1, 2. 1) ¿Tuku akxilha Jehová akxni lhuwa latamanin tamakxtumikgo xlakata tlawakan xTaway kiMalanakan? (Kaʼakxilhti xapulana dibujo). 2) ¿Tuku naʼakxilhaw kʼuma artículo?

¿TUKU akxilha Jehová akxni lhuwa latamanin tamakxtumikgo xlikalanka katiyatni xlakata tlawakgo xTaway kiMalanakan? Ni kajwatiya akxilha pi lhuwa wilakgoka; wata kuenta tlawa chatunu chatunu. Akgtum liʼakxilhtit, akxilha tiku ankgo akgatunu kata. Makgapitsi max ankgo maski kaputsastalanikan. Makgapitsi ni ankgo ktamakxtumit nema tatlawa akgatunu semana, pero xlakaskinka liʼakxilhkgo naʼankgo akxni lakapastakkan Cristo. Jehová nakakuentajtlawa tiku kajku xlimakgtum ankgo, maski kaj katsiputunkgo tuku tatlawa.

² Xlikana pi Jehová lu lhuwa xtapalh kaʼakxilha latamanin tiku ankgo akxni lakapastakkan Cristo (Luc. 22:19). Xlikana ni wa kuentajtlawa la xlilhuwa ankgo, wata akxilha tuku xlakata chuna tlawakgo. Kʼuma artículo, naʼakxilhaw tuku lu xlakaskinka: ¿Tuku xlakata ni kajwatiya anaw akxni tatlawa xTaway kiMalanakan, wata anaw kputum tamakxtumit nema tatlawa akgatunu semana? Kaʼakxilhwi tukuya tayat kinkamakgpuwantiniyan naʼanaw ktamakxtumit.

3, 4. 1) ¿Tuku xlakata anaw ktamakxtumit? 2) ¿Tukuya tayat limasiyayaw akxni anaw ktamakxtumit? 3) Chuna la wan 1 Corintios 11:23-26, ¿tuku xlakata ankgalhin naʼanaw akxni natalakapastaka akxni tinilh Cristo?

³ Anaw ktamakxtumit xlakata na makgtanuma ktakaknin nema maxkiyaw Jehová. Nachuna anaw xlakata Jehová kinkamasiyaniyan. Latamanin tiku tlankajwanankgo lakpuwankgo pi putum katsikgo chu ni talakaskin nakamasiyanikan (3 Juan 9).  Pero akinin lakaskinaw pi Jehová chu xkachikin kakinkamasiyanin (Is. 30:20; Juan 6:45).

⁴ Akxni anaw ktamakxtumit limasiyayaw pi taktujuyaw chu lakaskinaw pi Jehová nakinkamasiyaniyan. Ni kaj xafuerza anaw akxni lakapastakkan akxni tinilh Cristo, wata anaw xlakata taktujuyaw chu kgalhakgaxmatputunaw uma limapakgsin: «Ankgalhin natlawayatit yuma nakililakapastakatit» (kalikgalhtawakga 1 Corintios 11:23-26). Uma tamakxtumit matliwakglha kintakgalhkgalhinkan chu kinkamalakapastakayan la xlilhuwa kinkapaxkiyan Jehová. Pero xla katsi pi ni kaj xman wa lakaskinaw takgpuwantin akgatunu kata. Wa xlakata, kinkamaxkiyan tamakxtumit akgatunu semana chu kinkawaniyan pi kiliʼanatkan. Tataktujut kinkamakgpuwantiniyan nakgalhakgaxmataw. Lhuwa horas liskujaw xlakata nalakkaxwiliyaw chu naʼanaw ktamakxtumit.

5. ¿Tuku xlakata latamanin tiku tataktujukgo makgamakglhtinankgo invitación?

⁵ Akgatunu kata, lhuwa latamanin makglhtinankgo invitación nema Jehová kamaxki xlakata nalakgapaskgo (Is. 50:4). Pulana, ankgo akxni lakapastakkan Cristo chu alistalh ankgo kmakgapitsi tamakxtumit (Zac. 8:20-23). Tiku xalaksasti kstalaninanin Cristo chu akinin lakgatiyaw pi Dios nakinkapulalinan xlakata kinkamakgtayayan chu kinkalakgmaxtuyan (Sal. 40:17). Xlikana, ni tu tuku tlakg xlakaskinka chu tlakg tlan pi namakglhtinanaw invitación xlakata tamakxtumit nema Jehová chu Jesús tiku tlakg paxki kinkamaxkiyan xlakata nakinkamasiyaniyan (Mat. 17:5; 18:20; 28:20).

6. ¿La makgtayalh tataktujut chatum chixku xlakata xʼalh akxni lakapastakka Cristo?

⁶ Kata kata, kawaniyaw latamanin pi kaʼankgolh akxni talakapastaka Cristo. Lhuwa latamanin tiku taktujukgo litamakgtayakgonit akxni makglhtinankgo invitación. Kaʼakxilhwi akgtum liʼakxilhtit. Makgasata, chatum tala maxkilh akgtum invitación chatum chixku, pero xla wanilh pi ni xmatlani. Katsisni akxni lakapastakka Cristo, tala kaks lilakawa akxni tanucha kPukgalhtawakga. Chixku kaks lilakawa la makgamakglhtinanka chu tsukulh an kputum tamakxtumit. Kaj makgtutu tamakxtumit makgatsankgalh akgtum kata. ¿Tuku makgtayalh nalakgpali la xlakpuwan? Tala tiku maxkilh uma invitación lichuwinalh: «Lu taktuju uma lataman». Xlikana, wa Jehová tiku mastalh talakaskin pi uma chixku xtalakatsuwilh xlakata namakgtapakgsi kxkachikin. La uku, xtatayana Jehová litaxtu (2 Sam. 22:28; Juan 6:44).

7. ¿La kinkamakgtayayan nataktujuyaw tuku katsiniyaw ktamakxtumit chu tuku likgalhtawakgayaw kBiblia?

⁷ Tuku katsiniyaw ktamakxtumit chu tuku likgalhtawakgayaw kBiblia kinkamakgtayayan nataktujuyaw. Akxni tsankga makgapitsi semanas xlakata nalakapastakkan Cristo, ktamakxtumit litachuwinan xliʼakxilhtit Jesús chu xtataktujut nema limasiyalh akxni makamastalh xlatamat kimpalakatakan. Chu akxni atsinu tsankga kilhtamaku xlakata nalakapastakkan Cristo, kinkamakgpuwantinikanan nalikgalhtawakgayaw tuku titaxtulh Jesús akxni xʼamaja niy chu akxni lakastakwanalh. Putum uma tastakyaw tlawa pi napaxtikatsiniyaw xtamakamastan. Uma kinkamakgtayayan, nastalaniyaw xliʼakxilhtit xlakata xtataktujut chu natlawayaw xtalakaskin Dios, maski lakgachunin tuwa namakgkatsiyaw (Luc. 22:41, 42).

8. ¿La limasiyalh Jesús pi ni xpekuan?

⁸ Atanu xtayat Jesús nema tlan nastalaniyaw wa ni napekuanaw. Kalilakapastakwi la limasiyalh uma tayat akxni atsinu xtsankga  namakgnikan. Liwana xkatsi pi nialh makgas xtalatlawananin xʼamakgolh mamaxanikgo, xʼamakgolh makgsnokgkgo chu xʼamakgolh makgnikgo (Mat. 20:17-19). Maski chuna, liwana xlakpuwanit pi xʼama niy. Akxni chilh uma kilhtamaku kawanilh xʼapóstoles tiku xtawilakgolh kjardín xla Getsemaní: «Katakaxtakitit; kaw. ¡Kaʼukxilhtit! Chinit wanti kimakamastanit» (Mat. 26:36, 46). Chu akxni lhuwa latamanin ankgolh chipakgo kxlakatinkan tayalh chu wa pi wa tiku xputsamakgolh chu kawanilh soldados pi xmastakgolh talakaskin pi xʼapóstoles xʼankgolh (Juan 18:3-8). ¿Ni xlikana pi limasiyalh pi ni xpekuan? La uku, tiku xatalaksakni chu amakgapitsi borregos liskujaw xlakata nastalaniyaw xliʼakxilhtit xlakata ni napekuanaw. ¿La tlawayaw?

9. 1) ¿Tuku xlakata max natalakaskin ni napekuanaw xlakata ankgalhin naʼanaw ktamakxtumit? 2) ¿La kamakgtaya kiliʼakxilhtitkan natalan tiku tanumakgo kpulachin xlakata xtakanajlakan?

⁹ Max wi tuku natlawa pi tuwa namakgkatsiyaw naʼanaw ktamakxtumit. Komo chuna titaxtumaw, talakaskin ni napekuanaw. Makgapitsi natalan, tatatlakgo, lipuwankgo o taxlajwanikgo. Makgapitsi kaputsastalanikan kxfamiliajkan o mapakgsinanin. Kalilakpuwaw xlakata natalan tiku katamaknukanit kpulachin xlakata xtakanajlakan. ¿Xlilakpuwanitaw pi tlan nakamakgtaya kiliʼakxilhtitkan? (Heb. 13:3). Akxni katsikgo pi chuntiya skujnanimaw Jehová maski kgalhiyaw taʼakglhuwit, kamakgtaya namatliwakglhkgo xtakanajlakan chu ni napekuankgo. Chuna akgspulalh apóstol Pablo. Akxni xchilinkanit kRoma, xlipaxuwa akxni xkgaxmata pi xnatalan chuntiya kskujnanimakgolh Dios chu ni xmakgxtakgkgo (Filip. 1:3-5, 12-14). Akxni atsinu xtsankga natamakxtukan kpulachin o akxni tamakxtuka, tsokgli carta xla Hebreos. Anta katsokgnanilh natalan pi chuntiya xtamakxtumikgolh chu kawanilh: «Chuntiya kalapaxkitit minchatunukan la linatalan» (Heb. 10:24, 25; 13:1).

10, 11. 1) ¿Tiku tlan nakawaniyaw pi kaʼankgolh akxni natalakapastaka akxni tinilh Cristo? 2) ¿Tuku kinkawaniyan Efesios 1:7 pi chuna natlawayaw?

¹⁰ Nachuna limasiyayaw pi ni pekuanaw akxni kawaniyaw pi kaʼankgolh Akxni natalakapastaka akxni tinilh Cristo, kifamiliajkan, tiku kataskujaw chu kintalakatsukan. ¿Tuku xlakata chuna tlawayaw? Xlakata lu paxtikatsiniyaw tuku tlawakgonit Jehová chu Jesús kimpalakatakan. Nachuna, lakaskinaw pi umakgolh latamanin nakatsikgo la nalitamakgtayakgo «xtalakgalhaman Dios nema ni kinkamininiyan» xlakata talakgmaxtut (kalikgalhtawakga Efesios 1:7; Rev. 22:17).

¹¹ Akxni anaw ktamakxtumit, limasiyayaw atanu tayat. Jehová chu Jesús limasiyakgonit uma tayat.

12. 1) ¿Tuku xlakata tamakxtumit matliwakglha tapaxkit nema kgalhiniyaw Jehová chu Jesús? 2) ¿La tlan nastalaniyaw xliʼakxilhtit Jesús, chuna la wan 2 Corintios 5:14, 15?

¹² Tapaxkit nema kgalhiniyaw Jehová chu Jesús, kinkamakgpuwantiniyan naʼanaw ktamakxtumit  chu uma matliwakglha kintapaxkitkan. ¿Tuku xlakata? Xlakata anta ktamakxtumit, ankgalhin kinkawanikanan tuku tlawakgonit kimpalakatakan (Rom. 5:8). Akxni talakapastaka akxni tinilh Cristo kinkamalakapastakayan lanka xtapaxkit nema kgalhi kimpalakatakan, chu asta maski tiku ni lu lanka xtapalh akxilhkgo. Akinin lu paxtikatsiniyaw, wa xlakata ankgalhin liskujaw xlakata nastalaniyaw xliʼakxilhtit Jesús kkilatamatkan (kalikgalhtawakga 2 Corintios 5:14, 15). Nachuna, kinakujkan kinkamakgtayayan namalankiyaw Jehová xlakata mastalh xlatamat xKgawasa. Pulaktum la natlawayaw wa xatapaxuwan namastayaw kintakgalhtinkan ktamakxtumit.

13. Kalichuwinanti la tlan nalimasiyayaw pi lu kapaxkiyaw Dios chu xKgawasa.

¹³ Limasiyayaw pi lu paxkiyaw Jehová chu Jesús akxni wi tuku tlawayaw maski tuwa makgkatsiyaw kxpalakatakan. Min kilhtamaku akxni anaw ktamakxtumit tuwa makgkatsiyaw. Akgtum liʼakxilhtit, lhuwa congregaciones kgalhikgo xtamakxtumitkan nema tatlawa xʼitat semana akxni lu tlakgwankgonit xlakata skujkgo ama kilhtamaku. Chu atanu tamakxtumit tatlawa xlisputni semana, akxni latamanin jaxmakgolh. ¿Akxilha Jehová pi anaw ktamakxtumit maski tlakgwanitaw? Chuna. Nachuna, akxni anaw ktamakxtumit maski tuwa makgkatsiyaw, tlakg lanka xtapalh liʼakxilha Jehová tapaxkit nema limasiyaniyaw (Mar. 12:41-44).

14. ¿Tuku lu xatlan liʼakxilhtit kinkawilinin Jesús?

¹⁴ Jesús kinkawilinin akgtum lu tlan liʼakxilhtit xlakata tuku kilhchanima wi tuku natlawayaw xpalakata amakgapitsin xlakata kapaxkiya. Chu ni kajwatiya limasiyalh akxni mastalh xlatamat xpalakata kstalaninanin, wata chali chali kalimasiyanilh pi xkalilakgaputsa. Akgtum liʼakxilhtit, katatamakxtumilh maski lu xtlakgwanit o wi tuku xlilakgaputsama (Luc. 22:39-46). Chu kajwatiya xlilakgaputsa tuku tlan nakamaxki amakgapitsin, chu ni wa tuku tlan xmakglhtinalh (Mat. 20:28). Komo tapaxkit nema kgalhiniyaw Jehová chu natalan xtachuna la xla Jesús lu naliskujaw xlakata naʼanaw akxni natlawakan xTaway kiMalanakan chu amakgapitsi tamakxtumit.

15. ¿Tiku lu kamakgtayaputunaw?

¹⁵ Makgtapakgsiyaw kxkachikin Jehová kxlikalanka Katiyatni chu lu xatapaxuwan limaxtuyaw kilhtamaku xlakata nakawaniyaw  latamanin pi nakamakgtapakgsikgolh. Pero wa tiku lu kamakgatayaputunaw «wanti makxtum tawanitaw ktakanajla» pero uku nialh skujnanimakgolh Dios (Gál. 6:10). Kalimasiyaniyaw tapaxkit akxni kamakgpuwantiniyaw pi kaʼankgolh ktamakxtumit, liwaka akxni lakapastakkan akxni tinilh Cristo. Chuna la Jehová chu Jesús, akinin lu lipaxuwayaw akxni chatum tiku nialh kskujnanima Jehová lakgtaspita kinTlatkan xapaxkina (Mat. 18:14).

16. 1) ¿Tuku nalalimakgpuwantiniyaw kinchatunukan chu la nakinkamakgtayayan tamakxtumit? 2) ¿Tuku xlakata la uku xlakaskinka nalakapastakaw xtachuwin Jesús nema likgalhtawakgayaw kJuan 3:16?

¹⁶ Semanas nema talakatsuwima, tlan nakawaniyaw lhuwa latamanin pi kakinkatatamakxtumikgon akxni nalakapastakkan akxni tinilh Cristo viernes 19 xla abril kata 2019 (kaʼakxilhti recuadro « ¿Na nakawaniyaw amakgapitsin?»). Chuna la titaxtutilha uma kata, kalamakgpuwantiniw ankgalhin naʼanaw ktamakxtumit. Talakatsuwima xlisputni kakilhtamaku. Wa xlakata, lu xlakaskinka naʼanaw ktamakxtumit uma nakinkamakgtayayan nalimasiyayaw tataktujut, ni napekuanaw chu nalimasiyayaw tapaxkit (1 Tes. 5:8-11). Kalimasiyaniw Jehová pi lu paxtikatsiniyaw tapaxkit nema Jehová chu xKgawasa kinkalimasiyaniyan (kalikgalhtawakga Juan 3:16).