1. ¿Tuku xmakgkatsi David xpalakata Jehová chu tuku tlawalh?

MAPAKGSINA DAVID tsokgli: «Kintikukan Dios snun lanka, y minini wakg kilhtamaku likuanit natlinikan y namalankikan» (Sal. 145:3, SXP). Xla xpaxki Jehová chu uma tapaxkit tlawalh pi namalanki «nak ixlakatinkan wakg tachixkuwit» (Sal. 22:22; 40:5, SXP). Xlikana pi akinin na paxkiyaw Jehová chu nachuna lakpuwanaw la David: «Xasanto wix o Jehová xDios Israel kintlatkan, putum kilhtamaku» (1 Crón. 29:10-13).

2. 1) ¿Tuku pulaktum tlan nalimalankiyaw Jehová? 2) ¿Tuku kaʼakgspula makgapitsi natalan, chu tuku naʼakxilhaw?

² Pulaktum la tlan namalankiyaw Jehová la uku, wa namastayaw kintakgalhtinkan ktamakxtumit. Pero lhuwa natalan tuwa makgkatsikgo chuna natlawakgo. Maski mastaputunkgo xtakgalhtinkan, nila tlawakgo. ¿La natlawakgo xlakata ni napekuankgo? ¿Tuku nakinkamakgtayayan xlakata kintakgalhtinkan tlan nakamakgpuwantini amakgapitsin? Xlakata namastayaw xtakgalhtin umakgolh takgalhskinin, kaʼakxilhwi pulaktati tuku xlakata mastayaw kintakgalhtinkan anta ktamakxtumit.

3-5. 1) Chuna la lichuwinan Hebreos 13:15, ¿tuku xlakata mastayaw kintakgalhtinkan ktamakxtumit? 2) ¿Tuku xlakata katsiyaw pi Jehová ni kinkaskiniyan pi nachuna namastayaw kintakgalhtinkan chuna la amakgapitsin?

³ Jehová kinkamaxkinitan talakgalhaman pi putum akinin tlan namalankiyaw (Sal. 119:108). Takgalhtin nema mastayaw makgtanuma paxtikatsinit nema maxkiyaw Dios chu niti la tlawa kimpalakatakan (kalikgalhtawakga Hebreos 13: 15). ¿Kinkawaniyan Jehová pi chuna la mastakgo xtakgalhtinkan amakgapitsin nachuna natlawayaw? Ni chuna.

⁴ Jehová katsi pi kinchatunukan wi tuku nila tlawayaw chu wi tuku tlan tlawayaw chu lanka xtapalh liʼakxilha taskujut nema tlawayaw. Kalilakpuwaw tamakamastan nema xtlawakgo israelitas. Tiku xkgalhikgo tumin tlan xmastakgo tantum borrego o tantum cabra. Tiku lakglimaxkgenin tlan xmastakgo «tantiy tórtolas o tantiy pichones». Chu komo wi tiku nila xmasta umakgolh animales, Jehová xmakgamakglhtinan «tsinu harina» (Lev. 5:7, 11). Maski harina ni lu tapalaxla xwanit, Dios lanka xtapalh xliʼakxilha komo ni kaj katuwa harina, wata «xasmatanka harina», nema tlakg xatlan.

⁵ Dios chuntiyaku lakpuwan la uku. Akxni mastayaw kintakgalhtinkan anta ktamakxtumit, ni kinkaskiniyan pi nachuna nachuwinanaw la xtlawa Apolos o apóstol Pablo (Hech. 18:24; 26:28). Kajwatiya kinkaskiniyan tuku matlaniyaw. Kalakapastakwi puskat tiku xninita xchixku mastalh okgxtiy laktsu tumin. Jehová tlan akxilhli xlakata mastalh putum tuku xkgalhi (Luc. 21:1-4).

6. 1) Chuna la wan Hebreos 10:24, 25, ¿la kinkamakgtayayan takgalhtin nema mastakan ktamakxtumit? 2) ¿La nalimasiyaya pi lanka xtapalh akxilha xtakgalhtinkan natalan?

⁶ Akxni mastayaw kintakgalhtinkan lamakgpuwantiniyaw chatunu chatunu (kalikgalhtawakga Hebreos 10:24, 25). Kimputumkan lakgatiyaw kgaxmataw tipalhuwa takgalhtin ktamakxtumit. Akgtum liʼakxilhtit, lakgatiyaw kgaxmataw nixatuwa xtakgalhtinkan laktsu kamanan. Lu lipaxuwayaw kgaxmataw akxni chatum tala lichuwinan tuku aku akgatekgsli. Chu kaks lilakawanaw akxni mastakgo xtakgalhtinkan tiku maxanankgo o aku katsinimakgolh kintachuwinkan (1 Tes. 2:2). ¿La nakalimasiyaniyaw pi lanka xtapalh akxilhaw xtaskujutkan? Pulaktum tlan nakapaxtikatsiniyaw akxni sputa tamakxtumit chu nakawaniyaw pi xtakgalhtinkan lu kinkamakgpuwantinin. Atanu la natlawayaw wa pi akinin na tlan namastayaw kintakgalhtinkan. Chuna ni kajwatiya katimakglhtinaw taʼakgpuwantin, wata nachuna nakamakgpuwantiniyaw amakgapitsin (Rom. 1:11, 12).

7. ¿La kinkamakgtayayan namastayaw kintakgalhtinkan?

⁷ Akxni mastayaw kintakgalhtinkan  kinkamakgtayayan (Is. 48:17). ¿La kinkamakgtayayan? Pulana, komo naliskujaw pi natamakayawayaw xlakata namastayaw kintakgalhtinkan, nalakkaxwiliyaw tuku nataʼakxilha ktamakxtumit, tlakg naʼakgatekgsaw xTachuwin Dios chu tlakg naliskujaw natlawayaw tuku nakatsiniyaw. Xlipulaktiy, tlakg nalipaxuwayaw tamakxtumit, xlakata tlakg nakuentajtlawayaw. Chu xlipulaktutu, xlakata tlakg liskujnitaw kintakgalhtinkan tuku nalichuwinanaw tlakg tlan natamakgxtakga kkintalakapastaknikan.

8, 9. 1) Chuna la wan Malaquías 3:16, ¿la lakpuwana wix pi akxilha Jehová litliwakga nema tlawayaw akxni mastayaw kintakgalhtinkan? 2) Maski chuna, ¿la makgkatsikgo amakgapitsin?

⁸ Jehová lakgati pi kalichuwinaw kintakanajlakan. Liwana kakatsiw pi Jehová kinkakgaxmatniyan chu lhuwa xtapalh akxilha litliwakga nema tlawayaw xlakata mastayaw kintakgalhtinkan ktamakxtumit (kalikgalhtawakga Malaquías 3:16). Nachuna, limasiya uma tapaxkit akxni kinkasikulunatlawayan (Mal. 3:10).

⁹ Xlikana pi lhuwa tuku tlan nalimastayaw kintakgalhtinkan. Maski chuna, max makgapitsi chuntiya pekuankgo akxni tamakayawakgo. Komo chuna titaxtupat, ni kataxlajwani. Naʼakxilhaw makgapitsi tastakyaw chu liʼakxilhtit xalak Biblia chu atanu tuku tlan nakinkamakgtayayan xlakata tlan namastayaw kintakgalhtinkan ktamakxtumit.

10. 1) ¿La makgkatsiyaw makgapitsi akinin? 2) ¿Tuku xlakata tlan nawanaw pi akxni pekuanaw limasiyayaw pi taktujuyaw?

¹⁰ ¿Lu lhpipiya akxni lakpuwana pi natamakayawaya ktamakxtumit? Komo chuna, ni kaj mi akstu chuna akgspulayan. Max kimputumkan chuna makgkatsiyaw akxni mastaputunaw kintakgalhtinkan. Komo uma tlawa pi nila namastaya mintakgalhtin, tlan nalakputsananiya tuku xlakata chuna makgkatsiya. ¿Wa xlakata max nialh nakatsiya tuku nawana? ¿Lilakgaputsaya xlakata mintakgalhtin nixtachuna katikitaxtulh  la xla amakgapitsin? Xlikana, uma tuku makgkatsiya limasiya pi taktujuya chu katsiya pi amakgapitsi tlakg xlakaskinka litaxtukgo nixawa wix. Jehová lu lakgati tiku taktuju (Sal. 138:6; Filip. 2:3). Pero nachuna xla lakaskin pi namalankiya chu nakamakgpuwantiniya natalan anta ktamakxtumit (1 Tes. 5:11). Xla paxkiyan chu namakgtayayan xlakata ni napekuana.

11. ¿Tuku tastakyaw xalak Biblia tlan nakinkamakgtayayan?

¹¹ Kaʼakxilhwi makgapitsi tastakyaw xalak Biblia. Anta kxTachuwin Dios kinkamalakapastakayan pi kimputumkan akgtsankgatayayaw akxni chuwinanaw (Sant. 3:2). Jehová chu natalan ni kinkaskinikgoyan pi putum tlan tuku natlawayaw (Sal. 103:12-14). Kifamiliajkan litaxtukgo chu kinkapaxkikgoyan (Mar. 10:29, 30; Juan 13:35). Kinkaʼakgatekgsnikgoyan pi lakgachunin ni chuna chuwinanaw la lakaskinaw.

12, 13. ¿Tuku kinkamasiyaniyan xliʼakxilhtitkan Nehemías chu Jonás?

¹² Kaʼakxilhwi makgapitsi liʼakxilhtit xalak Biblia nema nakinkamakgtayayan nialh napekuanaw. Pulana, wa xla Nehemías, tiku kskujma xchik chatum tliwakga mapakgsina. Akxni katsilh pi xpatsaps chu xmalakcha Jerusalén xlaklanit lu lilipuwa (Neh. 1:1-4). Tlan nalilakpuwanaw tuku makgkatsilh akxni mapakgsina kgalhskilh tuku xlakata xlilipuwama. Akxni nina xkgalhtinan, Nehemías lakapala tlawalh akgtum oración. Xlakata chuna tlawalh, mapakgsina lhuwa makgtayanalh kxkachikin Dios (Neh. 2:1-8). Xliʼakxilhtit Nehemías kinkamasiyaniyan pi lu xlakaskinka natlawayaw oración akxni nina mastayaw akgtum takgalhtin. Na kalilakpuwaw xliʼakxilhtit Jonás. Akxni Jehová wanilh pi xkalakgalh latamanin xalak Nínive, lu pekualh asta tsalalh (Jon. 1:1-3). Pero komo makgtayalh Dios makgantaxtilh xtaskujut chu xtachuwin kamakgtayalh uma kachikin (Jon. 3:5-10). Xliʼakxilhtit Jonás kinkamasiyaniyan pi Jehová tlan nakinkamakgtayayan xlakata naskujnaniyaw maski lu pekuanaw. Komo nalilakpuwanaw kinatalankan ni lu kinkamakgapekuankgoyan chuna la ninivitas, ¿nixlikana?

¹³ ¿Tuku nakinkamakgtayayan namastayaw kintakgalhtinkan nema nakamakgpuwantini natalan? Kaʼakxilhwi makgapitsi.

14. 1) ¿Tuku xlakata tlan nalakkaxwiliyaw tuku nataʼakxilha ktamakxtumit? 2) ¿Tukuya kilhtamaku tlan nalakkaxwiliyaw?

¹⁴ Putum kalakkaxwiliw tuku nataʼakxilha ktamakxtumit. Tlakg tlan namastayaw kintakgalhtinkan komo nalimaxtuyaw kilhtamaku nalakkaxwiliyaw (Prov. 21:5). Xlikana, ni putum tlan chuna tlawakan. Eloise, chatum tala tiku ninita xchixku kgalhi 80 kata, akxni kajku tsukuma semana tsuku lakkaxwili Makatsinina. Wan: «Lu klipaxuwa tamakxtumit komo alisokg naklakkaxwili tuku nataʼakxilha». Chatum tala wanikan Joy, tiku xliputum kilhtamaku skuja likgalhtawakga Makatsinina akxni akgtum kilhtamaku tsankga naʼan ktamakxtumit  xlakata wan pi chuna tlan lakapastaka. Ike, tiku kgolotsin litaxtu chu precursor, lichuwinan: «Kakxilhnit pi tlakg tlan kinkitaxtuni akxni tsinu tsinu klikgalhtawakga, nixawa putum naklikgalhtawakga».

15. ¿La liwana nalakkaxwiliyaw tuku nataʼakxilha ktamakxtumit?

¹⁵ ¿La lakkaxwiliyaw tuku nataʼakxilha ktamakxtumit? Pulana, tuku tlan natlawayaw wa pi naskiniyaw Jehová xʼespíritu santo (Luc. 11:13; 1 Juan 5:14). Alistalh, kalimaxtuw tsinu kilhtamaku xlakata naʼakxilhaw tuku natalichuwinan. Kaʼakxilhwi título, subtítulos, xadibujos chu recuadros. Chu alistalh, kaʼakxilhwi párrafos komo matlaniyaw kalikgalhtawakgaw putum textos nema limin. Kalilakpuwaw tuku limin, chu kaʼakxilhwi niku max tlan namastayaw kintakgalhtinkan. Komo tlakg tlan nalakkaxwiliyaw kintakgalhtinkan, tlakg nalitamakgtayayaw chu tlakg ni tuwa namastayaw kintakgalhtinkan (2 Cor. 9:6).

16. ¿Tuku liskujni kgalhiya, chu la limaklakaskina?

¹⁶ Kamaklakaskiw liskujni nema kgalhiyaw. Jehová mastanit lhuwa liskujni kxkachikin xlakata tlan nalakkaxwiliyaw kintakgalhtinkan. Aplicación JW Library^® kinkamakgtayayan namaktiyaw likgalhtawakga nema maklakaskinaw kkintelefonojkan o ktableta. Chuna, tlan nalikgalhtawakgayaw o nakgaxmataw akxni matlaniyaw. Wi tiku maklakaskinkgo uma aplicación xlakata nakgalhtawakga akxni jaxma kxtaskujut, kʼescuela o akxni wi niku ama. Nachuna, xlakata kgalhiyaw Watchtower Library chu sitio BIBLIOTECA EN LÍNEA Watchtower^™, uma na nakinkamakgtayayan tlakg ni tuwa nakgalhtawakgayaw.

17. 1) ¿Tuku xlakata tlan kitaxtu ni kaj akgtum nalakkaxwiliyaw kintakgalhtinkan? 2) ¿Tuku katsini kvideo Xʼamigo Jehová kawanti: Liwana kalakkaxwili mintakgalhtin?

¹⁷ Komo matlaniyaw, pulaklhuwa kalakkaxwiliw kintakgalhtinkan. ¿Tuku xlakata? Xlakata max ni putum katikgalhtinaw akxni natamakayawayaw. Max wi tiku achatum natamakayaway chu tiku matitaxtima Makatsinina wa namaxki. Nachuna, max ni paks katikamaxkilh talakaskin namastakgo xtakgalhtinkan xlakata ni lhuwa kilhtamaku kgalhi. Wa xlakata ni nalisitsiyaw chu ni nataxlajwaniyaw komo ni namastayaw kintakgalhtinkan kxapulana párrafos. Akxni akglhuwa lakkaxwiliyaw kintakgalhtinkan kinkamaxkiyan talakaskin tlakg nakgalhtinanaw. Tuku tlan natlawayaw wa pi nalikgalhtawakgayaw texto nema limin Makatsinina. Pero komo matlaniyaw, kalakkaxwiliw kintakgalhtinkan kkintachuwinkan. *

18. ¿Tuku xlakata ni lhuwa tuku wanaw akxni namastayaw kintakgalhtinkan?

¹⁸ Ni lhuwa tuku nawana akxni namastaya mintakgalhtin. Akxni ni lhuwa tuku nawana  akxni namastaya mintakgalhtin tlakg makgpuwantininan. Wa xlakata kaliskujti kaj 30 segundos nalimastaya mintakgalhtin (Prov. 10:19; 15:23). Lu xlakaskinka pi tiku lhuwa kata linkgoya ktamakxtumit nawilikgo tlan liʼakxilhtit xlakata uma. Komo wi tiku namasta akgtum takgalhtin nema lu tuwa chu lhuwa chuwinan, max amakgapitsin nialh katitamakayawakgolh xlakata nalakpuwankgo pi nila chuna katikgalhtinankgolh. Komo kintakgalhtinkan ni lhuwa, amakgapitsi natalan na tlan namastakgo xtakgalhtinkan. Komo nakinkamaxkikanan talakaskin nakgalhtinanaw kxapulana párrafo, lu xlakaskinka pi kaj xman wa nakgalhtinanaw tuku kgalhskininamaka chu ni nawanaw putum tuku wi kpárrafo. Akxni lichuwinankanita tuku tlakg xlakaskinka, tlan nalichuwinanaw atanu tuku limin kpárrafo (kaʼakxilhti recuadro « ¿Tuku atanu tlan naklichuwinan akxni nakmasta kintakgalhtin?»).

19. ¿La nakinkamakgtayayan tiku matitaxtima Makatsinina, chu tuku kilitlawatkan akinin?

¹⁹ Kawaniw tiku matitaxtima Makatsinina pi laksaknitawa niku namastayaw kintakgalhtinkan. Komo chuna tlawaputunaw, katachuwinaw tala akxni nina tsuku tamakxtumit. Akxni nalakgchan párrafo niku laksaknitaw, lakapala katamakayawaw xlakata na kinkaʼakxilhan.

20. ¿La tatalakxtumi tamakxtumit chu liwat nema katawayaw kiʼamigoskan?

²⁰ Tamakxtumit nema tlawakan kcongregación tatalakxtumi la akgtum liwat nema katawayaw kiʼamigoskan. Komo makgapitsi natalan kinkawanikgoyan pi naʼanaw katawayanaw chu kinkawanikgoyan pi wi tuku nalinaw, ¿tuku natlawayaw? Max namaxananaw tsinu, pero max nalinaw maski kaj aktsu tuku nalakgatikgo natalan. Anta ktamakxtumit, tiku pulalinan wa Jehová, xla lakkaxwilinit akgtum mesa niku lhuwa tuku anan (Sal. 23:5; Mat. 24:45). Xla lakgati pi wi tuku namastayaw, maski kaj aktsu pero xatapaxuwan. Wa xlakata, liwana kalakkaxwiliw chu kamastaw kintakgalhtinkan. Chuna, ni kajwatiya akinin nalitamakgtayayaw nachuna nakamakgtayayaw amakgapitsin chuna natlawakgo.