1. ¿Tuku xlakata lhuwa latamanin ni kanajlakgo pi tlan nalatamakan putum kilhtamaku?

 LHUWA latamanin kuenta tlawakgo tuku wakgo chu tlawakgo ejercicio xlakata ni lu natatatlakgo. Maski chuna, katsikgo pi nila latamakan putum kilhtamaku. Max lakpuwankgo pi uma kaj akgtum tamanixnat, o ni xlakgatikgolh nalatamakgo putum kilhtamaku xlakata ni lipatinamputunkgo tuku kitaxtu akxni kgolonkan. Pero Jesús lichuwinalh pi tlan kgalhikan «latamat nema ni kgalhi xlisputni», chuna la wan Juan 3:16 chu 5:24.

2. ¿Tuku wan Juan capítulo 6 xlakata latamat nema ni kgalhi xlisputni? (Juan 6:​39, 40).

² Akgtum kilhtamaku, Jesús tlawalh milagro xlakata xkalimawilh skiti chu kaxtalanchu lhuwa latamanin. a Tuku tlawalh uma kilhtamaku lu kaks malakawaninan, pero tuku tlawalh lichali tlakg kaks malakawaninan. Latamanin kstalanikgonit asta kCapernaúm, kxkilhtun xpupunu Galilea, chu anta Jesús kawanilh pi latamanin tiku nikgonita tlan xʼamakgo lakastakwanankgo chu tlan xlipaxuwakgolh latamat nema ni kgalhi xlisputni (kalikgalhtawakga Juan 6:​39, 40). Kakalilakpuwanti tiku xalak mifamilia chu miʼamigos tiku nikgonita. Tuku Jesús wa kinkamasiyaniyan pi lhuwa latamanin tiku nikgonita chu pi wix chu mifamilia tlan nakgalhiyatit latamat nema ni kgalhi xlisputni. Pero kJuan capítulo 6 Jesús wi atanu tuku lichuwinalh nema nila akgatekgskgo lhuwa latamanin. Tlakg kalichuwinaw tuku lichuwinalh.

3. ¿Tuku wa Jesús anta kJuan 6:51?

 ³ Latamanin xalak Capernaúm tamalakxtumikgolh kaxtalanchu nema Jesús nina makgas xkamaxkinit xtachuna la maná nema Jehová xkamaxkinit xalakgmakgan xnatlatnikan. Biblia limapakuwi maná «kaxtalanchu xalak akgapun» (Sal. 105:40; Juan 6:31). Jesús kalitachuwinalh maná xlakata wi atanu tuku xkalimasiyanilh. Maski maná akgtum tamaskiwin xlitaxtu, tiku wakgolh uma nila latamakgolh putum kilhtamaku (Juan 6:49). Pero Jesús wa pi xla xlitaxtu «xaxlikana kaxtalanchu xalak akgapun», «kaxtalanchu nema masta Dios» chu «kaxtalanchu xla latamat» (Juan 6:​32, 33, 35). Chu alistalh lichuwinalh pi xla tlakg tlan xwanit nixawa maná. Wa: «Akit ama kaxtalanchu xastakna tiku taktanitanchi kʼakgapun. Komo wi tiku nawa uma kaxtalanchu nalatama putum kilhtamaku» (kalikgalhtawakga Juan 6:51). Judíos tiku xkgaxmatnimakgo nila xʼakgatekgskgo tuku xkawanima. ¿Tuku xlakata Jesús xkawanima pi xtaktanitanchi kʼakgapun chu pi xla tlakg xatlan «kaxtalanchu» xlitaxtu nixawa maná nema Dios xkamaxkinit xalakgmakgan xnatlatnikan? Jesús wi tuku kawanilh nema tlan xkamakgtayalh naʼakgatekgskgo tuku xkawanima: «Kaxtalanchu nema akit nakmasta wa kiliwa». ¿Tuku xwamputun Jesús? Lu xlakaskinka nakatsiyaw tuku xwamputun, xlakata uma nakinkamakgtayayan nakatsiyaw tuku tlawa pi akinin chu kifamiliajkan tlan nalatamayaw putum kilhtamaku. Tlakg kalichuwinaw tuku xlichuwinama Jesús.

¿TUKU KILHCHANIMA «KAXTALANCHU XASTAKNA» CHU XLIWA JESÚS?

4. ¿Tuku xlakata makgapitsin nipara tsinu lakgatikgolh tuku Jesús wa?

⁴ Makgapitsi tiku xkgaxmatnimakgo Jesús nipara tsinu lakgatikgolh akxni kgaxmatkgolh pi xla xʼama makamasta xliwa xlakata latamanin tlan xlatamakgolh. Max xlakpuwankgo pi xtalakaskin xwakgolh xliwa Jesús, chu uma lu nitlan xwanit (Juan 6:52). Pero Jesús alistalh kawanilh tuku tlakg kaks malakawaninan: «Komo ni nawayatit xliwa xKgawasa chixku chu ni nalikgotnanatit xkgalhni, ni katikgalhitit latamat» (Juan 6:53).

5. ¿Tuku xlakata liwana katsiyaw pi Jesús ni xkawanima pi xlikana xliwatkan xwanit xliwa chu xkgalhni?

⁵ Kxkilhtamaku Noé, Dios xkawaninit pi ni xliwatkan kgalhni (Gén. 9:​3, 4). Chu akxni kamaxkilh Limapakgsin israelitas nachuna kawanipa. Kaxatikawa tiku xwalh kgalhni xlinit xwanit (Lev. 7:27). Jesús xmasiya pi lu xlakaskinka xkgalhakgaxmatka xLimapakgsin Moisés (Mat. 5:​17-19). Wa xlakata tuku kawanilh ni xlikana xwamputun pi xwakgolh xliwa o xlikgotnankgolh xkgalhni. Wata tuku Jesús xkamasiyanima, wa tuku xlitlawatkan xwanit xlakata xkgalhikgolh «latamat nema ni kgalhi xlisputni» (Juan 6:54).

6. ¿Tuku xlakata wanaw pi tuku Jesús lichuwinalh kaj wi tuku xkilhchanima?

⁶ Liwana tasiya pi Jesús kaj wi tuku xkilhchanima. Tuku lichuwinalh uma kilhtamaku xtachuna tuku xwaninit samaritana: «Putum tiku nalikgotnan chuchut nema akit nakmaxki nikxni katikgalhputipa, wata chuchut nema akit nakmaxki nalitaxtu la taxtunu nema namaxki latamat nema ni kgalhi xlisputni» (Juan 4:​7, 14). b Jesús ni xwamputun pi xlakata samaritana xkgalhilh latamat nema ni kgalhi xlisputni, kajwatiya xtalakaskin xlikgotnalh chuchut xla akgtum pozo. Xtachuna la uma, akxni katachuwinalh latamanin xalak Capernaúm ni xwamputun pi xlakata xkgalhikgolh latamat nema ni kgalhi xlisputni xtalakaskin pi xlikana xwakgolh xliwa chu xlikgotnankgolh xkgalhni.

 TUKU LITALAKGPALI PULAKTIY TUKU JESÚS LICHUWINALH

7. ¿Tuku wankgo makgapitsin pi kilhchanima tuku lichuwinalh Jesús kJuan 6:53?

⁷ Makgapitsi latamanin wankgo pi tuku lichuwinalh Jesús kJuan 6:53 xlakata nawakan xliwa chu nalikgotnankan xkgalhni wa tuku xlitatlawat akxni tlawakan Taway xla kiMalanakan. Chuna wankgo xlakata akxni Jesús lakkaxwililh uma taway maklakaskilh makgapitsi watiya tachuwin (Mat. 26:​26-28). Xlakan wankgo pi putum tiku ankgo kxTaway kiMalanakan xliwatkan kaxtalanchu chu vino nema matitaxtikan. ¿Xlikana tuku wankgo? Lu xlakaskinka nakatsiyaw xatakgalhtin uma takgalhskinin xlakata akgatunu kata lhuwa latamanin kxlikalanka katiyatni kinkatatamakxtumikgoyan xlakata nalakapastakaw Taway xla kiMalanakan. Kalichuwinaw tuku litalakgpali tuku wan Juan 6:53 chu tuku wa Jesús akxni lakkaxwililh Taway xla kiMalanakan.

8. Kalichuwinanti pulaktiy tuku litalakgpali tuku wan Juan 6:53 chu tuku wa Jesús akxni lakkaxwililh Taway xla kiMalanakan. (Na kaʼakxilhti dibujos).

⁸ Kaʼakxilhwi pulaktiy tuku litalakgpali tuku lichuwinamaw. Pulana, ¿tuku kilhtamaku chu niku xwi Jesús akxni lichuwinalh tuku wan Juan 6:​53-56? Anta xwi kʼGalilea chu xkatachuwinama lhuwa latamanin kkata 32. Akgtum kata xtsankga xlakata xlakkaxwililh Taway xla kiMalanakan kJerusalén. Xlipulaktiy, ¿tiku xkatachuwinama Jesús? Anta kʼGalilea, tiku xkgaxmatnimakgo Jesús tlakg xlilakgaputsamakgo  tuku xmaklakaskinkgo kxmaknikan nixawa tuku xmaklakaskinkgo kxtakanajlakan (Juan 6:26). Akxni Jesús kalitachuwinalh tuku nila akgatekgskgolh, tunkun makgxtakgkgolh. Asta makgapitsin tiku na xtamakgalhtawakgen xlitaxtukgo nialh stalanikgolh (Juan 6:​14, 36, 42, 60, 64, 66). Pero tuku lalh uma kilhtamaku ni xtachuna tuku lalh kkata 33, akxni Jesús lakkaxwililh Taway xla kiMalanakan. Ama kilhtamaku xkatawi 11 xʼapóstoles tiku ni xmakgxtakgkgo, maski ni xʼakgatekgskgo putuminika tuku xla xmasiyama. Xlakan nichuna xlikatsikgo la latamanin tiku xkgaxmatnimakgo Jesús kʼGalilea. Apóstoles liwana xkanajlakgo pi Jesús wa xKgawasa Dios tiku xminitancha kʼakgapun (Mat. 16:16). Wa xlakata Jesús kawanilh pi lu tlan tuku xtlawakgonit. Xla kawanilh: «Wixin nikxni kimakgxtakgnitantit maski ktitaxtunit tuku lu tuwa» (Luc. 22:28). Uma pulaktiy tuku lichuwinanitaw kinkamakgtayayan naʼakgatekgsaw pi tuku wan Juan 6:53 ni wa kilhchanima tuku xlitatlawat kxTaway kiMalanakan. Pero ni kajwatiya uma, kaʼakxilhwi atanu tuku litalakgpali.

TUKU LICHUWINALH JESÚS CHU TUKU KILHCHANI MIMPALAKATA

9. ¿Tiku xkatachuwinama Jesús akxni lakkaxwililh tuku lilakgapasaw Taway xla kiMalanakan?

⁹ Akxni Jesús lakkaxwililh tuku lilakgapasaw Taway xla kiMalanakan, kamaxkilh xʼapóstoles kaxtalanchu nema ni kgalhi limaxkutin chu kawanilh pi uma xkilhchanima xmakni. Alistalh na kamaxkilh vino chu kawanilh pi uma xkilhchanima “xkgalhni xla talakkaxlan” (Mar. 14:​22-25; Luc. 22:20; 1 Cor. 11:24). Uma tuku xaʼawatiya tlawalh lu xlakaskinka. Uma xasasti talakkaxlan ni katatlawaka putum latamanin, kajwatiya «xkamanan Israel», uma kakilhchanima tiku natamapakgsinankgo Cristo anta «kxTamapakgsin Dios» (Heb. 8:​6, 10; 9:15). Ama kilhtamaku xʼapóstoles ni akgatekgskgolh putum tuku xkilhchanima uma. Pero nialh makgas, xʼamaka kalilaksakkan espíritu santo chu xʼamakgo makgtapakgsikgo kxasasti talakkaxlan xlakata tlan xʼankgolh kʼakgapun xlakata natamapakgsinankgo Jesús (Juan 14:​2, 3).

10. ¿Tuku litalakgpali tuku kawanilh Jesús latamanin kʼGalilea chu tuku kawanilh akxni lakkaxwililh Taway xla kiMalanakan? (Na kaʼakxilhti dibujo).

¹⁰ Akxni Jesús lakkaxwililh Taway xla kiMalanakan, Jesús kajwatiya kalichuwinalh «ni xalhuwa borregos». Kʼuma aktsu grupo xmakgtanumakgo xʼapóstoles tiku ni makgxtakgkgolh chu lakxtum xkatawi ama kilhtamaku (Luc. 12:32). Xlakan chu amakgapitsin latamanin tiku alistalh xmakgtapakgsikgolh kʼuma grupo xʼamakgo wakgo kaxtalanchu chu xʼamakgo likgotnankgo vino. Xputumkan tlan naʼankgo kʼakgapun chu natawilakgo kxpaxtun Jesús. Tuku Jesús kawanilh xʼapóstoles ama kilhtamaku lu litalakgpali tuku kawanilh latamanin akxni katachuwinalh kʼGalilea. Anta Jesús xkalilakpuwama lhuwa latamanin, wa xlakata tuku kawanilh xkakilhchanima lhuwa latamanin.

11. ¿Tuku lichuwinalh Jesús kʼGalilea nema xlimasiya pi xkakilhchanima lhuwa latamanin?

¹¹ Akxni Jesús xwi kʼGalilea kkata 32, wa xkatachuwinama judíos tiku kaj kaxtalanchu xwaputunkgo. Pero xla kalitachuwinalh tuku tlakg xlitamakgtayakgolh nixawa kaxtalanchu: kalitachuwinalh tuku xʼama kamaxki latamat nema ni kgalhi xlisputni. Nachuna kalitachuwinalh pi tiku xʼamakgo nikgo, tlan xlakastakwanankgolh chu xlatamakgolh putum kilhtamaku. Jesús ni xlichuwinama akgtum tasikulunalin nema kaj ni lhuwa xʼamakgo makgamakglhtinankgo, chuna la tuku wa akxni lakkaxwililh Taway xla kiMalanakan. Wata tuku xlichuwinama kʼGalilea xkilhchanima akgtum tasikulunalin nema tlan xmakgamakglhtinankgolh lhuwa latamanin. Wa xlakata, wa: «Komo wi tiku  nawa uma kaxtalanchu nalatama putum kilhtamaku; wa xlakata, kaxtalanchu nema akit nakmasta wa kiliwa nema latamanin nalikgalhikgo latamat» (Juan 6:51). c

12. ¿Tuku kilitlawatkan xlakata namakgamakglhtinanaw latamat nema ni kgalhi xlisputni?

¹² Anta kʼGalilea, Jesús ni xkawanima judíos pi putum latamanin tiku xlatamakgonita makgasa chu tiku xʼamakgo lakachinkgo, xʼamakgo makgamakglhtinankgo uma tasikulunalin. Kajwatiya namakgamakglhtinankgo tiku nawakgo kaxtalanchu, uma wamputun, tiku nalimasiyakgo takanajla. Lhuwa tiku wankgo pi na kstalaninanin Cristo litaxtukgo lakpuwankgo pi xlakata nalakgtaxtukgo kajwatiya talakaskin “nakanajlanikgo” Jesús chu xlakgmaxtunakan naliʼakxilhkgo (Juan 6:29). Pero ni kajwatiya uma natalakaskin. Ama kilhtamaku makgapitsi latamanin xalak Galilea xkanajlanikgo Jesús pero alistalh makgxtakgkgolh. ¿Tuku xlakata chuna tlawakgolh?

13. ¿Tuku talakaskin natlawayaw xlakata xlikana kstalaninanin Cristo nalitaxtuyaw?

¹³ Lhuwa latamanin tiku Jesús kamawilh kajwatiya kstalanimakgo xlakata xlakaskinkgo pi xkamaxkika tuku xmaklakaskinkgo. Tuku xlakan tlakg xlilakgaputsakgo wa pi xkamapaksaka, xkamaxkika liwat chu xkalitachuwinanka tuku xkgaxmatputunkgo. Pero Jesús kawanilh pi xlakata tlan kstalaninanin xlitaxtukgolh wi tuku tlakg xtalakaskin xtlawakgolh. Jesús ni xminit kkatiyatni kaj xlakata nakamaxki tuku xmaklakaskinkgo latamanin. Xtalakaskin pi xlakan “xlakgankgolh” Jesús, uma wamputun,  xmakgamakglhtinankgolh chu xkgalhakgaxmatkgolh putum tuku xla xmasiya (Juan 5:40; 6:44).

14. ¿Tuku kilitlawatkan xlakata nalitamakgtayayaw xmakni chu xkgalhni Jesús?

¹⁴ Jesús lichuwinalh pi tuku tlakg xlakaskinka wa pi xlimasiyakgolh takanajla. Pero ¿tuku xtalakaskin xkanajlakgolh? Xtalakaskin xkanajlakgolh pi xtiyatliwa chu xkgalhni Jesús nema xʼama makamasta xʼama kamaxki talakaskin xkgalhikgolh latamat nema ni kgalhi xlisputni. Lu xlakaskinka pi judíos xkanajlakgolh uma, chu nachuna kilitlawatkan la uku (Juan 6:40). Chuna, xlakata nalitamakgtayayaw xkgalhni chu xmakni Jesús nema talichuwinan kJuan 6:​53, lu xlakaskinka nalimasiyayaw pi kanajlaniyaw talakgmaxtut. Chu uma tasikulunalin tlan nalitamakgtayakgo putum latamanin (Efes. 1:7).

15, 16. ¿Tuku kinkamasiyaniyan tuku lichuwinan Juan capítulo 6?

¹⁵ Tuku lichuwinan Juan capítulo 6 lu lhuwa xtapalh kimpalakatakan chu nachuna xpalakatakan kifamiliajkan. Masiya la xlilhuwa kapaxki Jesús latamanin. Anta kʼGalilea kamapaksalh tiku xtatatlakgo, kalitachuwinalh xTamapakgsin Dios chu na kamawilh tiku xtsinksmakgolh (Luc. 9:11; Juan 6:​2, 11, 12). Chu ni kajwatiya uma, na kamasiyanilh pi xla wa «kaxtalanchu xla latamat» (Juan 6:​35, 48).

¹⁶ Latamanin tiku Jesús kalimapakuwilh «amakgapitsi borregos» ni xliwatkan kaxtalanchu chu vino akxni lakapastakkan Cristo akgatunu kata (Juan 10:16). Pero na litamakgtayakgo xtiyatliwa chu xkgalhni Jesucristo akxni limasiyakgo pi kanajlanikgo xtamakamastan (Juan 6:53). Chu tiku kalakgchan nawakgo kaxtalanchu chu vino, limasiyakgo pi makgtanumakgo kxasasti talakkaxlan chu natamapakgsinankgo Jesús kʼakgapun. Wa xlakata putum akinin, lata tiku kalaksakkanit naʼankgo kʼakgapun chu amakgapitsi borregos, lu xtapalh liʼakxilhaw tuku lichuwinan Juan capítulo 6. Masiya pi lu xlakaskinka nalimasiyakan takanajla xlakata nakgalhikan latamat nema ni kgalhi xlisputni.