1, 2. ¿La liwana limaklakaskin Jehová tuku kgalhi?

JEHOVÁ chatum Dios xalakgalhamana. Putum tuku kgalhiyaw wa kinkamaxkinitan. Wa tapakgsini putum oro, plata chu putum tuku anan kKatiyatni chu masta tuku talakaskin xlakata na’anan latamat (Sal. 104:13-15; Ageo 2:8). Biblia lichuwinan pi Jehová makglhuwa limaklakaskilh tuku anan kkakilhtamaku xlakata nakamaxki xlakskujnin tuku maklakaskinkgo.

² Akgtum li’akxilhtit, liwaka 40 kata Jehová kamaxkilh israelitas chuchut chu maná akxni xlamakgo kxakaskakni tiyat (Éx. 16:35). Chu «nitu katsankganilh» (Neh. 9:20, 21). Jehová maklakaskilh palakachuwina Eliseo, xla tlawalh akgtum milagro xlakata malhuwinilh x’aceite chatum puskat tiku xninita xchixku. Xlakata uma milagro, uma puskat tlan xokgolh putum tuku xlaklin chu chuntiyaku akgataxtunilh, chu tlan limaklakaskilh xla chu xkamanan (2 Rey. 4:1-7). Nachuna Jehová maxkilh litliwakga Jesús xlakata tlawalh milagro akxni kamaxkilh tuku nawakgo latamanin chu asta kamaxkilh tumin akxni chuna xtalakaskin (Mat. 15:35-38; 17:27).

3. ¿Tuku nalichuwinanaw k’uma artículo?

 ³ Jehová tlan nalimaklakaskin tuku xla lakaskin xlakata nakuentajtlawa putum tuku malakatsukinit kKatiyatni. Maski chuna, kawani xlakskujnin pi kalimaklakaskinkgolh tuku kgalhikgo xlakata namakgtayakgo xkachikin (Éx. 36:3-7; kalikgalhtawakga Proverbios 3:9). ¿Tuku xlakata Jehová lakaskin pi namaxkiyaw tuku lhuwa xtapalh kgalhiyaw nema kinkamaxkinitan? ¿La limakgtayanankgolh tuku lhuwa xtapalh xkgalhikgo xlakskujnin Dios xala makgasa kxaxlikana takaknin? ¿La limaklakaskin xkachikin Dios tumin nema xatapaxuwan mastayaw? K’uma artículo nalichuwinanaw xtakgalhtin umakgolh takgalhskinin.

4. ¿Tuku limasiyaniyaw Jehová akxni makgtayananaw kxkachikin?

⁴ ¿Tuku xlakata maxkiyaw Jehová tuku kgalhiyaw? Xlakata paxkiyaw chu paxtikatsiniyaw putum tuku tlawanit kimpalakatakan. Tlan limakgkatsi kinakujkan akxni lilakpuwanaw tuku tlawa Jehová. Chuna makgkatsiyaw la mapakgsina David akxni lichuwinalh tuku xtalakaskin xlakata natlawakan templo. Lichuwinalh pi putum tuku kgalhiyaw wa Jehová kinkamaxkinitan, chu wa xlakata tuku maxkiyaw wa tuku kinkamaxkinitan (kalikgalhtawakga 1 Crónicas 29:11-14).

5. ¿La limasiya Biblia pi akxni wi tuku namastaya chu ni nakgalhkgalhiya pi wi tuku namakglhtinana makgtanuma kxaxlikana takaknin?

⁵ Atanu tuku xlakata maxkiyaw Jehová tuku kgalhiyaw wa xlakata chuna kakninaniyaw. Akgtum kilhtamaku apóstol Juan ma’akxilhnika chu kgaxmatli pi xlakskujnin Dios k’akgapun xlichuwinamakgo: «KinTlatikan chu nkiDioskan, luwa mininiyan namakglhtinana nkakni, chu ntamapakxan, chu litliwakga; sampi wix nti ntimalakatsuku xlipaks nkatuwa ntu anan» (Rev. 4:11). Xlikana pi Jehová lakgchan namaxkikan kakni chu tatlankit, wa xlakata namaxkiyaw tuku tlakg xatlan kgalhiyaw. Kxkilhtamaku israelitas, Jehová limaklakaskilh Moisés xlakata nakawani pi xtlawakgolh pascua makgtutu akgatunu kata. Limapakgsin xwan: «Ni chatum xliminat kxlakatin Jehová chu nitu naliminkgo» (Deut. 16:16). Chuna la akxilhaw, akxni wi tuku xmaxkikan Jehová k’uma pascua anta xmakgtanuma kxtakakninkan israelitas. La uku, akxni wi tuku mastakan chu ni kgalhkgalhikan pi wi tuku namakglhtinankan na anta makgtanuma kkintakakninkan. Akxni chuna tlawayaw, limasiyayaw pi makgtayanamaw kxkachikin Jehová chu lhuwa xtapalh akxilhaw.

6. ¿Tuku xlakata tlan kitaxtu namastayaw tuku kgalhiyaw? (Kaʼakxilhti xapulana dibujo).

⁶ Xlakaskinka pi akinin xatapaxuwan namastayaw chu ni kaj watiya namakglhtinanaw (kalikgalhtawakga Proverbios 29:21). Akgtum li’akxilhtit, kalilakpuwaw pi chatum kgawasa wi tuku nakamaskiwi xnatlatni pero watiya tumin nalitamawa tuku maxkikgo xnatlatni. ¿Ni xlikana pi xnatlatni napaxtikatsinikgo? O kalilakpuwaw chatum precursor tiku akxtum katawi xnatlatni chu kamaxki tumin xlakata wi tuku nalimaklakaskinkan anta kxfamilia. Max natlatni ni lakpuwankgo pi nakamaxkikan tumin, pero max makglhtinankgo xlakata katsikgo pi chuna xkgawasa limasiya pi paxtikatsininan tuku tlawakan xpalakata. Chuna la uma, Jehová katsi pi tlan kitaxtu komo namaxkiyaw tuku lhuwa xtapalh kgalhiyaw.

7, 8. 1) ¿La makgtayanankgolh xlakskujnin Jehová xala makgasa akxni xtatlawa akgtum taskujut? 2) ¿La xmakgtayanankgo xlakskujnin Jehová kxtakaknin Dios?

⁷ Anta kBiblia tekgsaw li’akxilhtit niku masiya pi xlakskujnin Dios xmastakgo tuku xkgalhikgo. Milh kilhtamaku makgtayanankgolh akxni tlawaka akgtum taskujut. Akgtum li’akxilhtit,  Moisés kamakgpuwantinilh israelitas pi xatapaxuwan xmastakgolh tuku xkgalhikgo xlakata x’amaka tlawakan tabernáculo, chu mapakgsina David nachuna tlawalh akxni tlawaka templo (Éx. 35:5; 1 Crón. 29:5-9). Kxkilhtamaku mapakgsina Jehoás, sacerdotes likaxtlawakgolh xchik Jehová tumin nema xatapaxuwan xmastakgonit ama kachikin (2 Rey. 12:4, 5). Kxapulana siglo, kstalaninanin Cristo katsikgolh pi xnatalan xlakaskinkgo tamakgtay xlakata x’anan tatsinkstat kJudea. Biblia lichuwinan pi chatunu makgtayanankgolh chuna la matlanikgolh (Hech. 11:27-30).

⁸ Chu amakgapitsin xlakskujnin Dios xatapaxuwan mastakgolh tuku xkgalhikgo xlakata nakamakgtayakgo tiku xpulalinkgo kxtakaknin Jehová. Chuna la xwan xLimapakgsin Moisés, levitas ni xmakglhtinankgo tiyat chuna la amakgapitsi tribus. Wa xlakata israelitas xkamaxkikgo diezmo. Uma xtlawa pi levitas ankgalhin kskujkgolh anta ktabernáculo (Núm. 18:21). Makgapitsi kata alistalh, Jesús chu x’apóstoles nachuna litamakgtayakgolh tuku xatapaxuwan xmastakgo lakpuskatin tiku «limakgtayakgolh [...] tu xkgalhikgoy» (Luc. 8:1-3).

9. ¿La xmastokgkgo xtuminkan nema xatapaxuwan xmaskiwinankgo xlakskujnin Dios xala makgasa?

⁹ Tanu tanu la xmastokgkgo xtuminkan nema xatapaxuwan xmaskiwinankgo. Akgtum li’akxilhtit, akxni x’amaka tlawakan tabernáculo anta kxakaskakni tiyat, israelitas mastakgolh tuku xkgalhikgo nema xliminkgonitancha k’Egipto (Éx. 3:21, 22; 35:22-24). Kxapulana siglo, makgapitsi kstalaninanin Cristo stakgolh tuku xkgalhikgo, la komo xpukuxtukan o xchikkan chu xtuminkan linikgolh apóstoles. Nachuna uma tumin xkamaxkikan limaxkgenin (Hech. 4:34, 35). Amakgapitsi xmakikgo tumin chu xatapaxuwan xmastakgo xlakata xlimaklakaskinkan kxtakaknin Dios (1 Cor. 16:2). Wa xlakata, asta tiku lhuwa tumin xkgalhikgo chu tiku limaxkgenin putum xlimakgtayanankgo chuna la tlan xmakgkatsikgo (Luc. 21:1-4).

10, 11. 1) ¿La tlan nachuna xalakgalhamananin nawanaw chuna la xlakskujnin Dios xala makgasa? 2) ¿La makgkatsiya xlakata tlan makgtayanana kxtaskujut xTamapakgsin Dios?

¹⁰ La uku kilhtamaku max natalakaskin xatapaxuwan namastayaw tumin xlakata max wi tuku natalakaskin. Max anta kcongregación natalakaskin nakaxtlawakan Pukgalhtawakga o xasasti natlawakan. O max nakinkawanikanan pi natalakaskin tumin xlakata nakaxtlawakan sucursal o xlakata nalixokgokan niku natlawakan lanka tamakxtumit o xlakata nakalimakgtayakan natalan akxni wi tuku masputunan. Nachuna tumin nema mastayaw kalimakgtayakgokan misioneros, precursores especiales, superintendentes xla circuito chu natalan tiku skujkgo niku pulalinkan taskujut xla xtatayananin Jehová chu tiku skujkgo kBetel xlikalanka katiyatni. Nachuna, max kkincongregacionkan lakkaxwilikanit xlakata namalakgachakan tumin akgatunu papa’ xlakata nalitlawakan Pukgalhtawakga xla xtatayananin Jehová chu Pukgalhtawakga niku tlawakan laklanka tamakxtumit, nema litamakgtayakgo natalan xlikalanka kakilhtamaku.

¹¹ Putum tlan namakgtayananaw ktaskujut nema tlawama Jehová k’uma xa’awatiya kilhtamaku. Tumin nema xatapaxuwan mastayaw max anta mujuyaw kcajas xlakata nalitlawakan Pukgalhtawakga o malakgachayaw anta kjw.org. Max nalakpuwanaw pi kintuminkan ni lu makgtayanan. Pero kalakapastakwi pi la uku lhuwa natalan xatapaxuwan makgtayanankgo maski kaj tsinu. Putum natalan mastakgo maski kaj tsinu tuku kgalhikgo, chuna la kstalaninanin Cristo xalak Macedonia xalak pulana siglo. Maski asta «lu talimaxkgakgonit», kawanika pi xmakgtayanankgolh chu xatapaxuwan makgtayanankgolh (2 Cor. 8:1-4).

12. ¿Tuku tlawa xkachikin Jehová xlakata liwana namaklakaskin tumin nema xatapaxuwan mastakan?

 ¹² Lakgkgolotsin tiku pulalinkgo xtatayananin Jehová liskujkgo xlakata liwana nalimaklakaskinkgo tumin nema xatapaxuwan mastakan (Mat. 24:45). Umakgolh natalan tlawakgo oración xlakata liwana nalimaklakaskinkgo tumin (Luc. 14:28). Makgasa kilhtamaku, uma tumin wa xkamakuentajlikan lakchixkuwin tiku ni xmakgxtakgkgo Dios. Liwana xkuentajtlawakgo pi uma tumin kaj watiya xlimaklakaskinkan xlakata kxtakaknin Dios. Akgtum li’akxilhtit, akgtum kilhtamaku Esdras taspitli kJerusalén chu xlimin tuku lhuwa xtapalh nema mapakgsina persa mastalh, la komo oro, plata chu amakgapitsi tuku la uku max liwaka 1,700 millones xtapalh (100 millones xla dólares). Tuku xlimin Esdras xli’akxilha la komo akgtum tamaskiwin nema x’ama maxki Jehová, wa xlakata liwana mastalh tastakyaw xlakata nakuentajtlawakan anta ktiji (Esd. 8:24-34). Akglhuwa kata alistalh, apóstol Pablo kawanilh natalan pi xmastokgkgolh tumin xlakata xkamakgtayakgolh natalan xalak Judea chu lu kuenta tlawalh pi tiku xmakgpitsikgolh tumin liwana xtlawakgolh «ni xman wa kxlakatin nkimPuchinakan, wampi na xa wa kxlakatin nchixkuwin» (kalikgalhtawakga 2 Corintios 8:18-21). La uku, xkachikin Jehová nachuna tlawakgo la Esdras chu Pablo. Wa xlakata masta tastakyaw xlakata la namaklakaskinkan tumin nema xatapaxuwan mastakan.

13. ¿Tuku xlakata tlawanit makgpitsi talakgpalit xkachikin Jehová?

¹³ Makgapitsi familias wi tuku tlawakgo xlakata ni lhuwa nalaktlawakgo xtuminkan. O ni lhuwa tuku nakgalhikgo xlakata tlakg naskujnanikgo Jehová. Nachuna tlawakan kxkachikin Jehová. Kxa’awatiya kata nema titaxtunit, tlawakanit lhuwa taskujut. Uma tlawanit pi lhuwa tumin nalaktlawakan nixawa la makglhtinankan. Wa xlakata xkachikin Jehová putsa la natlawa xlakata ni lhuwa nalaktlawakan tumin chu lakapala natlawakan taskujut. Wa xlakata kintuminkan nema xatapaxuwan mastayaw liwana maklakaskinkan.

14-16. 1) ¿La limaklakaskimaka tumin nema xatapaxuwan mastayaw? 2) ¿La litamakgtayanita tamaskiwin nema masta xkachikin Jehová?

¹⁴ Lhuwa natalan tiku makgasata skujnanimakgolh Jehová lichuwinankgo pi nikxni xmakglhtinankgonit lhuwa tamaskiwin anta kxkachikin Jehová. Chu xlikana tuku wankgo. Akgtum li’akxilhtit, nina makgas wilika sitio xla internet jw.org chu JW Broadcasting. Nachuna Traducción del Nuevo Mundo de las Santas Escrituras klhuwa tachuwin anan nixawa la makgasa. Kkata 2014 chu 2015 tlawaka asambleas internacionales «Sigamos buscando  primero el Reino de Dios», anta klaklanka estadios liwaka akgkutati kachikinin kxlikalanka kakilhtamaku. Putum tiku kilakgolh lu lipaxuwakgolh.

¹⁵ Lhuwa tiku paxtikatsininankgonit xlakata tuku kinkamaxkiyan xkachikin Jehová. Akgtum li’akxilhtit, akgtum tamakgaxtokgat tiku skujnanimakgolh Jehová k’aktsu kachikin xla Asia lichuwinalh xlakata JW Broadcasting: «Lakgachunin kmakgkatsiyaw pi lu makgat kwilaw chu lakgachunin ni klakapastakaw la tatlawama xtaskujut Jehová. Pero akxni k’akxilhaw JW Broadcasting, lakapala klakapastakaw pi kmakgtapakgsiyaw k’akgtum familia xlikalanka katiyatni. Natalan xala unu lu lipaxuwakgo programa xla JW Broadcasting. Ankgalhin kkgaxmataw akxni wankgo pi makgkatsikgo pi lu lakatsu katawilakgo Lakgkgolotsin tiku Pulalinkgo xtatayananin Jehová. La uku tlakg tlan makgkatsikgo xlakata makgtapakgsikgo kxkachikin Jehová».

¹⁶ Xlikalanka katiyatni, tlawamaka chu lakkaxtlawamaka liwaka 2,500 Pukgalhtawakga xla xtatayananin Jehová. Anta k’Honduras, natalan xalak congregación tsokgkgolh uma akxni matsukikgolh xasasti xPukgalhtawakgakan: «Lu xlikana kpaxuwayaw xlakata kmakgtapakgsiyaw klanka xkachikin Jehová, nachuna klipaxuwayaw pi kkgalhiyaw natalan xlikalanka katiyatni. Kpaxtikatsiniyaw xlakata uma, la uku kkgalhiw akgtum Pukgalhtawakga niku naktamakxtumiyaw kkinkachikinkan». Lhuwa tiku nachuna wankgo akxni makglhtinankgo Biblia chu atanu likgalhtawakga kxtachuwinkan, akxni makglhtinankgo tamakgtay akxni titaxtu tuku masputunan o akxni akxilhkgo pi tlan kakitaxtuni akxni lichuwinankgo Dios niku lhuwa lamaka.

17. ¿La likatsiyaw pi Jehová makgtayama xkachikin la uku?

¹⁷ Lhuwa latamanin tiku ni xtatayananin Jehová tuwa makgkatsikgo nakanajlakgo pi lhuwa tuku tlan tlawayaw kaj xlakata tumin nema xatapaxuwan mastayaw. Chatum tiku pulalin akgtum lanka empresa lakgapaxialhnalh akgtum imprenta anta kBetel chu kaks lilakawa akxni kastilh pi tiku anta makgtayanamakgolh kaj xatapaxuwan skujmakgolh, chu tamaklakaskima tumin nema xatapaxuwan mastakan, nachuna nikxni pukikan tumin xlakata wi tuku natlawakan. Na lichuwinalh pi niti la matlani tuku tlawayaw. Chu xlikana uma. Katsiyaw pi putum uma matlaniyaw kaj xlakata xtamakgtay Jehová (Job 42:2).

18. 1) ¿Tuku tasikulunalin makglhtinanaw akxni makgtayananaw kxTamapakgsin? 2) ¿La tlan nakamasiyaniyaw kamanan chu tiku xalaksasti xlakata tlan namakgtayanankgo?

¹⁸ La uku kilhtamaku, Jehová kinkamaxkiyan talakaskin chu talakgalhaman xlakata namakgtayananaw klanka taskujut xlakata xTamapakgsin. Liwana kinkawaniyan pi komo chuna natlawayaw, namakglhtinanaw lhuwa tasikulunalin (Mal. 3:10). Chu malaknu pi tiku xalakgalhamana tlan nakitaxtuni kxlatamat (kalikgalhtawakga Proverbios 11:24, 25). Nachuna tapaxuwan natawilayaw xlakata «tlakg anan tapaxuwan akxni mastakan nixawa akxni makglhtinankan» (Hech. 20:35). Nachuna, kgalhiyaw talakaskin nakamasiyaniyaw kinkamanankan kkintachuwinkan o tuku tlawayaw chu nachuna tiku xalaksasti tlan namakgtayanankgo chu namakglhtinankgo lhuwa tasikulunalin.

19. ¿La makgtayanitan uma artículo?

¹⁹ Putum tuku kgalhiyaw wa kinkamaxkinitan Jehová. Namaxkiyaw tuku kgalhiyaw nalimasiyayaw pi paxkiyaw chu paxtikatsiniyaw tuku tlawa kimpalakatakan (1 Crón. 29:17). Akxni israelitas xatapaxuwan makgtayanankgolh akxni tlawaka templo, «tsukukgolh paxuwakgo xlakata xatapaxuwan xtlawakgonit tamakamastan, xlakata xliputum xnakujkan tlawanikgolh Jehová tamakamastan» (1 Crón. 29:9). Nachuna akinin chuntiya kalipaxuwaw akxni maxkiyaw Jehová tuku xla kinkamaxkinitan.