Klakachilh kkata 1927 kʼakgtum aktsu kachikin lakatsu kChicago (Illinois, Estados Unidos). Kinatlatni kgalhikgolh kgalhkitsis kamanan: Jetha, Don, akit, Karl chu Joy. Kimputumkan xakskujnaniputunaw Jehová xliputum kinakujkan. Kintala tsumat Jetha alh kxliʼakgtiy clase de Galaad, kkata 1943. Don, Karl chu Joy katasanika kBetel, kBrooklyn (Nueva York), chatum tasanika kkata 1944, achatum 1947 chu achatum 1951. Xatlan xliʼakxilhtit kinatalan chu kinatlatni, lu kimakgtayalh.

Kinatlatni lu xlakgatikgo xlikgalhtawakgakgo Biblia chu xpaxkikgo Dios, wa xlakata kinkamasiyanikgon nachuna naktlawayaw. Pero akxni kintlat xkitaspitnit kʼEuropa xlakata kimakgtlawalh xaPulana Guerra nema tlawaka xLikalanka Katiyatni, nialh xlakaskinka xʼakxilha takanajla. Kintse lu tlan xlimakgkatsi xlakata kintlat xkitaspitnit kʼguerra, wa xlakata wanilh: «Karl, kaʼamparaw ksikulan, chuna la xtlawayaw xapulana». Kintlat kgalhtilh: «Naktaʼanan, pero akit ni ktitanulh». Kintse kgalhskilh: «¿Tuku xlakata?». Xla kgalhtilh: «Akxni xaklama kʼguerra kakxilhli pi xpulalinanin takanajla xkasikulunatlawamakgo soldados xalak tanu tanu kachikinin pero watiya takanajla xkgalhikgo. ¿¡Tiku xʼama kamakgtaya Dios!?».

Akgtum kilhtamaku, akxni kintse xʼanit kpusikulan, chatiy xtatayananin Jehová minkgolh kchiki. Malaknunikgolh kintlat maktiy libros nema xlitapakuwikgo Luz, niku xlichuwinan tuku min klibro xla Apocalipsis. Kintlat lakgatilh chu makgamakglhtinalh. Akxni kintse akxilhli umakgolh libros, tsukulh likgalhtawakga. Milh kilhtamaku, kintse akxilhli kmaktum periódico niku xkaʼinvitarlimaka latamanin komo xlakaskinkgo xkalimakgakgalhtawakgeka Biblia chu maktiy libro nema xlitapakuwi Luz, wa xlakata alh niku xlimakgalhtawakgenankan umakgolh libros. Akxni chalh, makgamakglhtinalh chatum puskat tiku xlina kata. Kintse masiyanilh libro chu kgalhskilh: «¿Anta unu niku likgalhtawakgakan uma?». Chu xla kgalhtilh: «Chuna nana, katanu». Akgtum semana alistalh, kintse kinkalin akit chu kinatalan. Chu lata ama kilhtamaku ankgalhin kkaw.

Kʼakgtum tamakxtumit, tala tiku xpulalima kiwanilh pi xaklikgalhtawakgalh Salmo 144:​15, niku lichuwinan pi tiku skujnanikgo Jehová paxuwakgo. ¡Uma texto lu klakgatilh! Atanu textos nema klakgatilh wa 1 Timoteo 1:​11, niku wan pi Jehová wa xapaxuwana Dios,  chu Efesios 5:​1, niku kinkamakgpuwantiniyan nastalaniyaw xliʼakxilhtit Dios. Uma kimasiyanilh pi xtalakaskin xaklipaxuwalh putum tuku xaktlawalh xpalakata kiMalakatsukina chu pi xakpaxtikatsinilh xlakata xkimaxkinit talakgalhaman nakskujnani. Umakgolh akgtiy tapuwan wa tuku lu kliskujnit naktlawa putuminika kkilatamat.

Congregación nema tlakg lakatsu xwi wa xalak Chicago, nema 32 kilómetros xlilakgamakgat xwi lata niku xakwilaw. Maski chuna, ankgalhin xakkanaw ktamakxtumit, chu tlakg ktsukulh katsini xlakata Biblia. Klakapastaka pi akgtum kilhtamaku Jetha maxkika akgtum comentario. Akxni kkgaxmatli tuku wa, klakpuwa: «Akit na xakkatsi uma. ¿Tuku xlakata ni kchaxli kimakan?». Wa xlakata, lata ama kilhtamaku ktsukulh lakkaxwili tuku xʼamaka akxilhkan ktamakxtumit chu ktsukulh masta kincomentarios. Pero tuku tlakg xlakaskinka wa pi tatliwakglhli kintakanajla chuna la xla kinatalan. Chu kkata 1941 ktamunulh.

Lu klakapastaka akgtum asamblea nema tlawaka kkata 1942 kCleveland (Ohio). Uma programa matitaxtika kteléfono kliwaka 50 kachikinin xalak Estados Unidos. Kifamilia chu akit ktamakgxtakgwi klaktsu chiki xla lhakgat niku xwilakgo amakgapitsi natalan, lakatsu niku xtlawamaka asamblea. Xliʼakgtiy Guerra xLikalanka Katiyatni tlakg xtaliwakama, chu na tlakg xkaputsastalanimaka xtatayananin Jehová. Wa xlakata, katsisni natalan malakaʼayawanikgolh xputlawkan niku xlaktanukan kcampamento. Putum natalan lawanikgolh pi wi tiku xtamakgxtakgli kʼakgatunu putlaw xlakata xkuentajtlawanalh. Komo xʼakxilhkgolh pi wi tiku xtalakatsuwima, natalan xlimapasitkan xwanit xmakgskgot xputlawkan xlakata xmalakgachixikgolh, chu xmapasikgolh xbocinajkan. Uma xtlawalh pi amakgapitsin natalan lakapala xminkgolh makgtayanankgo. Chu akit klakpuwa: «Xkachikin Jehová liwana katsi tuku natlawa komo wi tuku lakapala nala». Uma katsisni nitu lalh, tlan klhtatalh xlakata xakkatsi pi xkinkuentajtlawamaka.

Akxni xtitaxtunita lhuwa kata chu xaklilakapastakma uma asamblea, klakapastakli pi kintse nipara tsinu xlakgaputsama uma katsisni chu ni xpekuama. Xla xlipawan Jehová chu xkachikin. Nikxni ktipatsankgalh xatlan xliʼakxilhtit.

Akxni nialh lhuwa kilhtamaku xtsankga xlakata xakkgalhiw uma asamblea, kintse precursora regular litaxtulh. Wa xlakata liwana kgaxmatli taʼakgchuwin niku xlichuwinankan la skujnanikan Jehová putum kilhtamaku. Akxni xaktaspitmaw kchiki, xla kinkawanin: «Chuntiya precursora klitaxtuputun. Pero ni kkatsi la naktlawa xlakata lhuwa tuku kilitlawat kchiki». Xla kinkakgalhskin komo tlan xakmakgtayaw, chu akinin kwaniw pi tlan. Wa xlakata kinkalakgayawan kinchatunukan pi akxni xaktakiw xakkaxakaw akgtum o akgtiy cuarto. Alistalh akxni xakkanaw kʼescuela, xla xʼakxilha komo nialh kalixkajni xwanit chu alistalh xʼan lichuwinan Dios. Maski kintse lhuwa taskujut xkgalhi, ankgalhin kinkakuentajtlawan. Akxni xakkitaspitaw kʼescuela, ankgalhin xkinkatawayanan. Xmin kilhtamaku xakkanaw talichuwinanaw Dios akxni xakkitaspitaw kʼescuela, chu uma kinkamakgtayan liwana nakʼakgatekgsaw la xlilhuwa skuja chatum precursor.

Precursor regular klitaxtulh akxni xakkgalhi 16 kata. Maski kintlat nina xtatayana Jehová xlitaxtu, xla ankgalhin xkinkgalhskin la xkinkitaxtuninit akxni xaklichuwinan Dios. Akgtum katsisni kwanilh pi maski lu xakliskujma nina xaktekgsnit tiku tlan  xaklimakgalhtawakgelh Biblia. Xla nitu kiwanilh, chu wa xlakata kkgalhskilh: «¿Ni lakaskina xaklimakgalhtawakgen Biblia?». Xla tsinu lilakpuwa chu kinkgalhtilh: «Pues max tlan nawan». Kintlat wa tiku pulana klimakgalhtawakgelh Biblia. Uma lu kimakgapaxuwalh.

Klikgalhtawakgaw libro «La verdad os hará libres». Chuna la xaklikgalhtawakgatilhamaw libro, kakxilhli pi xlakata xakmakgalhtawakgema kintlat xkimakgtayama tlakg xaklakputsananilh Biblia chu chuna tlakg tlan makgalhtawakgena xaklitaxtulh. Akgtum liʼakxilhtit, akgtum katsisni akxni xaklikgalhtawakganitaw akgtum párrafo, xla kiwanilh: «Wa uma tuku wan libro. Pero ¿la likatsiya wix pi xlikana tuku wan?». Uma kaks kimalakawanilh chu kwanilh: «Uku ninajla kkgalhtiyan. Pero akxni nakgalhtawakgaparayaw nakwaniyan». ¡Chu chuna ktlawalh! Ktekgsli makgapitsi textos nema xkgalhmakgtaya tuku xaklichuwinanitaw. Lata ama kilhtamaku, kkatsinilh la tlakg tlan naklakputsanani tuku xakkamaw likgalhtawakgayaw chu chuna tlakg tlan makgalhtawakgena xaklitaxtulh. Putum uma kimakgtayalh akit chu kintlat xlakata xakmatliwakglhwi kintakanajlakan. Xla tsukulh lilatama putum tuku xkatsinima chu tamunulh kkata 1952.

Akxni xakkgalhi 17 kata ktaxtulh kinchik. Chu watiya uma kilhtamaku, Jetha a misionera litaxtulh chu Don alh kBetel. Xchatiykan lu xlipaxuwakgo chuna la kskujnimakgo Jehová, chu uma tlawalh pi nachuna xaktlawaputulh. Wa xlakata kmalakgatsamalh solicitud xlakata tlan xakkalh kBetel chu solicitud xla Escuela de Galaad, chu kkgalhkgalhilh pi wa Jehová xwa niku tlan xakskujnanilh. Chu kkata 1946 kiwanika pi xakkalh kBetel.

Chuna la titaxtunit kilhtamaku, tanu tanu taskujut kilakgayawakganit kBetel. Uma kimakgtayanit tlakg lhuwa tuku nakkatsini. Akgtum liʼakxilhtit, kkatsininit xlakata contabilidad, kkatsininit la imprimirlikan libros, kimasiyanikanit la wi tuku malakgachakan kʼatanu país chu la wi tuku liminkan kBetel xalak atanu país. Pero tuku tlakg klakgatinit umakgolh 75 kata anta kBetel wa tuku kinkamasiyanikanan kʼadoración matutina chu kʼatanu taʼakgchuwin nema mastakan kBetel.

Na lhuwa tuku kimasiyanilh kintala xaʼaktsujku, Karl, tiku chalh kBetel kkata 1947. Xla lu xlakputsanani Biblia chu lu tlan makgalhtawakgena xlitaxtu. Akgtum kilhtamaku, kskinilh tamakgtay xlakata xaklakkaxtlawama akgtum taʼakgchuwin nema xakkama masta. Kwanilh pi lhuwa tuku xaklakputsananinit pero ni xakkatsi la xakkama lichuwinan putum uma. Kaj akgtum takgalhskinin kintlawanilh nema lu kimakgtayalh: «Joel, ¿tuku wan mi bosquejo pi tlakg talakaskin nalichuwinana?». Tunkun kʼakgatekgsli tuku xkiwaniputun: kajwatiya kilimaklakaskinat xwanit tuku tlakg xlakaskinka chu ni putum tuku xaklakputsananinit. Uma tuku kimasiyanilh nikxni kpatsankgalh.

 Xlakata nalipaxuwayaw chuna la skujmaw kBetel, talakaskin pi ankgalhin nalichuwinanaw Dios. Komo chuna natlawayaw, lhuwa tuku tlan nakinkakitaxtuniyan. Akgtum liʼakxilhtit, klakapastaka tuku kinkaʼakgspulan akxni xaklichuwinamaw Dios kakgotanun anta kBronx, Nueva York. Akxni aku xaktsukunitaw klichuwinanaw Dios, chatum tala chu akit ktilakgapaxialhnaw chatum puskat tiku xmakgamakglhtinanit revistas La Atalaya chu ¡Despertad! Akxni kchaw kwaniw: «La uku kkalitachuwinamaw latamanin pulaktum tuku lu tlan masiya Biblia». Xla kinkakgalhtin: «Komo wa Biblia lichuwinampatit, katanutit». Akxtum klikgalhtawakgaw chu klichuwinaw makgapitsi textos niku lichuwinan xlakata xTamapakgsin Dios chu xasasti kakilhtamaku nema Dios nalimin. Kakxilhwi pi lu xlakgatinit xlakata akxni kkilakglaparaw xkaʼinvitarlinit lhuwa xʼamigos. Alistalh, uma puskat chu xchixku xtatayananin Jehová litaxtukgolh.

Maski xaklakpuwanit pi naktamakgaxtokga, titaxtulh akgkaw kata asta akxni klakgapasli kimpuskat. ¿Tuku kimakgtayalh naktekgsa xatlan puskat? Kskinilh xtamakgtay Jehová chu klilakpuwa: «¿Tuku ktlawaputun akxni ktamakgaxtokgnita nawan?».

Akxni xtitaxtunita asamblea nema tlawaka kkata 1953 kʼEstadio de los Yankees, klakgapasli Mary Aniol. Xla chu kintala akxtum xkilakgonit kxliʼakgtiy clase de Galaad, chu uma kilhtamaku akxtum xkamalakgachakanit niku xlichuwinankgolh Dios. Mary xatapaxuwan xkilitachuwinan la xkitaxtuninit kCaribe akxni malakgachaka xlakata xlichuwinalh Dios chu la xlilhuwa latamanin xkalimakgalhtawakgenit Biblia. Chuna la xaklalakgapastilhamaw kakxilhwi pi kinchatiykan chuntiya xakskujnaniputunaw Jehová putum kilhtamaku. Tlakg ktsukuw lalakgatiyaw chu abril kata 1955 ktamakgaxtokgwi. Mary ankgalhin kilimasiyanilh pi akgtum xtamaskiwin Jehová xlitaxtu chu xkiwilini xatlan liʼakxilhtit. Ankgalhin xatapaxuwan xtlawa kaxatukawa tuku xlakgayawakan. Lu palha kskuja, xkalilakgaputsa latamanin chu ankgalhin pulana xwili xTamapakgsin Dios kxlatamat (Mat. 6:33). Akgtutu kata superintendente de circuito klitaxtulh, chu kkata 1958 kinkawanikan pi xakkaw makgtayananaw kBetel.

Mary lhuwa tuku kimasiyanilh. Akgtum liʼakxilhtit, akxni aku xaktamakgaxtokgnitaw klakkaxwiliw pi lakxtum xakkamaw likgalhtawakgayaw Biblia, chu chatunu chatunu xʼama likgalhtawakga 15 versículos. Akxni xla xlikgalhtawakgakgo 15 versículos, xaklichuwinanaw tuku xkinkamasiyaniyan chu xakakxilhaw la tlan xakmakgantaxtiw kkilatamatkan. Makglhuwa, Mary xkilitachuwinan tuku xkatsininit kʼGalaad o akxni misionera xlitaxtu. Uma tuku xaklikgalhchuwinanaw lu kimakgtayalh xlakata tlakg tlan xakmastalh kintaʼakgchuwin chu xakkatsinilh la nakkamatliwakglha natalan lakpuskatin (Prov. 25:11).

Mary nilh kkata 2013. ¡Lu klakaskin pi kachilha xasasti kakilhtamaku xlakata tlan nakakxilhpara! Pero la uku, chuntiya tlakg kkatsiniputun tuku nakimasiyani Jehová chu klipawamputun xliputum kinaku (Prov. 3:​5, 6). Akxni klilakpuwan tuku natlawa xkachikin Dios kxasasti kakilhtamaku, lu kimakgpuwantini chu lu kimakgapaxuwa. Ama kilhtamaku, xaLanka kiMakgalhtawakgenakan lhuwa tuku xasasti nakinkamasiyaniyan chu tlakg nakatsiniyaw xpalakata. Jehová lhuwa tuku kimasiyaninit chu kilimasiyaninit xtalakgalhaman, ni kintiakchanilh tachuwin maski lhuwa tuku nakwani xlakata nakpaxtikatsini.