«Kalimasiyatit pi paxtikatsininanatit»
«¿AKIT ankgalhin kpaxtikatsininan?». Talakaskin pi kimputumkan nakinkatlawanikanan uma takgalhskinin. Biblia lichuwinalh pi kkinkilhtamakujkan lhuwa latamanin nialh xpaxtikatsininankgolh (2 Tim. 3:2). Max kalakgapasaw latamanin tiku lakpuwankgo pi putum kalakgchan tuku kgalhikgo o tuku kamaxkikan, chu max ni paxtikatsininankgo. Niti tlan akxilha tiku chuna likatsi.
Pero Jehová kawani xlakskujnin: «Kalimasiyatit pi paxtikatsininanatit» chu «putum kalipaxtikatsinitit Dios» (Col. 3:15; 1 Tes. 5:18). Nachuna, lu tlan kitaxtu akxni paxtikatsininanaw. ¿Tuku xlakata? Kaʼakxilhwi.
PAXTIKATSININANKAN LU TLAN KINKAMAMAKGKATSINIYAN
Pulaktum tuku xlakata xlakaskinka napaxtikatsininanaw wa pi lu tlan kinkamamakgkatsiniyan, chu nachuna tlan makgkatsi tiku paxtikatsiniyaw. ¿Tuku xlakata? Kalilakpuwaw uma. Komo chatum lataman wi tuku tlawa kimpalakatakan, chuna tlawa xlakata kinkalilakgaputsayan. Uma tlawa pi tlan nalimakgkatsiyaw. Max chuna makgkatsilh Rut. Akxni Boaz tlan likatsinilh, max lu paxuwalh akxni akxilhli pi lu xlilakgaputsa (Rut 2:10-13).
Pero tuku tlakg xlakaskinka wa pi napaxtikatsiniyaw Jehová. Xlikana pi makglhuwa lilakpuwanitaw tuku kinkamaxkinitan Jehová, chuna la tuku maklakaskinaw kkilatamatkan chu xla kintakanajlakan chu chuntiya kinkamaxkiman (Deut. 8:17, 18; Hech. 14:17). Pero ni kajwatiya kalakapastakwi tuku tlawanit Dios kimpalakatakan. Wata kalimaxtuw kilhtamaku xlakata nalilakpuwanaw la kinkamasiyaninitan xtalakgalhaman akinin chu kifamiliajkan. Chuna tlakg napaxtikatsiniyaw chu tlakg liwana nakatsiyaw pi xla lu kinkapaxkiyan chu kinkalilakgaputsayan (1 Juan 4:9).
Nachuna ni kajwatiya kalilakpuwaw la kinkalilakgaputsayan Jehová chu la kinkasikulunatlawayan, wata kapaxtikatsiniw xlakata kinkalakgalhamanan (Sal. 100:4, 5). Lichuwinankan pi «paxtikatsininankan lu limin tapaxuwan».
AKXNI PAXTIKATSININANAW TLAKG TLAN KATALALINAW AMAKGAPITSIN
Atanu tuku xlakata tlan napaxtikatsininanaw wa pi tlakg tlan nakatalalinaw amakgapitsin. Putum akinin lakaskinaw pi kakinkalilakgaputsakan. Akxni xliputum kinakujkan paxtikatsiniyaw tiku wi tuku tlawalh kimpalakatakan, tlakg tlan talalinaw (Rom. 16:3, 4). Wa xlakata, tiku kapaxtikatsini amakgapitsin xlakan max tlakg namakgtayaputunkgo. Xlakata akxilha tuku tlawakan kxpalakata, tlan tsuku kalikatsini amakgapitsin. Chu akxni nakamakgtayayaw kintalatamankan kinkamakgapaxuwayan, xlakata chuna la lichuwinalh Jesús, «tlakg anan tapaxuwan akxni mastakan nixawa akxni makglhtinankan» (Hech. 20:35).
Robert Emmons, tiku na xlakgayawakanit taskujut anta kʼUniversidad xalak California xlakata nakatsikan tuku kitaxtu xapaxtikatsinina nawana, lichuwinalh: «Xlakata xapaxtikatsinina nawana, talakaskin liwana naʼakxilha la latalalinkgo latamanin; lakgachunin, makgapitsin wi tuku tlawakgo kimpalakatakan, chu lakgachunin akinin wi tuku tlawayaw kxpalakatakan amakgapitsin». Chuna, lakgachunin amakgapitsin kinkamakgtayakgoyan xlakata tlan nalatamayaw chu napaxuwayaw. Akgtum liʼakxilhtit, max amakgapitsin nakinkamaxkikgoyan liwat o nakinkamakgtayakgoyan akxni tatatlayaw 1 Cor. 12:21). Tiku paxtikatsininankgo liwana akxilhkgo tuku tlawakgo amakgapitsin kxpalakatakan. ¿Akinin lismaninitaw nakapaxtikatsiniyaw amakgapitsin?
(PAXTIKATSININANKAN KINKAMAKGTAYAYAN TLAN NAʼAKXILHAW TUKU TLAN NAKINKAKITAXTUNIYAN
Atanu tuku xlakata tlan napaxtikatsininanaw wa pi kinkamakgtayayan tlan naʼakxilhaw tuku tlan nakinkakitaxtuniyan. Kintalakapastaknikan xtachuna la akgtum putsikin, nema wi tuku makgxtakga. Latamanin tiku lu paxtikatsininankgo, ni wa kuenta tlawakgo tuku nitlan titaxtumakgo wata wa akxilhkgo tuku tlan nakakitaxtuni. Akxni tlakg paxtikatsininanaw, tlakg tsukuyaw akxilhaw tuku tlan kinkakitaxtuniman, chu uma tlawa pi tlakg napaxtikatsininanaw. Komo chuna nalinaw kilatamatkan nakinkamakgtayayan natlawayaw tuku lichuwinalh apóstol Pablo: «Ankgalhin kapaxuwatit xpalakata kimalanakan» (Filip. 4:4).
Komo xapaxtikatsininanin nawanaw, ni wa katiʼakxilhwi tuku nitlan titaxtumaw. Nila paxtikatsininanaw komo wi tuku lakgkatsalakanaw, sitsiyaw o lipuwamaw. Nachuna, latamanin tiku paxtikatsininankgo ni lhuwa tuku kgalhiputunkgo, xlakata lanka xtapalh akxilhkgo tuku kgalhikgo chu ni tlakg lhuwa tuku kgalhiputunkgo (Filip. 4:12).
KAʼAKXILHWI TUKU TLAN KGALHIYAW
Akinin kstalaninanin Cristo katsiyaw pi Satanás lu nalipaxuwa komo tuku tuwa titaxtuyaw kkilatamatkan xkinkamaxlajwanin chu xkinkamakgalipuwan. Xla lakaskin pi xʼakxilhwi tuku nitlan titaxtumaw chu ankgalhin nitlan xlimakgkatsiw. Komo chuna xlakpuwaw nila liwana xlichuwinaw xtachuwin Dios. Nachuna akxni mastakan paxtikatsinit limasiyakan xtawakat espíritu santo, chuna la tapaxuwan nema kinkaliminiyan akxni anaw lichuwinanaw Dios chu takanajla nema kgalhiniyaw xtamalaknun Dios (Gál. 5:22, 23).
Akinin xlakskujnin Dios xlikana pi nachuna lakpuwanaw putum tuku akxilhnitaw la uku xlakata lu xlakaskinka napaxtikatsininanaw. Pero nachuna liwana katsiyaw pi lu xlakaskinka naliskujaw xlakata xapaxtikatsininanin nawanaw chu wa naʼakxilhaw tuku tlan titaxtuyaw. Ni kataxlajwaniw. Kimputumkan tlan xapaxtikatsininanin nawanaw. Wa xlakata, ankgalhin kalimaxtuw kilhtamaku xlakata nalilakpuwanaw tuku tlan nalipaxtikatsininanaw. Komo ankgalhin chuna natlawayaw, tlakg ni tuwa katimakgkatsiw napaxtikatsininanaw. Chu lu napaxuwayaw nixawa latamanin tiku wa akxilhkgo tuku nitlan kakitaxtunima kxlatamatkan. Kalilakpuwaw tuku tlawa Dios kimpalakatakan chu la kinkamakgtayakgoyan amakgapitsin, kalilakpuwaw putum tuku kinkamakgapaxuwayan. Asta max tlan chali chali xtlawaw akgtum lista niku tlan xtsokgwiliw tuku tlan nalipaxtikatsiniyaw.
Lakgskgalalan lakchixkuwin akxilhkgonit pi komo nalismaniyaw napaxtikatsininanaw lakgpali kintalakapastaknikan, chu tlakg ni tuwa katimakgkatsiw wa naʼakxilhaw tuku tlan kinkakitaxtuniyan. Tiku lu paxtikatsininankgo tlakg kgalhikgo tapaxuwan. Wa xlakata, wa kaʼakxilhwi tuku tlan kgalhiyaw, kalipaxuwaw tuku titaxtuyaw kkilatamatkan chu ankgalhin kapaxtikatsininaw. Ni kalakpuwaw pi tuku titaxtuyaw ni katitalakgpalilh, wata katlawaw tuku wan Biblia: «Kamaxkitit paxtikatsinit Jehová, xlakata xla tlan likatsi», «putum kalipaxtikatsinitit Dios» (1 Crón. 16:34; 1 Tes. 5:18).