Tuku katsiputunkgo tiku likgalhtawakgakgo
Akxni Satanás wanilh Eva pi ni xʼama niy komo xwalh xtawakat kiwi nema lilakgapaskan tuku xatlan chu tuku nixatlan, ¿xlitachuwinama pi wi tuku xkgalhi nema ni niy, chuna la lakpuwankgo latamanin la uku?
Max ni chuna. Satanás ni wanilh Eva pi kajwatiya xmakni xnilh komo xwalh xtawakat kiwi nema ni xliwat xwanit, chu wi tuku chuntiya xlatamalh nema ni tasiya (nema latamanin lilakgapaskgo espíritu nema ni niy). Satanás limaklakaskilh tantum luwa xlakata nawani Eva pi ni xʼama niy. Uma kinkamakgatekgsniyan pi chuntiya xʼama latama chu pi tlakg xʼama lipaxuwa xlatamat unu kKatiyatni, akgtum latamat niku ni xmaklakaskilh xtamakgtay Dios (Gén. 2:17; 3:3-5).
Wa xlakata, komo takanajla xlakata kgalhiyaw espíritu nema ni niy, ni anta lakatsukulh kʼEdén, ¿tuku kilhtamaku lakatsukulh? Ni liwana katsiyaw. Katsiyaw pi nixaxlikana takanajla lakgsputkgolh kxkilhtamaku Noé akxni milh Munkaklat. Xlakata kajwatiya Noé chu xfamilia lakgtaxtukgolh, tiku xlakskujnin Dios xwankgonit, putum nixaxlikana talakapastakni xlakata takanajla na lakgsputkgolh.
Wa xlakata, tlan nawanaw pi uma takanajla lakatsukulh akxni xtitaxtunit Munkaklat. Akxni Dios kalakgpalinilh xtachuwinkan latamanin anta kBabel chu talakgatumikgolh «kxlikalanka katiyatni», max linkgolh talakapastakni xlakata latamanin kgalhikgo akgtum espíritu nema ni niy (Gén. 11:8, 9). Wa xlakata ni liwana katsiyaw tuku kilhtamaku lakatsukulh uma nixaxlikana takanajla. Pero tuku liwana katsiyaw wa pi Satanás, tiku «xmalakatsukina taʼakgsanin», malakatsukilh uma tamasiy chu lu lipaxuwalh akxni akxilhli pi uma talakpuwan xtalakgatumima (Juan 8:44).