1. ¿La xlilakaskinka xliʼakxilhkan kaxtalanchu makgasa?

 MAKGASA kaxtalanchu lu xlakaskinka xliʼakxilhkan xlakata wa xliwayankgo latamanin (Gén. 14:18; Luc. 4:4). Wa xlakata, Biblia makglhuwa lichuwinan kaxtalanchu akxni lichuwinan liwat (Mat. 6:11; Hech. 20:7). Kʼakgtiy milagros nema Jesús tlawalh nema lu kalakgapaskan, na kamaklakaskilh kaxtalanchu (Mat. 16:​9, 10). Kalichuwinaw umakgolh milagros nema lichuwinankan kJuan capítulo 6, chu kaʼakxilhwi tuku kinkamasiyaniyan.

2. ¿Tuku xlakata xtalakaskin pi latamanin tiku kstalanikgonit Jesús wi tiku xkamawilh?

² Xtamakgalhtawakgen Jesús aku xkimasputukgonit la kilichuwinankgolh Dios. Jesús katatawakalh xtamakgalhtawakgen kʼaktsu barco xlakata xtitaxtukgolh kpupunu xalak Galilea chu xʼankgolh niku tlakg lakgamakgat lakatsu kkachikin Betsaida xlakata tlan xjaxkgolh (Mar. 6:​7, 30-32; Luc. 9:10). Pero latamanin tunkun kamataxtukkgolh xlakata xʼakxilhputunkgo Jesús. Chu xla ni katlakgalilh. Tlan kalikatsinilh, kalimaxtunilh kilhtamaku xlakata xkalitachuwinalh xTamapakgsin Dios chu kamapaksalh tiku xtatatlakgo. Xlakata xkgotanumaja, xtamakgalhtawakgen xlilakpuwamakgo la xʼamakgo tlawakgo umakgolh latamanin xlakata xkgalhikgolh tuku nawakgo. Makgapitsin xlinkgo tsinu xliwatkan, pero lhuwa amakgapitsin xliʼanatkan xwanit kkachikinin nema  xwilakgo lakatsu xlakata xtamawakgolh tuku nawakgo (Mat. 14:15; Juan 6:​4, 5). ¿Tuku xʼama tlawa Jesús?

JESÚS TLAWALH AKGTUM MILAGRO XLAKATA XMALHUWILH KAXTALANCHU

3. ¿Tuku wa Jesús akxni akxilhli pi latamanin xmaklakaskinkgo tuku nawakgo? (Na kaʼakxilhti dibujo kxmakni revista).

³ Jesús kawanilh xʼapóstoles: «Ni talakaskin pi naʼankgo; wixin kakamawitit» (Mat. 14:16). Pero uma lu tuwa xwanit xlakata xʼanankgo 5,000 lakchixkuwin chu komo xkataputlekgeka lakpuskatin chu kamanan max xʼanankgo 15,000 latamanin (Mat. 14:21). Andrés wa: «Unu wi chatum aktsu kgawasa tiku kgalhi makkitsis kaxtalanchu xla cebada chu tantiy laktsu skiti. Pero ¿la nakaʼakchani uma xputumkan?» (Juan 6:9). Kaxtalanchu xla cebada wa tuku lu xwakan chu ni tapalaxla xwanit, chu umakgolh laktsu skiti max xaskawawa chu xaskgokgo xwanit. Pero ni xʼama kaʼakchani putum umakgolh latamanin.

4. ¿Tuku kinkamasiyaniyan tuku lichuwinan Juan 6:​11-13? (Na kaʼakxilhti dibujos).

⁴ Xlakata Jesús tlan xkalikatsiniputun latamanin, kawanilh pi xtakaxtawilakgolh kkasekgetni (Mar. 6:​39, 40; kalikgalhtawakga Juan 6:​11-13). Biblia wan pi Jesús paxtikatsinilh xTlat xlakata xmaxkinit kaxtalanchu chu skiti. Chu lu tlan pi chuna tlawalh xlakata wa Dios tiku xkamaxkinit uma liwat. Uma kinkamalakapastakayan pi nachuna kilitlawatkan, chu natlawayaw oración akxni nina wayanaw maski kaj kiʼakstukan wilaw o akxni katawilaw amakgapitsin. Alistalh, Jesús tlawalh pi xkamaʼakgpitsinika liwat latamanin chu xlakan liwana wayankgolh asta akxni kgalhkgaskgolh. Liwat akgataxtulh chu Jesús ni xlakaskin pi paxkat xwa. Wa xlakata kalimapakgsilh xʼapóstoles pi xmastokgkgolh max xlakata alistalh tlan xwaparakgolh. Uma  tuku tlawalh Jesús kinkamasiyaniyan pi ni kililaktlawamitkan tuku kgalhiyaw. Natlatni tlan nakalitachuwinankgo xkamanankan uma tuku tlawalh Jesús xlakata nakamasiyanikgo natlawakgo oración, tlan nakamakgamakglhtinankgo amakgapitsin chu nakamaskiwikgo tuku kgalhikgo.

5. ¿Tuku tlawakgolh latamanin akxni akxilhkgolh xmilagros Jesús, pero tuku tlawalh Jesús?

⁵ Latamanin lu kaks xlilakawankgo chuna la xmasiya Jesús chu milagros nema xtlawa. Xkatsikgo pi Moisés xlichuwinanit pi Dios xʼama makamin chatum lu xlakaskinka palakachuwina. Wa xlakata max xlilakpuwankgo: ¿Wa Jesús uma palakachuwina? (Deut. 18:​15-18). Komo chuna xkanajlakgo, max xlakpuwankgo pi Jesús lu tlan mapakgsina xʼama litaxtu, tlan xʼama kamawi putuminika kachikin. Uma kinkamakgtayayan naʼakgatekgsaw tuku xlakata «xafuerza mapakgsina xʼamakgolh tlawakgo» (Juan 6:​14, 15). Komo Jesús xmastalh talakaskin pi mapakgsina xlimaxtuka, xmakgtanulh kpolítica chu xkatatayalh judíos tiku ama kilhtamaku xtapakgsinikgo Roma. Pero nichuna tlawalh. Biblia wan pi Jesús ni makgtiy lilakpuwa, tsalalh chu «amakgtum xʼakstu ampa kkasipijni». Maski xafuerza mapakgsina xtlawaputunkan, ni makgtanulh kpolítica. ¡Lu xlakaskinka tuku kinkamasiyaniyan uma!

6. ¿La tlan nastalaniyaw xliʼakxilhtit Jesús? (Na kaʼakxilhti dibujo).

⁶ Xlikana pi akinin ni kintikaskinikan pi katlawaw akgtum milagro xlakata namalhuwiyaw kaxtalanchu o wi tiku namapaksayaw. Na max ni mapakgsina kintikalimaxtuputunkan. Pero max latamanin nakinkamafuerzaliniputunkgoyan xlakata navotarlinanaw o nakinkawanikgoyan pi katatayaw tiku xlakan lakpuwankgo pi tlan nalakkaxtlawa taʼakglhuwit nema anan. Pero Jesús kinkawilinin lu tlan liʼakxilhtit akxni  ni makgtanulh kpolítica. Xla wa: «KinTamapakgsin ni xalak uma kakilhtamaku» (Juan 17:14; 18:36). Kstalaninanin Cristo kilistalanitkan xtapuwan chu tuku tlawalh Jesús. Akinin tatayayaw xTamapakgsin Dios, lichuwinanaw xlakata uma Tamapakgsin chu skinaw kkioracioneskan pi kamilh (Mat. 6:10). Kalichuwinaw atanu tuku kinkamasiyaniyan milagro nema tlawalh Jesús akxni malhuwilh kaxtalanchu.

«NINA XʼAKGATEKGSKGO TUKU XKILHCHANIMA MILAGRO XLA KAXTALANCHU»

7. ¿Tuku atanu milagro tlawalh Jesús, chu tuku wankgolh apóstoles? (Juan 6:​16-20).

⁷ Akxni Jesús xkamawinita lhuwa latamanin, kawanilh xʼapóstoles pi xtawakakgolh kbarco chu xtaspitkgolh kCapernaúm, chu xla alh kkasipijni xlakata latamanin ni mapakgsina xlimaxtukgolh (kalikgalhtawakga Juan 6:​16-20). Akxni apóstoles xwakakgolha kbarco, lipekua tsukulh senan chu unan. Xlakata Jesús tlan xkalakgchalh, tsukulh akgspuntlawan chuchut, chu wanilh apóstol Pedro pi na xʼakgspuntlawalh chuchut (Mat. 14:​22-31). Akxni Jesús tawakalh kbarco, unisen takaksli. Xtamakgalhtawakgen lu kaks lilakawankgolh chu wankgolh: «Xlikana xKgawasa Dios wix» (Mat. 14:33). a Maski lu kaks lilakawankgolh uma, nina xʼakgatekgskgo la uma xmilagro Jesús xtatalakxtumi milagro nema xtlawanit akxni kamawilh lhuwa latamanin. Marcos liwana lichuwinan pi apóstoles lu kaks lilakawankgolh uma tuku xlama xlakata «nina xʼakgatekgskgo tuku xkilhchanima milagro xla kaxtalanchu, chu xnakujkan chuntiya tuwa xkitaxtuni naʼakgatekgsa» (Mar. 6:​50-52). Apóstoles tuwa xmakgkatsikgo naʼakgatekgskgo la xlilhuwa litliwakga xmaxkinit Jehová Jesús xlakata xtlawalh milagros. Alistalh Jesús lichuwinampa milagro xla kaxtalanchu xlakata wi atanu tuku lu xlakaskinka xkinkamasiyanin.

8, 9. ¿Tuku xlakata latamanin ankgolh putsakgo Jesús? (Juan 6:​26, 27).

⁸ Tuku tlakg xlilakgaputsakgo latamanin tiku Jesús xkamawinit wa pi xkamaxkika tuku xmaklakaskinkgo. Xlikana pi lichali akxni akxilhkgolh pi Jesús chu xʼapóstoles xʼankgonita, tawakakgolh klaktsu barco nema xminkgoyacha kTiberíades chu ankgolh kCapernaúm xlakata xputsakgolh Jesús (Juan 6:​22-24). Pero ¿chuna tlawakgolh xlakata xkgaxmatputunkgo xpalakata xTamapakgsin Dios? Nichuna. Tuku tlakg xlilakgaputsakgo wa pi xkamaxkika tuku nawakgo. ¿La likatsiyaw uma?

⁹ Kalilakpuwaw tuku lalh akxni umakgolh latamanin tatanokglhkgolh Jesús lakatsu kCapernaúm. Jesús liwana kawanilh pi xlakan tlakg xlilakgaputsamakgo nakamaxkikan tuku xmaklakaskinkgo. Xla kawanilh pi “xwakgonit kaxtalanchu chu xlikgalhkgaskgonit taway nema lakxla”. Pero kamaʼakgpuwantinilh pi tlakg tlan xwa pi xliskujkgolh nakgalhikgo «taway nema ni lakxla chu masta latamat nema ni kgalhi xlisputni» (kalikgalhtawakga Juan 6:​26, 27). Na kawanilh pi uma taway wa xTlat tiku tlan xʼama kamaxki. Latamanin max lu kaks lilakawankgolh akxni kgaxmatkgolh pi xʼanan akgtum taway nema tlan xkamaxkilh latamat nema nikxni sputa. Pero ¿tuku taway xlichuwinama Jesús chu la tlan xkgalhikgolh uma taway?

10. ¿Tuku xtalakaskin pi xtlawakgolh latamanin xlakata tlan xkgalhikgolh latamat nema ni kgalhi xlisputni?

¹⁰ Max umakgolh judíos xlakpuwankgo pi xtalakaskin pi wi tuku xtlawakgolh xlakata xmakglhtinankgolh uma taway. Max xlakpuwankgo pi xlimakgantaxtitkan xwanit “tuku xwan” xLimapakgsin Moisés. Pero Jesús kawanilh: «Wa uma tuku militlawatkan xlakata Dios tlan nakaʼakxilhan: nalimasiyayatit pi kanajlaniyatit tiku xla malakgachanit» (Juan 6:​28, 29). Xlakata nakgalhiyaw «latamat nema ni kgalhi xlisputni», talakaskin nalimasiyayaw pi kanajlaniyaw tiku Dios malakgachalh. Jesús xlichuwinanita uma (Juan  3:​16-18, 36). Chu alistalh xʼamapa lichuwinan tuku kilitlawatkan xlakata nakgalhiyaw latamat nema ni kgalhi xlisputni (Juan 17:3).

11. ¿La limasiyakgolh judíos pi kajwatiya xlilakpuwamakgo pi xkamaxkika tuku nawakgo? (Salmo 78:​24, 25).

¹¹ Umakgolh judíos ni akgatekgskgolh tuku Jesús xkamasiyanima pi xlitlawatkan xlakata Dios tlan xkaʼakxilhli. Wa xlakata kgalhskinkgolh: «¿Tuku milagro natlawaya xlakata nakakxilhaw chu nakkakanajlaniyan?» (Juan 6:30). Alistalh litachuwinankgolh Jesús pi xamakgan xnatlatnikan, tiku xlamakgo kxkilhtamaku Moisés, xmakglhtinankgonit maná, nema xtachuna kaxtalanchu xwanit (Neh. 9:15; kalikgalhtawakga Salmo 78:​24, 25). Uma liwana masiya pi xlakan chuntiya xlilakpuwamakgo pi xkamaxkika tuku xmaklakaskinkgo. Wa xlakata akxni Jesús kalitachuwinalh «xaxlikana kaxtalanchu xalak akgapun» nema xtachuna la maná xwanit chu tlan xkamaxkilh latamat nema ni kgalhi xlisputni, xlakan ni kgalhskininankgolh tuku xwamputun uma (Juan 6:32). Xlakan kajwatiya xlilakgaputsamakgo tuku xmaklakaskinkgo chu ni kuenta tlawakgolh tuku Jesús xkamasiyanima pi xlitlawatkan xlakata tlan xkgalhikgolh latamat nema ni kgalhi xlisputni. ¿Tuku kinkamasiyaniyan uma?

TUKU TLAKG XLAKASKINKA KILIʼAKXILHATKAN

12. ¿Tuku wa Jesús pi tlakg xlakaskinka xwanit?

¹² Pulaktum tuku lu xlakaskinka kinkamasiyaniyan Juan capítulo 6 wa uma: tuku tlakg xlakaskinka kiliʼakxilhatkan wa chuna la talalinaw Jehová. Akxni Satanás lakputsananilh Jesús, xla limasiyalh pi tlakg xlakaskinka xwanit nakgalhakgaxmatkan Dios nixawa nakgalhikan tuku nawakan (Mat. 4:​3, 4). Chu kxtaʼakgchuwin xalak sipi na lichuwinalh pi lu xlakaskinka natalalinaw Jehová (Mat. 5:3). Wa xlakata, kalilakpuwaw uma takgalhskinin: «¿Limasiya chuna la klin kilatamat pi tlakg xlakaskinka kliʼakxilha chuna la ktalalin Jehová nixawa nakkgalhi tuku nakmaklakaskin?».

13. 1) ¿Tuku xlakata ni talakgalhin nalipaxuwayaw kiliwatkan? 2) ¿Tuku lu kuenta kilitlawatkan (1 Corintios 10:​6, 7, 11).

¹³ Xlikana pi ni talakgalhin naskiniyaw Dios pi kakinkamaxkin tuku maklakaskinaw chu nalipaxuwayaw uma (Luc. 11:3). Biblia wan pi lu tlan pi chixku nawayan, nakgotnan chu nalipaxuwa xtaskujut, xlakata uma «akgtum xtamaskiwin Dios» (Ecl. 2:24; 8:15; Sant. 1:17). Maski chuna, talakaskin pi ni tlakg xlakaskinka naliʼakxilhaw tuku maklakaskinaw. Wa uma tuku apóstol Pablo kamalakapastakalh kstalaninanin Cristo tiku xlamakgo akxni nina xmasputukan Jerusalén chu xtemplo. Kalitachuwinalh tuku titaxtukgolh israelitas, chuna la tuku lalh ksipi Sinaí. Chu kawanilh pi kuenta xtlawakgolh xlakata ni xtlawaputunkgolh «tuku nitlan», chuna la tlawakgolh israelitas (kalikgalhtawakga 1 Corintios 10:​6, 7, 11). Jehová xtlawanit akgtum milagro xlakata xkamaxkilh israelitas tuku nawakgo, pero xlakata xlakan tlakg xlakaskinka xliʼakxilhkgo tuku nawakgo “nitlan kakitaxtunilh” (Núm. 11:​4-6, 31-34). Chu akxni kakninanikgolh aktsu toro xaʼoro na limasiyakgolh pi tlakg xlakaskinka xliʼakxilhkgo nawayankgo, nakgotnankgo chu napaxuwakgo nixawa nakgalhakgaxmatkgo Dios (Éx. 32:​4-6). Pablo lichuwinalh uma tuku lalh xlakata wi tuku xkamasiyanilh kstalaninanin Cristo tiku xlamakgo akxni nina xmasputukan Jerusalén chu xtemplo, nema chuna lalh kkata 70 akxni xminita Jesús. La uku nachuna titaxtumaw, nialh makgas namasputukan uma kakilhtamaku. Wa xlakata lu kuenta kilitlawatkan tuku wa apóstol Pablo.

14. ¿Tuku wan Biblia xlakata liwat nema naʼanan kxasasti kakilhtamaku?

¹⁴ Akxni Jesús masiyalh pi naskiniyaw Dios “tuku nawayaw uma kilhtamaku”, na masiyalh pi naskiniyaw pi kalalh xtalakaskin «kkatiyatni» (Mat. 6:​9-11). ¿La lakpuwana wix pi nawan uma kilhtamaku? Biblia lichuwinan pi akxni natatlawa xtalakaskin Dios unu kKatiyatni, nakgalhiyaw  lhuwa liwat. Anta kʼIsaías 25:​6-8 malaknu pi akxni namapakgsinan xTamapakgsin Dios naʼanan lhuwa xatlan liwat. Chu kSalmo 72:16 lichuwinan pi «Katiyatni lhuwa tuku namakgalananan, lhuwa tuku namakgalananan kasipijni». ¡Kalilakpuwanti pi kaxtlawapat miliwat nema lu lakgatiya o nema nikxni wanita! Chu ¡kalilakpuwanti akxni nawaya xtawakat miʼuvas nema chanita! (Is. 65:​21, 22). Chu putum uma tasikulunalin ni miʼakstu katilipaxuwa.

15. ¿Tuku natalakaskin nakatsinikgo tiku nakamalakastakwanikan? (Juan 6:35).

¹⁵ (Kalikgalhtawakga Juan 6:35). ¿Tuku kgalhkgalhimakgo latamanin tiku Jesús kamawilh kaxtalanchu chu skiti akxni tlawalh milagro? Max akxni naʼanan talakastakwanat nakalakgapasaw makgapitsi umakgolh latamanin. Max Jehová nakamalakastakwani maski makgasa ni limasiyakgolh takanajla (Juan 5:​28, 29). Natalakaskin nakatsinikgo tuku wamputun umakgolh xtachuwin Jesús: «Akit kaxtalanchu xla latamat. Putum tiku nakilakgmin, nikxni katitsinkspa». Na natalakaskin nakanajlanikgo xtamakamastan Jesús, uma wamputun, nakanajlanikgo tiku makamastalh xlatamat xpalakatakan. Ama kilhtamaku putum tiku nakamalakastakwanikan chu kamanan tiku nalakachinkgo kxasasti kakilhtamaku, nakamasiyanikan xlakata Jehová chu xlakata tuku lakpuwanit natlawa. ¡Lu nalipaxuwayaw nakamakgtayayaw umakgolh latamanin nakatsinikgo uma! Xlikana pi tlakg nalipaxuwayaw nakamakgtayayaw xlakata tlan natalalinkgo Jehová nixawa nalipaxuwayaw xakgama liwat.

16. ¿Tuku nalichuwinanaw kʼatanu artículo?

¹⁶ Uma artículo kaj pulaktum tuku lichuwinanit xlakata tuku kinkamasiyaniyan Juan capítulo 6. Pero Jesús wi tuku tlakg lichuwinalh xlakata «latamat nema ni kgalhi xlisputni». Xtalakaskin pi judíos kuenta xtlawakgolh tuku Jesús xkalitachuwinama chu uma na kuenta kilitlawatkan. Kʼatanu artículo nalichuwinanaw atanu tuku kinkamasiyaniyan Juan capítulo 6.