«AKXNI ki’amigos xlichuwinankgo la tapaxuwan xwilakgo akxni x’ankgo lakskujnanikgo Jehová niku tlakg xtalakaskin chu na xakamputun», lichuwinan Sylviana, chatum precursora tiku kgalhi puxamakitsis kata. Xla chuntiya lichuwinan: «Pero xaklakpuwan pi nila xakalh lakskujnani Jehová alakatanu».

¿Minit kilhtamaku nachuna makgkatsinita la Sylviana? ¿Lakgatiya xpit lakskuja niku tlakg talakaskin tamakgtay, pero max kgalhskinkana komo namatlaniya? Komo chuna, ¡ni kalipuwanti! Jehová kamakgtayanit lhuwa natalan xlakata tlan natayanikgo ta’akglhuwit nema kamachokgo xlakata tlakg naskujnanikgo. ¿La tlawanit? Kalichuwinaw kachikin xla Madagascar, xli’akgtati isla nema tlakg lanka.

K’uma xa’awatiya akgkaw kata, liwaka 70 precursores chu tiku lichuwinankgo Dios xalak akgkawitu países * ankgonit latamakgo k’uma kachikin xla África, niku latamanin maxkikgo kakni Biblia. Nachuna, lhuwa tiku lichuwinankgo Dios xala uma país, xatapaxuwan ankgonit latamakgo klaktsu kachikinin xla uma isla. ¿Kalakgapasputuna makgapitsi?

Louis chu Perrine akgtum tamakgaxtokgat xalak Francia nema kajku tsinu liwaka 30 kata kgalhikgo chu ankgolh latamakgo kMadagascar. Akglhuwa kata kaj watiya xlilakpuwankgo komo tlan na’ankgo alakatanu país xlakata nalichuwinankgo Dios, pero Perrine ni liwana xkatsi komo tlan na’ankgo. Xla lichuwinan: «Xakpekuani tuku ni xaklakgapasa. Nitlan xakmakgkatsi xlakata nakmakgxtakga kifamilia, congregación, kinchikkan, tiku xakkalakgapasaw chu tuku xaklismaninitaw. Pero tuku tlakg xaklilakgaputsa wa kintapekua». Pero kkata 2012 Perrine makgatlajalh xtapekua chu ankgolh latamakgo alakatanu. ¿Chu la makgkatsi la uku? Xla kgalhtinan: «Akxni klilakpuwan tuku ktitaxtunitaw, tlan klichuwinan pi kintakanajla tatliwakglhinit xlakata k’akxilhnitaw la kinkamakgtayanitan Jehová kkilatamatkan». Chu Louis na lichuwinan: «Kgalhakaw tiku klimakgalhtawakgaw Biblia kilakgolh akxni pulana tatlawalh akxni  lakapastakkan akxni tinilh Cristo anta kMadagascar. ¡Kalilakpuwanti!».

¿Tuku kamakgtayalh xlakata ni namakgxtakgkgo la kskujnanimakgolh Jehová akxni tuwa tuku titaxtukgolh? Tlawanikgolh oración Jehová chu tasaskinikgolh pi xkamaxkilh litliwakga xlakata natayanikgo (Filip. 4:13). Louis wan: «Kakxilhwi pi Jehová xkgalhti ki’oracioneskan chu xkinkamaxkiyan xtakaksni. Wa xlakata kaj watiya xaklilakpuwanaw la tlan xkinkakitaxtuniman akxni xaklichuwinaw xtachuwin Dios. Nachuna, ki’amigoskan xalak Francia kinkamalakgachanikgon correos chu cartas xlakata nakinkamakgpuwantinikgoyan» (Filip. 4:6, 7; 2 Cor. 4:7).

Jehová kasikulunatlawalh Louis chu Perrine xlakata tayanikgolh. Louis lichuwinan: «Octubre kata 2014 kkilaw k’Escuela niku kamasiyanikan xalak Biblia tiku Tamakgaxtokgnit kFrancia. * Akgtum tamaskiwin kinkamaxkin Jehová xlakata kkilaw k’uma escuela nema ankgalhin naklakapastakaw». Lu paxuwakgolh pi akxni sputli escuela kamalakgachaparaka kMadagascar.

Didier chu Nadine, akgtum tamakgaxtokgat xalak Francia, xkgalhikgo liwaka 50 kata akxni ankgolh latamakgo kMadagascar kkata 2010. Didier wan: «Akxni kajku kamanan xakwanitaw precursores xaklitaxtuyaw, chu alistalh kkgalhiw kgalhtutu kamanan. Akxni stakkgolh, klakpuwaw pi tlan xakaw lakskujaw alakatanu país». Nadine wan: «Xaklilakgaputsa pi makgat xakama katawilani kinkamanan, pero xlakan kinkawanikgon: “Komo napinatit alakatanu país xlakata nalichuwinanatit Dios, ¡lu naklipaxuwayaw mimpalakatakan!”. Lu kinkamakgpuwantinikgon xtachuwinkan. Maski makgat niku klamaw, pero lu kpaxuwayaw akxni kkatachuwinanaw».

Didier chu Nadine tuwa makgkatsikgolh nakatsinikgo tachuwin malgache. Nadine wan «nialh kgalhiyaw akgpuxam kata». ¿Tuku tlawakgolh xlakata xmatlanikgolh? Pulana ankgolh kʼakgtum congregación niku xchuwinankan frances. Alistalh, akxni katsikgolh tachuwin nema xchuwinankan, ankgolh kcongregación tachuwin xla malgache. Nadine wan: «Akxni xaklichuwinanaw Dios xakkatekgsaw lhuwa latamanin tiku lakgatikgo likgalhtawakgakgo Biblia chu lu kinkapaxtikatsinikgoyan xlakata kkalakgapaxialhnanaw. Xapulana xaklakpuwan pi kaj xakmanixnima. Lu klipaxuwa xlakata kskujma la precursora kʼuma kachikin. Akxni ktaki tsisa, klakpuwan: “¡Lu tlan, uku nakan lichuwinan Dios!”».

Didier lilitsin akxni lakapastaka akxni tsukulh katsini tachuwin malgache. Xla wan: «Akgtum kilhtamaku xakmatitaxtima taʼakgchuwin chu ni xakʼakgatekgsa xtakgalhtinkan natalan. Kaj watiya xakkapaxtikatsini. Akxni chatum tala mastalh xtakgalhtin chu kpaxtikatsinilh, tiku xwilakgolh kxchakgen tala tsukukgolh kilakawanikgo. Xkiwaniputunkgo pi takgalhtin nema mastaka nitlan. Alistalh tunkun kmaxkilh talakaskin  atanu tala pi xmastalh xtakgalhtin chu xla tlan kgalhtinalh. Chuna klakpuwan».

Klanka tamakxtumit kkata 2005, Thierry chu xpuskat, Nadia, akxilhkgolh drama Vayamos tras metas que honran a Dios, xlichuwinan xlatamat Timoteo. Kalakgchanilh kxnakujkan chu lakpuwankgolh pi naʼankgo niku tlakg xtalakaskilh tamakgtay. Thierry wan: «Akxni sputli drama kwanilh kimpuskat: “¿Niku naʼanaw akinin?”. Chu xla kiwanilh pi nachuna xlakpuwama». Ni makgas kilhtamaku makgatsikgolh tuku xtaskin xlakata xʼankgolh. Nadia wan: «Tsinu tsinu kmasputuw tuku xakkgalhiyaw. ¡Alistalh, kaj watiya xtajukgo kʼakgtati maletas tuku xakkgalhiyaw!».

Chankgolh kMadagascar kkata 2006 chu lata xapulana lipaxuwakgolh la lichuwinankgolh Dios. Nadia wan: «Latamanin xala unu lu kinkamakgapaxuwakgoyan».

Pero titaxtulh akgchaxan papaʼ makglhtinankgolh nitlan tamakatsinin. Xtse Nadia, wanikan Marie-Madeleine, tiku wi kFrancia, tamakgwasli, takwakalh chu tapakgatlakgelh. Akxni tachuwinankgolh makuchina, Thierry chu Nadia kgalhskinkgolh Marie-Madeleine komo na xʼamputun kMadagascar. Maski xkgalhiya 80 kata, xatapaxuwan makglhtinalh invitación. ¿La akxilha latamat k’alakatanu país? Wan: «Lu tuwa kmakgkatsi wi tuku naklismani, pero maski wi tuku nila ktlawa, kmakgkatsi pi wi tuku klimakgtayanan kcongregación. Chu lu kimakgapaxuwa pi kintsumat chu xchixku lichuwinankgo Dios niku tlakg talakaskin».

Riana chatum tala kgawasa tiku tsinu liwaka akgpuxam kata kgalhi. Makgastakka kʼAlaotra Mangoro, kʼakgtum kachikin niku lhuwa tuku anan, kx’este Madagascar. Komo lu xkatsini kʼescuela, xkgalhiputun akgtum tlan takgalhtawakga. Pero akxni likgalhtawakgalh Biblia, lakgpalilh tuku xlakpuwan. Xla wan: «Klakkaxwililh pi lakapala xakama masputu preparatoria chu kmalaknunilh Jehová: “Komo tlan nataxtuyacha kiʼexamen, precursor naklitaxtu”». Akxni Riana masputulh xtakgalhtawakga, makgantaxtilh tuku xmalaknunit. Alh tawila niku xwi chatum precursor, chu putsalh taskujut nema xmaxkilh talakaskin precursor litaxtulh. Xla wan: «Wa uma tuku lu tlan klaksakli kkilatamat».

Xfamilia ni xʼakgatekgskgo tuku xlakata nialh xkgalhtawakgaputun. Xla wan: «Kintlat, kinkuku chu kinapa xlakaskinkgo pi xakalh kʼuniversidad. Pero akit xaklakpuwanit pi precursor xakama litaxtu». ¿Tuku makgtayalh? Xla wan: «Kgalhananin tanukgolh kkinchik. Uma kimalakpuwanilh tastakyaw nema mastalh Jesús xlakata makikan tuku lhuwa “xtapalh kʼakgapun”. Wa xlakata kliskujli nakkgalhi tuku lhuwa xtapalh kʼakgapun» (Mat. 6:19, 20). Riana alh latama kʼalakatanu kachikin, niku lamakgolh Antandroy. Uma kachikin 1,300 kilómetros wi xlilakgamakgat niku pulana xlama. ¿Tuku xlakata alh latama niku makgat?

Xtitaxtunit akgtum papaʼ la xmakgkgalhanankanit, Riana tsukulh kamakgalhtawakge chatiy lakchixkuwin xalak tribu Antandroy. Wi tuku katsinilh kxtachuwinkan chu lilakpuwa putum umakgolh latamanin tiku nina xkalitachuwinankan tamakatsinin xla Tamapakgsin. Xla lichuwinan: «Kskinilh Jehová pi xkimakgtayalh xlakata tlan nakan latama niku chuwinankan tandroy».

Akxni anta alh latama, nila xtekgsa taskujut. Chatum chixku wanilh: «¿Tuku xlakata tanita? Latamanin xala unu ankgo niku wix xlapat xlakata natekgskgo taskujut». Titaxtulh akgtiy semana, Riana alh klanka tamakxtumit. Xlakata nialh xkgalhi tumin, xkgalhskinkan tuku xʼama tlawa. Xaʼawatiya kilhtamaku klanka tamakxtumit, chatum tala tantimujulh tumin xlakata tlan xtaspitli kkachikin xla Antandroy chu xmatsukilh taskujut xlakata kstalh yogur. Lichuwinan: «Jehová kimakgtayalh akxni xaklakaskima. Chu tlan xakkamakgtayalh putum latamanin tiku ni xkgalhikgonit talakaskin nalakgapaskgo». Nachuna lhuwa tuku xlitatlawat xwanit kcongregación. Xla wan: «Xkiwanikan pi xakmatitaxtilh taʼakgchuwin  akgatiyun semana. Jehová xlimaklakaskima xkachikin xlakata tlakg tlan nakskujnani». La uku, chuntiya kamasiyanima tuku xaxlikana tiku chuwinankgo tandroy chu katsiniputunkgo xla Jehová.

Jehová malaknu pi nakasikulunatlawa tiku lu liskujkgo xlakata namakglhtinankgo xtasikulunalin (Is. 65:16). Xlikana, akxni liskujaw xlakata nitu nalilakgaputsayaw la naskujnaniyaw Jehová, namakglhtinanaw tasikulunalin. Akgtum liʼakxilhtit, Sylviana, tiku pulana lichuwinaw kʼuma artículo, xlakpuwan pi nila xʼama lakskujnani Jehová alakatanu país. ¿Tuku xlakata chuna xlakpuwan? Xla lichuwinan: «Kgantum kintantun tlakg aktsu wa xlakata nila liwana ktlawan chu lakapala ktlakgwan».

Maski chuna, kkata 2014 Sylviana taʼalh Sylvie Ann, atanu precursora xalak xcongregación, kʼakgtum aktsu kachikin nema 85 kilómetros xwi niku kxkachikin. Maski wi tuku xlilakgaputsa, Sylviana tlawalh tuku xtlawaputun. Chu makglhtinalh akgtum tlan tasikulunalin. «Akxni kajku akgtum kata la xakanit, Doratine chatum tse tiku klimakgalhtawakgelh Biblia, tamunulh kʼakgtum lanka tamakxtumit xla circuito».

Tuku lichuwinankgo uma natalan kinkamasiyaniyan pi komo naliskujaw xlakata natayaniyaw tuku lilakgaputsayaw xlakata tlakg naskujnaniyaw Jehová, naʼakxilhaw pi xlikana tuku wan umakgolh tachuwin: «Xlikana akit nakmatliwakglhan. Lu xlikana akit nakmakgtayayan» (Is. 41:10). Uma natlawa pi chuna la talalinaw Jehová natatliwakglha. Nachuna, komo xatapaxuwan namakgtayananaw kʼalakatanu país o kkimpaískan, nakinkamakgtayayan tlan natlawayaw taskujut kxasasti kakilhtamaku. Chuna la wan Didier, «namakgtayanana niku tlakg talakaskin namakgtayayan kkilhtamaku nema aku mima». Kgalhkgalhiyaw pi lhuwa natalan na xatapaxuwan namakgtayanankgo chu wi tuku nakatsinikgo natlawakgo kkilhtamaku nema aku mima.