Apóstol Pablo tsokgnanilh umakgolh tachuwin Timoteo, tiku na kgolotsin xlitaxtu: «Klimapakgsiyan kxlakatin Dios chu Cristo Jesús chu ángeles nema Dios kalaksaknit pi kamakgantaxti uma tastakyaw, liwana kalakputsanani akxni nina wi tuku laksaka chu ni kalaksakpaxkinanti» (1 Tim. 5:21). ¿Tiku umakgolh «ángeles nema Dios kalaksaknit»?

Pulana kalichuwinaw tiku ni kakilhchanima. Tuku wa Pablo ni wa kakilhchanima 144,000. Akxni Pablo malakgachanilh uma tatsokgni Timoteo, nina xtsukukanit kamalakastakwanikan xatalaksakni kstalaninanin Cristo k’akgapun. Apóstoles chu amakgapitsi tiku xatalaksakni nina espíritus xlitaxtukgo. Wa xlakata tachuwin «ángeles nema Dios kalaksaknit» ni wa kakilhchanima 144,000 (1 Cor. 15:​50-54; 1 Tes. 4:​13-17; 1 Juan 3:2).

Umakgolh na ni wa kakilhchanima ángeles tiku makgxtakgkgolh Dios kxkilhtamaku Noé. Umakgolh ángeles xtalamakgasitsin Jesús litaxtukgolh akxni tatayakgolh Satanás chu demonios litaxtukgolh (Gén. 6:2; Luc. 8:​30, 31; 2 Ped. 2:4). Kkilhtamaku nema aku mima, Jesús nakalakgachinu kxakapulhman 1,000 kata, chu alistalh nakatamalakgsputu Satanás (Jud. 6; Apoc. 20:​1-3, 10).

«Ángeles nema Dios kalaksaknit» nema talichuwinan k1 Timoteo 5:​21, wa kakilhchanima ángeles tiku ni makgxtakgkgo Dios chu lakxtum taskujmakgo k’akgapun.

Anankgo lhuwa ángeles tiku ni makgxtakgkgo Jehová (Heb. 12:​22, 23). Ni kililakpuwanatkan pi pulakatunu taskujut nema Jehová kamaxki ángeles xputumkan makxtum tlawakgo (Apoc. 14:​17, 18). Kalakapastakwi pi akgtum kilhtamaku, Jehová kaj chatum ángel lakgayawalh nakamasputu 185,000 soldados xalak Asiria (2 Rey. 19:35). Nachuna, Jesús wa pi amakgapitsi ángeles kalakgayawakanit «nakatamakxtukgo kxTamapakgsin tiku tlawakgo pi amakgapitsin naʼakgchakgxkgo, chu tiku tlawakgo tuku nitlan» (Mat. 13:​39-41). Nachuna, atanu ángeles kalaksakkanit xlakata «namamakxtumikgo tiku xla kalaksaknit» xlakata na’ankgo k’akgapun (Mat. 24:31). Chu amakgapitsi ángeles kaliyawakanit pi nakinkakuentajtlawakgoyan chuna la wan Salmo 91:11 (Mat. 18:10; katamalakxtupi tuku wan Mateo 4:11 chu Lucas 22:43).

Chuna la akxilhnitaw, «ángeles nema Dios kalaksaknit» nema kalichuwinankan k1 Timoteo 5:21 max kakilhchanima ángeles tiku xkalakgayawakanit nakuentajtlawakgo congregaciones. Kxapulana versículos nema litsuku uma capítulo, Pablo xkalichuwinama lakgkgolotsin xalak congregación chu xkawanima natalan pi xkamaxkikgolh kakni lakgkgolotsin. Chu lakgkgolotsin xkawani pi liwana xmakgantaxtikgolh tuku xkalakgayawakanit, “liwana xlakputsanankgolh akxni nina wi tuku xlaksakkgo chu ni xlaksakpaxkinankgolh”. ¿Tuku xlakata chuna xlitlawatkan xwanit? Dios malakpuwanilh Pablo pi xlichuwinalh tuku xlakata lu xlakaskinka chuna xtlawakgolh. Xlakan xkaskujnanimakgo xnatalankan «kxlakatin Dios chu Cristo Jesús chu ángeles nema Dios kalaksaknit». Uma wamputun pi Jehová, Jesús chu «ángeles nema Dios kalaksaknit» akxilhmakgo la lakgkgolotsin kuentajtlawakgo congregaciones. Putum uma tuku katsininitaw, kinkamasiyaniyan pi wilakgo ángeles tiku kalakgayawakanit nakuentajtlawakgo congregación, tiku nakuentajtlawakgo xlakskujnin Jehová chu tiku pulalinkgo la natalichuwinan Dios, chu namakatsinikgo Jehová tuku akxilhkgo (Mat. 18:10; Apoc. 14:6).