«Lata nti laktankswa, nakamakgapaxawa tu tlawanit Dios»
DIANA liwakaya 80 kata xkgalhi. Xchixku nilh xlakata xkgalhi tajatat wanikan Alzheimer chu anta xwi niku kakuentajtlawakan lakgkgolon. Xla na makgatsankgalh chatiy xkamanan chu na xkgalhi cáncer de mama. Maski chuna, akxni natalan xalak congregación akxilhkgo pi an lichuwinan Dios chu an ktamakxtumit, wankgo pi ankgalhin paxuwa.
John tiku superintendente viajante xwanit liwaka 43 kata. Lu xlakgati uma taskujut nema xlakgaya, pero makgxtakgli uma taskujut xlakata nakuentajtlawa chatum tiku xalak xfamilia xlakata xtatatla. Akxni natalan tiku makgasa lakgapaskgo chu katatanokglhkgo klanka tamakxtumit wankgo pi nitu talakgpalinit. Chuntiya xapaxuwana.
¿La tlawakgo Diana chu John xlakata ankgalhin tapaxuwan natawilakgo? ¿Tuku xlakata tlan tapaxuwan tawila maski titaxtuma tapatin o xlakata makgxtakga akgtum taskujut nema lu lakgati? Biblia kgalhtinan: «Lata nti laktankswa, nakamakgapaxawa tu tlawanit Dios» (Sal. 64:10, SXP). Xlakata tlakg liwana naʼakgatekgsniyaw uma, kalichuwinaw tuku kinkamaxkiyan xaxlikana tapaxuwan chu tuku ni.
TUKU MAKGKATSIYAW NEMA KAJ TITAXTU
Kkilatamatkan wi tuku kinkamakgapaxuwayan, la komo natamakgaxtokgaw, nakgalhiya kamanan o namakglhtinana akgtum tlan taskujut anta kxkachikin Jehová. Xlikana pi uma lipaxuwayaw xlakata wa xtamaskiwin Jehová. Wa tiku malakatsukilh tamakgaxtokgat, tiku kinkatlawan xlakata tlan nakgalhiyaw kamanan chu tiku kinkamaxkiyan taskujut anta kxkachikin (Gén. 2:18, 22; Sal. 127:3; 1 Tim. 3:1).
Lakgachunin tuku lipaxuwayaw kaj ni makgas titaxtu. Lu nitlan pero max wi tiku namakgatsankga o naniy tiku tamakgaxtokga o nalaʼakgskgawi (Ezeq. 24:18; Os. 3:1). Max kamanan ni kgalhakgaxmatkgo Dios chu xnatlatni o asta max natalakaskin nakatamakxtukan kcongregación. Akgtum liʼakxilhtit, xkamanan palakachuwina Samuel ni liwana skujnanikgolh Jehová; chu mapakgsina David tlawalh akgtum lanka talakgalhin chu alistalh lu nitlan tuku kitaxtulh xlakata katakgalhilh taʼakglhuwit xfamilia (1 Sam. 8:1-3; 2 Sam. 12:11). Uma taʼakglhuwit ni limin tapaxuwan wata limin lhuwa talipuwan.
Xtachuna la uma, taskujut nema lakgayaw kxkachikin Jehová max namakgatsankgayaw xlakata tajatat, kifamiliajkan o akxni anan talakgpalit anta kxkachikin Jehová. Lhuwa natalan tiku makgxtakgkgonit taskujut nema xlakgayakgo lichuwinankgo pi lu lakapastakkgo tapaxuwan nema xkalimini.
Xlikana max nalakpuwanaw pi uma tapaxuwan kaj ni makgas makgapala. Pero xliʼakxilhtitkan Samuel, David chu amakgapitsi masiya pi anan atanu tapaxuwan nema ankgalhin nakgalhiyaw maski natitaxtuyaw talakgpalit kkilatamatkan o nakgalhiyaw makgapitsin taʼakglhuwit.
TAPAXUWAN NEMA MAKGAPALA
Jesús xkatsi la kgalhikan xaxlikana tapaxuwan. Akxni xlama kʼakgapun, lu tlan xwanit xlatamat. Wa xlakata «putum kilhtamaku xatapaxuwan ktawi [Jehová] kxlakatin» (Prov. 8:30). Pero akxni milh kKatiyatni, lakgachunin titaxtulh laktuwa taʼakglhuwit. Maski chuna, lu xlipaxuwa xtlawa tuku xtalakaskin xTlat (Juan 4:34). ¿Tuku makgtayalh natayani tuku tuwa tsukulh titaxtu akxni awatiya kilhtamaku xlama unu kKatiyatni la chatum lataman? Biblia lichuwinan: «Wanti wa lantla xkgalhilh ntapaxuwan, wata kaj tipatinalh» (Heb. 12:2). Kalichuwinanaw pulaktiy tuku lichuwinalh Jesús xlakata tapaxuwan, wamputun xaxlikana tapaxuwan.
Akgtum kilhtamaku, 70 kstalaninanin tapaxuwan kitaspitkgolh akxni kilichuwinankgolh Dios xlakata tlawakgolh milagros, la komo katamakxtukgolh demonios. Wa xlakata Jesús kawanilh: «Wampi ni wa ntilipaxuwayatit yuma, mpi kalakgachixkuwikgoyan nixatlan spiritu; wampi wata wa nkalipaxuwatit mpi wa mintukuwinikan, anta ntatsokgnit nkakgapun» (Luc. 10:1-9, 17, 20). Xlikana maski lipaxuwayaw akgtum taskujut nema lakgayaw, pero tuku tlakg xlakaskinka wa pi Jehová tlan kinkaʼakxilhan chu uma kinkamaxkiyan xaxlikana tapaxuwan.
Atanu kilhtamaku, akxni Jesús xkamasiyanima lhuwa latamanin, chatum puskat tiku judía xwanit lichuwinalh pi max xtse ama tlan makgalhtawakgana lu xpaxuwa. Pero Jesús wanilh: «Ni; wata: ¡Paxuwakgo tiku kgaxmatkgo xtachuwin Dios chu kgalhakgaxmatkgo!» (Luc. 11:27, 28). Komo wi tiku kgalhi kamanan tiku tlan likatsikgo, xlikana pi max lu lipaxuwa. Pero tlakg napaxuwa komo nakgalhakgaxmata Jehová chu tlan natalalin.
Xlikana, xlakata nakgalhiya xaxlikana tapaxuwan wa pi nakatsiyaw pi Jehová tlan kinkaʼakxilhan. Taʼakglhuwit ni kinkaliminiyan tapaxuwan, pero na ni kinkamakglhtiyan. Wata akxni tayaniyaw chu ni makgxtakgaw Jehová, tlakg taliwaka kintapaxuwankan (Rom. 5:3-5). Nachuna kalakapastakwi pi Jehová kamaxki xʼespíritu tiku lipawankgo chu pulaktum tayat nema masta espíritu wa tapaxuwan (Gál. 5:22). Lu xlikana tuku lichuwinan Salmo 64:10, wan: «Lata nti laktankswa, nakamakgapaxawa tu tlawanit Dios».
¿Tuku makgtayanit John chuntiya napaxuwa?
Putum uma lichuwinan tuku xlakata Diana chu Jhon, tiku kalichuwinaw kxapulana, ni makgatsankgakgolh tapaxuwan maski xkgalhikgo taʼakglhuwit. Diana lichuwinan: «Klitatsekga Jehová, chuna la chatum aktsu kgawasa litatsekga xnatlatni». Nachuna wampara: «Kmakgkatsi pi Dios kimaxkinit xtasikulunalin xlakata kimakgtayanit chuntiya naklichuwinan xTachuwin chu ankgalhin nakpaxuwa». ¿Tuku tlan nawanaw xlakata John? Xla lichuwinan pi kkata 1998 wanika pi makgalhtawakgana xlitaxtulh k’Escuela Niku Kamasiyanikan Lakgkgolotsin chu Ministeriales chu uma tlawalh pi lu lhuwa xkgalhtawakgalh. Xlakata uma takgalhtawakga makgtayalh ankgalhin tapaxuwan nalichuwinan Dios maski alistalh makgxtakglhi taskujut nema xlakgaya la superintendente. Lichuwinan pi uma talakgpalit ni lu tuwa makgkatsikgolh xla chu xpuskat, xlakata ankgalhin xatapaxuwan xtlawakgo tuku Jehová xkawani, chu xchatiykan lichuwinankgo pi nitu lilakgaputsakgo.
Lhuwa amakgapitsi kstalaninanin Cristo lichuwinankgonit pi xlikana tuku wan Salmo 64:10. Kaʼakxilhwi akgtum liʼakxilhtit xpalakata akgtum tamakgaxtokgat tiku skujkgolh liwaka 30 kata anta kBetel xla Estados Unidos chu makglhtinankgolh taskujut xla precursorado especial. Xla lichuwinankgo: «Akxni namakgatsankgaya tuku pulana xliskujpat, xlikana pi nalilipuwana. Pero ni xlilat pi putum kilhtamaku nalilipuwana». Lakapala tsukukgolh makgtayanankgo kcongregación niku xtapakgsikgo. Nachuna wankgo: «Liwana xakwaniyaw Jehová tuku xlikana xaklilakgaputsayaw. Akxni xakakxilhaw la Jehová xkinkakgalhtiyan, lu xakpaxuwayaw chu lu xkinkamatliwakglhan. Akxni la nina makgas la xakwilaw kcongregación, amakgapitsi natalan nachuna precursores litaxtukgolh. Nachuna, chatiy kkamaxkiw takgalhtawakga xalak Biblia tiku lakapala tatliwakglhkgolh xtakanajlakan».
«ANKGALHIN NAKGALHIKGO TAPAXUWAN»
Xlikana pi tuwa ankgalhin nakgalhiyaw tapaxuwan. Namin kilhtamaku akxni nalipuwanaw. Pero Jehová kinkalimaxkiyan takgtsiyajni tuku wan Salmo 64:10. Maski taxlajwaniyaw, tlan nalipawanaw pi «nti laktankswa, nakamakgapaxawa tu tlawanit Dios». Uma kilhchanima pi maski kalalh tuku nala, ankgalhin napaxuwayaw komo ni namakgxtakgaw Jehová. Chu kgalhkgalhiyaw pi nachin kilhtamaku akxni nakgantaxtu tuku malaknunit xlakata natawila «xasasti akgapun, chu xasasti tiyat». Chuna xlakskujnin Dios nialh katikgalhikgolh talakgalhin chu «ankgalhin nakgalhikgo tapaxuwan» xlakata putum tuku natlawa Jehová (Is. 65:17, 18).
Kalilakpuwaw uma tuku kilhchanima: nialh katitatatlaw, chu chali chali tlan namakgkatsiyaw. Putum tuku nitlan talakapastakni kgalhiyaw o tuku makgkatsiyaw nialh katilakapastakwi. Jehová kinkawaniyan pi «tuku titaxtunita nialh katitalakapastakli, na nialh katitawilalh kkinakujkan». Xlakata talakastakwanat tlan akxtum nakatatawilaparakgoyaw kifamiliajkan tiku nikgonita. Lhuwa millones latamanin lu napaxuwakgo chuna la nikxni lakpuwanaw, chuna la xnatlatni tsumat tiku xkgalhi akgkutiy kata tiku Jesús malakastakwanilh (Mar. 5:42). Chu namin kilhtamaku akxni putum latamanin tiku nalatamakgo Katiyatni xaʼakgstitum nalitaxtukgo «nti laktankswa, nakamakgapaxawa tu tlawanit Dios» putum kilhtamaku.