1, 2. Kalichuwinanti makgapitsi tuku kinkamakgatasayan.

 ¿NI XLIKANA pi putum akinin minit kilhtamaku tasanitaw? Min kilhtamaku tasayaw xlakata paxuwamaw, xlakata wi tuku tlan kinkaʼakgspulan chuna la akxni lakachin chatum aktsu skgata. Max lakgaxtajaw xlakata lakapastakaw tuku tlan kinkaʼakgspulanitan o xlakata tatanokglhaw chatum kiʼamigojkan tiku makgasata ni xʼakxilhaw.

² Pero tlakg makglhuwa tasayaw xlakata lipuwamaw. Max wi tiku lu nitlan kinkamamakgkatsinitan o nitlan limakgkatsiyaw xlakata tatatlayaw o xlakata nilh chatum tiku lu xpaxkiyaw. Uma kilhtamaku max makgkatsiyaw chuna la makgkatsilh Jeremías akxni babilonios masputukgolh Jerusalén. Uma palakachuwina wa: «Kilakgaxtajat lhuwa taxtu xtachuna xchuchut kgalhtuchokgo [...]. Kilakgastapu chuntiya natasakgo, ni katijaxkgolh» (Lam. 3:​48, 49).

3. ¿La makgkatsi Jehová akxni akxilha pi kskujnin patinamakgo? (Isaías 63:9).

³ Jehová katsi la xlimakglhuwa tasanitaw asta la uku. Biblia kinkawaniyan pi xla akxilha akxni patinanaw chu kgaxmata akxni tasaskiniyaw tamakgtay (Sal. 34:15). Pero Jehová ni kajwatiya akxilha chu kgaxmata, na wi tuku tlawa. Xla kinTlatkan litaxtu chu lu kinkapaxkiyan, nitlan limakgkatsi akxni akxilha pi xkamanan tasamakgo. Wa xlakata kinkamakgtayayan (kalikgalhtawakga Isaías 63:9).

4. ¿Tuku liʼakxilhtit xalak Biblia nalichuwinanaw, chu tuku nakinkamasiyaniyan umakgolh liʼakxilhtit xlakata la likatsi Jehová?

 ⁴ Anta kBiblia, akxilhaw tuku tlawalh Jehová akxni akxilhli pi kskujnin xtasamakgo. Kalilakpuwaw tuku titaxtulh Ana, David chu mapakgsina Ezequías. ¿Tuku tlawalh pi umakgolh xlakskujnin Jehová xtasakgolh? ¿La kamakgtayalh Jehová? Chu ¿tuku xlakata xliʼakxilhtitkan tlan kinkamamakgkatsiniyan akxni tasayaw xlakata lipuwamaw, xlakata wi tuku nitlan kinkatlawanikan o xlakata nialh katsiyaw tuku natlawayaw?

AKXNI TASAYAW XLAKATA LU LIPUWAMAW

5. ¿La xmakgkatsi Ana?

⁵ Ana titaxtulh tuku lu tuwa nema lu xmakgalipuwan chu xmakgatasa. Xchixku ni kajwatiya xla xtamakgaxtokga, wata na xtamakgaxtokga Peniná, chatum puskat tiku ni xʼakxilhputun Ana chu lu nitlan xlikatsini. Pero ni kajwatiya uma, Ana nila xkgalhi kamanan, pero Peniná xkgalhi chalhuwa kamanan (1 Sam. 1:​1, 2). Wa xlakata Peniná ankgalhin xlikgalhkgamanan Ana. ¿La xmakgkatsi wix komo chuna xtitaxtu? Ana “lu xlipuwan”, chu wa xlakata «xtasa chu ni xwayan» (1 Sam. 1:​6, 7, 10).

6. ¿Tuku tlawalh Ana xlakata tlan xmakgkatsilh?

⁶ ¿Tuku tlawalh Ana xlakata tlan xmakgkatsilh? Alh ktabernáculo, niku xkakninanikan Dios. Chu akxni anta xwi, max lakatsu kxtankilhtin tabernáculo, «tsukulh tlawani oración Jehová chu nila xmachokgo xtatasa». Tasaskinilh Dios pi xlakapastakli chu wanilh: «Kaʼakxilhti la xlilhuwa kpatinama» (1 Sam. 1:10b, 11). Ana litachuwinalh Jehová putum tuku xmakgkatsi. Jehová lu lilipuwa akxni akxilhli pi xtsumat xtasama.

7. ¿La makgkatsilh Ana akxni xlitachuwinanita Jehová putum tuku xmakgkatsi?

⁷ ¿La makgkatsilh Ana akxni xlitachuwinanita Jehová putum tuku xmakgkatsi chu akxni kgaxmatli tuku wanilh sacerdote Elí? Biblia wan: «Alh chu wayalh, chu nialh lakalipuwa» (1 Sam. 1:​17, 18). Maski xtaʼakglhuwit Ana nina xlakkaxla, xla tlan makgkatsilh. Xmakamaxkinit Jehová tuku lu xlilipuwan. Jehová akxilhli xtalipuwan Ana, kgaxmatnilh tuku tasaskinilh chu sikulunatlawalh. Maxkilh talakaskin pi xkgalhilh kamanan (1 Sam. 1:​19, 20; 2:21).

8, 9. Chuna la wan Hebreos 10:​24, 25, ¿tuku xlakata lu kiliskujatkan xlakata ni namakgxtakgaw tamakxtumit? (Na kaʼakxilhti dibujo).

⁸ ¿Tuku kinkamasiyaniyan uma? ¿Titaxtupat tuku lu tuwa nema makgatasayan? Max lipuwampat xlakata nilh chatum tiku xalak mifamilia o mi’amigo. Akxni chuna titaxtuyaw max niti tachuwinamputunaw. Pero kalilakapastakwi xliʼakxilhtit Ana. Xla alh ktabernáculo chu anta Jehová tlan mamakgkatsinilh. Jehová na tlan namamakgkatsiniyan komo napina ktamakxtumit, maski max lu lipuwampat chu taxlajwaninita (kalikgalhtawakga Hebreos  10:​24, 25). Ktamakxtumit kgaxmataw textos xalak Biblia nema tlan kinkamamakgkatsiniyan. Jehová limaklakaskin tamakxtumit xlakata nakinkamakgtayayan nialh nalilakpuwanaw tuku nitlan. Chuna tlakg tlan namakgkatsiyaw asta maski ni tunkun nalakkaxla tuku nitlan titaxtumaw.

⁹ Ktamakxtumit, kinatalankan tlan kinkamamakgkatsinikgoyan chu kinkalimasiyanikgoyan pi kinkapaxkikgoyan, chu uma kinkamakgpuwantiniyan (1 Tes. 5:​11, 14). Kalichuwinaw tuku wa chatum precursor especial tiku nilh xpuskat. Xla wan: «Chuntiyaku klakgtasa kimpuskat. Min kilhtamaku makgat kkan tawila chu ktsuku tasa... Pero tamakxtumit tlan kimamakgkatsini chu kimakgtaya xlakata chuntiya naktayani. Xtakgalhtinkan natalan nema mastakgo ktamakxtumit chu tuku kiwanikgo skaya kimamakgkatsini. Akxni aku kkama kpukgalhtawakga, min kilhtamaku lu nitlan kmakgkatsi, pero akxni anta kwi ankgalhin tlan ktsuku kmakgkatsi». Akxni anaw ktamakxtumit, Jehová kalimaklakaskin kinatalankan xlakata nakinkamakgtayayan.

10. ¿La tlan nastalaniyaw xliʼakxilhtit Ana akxni lu lipuwamaw?

¹⁰ Ana tlakg tlan makgkatsilh akxni litachuwinalh Jehová putum tuku xmakgkatsi. Wix na tlan natlawaya tuku wan 1 Pedro 5:7 chu namakamaxkiya Jehová putum tuku lilakgaputsaya chu nalipawana pi xla nakgaxmatniyan. Chatum tala lichuwinan tuku makgkatsilh akxni kgalhananin makgnikgolh xchixku. Xla wan: «Kmakgkatsilh xtachuna la xlaklhtukuwilikanit kinaku chu pi nitila xʼama mapaksa». ¿Tuku makgtayalh? Xla wan: «Ktasaskinilh tamakgtay kinTlat xalak akgapun, chu tlan xakmakgkatsi makgatunu xaktlawani oración. Xmin kilhtamaku, nipara xakkatsi la xakama litachuwinan tuku xakmakgkatsi, pero xla xkiʼakgatekgsni. Akxni xakmakgkatsi pi kintalipuwan xkimakgatlajama chu nialh xakkatsi tuku naktlawa, xakskini pi xkimaxkilh takaksni. Tunkun skaya xakmakgkatsi chu nialh xaklakgaputsa, chu xakkgalhi litliwakga xlakata chuntiya xaktayanilh». Akxni litachuwinana Jehová tuku makgkatsiya, xla makgkatsi mintakatsanajwat chu liwana akgatekgsa tuku makgkatsipat. Maski mintaʼakglhuwit max ni tunkun nalakkaxla, Jehová tlan namamakgkatsiniyan chu namaxkiyan takaksni nema maklakaskina (Sal. 94:19; Filip. 4:​6, 7). Nachuna, nasikulunatlawayan xlakata ni makgxtakga chu chuntiya tayanipat (Heb. 11:6).

AKXNI TASAYAW XLAKATA KINKAʼAKGSKGAWIKAN

11. ¿La makgkatsilh David akxni amakgapitsin nitlan likatsinikgolh?

¹¹ David, lhuwa tuku nitlan titaxtulh nema makgatasalh. Lhuwa latamanin ni xʼakxilhputunkgo, asta tiku xalak xfamilia chu xʼamigos akgskgawikgolh chu xtlawaniputunkgo tuku nitlan (1 Sam. 19:​10, 11; 2 Sam. 15:​10-14, 30). Milh kilhtamaku David tsokgwililh: «Lu ktlakgwanit xlakata lu ksalhpanima [o kjalhpanima]; putuminika katsisni klimastaja kilakgaxtajat kimputama; kintatasa klimastaja putumininka kimputama». ¿Tuku xlakata chuna xmakgkatsi David? Xla wa: «Xkuentajkan putum tiku nitlan kilikatsinikgo» (Sal. 6:​6, 7). Latamanin lhuwa tuku nitlan tlawanikgolh David chu uma lu xmakgatasa.

12. Chuna la wan Salmo 56:​8, ¿tuku liwana xkatsi David?

¹² Maski David lhuwa tuku tuwa titaxtulh, liwana xkatsi pi Jehová xpaxki, xla tsokgwililh: «Jehová nakgaxmata kintalipuwan» (Sal. 6:8). Atanu kilhtamaku tsokgwililh lakstlan tachuwin nema min kSalmo 56:8 (kalikgalhtawakga). Umakgolh tachuwin limasiya la xlilhuwa kinkapaxkiyan Jehová chu pi lilakgaputsa  tuku makgkatsiyaw. David wa pi xtachuna la Jehová xmakilh kilakgaxtajatkan kʼakgtum odre o xtsokgwililh kmaktum libro. David liwana xkatsi pi xTlat xalak akgapun xʼakxilhma putum tuku xlipatinama chu xlakapastaka, chu pi Jehová ni kajwatiya xkatsi tuku taʼakglhuwit xtitaxtuma, wata na xʼakgatekgsa la xmakgkatsi David.

13. ¿Tuku nakinkamakgtayayan nialh lu nalipuwanaw komo wi tiku kinkamakgalipuwan o kinkaʼakgskgawin? (Na kaʼakxilhti dibujo).

¹³ ¿Tuku kinkamasiyaniyan uma? ¿Makgalipuwan o akgskgawin chatum tiku lu paxkiya? ¿Lu lipuwampat xlakata lakxlalh mintamakgaxtokgat o xlakata ni tatamakgaxtokgti tiku xtatamakgaxtokgputuna? ¿Lilipuwampat xlakata tiku lu paxkiya makgxtakgli Jehová? Kalichuwinaw la makgkatsilh chatum tala akxni xpuskat akgskgawilh chu makgxtakgli. Xla wan: «Lu kaks kimalakawanilh uma, nila xakkanajla pi chuna xkiʼakgspulama. Xakmakgkatsi pi nitu xaklitaxtu, lu xaklipuwan chu xaksitsinit». ¿Tuku namakgtayayan tlakg tlan namakgkatsiya komo wi tiku makgalipuwan o akgskgawin? Kalakapastakti pi Jehová nikxni katimakgxtakgni. Watiya uma tala wa: «Uma kimasiyanilh pi latamanin tlan namakgxtakgkgoyan, pero Jehová nichuna tlawa. Tlan nalipawanaw pi xla nikxni kintikamakgxtakgni. Xla nikxni kamakgxtakga tiku ni makgxtakgkgo» (Sal. 37:28). Kalakapastakti pi ni anan atanu tiku paxkiyan chuna la Jehová. Ni kamasta talakaskin pi tuku nitlan tlawanika, natlawa pi ni naʼakxilha la xlilhuwa paxkiyan Jehová (Rom. 8:​38, 39). Maski wi tiku nitlan nalikatsiniyan, ankgalhin kalakapastakti pi Jehová paxkiyan.

14. ¿Tuku liwana kinkawaniyan Salmo 34:18?

¹⁴ Komo wi tiku akgskgawin, tlan namamakgkatsiniyan tuku tsokgwililh David kSalmo 34:18 (kalikgalhtawakga). Maktum libro lichuwinan pi tachuwin nema min k’uma Salmo niku wan «tiku makgkatsikgo pi katlajama xtaʼakglhuwitkan» na tlan matitaxtikan chuna la «tiku lakpuwankgo pi nialh katika’akgspulalh tuku tlan kxlatamatkan». ¿La kamakgtaya Jehová tiku chuna makgkatsikgo? Watiya uma texto wan pi xla «lakatsu katawi» tiku lu lipuwamakgo, max xlakata ka’akgskgawika o kamakgalipuwanka. Jehová xtachuna la chatum tlat, tiku chaxa chu makgoxomixi aktsu xkgawasa akxni akxilha pi tasama. Xla makgkatsi kintakatsanajwatkan chu tunkun kinkamakgtayayan. Xla tlan kinkamamakgkatsiniputunan chu mapanuputun kintapatinkan. Nachuna, xla kinkawaniyan pi lhuwa tuku tlan nakinkamaxkiyan, chu uma kinkamakgtayayan natayaniyaw taʼakglhuwit nema kgalhiyaw la uku (Is. 65:17).

 AKXNI TASAYAW XLAKATA NIALH KATSIYAW TUKU NATLAWAYAW

15. ¿Tuku tlawalh pi Ezequías lu xlipuwa chu xtasalh?

¹⁵ Akxni mapakgsina Ezequías xalak Judá xkgalhi 39 kata, chipalh xasnun tajatat. Jehová maklakaskilh palakachuwina Isaías xlakata xmakatsinilh pi uma tajatat xʼama makgni (2 Rey. 20:1). Ezequías nialhla tuku xtlawa. Uma tuku makatsinika lu makgalipuwa, chu tsukulh tasaskini Jehová pi xmakgtayalh (2 Rey. 20:​2, 3).

16. ¿Tuku makgkatsilh chu tuku tlawalh Jehová akxni kgaxmatli xʼoración Ezequías chu akxilhli xlakgaxtajat?

¹⁶ Akxni Jehová kgaxmatli xʼoración Ezequías chu akxilhli la xtasama, lakgalhamalh chu maklakaskilh palakachuwina Isaías xlakata xwanilh: «Kkgaxmatnit mioración. Kakxilhnit milakgaxtajat. Nakmapaksayan». Limasiyanilh talakgalhaman chu malaknunilh pi xʼama malhmani xlatamat chu xʼama lakgmaxtu Jerusalén xlakata asirios ni xʼakgchipakgolh (2 Rey. 20:​4-6).

17. ¿La kinkamakgtayayan Jehová akxni kgalhiyaw akgtum xasnun tajatat? (Salmo 41:3; na kaʼakxilhti dibujo).

¹⁷ ¿Tuku kinkamasiyaniyan uma? ¿Tuku tlan natlawaya komo kgalhiya akgtum tajatat nema ni kgalhi xalikuchun? Kalitachuwinanti Jehová tuku makgkatsiya, asta tlan natasaya. Biblia kinkawaniyan pi «Tlat tiku kgalhi lhuwa talakgalhaman chu Dios tiku tlan kamamakgkatsini latamanin xliputum tuku titaxtukgo» tlan nakinkamamakgkatsiniyan akxni titaxtuyaw tuku tuwa (2 Cor. 1:​3, 4). Xlikana pi Jehová ni katimapanulh la uku putum kintaʼakglhuwitkan. Pero tlan nalipawanaw pi xla nakinkapakgachipalinan xlakata natayaniyaw (kalikgalhtawakga Salmo 41:3). Xla kinkamaxkiyan xʼespíritu santo, nema kinkamakgtayayan nakgalhiyaw litliwakga, nakgalhiyaw liskgalala chu takaksni nema maklakaskinaw (Prov. 18:14; Filip. 4:13). Na kinkamalaknuniyan pi namasputu putum tajatat nema anan (Is. 33:24).

18. ¿Tuku texto xalak Biblia makgtayanitan akxni titaxtunita tuku lu tuwa? (Kaʼakxilhti recuadro « Tachuwin nema Jehová maklakaskin xlakata naxaka kilakgaxtajatkan»).

¹⁸ Ezequías lu tlan limakgkatsilh tuku Jehová wanilh. Akinin na tlan nakinkamamakgkatsiniyan tuku Jehová kinkawaniyan kBiblia. Jehová matsokgninalh kBiblia tachuwin nema kinkamakgpuwantiniyan akxni titaxtuyaw tuku tuwa (Rom. 15:4). Kalichuwinaw chatum tala xalak África Occidental tiku lu xtasa xlakata wanika pi xkgalhi cáncer. Xla wan: «Akgtum texto nema lu tlan kimamakgkatsini wa Isaías 26:3. Maski nila malakgachokgoyaw tuku nitlan kinkaʼakgspulayan, uma versículo masiya pi Jehová tlan kinkamaxkiyan takaksni nema maklakaskinaw xlakata ni namalakatsaliyaw tuku makgkatsiyaw akxni titaxtuyaw tuku tuwa». ¿Lakapastaka akgtum texto xalak Biblia nema matliwakglhni akxni  xtitaxtupat tuku lu tuwa, max akxni nialh xkatsiya tuku natlawaya?

19. ¿Tuku namakgamakglhtinanaw kkilhtamaku nema aku mima?

¹⁹ Chuna la talakatsuwima xlisputni uma kakilhtamaku, tlakg natitaxtuyaw tuku tuwa nema nakinkamakgatasayan. Pero chuna la kinkamasiyaniyan xliʼakxilhtit Ana, David chu mapakgsina Ezequías, Jehová akxilha akxni tasayaw chu makgkatsi kintakatsanajwatkan. Xla lakapastaka la xlimakglhuwa tasanitaw chu la xlimakglhuwa lakgaxtajnitaw. Wa xlakata akxni natitaxtuya tuku lu tuwa kalitachuwinanti Jehová. Ni kakatamakgatlini natalan xalak congregación, xlakan paxkikgoyan. Chu chuntiya kaputsa kBiblia tamakgtay nema Jehová kinkamaxkiyan. Tlan nalipawana pi komo natayaniya chu ni namakgxtakga Jehová, xla nasikulunatlawayan. Nialh makgas naʼakxilhaw akxni Jehová naxaka putum lakgaxtajat (Apoc. 21:4). ¡Kxasasti kakilhtamaku natasayaw pero xlakata napaxuwayaw!