Jehová kawanilh israelitas pi akgtum xaskulunku kachikin xliwanatkan xwanit. Xlakata tlan xmakgantaxtikgolh, kamaxkilh uma limapakgsin: «Ni kamalakgatumi taʼakgsanin kxlakgstipan minkachikin. Ni katlawa tuku nitlan nakitaxtuni mintalataman. Akit Jehová» (Lev. 19:2, 16).

¿La kiliʼakgatekgsatkan tachuwin «Ni katlawa tuku nitlan nakitaxtuni mintalataman»? Maktum libro judío wa uma tuku wa xlakata Levítico: «Lu tuwa wankan tuku kilhchanima uma xlakata ni liwana takatsi tuku xlikana wamputun ktachuwin hebreo, kʼuma tachuwin taʼakgatekgsa “ni lakatsu natayaya o kxpaxtun”».

Tiku lu katsinikgo lakpuwankgo pi uma tachuwin tatalakxtumi xapulana versículo nema wan: «Ni kamalakatsalitit chuna la lakputsananatit. Ni kakalaksakpaxkitit lakglimaxkgenin chu ni tlakg kakapaxkitit tiku kgalhikgo lhuwa tumin. Xaʼakgstitum kakalakputsananitit mintalatamankan» (Lev. 19:15). Komo uma xlikana, limapakgsin nema tatekgsa kversículo 16 pi ni lakatsu natayaya o kxpaxtun achatum, kilhchanima pi israelitas ni xlitlawatkan xwanit tuku ni xaʼakgstitum, anta niku lakputsanankan, akxni kstanankgolh o kxfamiliajkan. Chu na ni xliʼakgskgawinatkan xwanit. Xlikana pi ni kilitlawatkan umakgolh, pero wi atanu la tlan tlakg liwana naʼakgatekgsaw tachuwin nema min kversículo 16.

Kaʼakxilhwi xapulana tachuwin xla uma versículo. Dios kawani israelitas pi ni namalakgatumikgo taʼakgsanin. Kalakapastakwi pi akgsaninankan ni kilhchanima nitlan wi tiku nalichuwinana, maski uma na limin taʼakglhuwit (Prov. 10:19; Ecl. 10:12-14; 1 Tim. 5:11-15; Sant. 3:6). Makglhuwa, akxni wankan taʼakgsanin tuku tlawaputunkan wa pi nitlan kalichuwinanka achatum. Tiku wan taʼakgsanin nawan tuku nixaxlikana xlakata chatum lataman maski kalipekua nawilini xlatamat. Wa uma tuku akgspulalh Nabot. Makgapitsi lakchixkuwin limawakakgolh tuku ni xaxlikana, xlakata uma taʼakgsanin makgnika maski ni xlin kuenta (1 Rey. 21:8-13). Wa xlakata, chuna la wan xlipulaktiy tuku lichuwinan Levítico 19:16, tiku wan taʼakgsanin xlakata achatum tlawanima tuku nitlan xtalataman.

Nachuna, max wi tiku nawan taʼakgsanin xlakata xtalataman xlakata ni akxilhputun. Anta k1 Juan 3:15 wan: «Putum tiku ni akxilhputun xtala makgnina litaxtu, chu wixin katsiyatit pi nipara chatum tiku kamakgni latamanin namakglhtinan latamat nema ni kgalhi xlisputni». Lu kaks malakawaninan pi akxni xmastanita limapakgsin xla Levítico 19:16, Dios wa: «Minaku ni kasitsinilh mintala» (Lev. 19:17).

Wa xlakata, xlipulaktiy tuku wan Levítico 19:16 kinkamaxkiyan akgtum tlan tastakyaw putum kstalaninanin Cristo. Kililakgmakganatkan nixalaktlan talakapastakni chu nikxni nawanaw taʼakgsanin xlakata achatum. Komo namastayaw talakaskin pi tasitsi o talakgkatsalakan natlawa pi nawanaw taʼakgsanin xlakata achatum, uma xlimasiyalh pi ni akxilhputunaw. Chu chatum kstalanina Cristo niti xlisitsinit (Mat. 12:36, 37).