1, 2. 1) ¿Tuku xlakata xlakaskinka pi Jesús xkinkamasiyanin la nalakapastakaw xlinin chu ni tuwa la natlawayaw? 2) ¿Tuku xtayat Jesús nalichuwinanaw?

¿TLAN nalichuwinana tuku tlawayaw akgatunu kata akxni lakapastakkan akxni tinilh Cristo? Xlikana pi chuna, xlakata uma tamakxtumit ni tuwa. Max wi tiku nakgalhskinkan: «¿Tuku xlakata ni tuwa, uma akgtum xlakaskinka tamakxtumit?».

² Akxni Jesús latamalh unu kKatiyatni, ankgalhin masiyalh tuku xaxlikana nema lu xlakaskinka, ni tuwa la tlawalh chu lakapala xtaʼakgatekgsa (Mat. 7:28, 29). Nachuna, kinkamasiyanin la nalakapastakaw xlinin, * lantla ni tuwa natlawayaw pero lu xlakaskinka. Liwana kalakputsananiw uma tamakxtumit, chu tuku tlawalh Jesús chu tuku wa. Uma nakinkamakgtayayan tlakg liwana naʼakgatekgsaw xtataktujut, ni xpekuan chu xtapaxkit. Nachuna naʼakxilhaw tuku natlawayaw xlakata xtachuna nawanaw la Jesús.

3. Akxni likgalhtawakgayaw Mateo 26:26-28, ¿tuku xlakata wanaw pi taway nema lakkaxwililh Jesús ni tuwa xwanit chu tuku kilhchanima kaxtalanchu chu vino?

³ Jesús lakkaxwililh la nalakapastakkan akxni tinilh kxlakatinkan xʼapóstoles tiku ni xmakgxtakgkgo. Kʼuma tamakxtumit, kajwatiya maklakaskilh kaxtalanchu nema ni xkgalhi limaxkutin chu vino nema xʼakgataxtunit kpaskua (kalikgalhtawakga  Mateo 26:26-28). Kawanilh xʼapóstoles pi uma wa xkilhchanima xtiyatliwa nema ni xkgalhi talakgalhin chu xkgalhni nema alistalh xʼama stajmakgan. Apóstoles ni kaks lilakawankgolh pi taway lu ni tuwa xwanit. ¿Tuku xlakata?

4. ¿Tuku tastakyaw kinkamakgtayayan nema maxkika Marta xlakata ni tuwa la tlawakan akxni lakapastakkan la tinilh Cristo?

⁴ Kalakapastakwi tuku lalh makgapitsi papaʼ akxni nina xmakgnikan, xlimaja akgtutu kata la xmatsukinit xtaskujut Jesús. Akxni xkalakgapaxialhnama xʼamigos Lázaro, Marta chu María, tsukulh kamasiyani. Maski Marta anta xwi kxchik, ni kuenta tlawalh Jesús xlakata xlilakgaputsama liwat. Pero Jesús lakatsuku wanilh pi ni ankgalhin talakaskin natlawakan akgtum liwat nema lu xatlan (Luc. 10:40-42). Alistalh, akxni kaj nialh makgas xtsankga namakgnikan, nachuna tlawalh tuku xwaninit Marta. Tlawalh akgtum ni xatuwa liwat. ¿Tuku kinkamasiyaniyan uma xlakata Jesús?

5. ¿Tuku kinkamasiyaniyan xlakata Jesús pi ni tuwa la natlawayaw akxni lakapastakkan akxni tinilh, chu la tatalakxtumi Filipenses 2:5-8?

⁵ Putum tuku tlawalh chu lichuwinalh Jesús limasiyalh pi xtaktuju. Limasiyalh uma tayat katsisni akxni xʼamaka makgnikan (Mat. 11:29). Xkatsi pi kaj atsinu xtsankga natlawa akgtum lanka tamakamastan nema nikxni chuna lanit chu Jehová xʼama malakastakwani chu Mapakgsina xlimaxtulh kʼakgapun. Maski chuna, ni lakpuwa natlawa akgtum lanka paskua xlakata nalilakapastakkan akxni tinilh. Wata kawanilh kstalaninanin pi xlakapastakkgolh makgatunu akgatunu kata chu ni tuwa la xtlawakgolh (Juan 13:15; 1 Cor. 11:23-25). Chuna limasiyalh pi ni xtlankajwanan. Lu lipaxuwayaw pi tataktujut wa akgtum lu tlan tayat kgalhi kiMapakgsinakan xalak akgapun (kalikgalhtawakga Filipenses 2:5-8).

6. ¿La tlan nastalaniyaw xliʼakxilhtit Jesús xlakata tataktujut akxni titaxtuyaw tuku tuwa?

⁶ Pulaktum la tlan nastalaniyaw xliʼakxilhtit Jesús xlakata xtataktujut wa pulana nakalilakgaputsayaw amakgapitsin (Filip. 2:3, 4). Kalilakpuwaw tuku tlawalh xaʼawatiya katsisni akxni nina xniy. Maski xkatsi pi kaj atsinu xtsankga namakgnikan, tlakg lilakgaputsalh la xʼamakgolh makgkatsikgo kstalaninanin. Wa xlakata ama katsisni chuntiya kamasiyanilh, kamakgpuwantinilh chu kamakgoxamixilh (Juan 14:25-31).  Limasiyalh pi tlakg xkalilakgaputsa amakgapitsin nixawa tuku xla xʼakstu xlilakgaputsa. Lu tlan liʼakxilhtit wililh xlakata taktujukan.

7. ¿La limasiyalh Jesús pi ni xpekuan akxni lakkaxwililh taway xla kiMalanakan?

⁷ Akxni lakkaxwililh uma taway xla kiMalanakan, Jesús limasiyalh pi ni xpekuan. ¿La tlawalh? Liwana xlakpuwanit natlawa xtalakaskin Dios maski xkatsi pi xmamaxanika xlakata xlimawakaka tuku nitlan chu xmakgnika (Mat. 26:65, 66; Luc. 22:41, 42). Xla nikxni makgxtakgli Jehová chu malankilh xtukuwani, kgalhmakgtayalh xtamapakgsin chu tlawalh pi latamanin tiku namakgxtakgo xtalakgalhinkan nakgalhikgo latamat putum kilhtamaku. Nachuna, kamakgtayalh kstalaninanin xlakata tlan natayanikgo tuku nitlan xʼama titaxtukgo.

8. 1) ¿Tuku kawanilh Jesús xʼapóstoles tiku ni xmakgxtakgkgo? 2) Akxni xninita Jesús ¿la limasiyakgolh kstalaninanin pi kstalanimakgolh xliʼakxilhtit xlakata ni xpekuankgo?

⁸ Jesús nachuna limasiyalh pi ni xpekuan akxni tlakg lilakgaputsalh tuku xmaklakaskinkgo xʼapóstoles nixawa tuku xla xlilakgaputsa. Akxni wanilh Judas pi xtaxtulh, lakkaxwililh taway xla kimalanakan nema xkamalakapastakalh kstalaninanin tiku xatalaksakni chu la xʼama kamakgtaya xkgalhni Jesús nema xʼama stajmakgan chu xʼamakgolh tanukgo kxasasti talakkaxlan (1 Cor. 10:16, 17). Xlakata ni namakgxtakgkgo chu xtatawilakgolh Jesús kʼakgapun, kawanilh tuku xla chu xTlat xlakaskin xmakgantaxtikgolh (Juan 15:12-15). Nachuna kalitachuwinalh tuku taputsastalanit xʼamakgolh titaxtukgo. Alistalh kawanilh pi ni xpekuankgolh chuna la xla ni pekualh  (Juan 16:1-4a, 33). Akglhuwa kata alistalh, kstalaninanin chuntiya xtlawamakgo xliʼakxilhtit xlakata ni xpekuankgo chu xlakata liwana xlakpuwankgonit napatinankgo xlakata nakamakgtayakgo amakgapitsin (Heb. 10:33, 34).

9. ¿La tlan nastalaniyaw xliʼakxilhtit Jesús xlakata ni xpekuan?

⁹ La uku kilhtamaku, nachuna stalaniyaw xliʼakxilhtit Jesús xlakata ni xpekuan. ¿La tlawayaw? Akgtum liʼakxilhtit, kamakgtayayaw natalan tiku kaliputsastalanimaka xtakanajlakan. Lakgachunin makgapitsi katamaknukan kpulachin. Akxni chuna la, talakaskin lu nakamakgtayayaw chu nakakgalhmakgtayakgoyaw (Filip. 1:14; Heb. 13:19). Atanu la tlan nalimasiyayaw pi ni pekuanaw wa ankgalhin nalichuwinanaw Dios (Hech. 14:3). Chuna la Jesús, liwana lakpuwanitaw nalichuwinanaw xTamapakgsin maski natitaxtuyaw taputsastalanit. Wa xlakata, ¿tuku natlawayaw komo namin kilhtamaku namakgkatsiyaw pi taxlajwanimaw?

10. ¿Tuku natlawayaw akxni tsankga kilhtamaku akxni natalakapastaka akxni tinilh Cristo chu tuku xlakata?

¹⁰ Tuku nakinkamakgtayayan ni napekuanaw wa nalilakpuwanaw takgalhkgalhin nema kgalhiyaw xlakata xtamakamastan Jesús (Juan 3:16; Efes. 1:7). Akxni tlan nalilakpuwanaw pi limasiyayaw tapaxtikatsinit xlakata talakgmaxtut wa akxni tsankga makgapitsi semanas akxni natalakapastaka akxni tinilh Cristo. Ama kilhtamaku kalikgalhtawakgaw tuku lakgchan akxni lakapastakkan akxni tinilh Cristo chu liwana kalilakpuwaw tuku titaxtutilhalh xlakata makgnika. Akxni natamakxtumiyaw xlakata nalakapastakaw xTaway kiMalanakan, tlakg liwana naʼakgatekgsaw tuku kilhchanima kaxtalanchu chu vino chu xtamakamastan.  Akxni akgatekgsniyaw tuku Jesús chu Jehová tlawakgonit kimpalakatakan, tuku kinkalimakgtayayan akinin chu tiku kapaxkiyaw, kintakgalhkgalhinkan chuntiyaku tatliwakglhtilha chu nachuna tlakg ni katipekuaw asta akxni namin lisputni (Heb. 12:3).

11, 12. ¿Tuku akxilhnitaw asta uku?

¹¹ Asta uku akxilhnitaw pi xTaway kiMalanakan ni kajwatiya kinkamalakapastakayan xtapalh talakgmaxtut, wata nachuna xtataktujut chu xlakata ni xpekuan Jesús. Lu paxtikatsiniyaw pi chuntiya kgalhi uma tayat xlakata kinkakgalhmakgtayayan la komo xaPuxku Sacerdote kʼakgapun (Heb. 7:24, 25). Xlakata nalimasiyayaw pi paxtikatsiniyaw, talakaskin nakgalhakgaxmataw limapakgsin nema mastalh xlakata nalakapastakaw akxni tinilh (Luc. 22:19, 20). Ankgalhin lakapastakaw akgatunu kata akxni lakgchan 14 xla nisán, wa uma kilhtamaku tlakg xlakaskinka.

¹² Akxni lilakpuwanaw pi ni tuwa tlawakan Taway xla kiMalanakan, akxilhaw akgtum tayat nema tlawalh pi Jesús naniy kimpalakatakan. Uma tayat lu lilakgapaska akxni xlama kKatiyatni. Kaʼakxilhwi tuku tayat.

13. ¿La lichuwinan Juan 15:9 chu 1 Juan 4:8-10 xtapaxkit Jehová chu Jesús, chu tiku litamakgtayakgo xtapaxkit?

¹³ Putum tuku tlawalh, Jesús liwana limasiyalh tapaxkit nema makgkatsi Jehová kimpalakatakan (kalikgalhtawakga Juan 15:9 chu 1 Juan 4:8-10). Wa tapaxkit nema makgtayalh namasta xlatamat kimpalakatakan. Komo akinin xatalaksakni o «amakgapitsi borregos», kinkamakgtayayan tapaxkit nema Jehová chu xKgawasa limasiyakgolh akxni tamakamastalh (Juan 10:16; 1 Juan 2:2). Nachuna kaʼakxilhwi la limasiya xtapaxkit chu la xkaʼakgatekgsni Jesús kstalaninanin akxni tlawalh uma Taway xla kiMalanakan.

14. ¿La limasiyalh Jesús tapaxkit nema kakgalhini kstalaninanin?

¹⁴ Chuna la akxilhnitaw, Jesús ni kawanilh kstalaninanin pi xtlawakgolh akgtum lu xatuwa taway wata kaj ni tuwa tuku tlawakgolh. Chuna la titaxtutilhanit kilhtamaku, ankgalhin lakapastakkan xlinin akgatunu kata kaj xanikuta niku tatakgsaw, asta lakgachunin anta kpulachin (Rev. 2:10). ¿Kgalhakgaxmatkgonit xlimapakgsin Jesús? Chuna.

15, 16. ¿La tlawakgonit makgapitsi natalan xlakata natlawakgo xTaway kiMalanakan maski tuwa tatekgskgo?

¹⁵ Xaxlikana kstalaninanin Cristo ankgalhin liskujkgo nalakapastakkgo xlinin Jesús. Lu liskujkgo xlakata nastalanikgo xliʼakxilhtit Jesús, maski lakgachunin lu tuwa makgkatsikgo. Kaʼakxilhwi xliʼakxilhtit tala Harold King. Xlakata niti la xtachuwinan anta kpulachin xla China, liwana lilakpuwa la natlawa xlakata nalakapastaka akxni lakgchan xTaway kiMalanakan. Tsekg xtlawa tuku tsinu xkgalhi xlakata natlawa tuku xtamaklakaskin. Nachuna liwana xputlekge tuku kilhtamaku xlakgchan. Akxni xlakgchan ama kilhtamaku, maski kaj xʼakstu xtanuma kpulachin xkilhtli, xtlawa oración chu masta akgtum taʼakgchuwin.

¹⁶ Kaʼakxilhwi atanu liʼakxilhtit. Akxni xlama xliʼAkgtiy Guerra xLikalanka Katiyatni, makgapitsi natalan lakpuskatin tiku xtanumakgolh kcampo de concentración lakapastakkgolh xTaway kiMalanakan maski katuwa xwilimakgolh xlatamatkan. Lu tlan kitaxtulh uma tuku tsekg tlawakgolh xlakata ni tuwa la tlawakan. Lichuwinankgo: «Makxtum ktayaw niku xwi akgtum putawilh nema xlitatlapanit  xasnapapa lhakgat niku kwiliw kaxtalanchu chu vino. Xlakata ni nakinkaʼakxilhkanan kaj kgantum vela kmapasiw. [...] Kwaniw kinTlatkan xliputum kilitliwakgakan xlakata nakmasantuliyaw xtukuwani». ¡Lu tliwakga xkgalhikgo xtakanajlakan! Xlikana pi akxni lakapastakaw akxni tinilh Cristo maski katuwa tatakgsaw limasiyayaw tapaxkit nema kgalhiniyaw Jesús.

17. ¿Tuku talakaskin nakinkakgalhskinkanan?

¹⁷ Akxni talakatsuwi akxni tinilh Cristo, tlan nakinkakgalhskinkanan: «¿La tlakg tlan nakstalani xliʼakxilhtit Jesús? ¿Tlakg klilakgaputsa tuku maklakaskinkgo amakgapitsi natalan nixawa akit? ¿Klilakpuwan tuku tlan o nila tlawakgo?». Ankgalhin kastalaniw xliʼakxilhtit Jesús chu kalimasiyaw talakgalhaman (1 Ped. 3:8).

18, 19. 1) ¿Tuku liwana katsiyaw? 2) ¿Tuku naliskuja wix?

¹⁸ Kaj nialh makgas nialh katitalakaskilh nalakapastakaw akxni tinilh Cristo. Akxni Jesús «namimparay» akxni nala lanka takatsanajwat, nakalin kʼakgapun «xatalaksakni» tiku wilakgolhku nawan kKatiyatni. Akxni ama kilhtamaku nialh katitalakapastakli akxni tinilh Cristo (1 Cor. 11:26; Mat. 24:31).

¹⁹ Liwana katsiyaw pi akxni nialh katitatlawalh xTaway kiMalanakan, tapaxuwan nalakapastakaw uma nixatuwa taway xlakata limasiyaka akgtum xatlan liʼakxilhtit xlakata tataktujut, ni pekuankan chu tapaxkit nema ni chatum lataman limasiyanit. Xlikana, tiku max lakapastakkgolh uma taway nakalitachuwinankgo amakgapitsi tiku nalatamakgo ama kilhtamaku. Lu nakamakgtaya nakgaxmatkgo uma. Xlakata la uku nalitamakgtayayaw akxni tinilh Cristo, talakaskin naliskujaw xlakata nataktujuyaw, ni napekuanaw chu napaxkinanaw chuna la Jesús. Komo chuna natlawayaw liwana kakatsiw pi Jehová nakinkasikulunatlawayan (2 Ped. 1:10, 11).