Deuteronomio 22:25-27 ni wa lichuwinan komo nalimawakakan talakgalhin uma chixku, xlakata liwana xtasiya pi xla xtlawanit talakgalhin. Wata uma limapakgsin xlimasiya pi tsumat nitu xmakglakgalhinanit. Kaʼakxilhwi tuku xtlawakan.

Xapulana versículo lichuwinan chatum chixku tiku tatlawalh talakgxtumit xalimaxana «anta klanka kachikin» chatum tsumat tiku kskinkanit. Xlakata laktsuman tiku xkaskinkanit xtachuna xkaʼakxilhkan la komo xtamakgaxtokgkgonita, chixku xlimawakakan pi xlaktlawanit akgtum tamakgaxtokgat. ¿Pero tuku xkitaxtuni tsumat? «Ni skilh tamakgtay». Komo ni xtiskilh tamakgtay, xla nachuna xlimawakaka talakgalhin. Wa xlakata xchatiykan xkalimawakakan talakgalhin (Deut. 22:23, 24).

Pero, Limapakgsin nachuna xwan: «Pero, komo uma chixku xtekgsli anta kkapukuxtun uma tsumat tiku skinkanita chu fuerza xtlawalh pi xtatalakgxtumilh, kajwatiya xlinit chixku tiku lekgamanalh; tsumat nitu natlawaniyatit. Xla nitu tlawanit talakgalhin xlakata namakgniyatit. Uma xtachuna la chixku tiku talatlawa xtalataman chu makgni. Xlakata chixku tekgsli kkapukuxtun chu tsumat tiku skinkanit skilh tamakgtay, pero niti kgaxmatli xlakata namakgtayakan» (Deut. 22:25-27).

Akxni xtawila uma taʼakglhuwit, jueces wa xkanajlanikgo tsumat. Xlakpuwankgo pi xla «skilh tamakgtay, pero niti kgaxmatli xlakata namakgtayakan». Wa xlakata ni xlimawakakan talakgalhin. Pero, chixku xlin kuenta xlakata xlikgamananit tsumat xlakata «fuerza tlawalh pi xtatalakgxtumilh» chu xlakata mamaxanilh xpuskat xtalataman.

Wa xlakata, maski uma limapakgsin wa xlakata nalimasiyakan pi tsumat ni xlin kuenta, liwana lichuwinan tuku xlakata wa chixku xlimawakakan pi xlikgamananit tsumat chu xlaktlawanit xtamakgaxtokgat xtalataman. Katsiyaw pi jueces liwana xlakputsananikgo tuku xlikana xlanit chu pulana liwana xʼakxilhkgo tuku xlichuwinanit Dios xlakata tlan xlaksakkgolh tuku xtlawakgolh (Éx. 20:14; Deut. 13:14; 17:4).