakaskinaw pi kintsumatkan nakanajla tuku katsinima chu komo xlikana akgatekgsa, tlakg talakaskin akxni lu xlakaskinka tuku klichuwinamaw. Chu lu tlan komo kgalhi takgalhskinin. Pero nitlan nakmakgkatsi komo kaj akglakgwa tuku natsuku kanajla chu ni nakinkakgalhskinan».

9. ¿La natlawakgo natlatni xlakata nakamasiyanikgo tuku xaxlikana xalak Biblia xkamanan?

⁹ Akxni xanatlatni xakgalhkgalhinanin, kamanan tsinu tsinu katsinitilhakgo «xanima xatitlanka, chu xlilhman, chu lantla xlipulhman, chu lantla xlitalhman» xlakata kintakanajlakan (Efes. 3:18). Talakaskin nakamasiyanikgo nema tlantiya naʼakgatekgsnikgo. Akxni tlakg lakatanks naʼakgatekgskgo tuku katsinimakgo, tlan liwana nakgalhtinankgo xlakata xtakanajlakan akxni xcompañeros xalak escuela o amakgapitsi latamanin max nakataratlawakgo (1 Ped. 3:15). Akgtum liʼakxilhtit, ¿tlan nalimaklakaskinkgo Biblia akxni nalichuwinankgo tuku kinkaʼakgspulayan akxni niyaw? ¿Liwana kanajlakgo tuku wan Biblia? * Xlikana talakaskin xakgalhkgalhinanin nawanakgo xlakata nakamasiyanikgo xkamanan tuku xalak Biblia, pero lu tlan kitaxtu (Deut. 6:6, 7).

10. ¿Tuku xlakaskinka xlitlawatkan natlatni?

¹⁰ Xlikana xlakata kamanan tlan nakanajlakgo tuku xaxlikana, talakaskin pi nachuna xanatlatni nakawilinikgo tlan liʼakxilhtit. Stephanie, tiku kgalhi kgalhtutu xlaktsuman, lichuwinan: «Lata akxni laktsujku xwankgonit, kinkgalhskinkan: “¿Kkalitachuwinan tuku xlakata akit lakatanks kkatsi pi Jehová lama, xaʼakgstitum chu lu xapaxkina? ¿Liwana akxilhkgo pi akit xlikana kpaxki?”. Nila kkgalhkgalhi pi xlakan nakanajlakgo komo akit ni kkanajla».

11, 12. ¿Tuku liskgalala chu tuku xlakata wanaw pi ni kaj watiya limasiyakgo tiku linkgoya kata?

¹¹ Chuna la akxilhnitaw, Timoteo 1) liwana xkatsi tuku xalak Biblia chu 2) lakatanks xkanajla tuku xkatsi. Pero ¿tuku xkilhchanima Pablo akxni wanilh pi xasanto tatsokgni tlan «namaskgalali xlakata nalakgtaxtu»?

¹² Volumen 2 xla libro Perspicacia lichuwinan pi anta kBiblia, liskgalala na makgtanuma «liwana nalimaklakaskinkan takatsin chu takgatekgsni, nalakkaxtlawakan taʼakglhuwit,  ni namakgtanukan o ni natlawakan tuku nitlan, tlan nalakgchankan tuku tlawaputunkan, nakastakyawakan amakgapitsin pi nachuna katlawakgolh. Tiku xatonto nichuna tlawa». Biblia lichuwinan pi «xlitonto kgawasa tachitawilanit kxnaku» (Prov. 22:15). Liskgalala limasiya pi liwana lakapastaknan. Tiku liwana lakapastaknan ni wa tiku lina kata, wata wa tiku kgalhini tapekua Jehová chu kgalhakgaxmatputun xlimapakgsin (kalikgalhtawakga Salmo 111:10).

13. ¿La tlan chatum kgawasa nalimasiya liskgalala xlakata nalakgtaxtu?

¹³ Kamanan tiku kgalhikgo liskgalala xlakata xtakanajlakan ni «anu anu kalin un chuna la takgayawana» kaj xlakata tuku tlawaputunkgo o kamatlawiputunkgo xcompañeros (Efes. 4:14). Wata kgalhikgo «kxtalakapastaknikan lantla nakatsi[kgo] ntu ni xatlan, chu ntu xatlan» (Heb. 5:14). Limasiyakgo pi liwana lakapastakkgo akxni wi tuku nalaksakkgo natlawakgo maski ni nakaʼakxilhkgo xnatlatnikan o atanu tiku laklankata (Filip. 2:12). Uma liskgalala, xlakaskinka xlakata tlan nalakgtaxtuyaw (kalikgalhtawakga Proverbios 24:14). ¿Tuku tlan natlawa xatlat xlakata nakamakgtaya xkamanan skgalala nawankgo? Xlikatsitkan tuku tlakg xlakaskinka akxilhkgo kxlatamatkan. Tuku wan chu tuku tlawa xlimasiyatkan pi limakgolh xlatamatkan chuna la wan Biblia (Rom. 2:21-23).

14, 15. 1) ¿Tuku tlan nalilakpuwan chatum kgawasa tiku tamunuputun? 2) ¿La tlan namakgtayaya minkgawasa xlakata nalilakpuwan tuku tlan kitaxtu akxni kgalhakgaxmatkan tuku wan Biblia?

¹⁴ Pero ni kaj watiya talakaskin pi natlatni nakawani xkamanan tuku xatlan chu tuku nixatlan. Talakaskin tlan nakalimalakpuwani la umakgolh takgalhskinin: «¿Tuku xlakata Biblia lichuwinan pi nitlan natlawayaw nema lilakgatit tasiya? ¿Tuku liwana likanajlaya pi limapakgsin nema limin Biblia ankgalhin namakgtayayan?» (Is. 48:17, 18).

¹⁵ Akxni chatum kgawasa wan pi tamunuputun, talakaskin pi xnatlatni nakamakgtayakgo nalilakpuwankgo tuku nalakgatayakgo komo chuna natlawakgo. ¿La akxilha?  ¿Tuku tlan kitaxtu? ¿Chu tuku taʼakglhuwit max nakgalhikgo? ¿Tuku xlakata tlakg lhuwa tuku nalitamakgtayayaw nixawa taʼakglhuwit? (Mar. 10:29, 30). Lu xlakaskinka pi xakgawasa nalilakpuwan umakgolh takgalhskinin akxni nina tamunu. Komo xanatlatni nakamakgtayakgo nalilakpuwankgo tuku tlan kitaxtu akxni kgalhakgaxmatnankan chu tuku kitaxtu komo nichuna natlawakan, max nakatsi pi tlakg tlan kitaxtu komo ankgalhin nakgalhakgaxmata tuku wan Biblia (Deut. 30:19, 20).

16. ¿Tuku tlan natlawakgo natlatni komo xkgawasakan nialh lu natsuku kanajla akxni tamununita?

¹⁶ ¿Tuku tlan natlawakgo natlatni komo xkgawasakan tiku tamununita alistalh nialh lu natsuku kanajla? Akgtum liʼakxilhtit, chatum kgawasa max natsuku lakgati tuku anan kkakilhtamaku o natsuku kgalhskinkan komo tlakg tlan kitaxtu kgalhakgaxmatkan tuku wan Biblia (Sal. 73:1-3, 12, 13). Natlatni talakaskin nakatsikgo pi xtayatkan natlawa pi xkgawasakan chuntiyaku naskujnani Jehová o nialh naskujnani. Talakaskin ni nakatalatlawa maski kajku chatum aktsu kgawasa o tlakg lankata. Xakgawasa xlikatsit pi xlikana paxkikgo xnatlatni chu kamakgtayaputunkgo.

17, 18. Komo chatum kgawasa wi tuku ni liwana kanajla, ¿tuku tlan natlawakgo xanatlatni xlakata nakamakgtayakgo?

¹⁷ Xlikana, chatum kgawasa tiku tamununita malaknunilh Jehová pi napaxki chu natlawa xtalakaskin maski kalalh tuku nala (kalikgalhtawakga Marcos 12:30). Jehová xlakaskinka akxilha uma tamalaknun, chu nachuna xliʼakxilhatkan tiku makamaxkikgonit xlatamatkan (Ecl. 5:4, 5). Natlatni xlimaxtutkan kilhtamaku xlakata xatapaxuwan nakamalakapastakakgo xkamanankan. Pero pulana talakaskin nalikgalhtawakgakgo likgalhtawakga nema tlawanit xkachikin Jehová xlakata natlatni. Uma namakgtaya liwana nakatsikgo pi ni kaj takgaman chu lanka tasikulunalin xlakata tamakamastaniw chu tamunuw la xtatayananin Jehová.

¹⁸ Akgtum liʼakxilhtit, xanatlatni tlan natekgskgo makgapitsi tamakgtay anta klibro Los jóvenes preguntan kvolumen 1, kʼapéndice «Los padres preguntan». Lichuwinan: «Ni kalakpuwanti pi minkgawasa nialhtu katsiputun xlakata takanajla. Makgapitsi kamanan kaj watiya lakaskinkgo nalakkaxtlawakgo taʼakglhuwit o talipuwan nema kgalhikgo». Max xlakata tuku matlawiputunkgo xcompañeros, kaj xakstu kamakgkatsikan, lakpuwankgo pi amakgapitsin kamanan tlakg kalakgayawakan taskujut anta kcongregación. Apéndice tlakg lichuwinan: «Uma taʼakglhuwit ni wa xlakata ni kanajla, wata la uku tuwa makgkatsi nalilatama tuku katsi». Uma apéndice kamaxki tastakyaw xanatlatni tuku natlawakgo komo xkamanankan wi tuku ni liwana kanajlakgo xlakata takanajla.

19. ¿La tlan nakamakgtayakgo natlatni xkamanankan xlakata skgalala nawankgo chu tlan nalakgtaxtukgo?

¹⁹ Xanatlatni wa tiku lakgayakgo uma talakgalhaman xlakata nakamakgastakkgo xkamanan anta «kxtastakyaw chu kxtalakapastakni Jehová» (Efes. 6:4). Chuna la akxilhnitaw, ni kaj watiya talakaskin nakamasiyaniyaw tuku wan Biblia, wata nakamakgtayayaw pi lakatanks nakanajlakgo pi xlikana tuku katsinimakgo. Kamanan liwana xlikatsitkan tuku natlawa pi natamakamastanikgo Jehová chu xliputum xnakujkan naskujnanikgo. Biblia, espíritu santo chu tuku tlawakgo natlatni kamakgtayakgo kamanan xlakata skgalala nawankgo chu tlan nalakgtaxtukgo.