1, 2. ¿Tuku lakpuwankgo lhuwa latamanin xlakata xtaskujutkan?

LHUWA latamanin lakpuwankgo pi taskujut nema kgalhikgo litasiya komo tlakg xlakaskinka litaxtukgo o ni. Makgapitsi latamanin, lismanikgonit pi akxni wi tiku lakgapaskgo kgalhskinkgo tuku liskujkgo.

² Akxni Biblia lichuwinan makgapitsi latamanin, lakgachunin wan tuku xliskujkgo. Akgtum li’akxilhtit, wan pi Mateo xmatajina tumin xwanit, Simón xmamasana xuwa chu Lucas «xatapaxkin makuchina» (Col. 4:14; Mat. 10:3; Hech. 10:6). Lakgachunin, kBiblia lichuwinan tuku litay xkgalhikgo tiku skujnanimakgolh Jehová. Kalilakpuwaw xlakata mapakgsina David, palakachuwina Elías chu apóstol Pablo. Umakgolh lakchixkuwin lanka xtapalh akxilhkgolh tuku xkalakgayawanit Dios. Akinin nachuna lanka xtapalh na’akxilhaw katuwa taskujut nema natlawayaw xpalakata Jehová.

3. ¿Tuku xlakata xlakaskinka pi natalan tiku linkgoya kata nakamasiyanikgo tiku kamananku? (Kaʼakxilhti xapulana dibujo).

 ³ Xlakskujnin Dios xatapaxuwan lakskujnaniyaw chu lanka xtapalh akxilhaw tuku kinkalakgayawakanan. Lhuwa lakgatiyaw tuku tlawayaw chu tlawaputunaw putum kilhtamaku. Pero lu nitlan xlakata akxni linawa kata, nialh xtachuna tlawayaw la xapulana (Ecl. 1:4). Uma tlawa pi tuwa namakgkatsiyaw xtatayananin Jehová. ¿Tuku xlakata? Xlakata tlakg talhuwima la talichuwinama Dios chu xkachikin limaklakaskima xasasti tecnología xlakata nakalinikan xalakwan xalaksasti lhuwa latamanin. Pero natalan tiku linkgoya kata tuwa makgkatsikgo nakatsinikgo la natlawakgo tuku xasasti (Luc. 5:39). Xlikana pi chuna la titaxtutilha kilhtamaku wa latamanin makgatsankgatilhakgo xlitliwakgakan (Prov. 20:29). Wa xlakata xlakaskinka pi natalan tiku linkgoya kata nakamasiyanikgo tiku kamananku xlakata tlakg nalakgatayakgo taskujut (kalikgalhtawakga Salmo 71:18).

4. ¿Tuku xlakata makgapitsi tuwa makgkatsikgo nakamaxkikgo taskujut amakgapitsin? (kaʼakxilhti recuadro « Akxni tuwa makgkatsikan kamaxkikan taskujut amakgapitsin»).

⁴ Natalan tiku lakgayakgolh limapakgsin, tlakg tuwa makgkatsikgo nakamaxkikgo uma taskujut tiku kajku kamanan (kaʼakxilhti recuadro «¿Tuku kilhchanima?»). Max nitlan katilimakgkatsilh xlakata nalakpuwan pi namakgatsankga tuku lakgaya nema lakgati. Max nitlan katilimakgkatsikgolh akxni nalilakpuwankgo pi atanu tiku natlawa taskujut nema lu xlakaskinka akxilhkgo. Max lakpuwankgo pi nitlan katitatlawalh komo ni wa naʼakxilhkgo. O max lakpuwankgo pi ni kgalhikgo kilhtamaku xlakata nakamasiyanikgo amakgapitsin. Nachuna, tiku kajku kamanan talakaskin nakgalhkgalhinankgo komo ni lhuwa taskujut nakalakgayawakan.

5. ¿Tuku takgalhskinin naʼakxilhaw kʼuma artículo?

⁵ ¿Tuku xlakata xlakaskinka pi natalan tiku linkgoya kata nakamakgtayakgo tiku kajku kamanan akxni aku nalakgatayakgo taskujut? ¿La tlan nakamakgtayakgo? (2 Tim. 2:2). ¿Tuku xlakata xlakaskinka pi tiku kajku kamanan nakatsiniputunkgo akxni nakataskujkgo tiku linkgoya kata? Kakxilhwi la mapakgsina David makgtayalh xkgawasa xlakata natlawa akgtum taskujut nema xlakaskinka.

6. ¿Tuku xtlawaputun David, pero tuku wanilh Jehová?

⁶ David akglhuwa kata putsastalanika chu kaniwa niku xtatsekga. Akxni mapakgsina litaxtulh, lu tlan kchiki niku alh tawila. Wa xlakata wanilh palakachuwina Natán: «Unu kwi k’akgtum chiki niku litatlawanit puksnankiwi, pero caja xla talakkaxlan xla Jehová wi kchiki nema litatlawanit lhakgat». David xliputum xnaku xtlawaniputun Jehová akgtum lu stlan templo. Wa xlakata Natán wanilh David: «Putum tuku wi kminaku katlawa, xlakata xaxlikana Dios tawilan». Pero Jehová ni xlakpuwan la palakachuwina Natán. Wa xlakata malakgachalh nawani David: «Ni wix katitlawa chiki». Xlikana pi Jehová malaknunilh David chuntiya x’ama sikulunatlawa, pero wanilh pi chatum xkgawasa wa x’ama kaxtlawa templo. ¿La makgkatsilh David? (1 Crón. 17:1-4, 8,11, 12; 29:1).

7. ¿La limasiyalh David pi xmaxki kakni tuku xlaksaknit Jehová?

⁷ Lu xlakgati David xtlawaputun xtemplo Jehová, max lu lilipuwa akxni wanika pi ni x’ama tlawa. Maski chuna, lu makgtayalh taskujut nema x’ama tlawa xkgawasa  Salomón. David kamakgamakgtayalh lakskujnin nalakkaxwilikan taskujut chu kataputsalh kiwi, hierro, cobre, plata chu oro. David ni lilakgaputsalh tiku xliyawaka pi tlawalh templo, alistalh lilakgapaska la xtemplo Salomón. Wata matliwakglhi xkgawasa chu wanilh: «Jehová ankgalhin katatawilan chu tlan kakitaxtulh tuku natlawaya chu katlawa xchik Jehová mi Dios, chuna la wanit» (1 Crón. 22:11, 14-16).

8. ¿Tuku xlakata max xlakpuwa David pi Salomón nina la x’ama tlawa templo, pero tuku tlawalh?

⁸ (Kalikgalhtawakga 1 Crónicas 22:5). David max xlakpuwa pi Salomón nina xkatsi la napulalin uma xlakaskina taskujut. Xla xlakaskin pi templo lu stlan xtasiyalh, pero Salomón kajku kgawasa xwanit chu nina xkatsi la natlawa. Maski chuna, David xkatsi pi Jehová x’ama makgtaya Salomón xlakata tlan xtlawalh uma xlakaskinka taskujut. Wa xlakata ankgalhin makgtayalh xkgawasa k’uma lu lanka taskujut.

9. ¿Tuku li’akxilhtit tlan nakamakgtaya natalan tiku linkgoya kata xlakata tlan nalipaxuwakgo akxni kamakgxtakgnikgo taskujut amakgapisin?

⁹ Natalan tiku linkgoya kata ni nalilipuwankgo akxni nakamakgxtakgnikgo xtaskujutkan natalan tiku kajku kamanan. Putum katsiya pi tuku tlakg xlakaskinka wa namakgantaxtiyaw xtaskujut Jehová nema kinkalakgayawanitan. Wa xlakata talakaskin nakamasiyanikgoyaw natalan tiku kajku kamanan. Kalilakpuwaw uma li’akxilhtit. Akxni laktsujku x’wanitaw, max x’akxilhaw pi kintlatkan xmatlawani xputlaw. Akxni staktilhaw, xla xkinkawanitilhayan la matlawanikan. Titaxtulh kilhtamaku, maxtuw licencia chu tsukuw matlawaniyaw. Pero maski chuna, kintlatkan chuntiya xkinkawaniyan la namatlawaniyaw. Chu lakgachunin xaktalakgpalitilhayaw xlakata tiku namatlawani putlaw. Pero akxni tlakg kgolota wa, akinin akgalhin tsukuw matlawaniyaw. ¿Xlisitsi kintlatkan? Ni. Max lu xlipaxuwa pi tlan kaniwa  xlinaw. Na xtachuna, natalan tiku linkgoya kata tapaxuwan makgkatsikgo akxni akxilhkgo pi kamanan tiku kamasiyanikgonit tlan tlawakgo xtaskujutkan.

10. ¿La xakxilha Moisés xlakata makglhtinankan kakni chu limapakgsin?

¹⁰ Kuenta kilitlawatkan xlakata ni nalakgsitsiyaw akxni amakgapitsin nakamaxkikan taskujut. Tlan li’akxilhtit kinkamakgxtakgnin Moisés. Ka’akxilhwi tuku tlawalh akxni makgapitsi israelitas palakachuwinanin tsukukgolh litaxtukgo (kalikgalhtawakga Números 11:24-29). Josué xkamalakgachokgoputun, pero Moisés wanilh: «¿Kilakgsitsiya? Ni, ¡xaklakaskilh pi putum xkachikin Jehová palakachuwinanin xlitaxtukgolh, xlakata Jehová xkamaxkilh x’espíritu!». Moisés katsi pi wa Jehová tiku putum xpulalima. Moisés ni xlakaskin pi putum kakni chu limapakgsin wa xlakgchalh. Wata xlakaskin pi putum xlakskujnin Dios palakachuwinanin xlitaxtukgolh. ¿Chu akinin? ¿Lipaxuwayaw akxni wi tiku tlakg lakgayawakan taskujut?

11. ¿Tuku wa chatum tala akxni makgaxtakgnilh xtaskujut atanu tala?

¹¹ Lhuwa natalan makgasa skujnanimakgolh Jehová xliputum xlitliwakgakan. Xlakan kamasiyanikgonit natalan tiku kajku kamanan xlakata tlakg nalakgatayakgo taskujut. Kalichuwinaw xlakata tala Peter. Lata 74 kata skujnilh Dios putum kilhtamaku, xwi 35 kata anta ksucursal k’Europa. Akglhuwa kata, Peter wa tiku xlakgaya Departamento de Servicio. Pero alistalh xtaskujut maxkika chatum tala wanikan Paul tiku kajku kgawasaku. Peter xmasiyaninit Paul. ¿Lisitsilh Peter xlakata uma talakgpalit? Ni. Xla wa: «Lu klipaxuwa xlakata kamasiyanikgokanit natalan xlakata tlakg nalakgatayakgo taskujut chu lu tlan tlawamakgolh».

12. ¿Tuku kinkamasiyaniyan xli’akxilhtit Rehoboam?

¹² Akxni Salomón nilh, Rehoboam mapakgsina litaxtulh, tiku xkgawasa xwanit. Rehoboam xkatsiputun la tlan namakgantaxti taskujut nema aku xlakgayawakanit, wa xlakata skinilh xtamakgtaykan tiku linkgoya kata. Pero alistalh ni kakgalhakgaxmatli. Wata wa kakgalhakgaxmatli xtastakyawkan tiku akxtum xtastakmakgolh. Chu lu nitlan kitaxtunilh (2 Crón. 10:6-11, 19). ¿Tuku kinkamasiyaniyan xli’akxilhtit? Lu tlan nakaskinikgoyaw xtastakyawkan tiku linkgoya kata xlakata tlakg katsikgo nixawa akinin. Nachuna, kuenta natlawayaw tuku kinkawanikgoyan. Uma ni wamputun pi tiku kajku kamanan putum kilhtamaku chuna natlawakgo la xtatlawa xapulana. Pero ni tunkun nalakpuwankgo  pi tuku wankgo tiku linkgoya kata ni tlan katikitaxtulh.

13. ¿Tuku xlitlawatkan natalan tiku kamananku akxni kataskujkgo natalan tiku linkgoya kata?

¹³ Min kilhtamaku natalan tiku kamananku, wa akxilhkgo taskujut nema tlawakgo natalan tiku linkgoya kata chu tlakg katsinikgo. Lu tlan komo tiku kajku kamanan nakatsinikgo la tlawakgo tiku linkgoya kata. ¿Lakapastakaw Paul, tiku lichuwinaw kpárrafo 11? Akxni wa maxkika taskujut nema xlakgaya Peter kBetel, chu wa tsukulh pulalin akgtum departamento, wa: «Xaklimaxtu kilhtamaku xlakata xakskini tastakyaw Peter, chu xakkamakgpuwantini natalan tiku na’anta kskujkgo pi nachuna xtlawakgolh».

14. ¿Tuku kinkamasiyanikgoyan la kskujkgolh Timoteo chu apóstol Pablo?

¹⁴ Timoteo tlakg kgawasaku xwanit nixawa apóstol Pablo. Akglhuwa kata akxtum skujkgolh (kalikgalhtawakga Filipenses 2:20-22). Akgtum kilhtamaku, Pablo kawanilh kstalaninanin Cristo xalak Corinto: «Kkalimalakgachananinitan nTimoteo, wa nti xatapaxkin nkinkam xpalakata nkimPuchinakan, chu na luwa makgantaxtiy xtaskujut, wa cha nti nakalistakyawayan nakawaniyan wa lantla kliyan nkilatamat xpalakata nCristo, watiya ntu kmasiyuy xlipaks nkani kawaj» kcongregación (1 Cor. 4:17). Umakgolh tachuwin limasiya pi Pablo chu Timoteo xlamakgtayakgo akxni akxtum kskujkgo. Pablo limaxtulh xkilhtamaku xlakata namasiyani Timoteo la «namakgantaxtiy xtaskujut», chu Timoteo liskujli xlakata liwana nakatsini. Xlikana pi Pablo lu xpaxki Timoteo chu liwana xkatsi pi tlan x’ama kakuentajtlawa natalan xalak Corinto. Lakgkgolotsin na tlan chuna natlawakgo la Pablo akxni kamasiyanikgo natalan xalak kcongregación.

15. ¿La kinkamakgtayayan Romanos 12:3-5 akxni wi tuku talakgpali kkilatamatkan?

¹⁵ Lamaw kxatapaxuwan kilhtamaku. Xkachikin Dios nema wi kKatiyatni pulaklhuwa la stakma. Uma wamputun pi chuntiya na’anan talakgpalit, chu max makgpitsi tuwa namakgkatsiyaw. ¿Tuku tlan natlawayaw? Ni ki’akstukan kakinkalilakgaputsakan, kataktujuw chu kamakgtayanaw kxtaskujut xTamapakgsin Dios. Komo chuna natlawayaw, makxtum natawilayaw. Kxcarta, Pablo kawanilh kstalaninanin Cristo xalak Roma: «Kkaliwaniyan nchatunu wixin, ni tlakg tlanka nalakapastakatit nkaj mimpalakatakan mpala nalakatsalayatit wa lantla ntu ntlan, wampi wa lantla nchuna xlilat nkalakapastaktit mimpalakatakan». Alistalh Pablo lichuwinalh pi tuku likgatsiyaw kkimaknikan putum xlakaskinka, kcongregación nachuna kinchatunukan kgalhiyaw xlakaskinka taskujut (Rom. 12:3-5).

16. ¿Tuku tlan natlawayaw kinchatunukan xlakata makxtum natawilayaw chu na’anan takaksni kxkachikin Dios?

¹⁶ Putum xlakskujni Jehová makgtayanamputunaw kTamapakgsin chu natlawayaw tuku nakinkaskinikanan. Natalan tuku linkgoya kata tlan nakamasiyanikgo natalan tiku kajku  kamanan. Kamanan tlan nalakgatayakgo taskujut chu liwana nalimasiyakgo pi nila putum tlan tlawakgo chu na nalimasiyakgo kakni. Chu natalan tiku tamakgaxtokgkgonit paxtikatsininankgo pi xlakpuskatin nakamakgtayakgo akxni wi tuku talakgpali. Xlakan nachuna natlawakgo xliʼakxilhtit Priscila, chatum kstalanina Cristo tiku ni makgxtakgnalh putum kilhtamaku makgtayalh xchixku tiku xwanikan Áquila (Hech. 18:2).

17. ¿Tuku kamasiyanilh Jesús kstalaninanin?

¹⁷ Jesús putum kilhtamaku xkamasiyaniputun amakgapitsin, chu lu tlan li’akxilhtit kinkawilinin. Xkatsi pi atanu tiku xlitlawatkan xwanit xtaskujut. Xlikana xkatsi pi wa kstalaninanin makglakgalhinanin xwankgonit. Pero xla xkalipawan pi xlakan x’amakgolh lichuwinankgo xalakwan xalaksasti tlakg lakgamakgat ni xawa la xla tlawalh (Juan 14:12). Jesús liwana kamasiyanilh xtamakgalhtawakgen xlakata nalichuwinankgo Dios xanikuta niku xmatlanikgolh, chu xlakan makgantaxtikgolh tuku kalakgayawaka (Col. 1:23).

18. 1) ¿Tuku taskujut natlawayaw kilhtamaku nema aku mima? 2) ¿Tuku taskujut kgalhiyaw la uku?

¹⁸ Akxni xninita Jesús, Jehová malakastakwanilh chu tlakg maxkilh taskujut. Nachuna, «mapuxkunilh ntlakg kgalhi xkakni, ni xawa amakgapitsin ntlanka napuxkun, chu mapakgsinanin, chu nti nkgalhi litliwakga» (Efes. 1:19-21). Komo ni namakgxtakgaw Jehová chu naniyaw akxni nina min Armagedón, nalakastakwananaw kxasasti kakilhtamaku, nakgalhiyaw lhuwa taskujut nema tlan nalimakgkatsiyaw. Pero la uku lu tlan taskujut kgalhiyaw xlakata nalichuwinanaw xalakwan xalaksasti tamakatsinin chu namakgalhtawakgananaw. Maski akinin kamanan o linawa kata, chuntiya «Lu kalimaxtu[w] kilhtamaku xlakata nalichuwinana[w] kiMalanakan» (1 Cor. 15:58).