ARTÍCULO NEMA NATALIKGALHTAWAKGA 4
«Espíritu kinkamasiyaniyan pi xkamanan Dios akinin»
«Espíritu kinkamasiyaniyan pi xkamanan Dios akinin» (ROM. 8:16).
TAKILHTLIN 25 Xkamanan nema kalaksaknit
TUKU NATALICHUWINAN *
Anta kPentecostés, Jehová kalimatsamalh xʼespíritu santo 120 kstalaninanin Cristo (Kaʼakxilhti párrafos 1 chu 2).
1, 2. ¿Tuku lalh Pentecostés kkata 33 nema lu kaks kinkamalakawaniyan?
TSISA domingo kJerusalén, kPentecostés xla kata 33. Tamakxtumikgonit liwaka 120 kstalaninanin Cristo kxʼakgstin akgtum chiki (Hech. 1:13-15; 2:1). Nina makgas, Jesús xkawaninit pi xtamakgxtakgkgolh kkachikin xlakata wi tuku lu xlakaskinka xʼama kamaxki (Hech. 1:4, 5). ¿Tuku lalh?
2 «Kaj xalan kgaxmatkgolh pi wi tuku makasanalh kʼakgapun, xtachuna la makasan tliwakga un, chu takgaxmatli kxlikalanka chiki». Chu «akxilhkgolh pi tasiyakgolh lhkuyat chuna la simakgat chu xputumkan litatsamakgolh espíritu santo» (Hech. 2:2-4). Chuna, Jehová kamaxkilh xʼespíritu santo umakgolh kstalaninanin Cristo (Hech. 1:8). Wa umakgolh tiku xapulana kalilaksakka espíritu santo * xlakata natamapakgsinankgo Jesús kʼakgapun.
¿TUKU LA AKXNI WI TIKU LILAKSAKKAN ESPÍRITU SANTO?
3. ¿Tuku xlakata umakgolh kstalaninanin Cristo liwana xkatsikgo pi xkalilaksakkanit espíritu santo?
3 Komo wix anta xtitawila chu xmakglhtinanti uma lanka talakgalhaman, xlikana pi ankgalhin xlakapastakti tuku lalh uma kilhtamaku. Akgtum lhkuyat nema xtasiya xtachuna la simakgat tawila kmiʼakgxakga, chu wix tipalhuwa tachuwin tsukuya chuwinana (Hech. 2:5-12). Xlikana pi uma liwana xmasiyanin pi na lilaksakka espíritu santo. Pero, ¿ankgalhin kaks malakawaninan la Dios kalaksaka tiku natamapakgsinankgo Jesús? Nichuna. ¿Tuku likatsiyaw pi nichuna? Kaʼakxilhwi.
4. Kxapulana siglo, ¿watiya kilhtamaku kalaksakka tiku natamapakgsinankgo Cristo kʼakgapun? Kalichuwinanti.
4 Kaʼakxilhwi pulana tukuya kilhtamaku kalaksakkan tiku natamapakgsinankgo Cristo kʼakgapun. Ni kajwatiya 120 kstalaninanin Cristo xalak pulana siglo tiku xwilakgolh kJerusalén kalilaksakka espíritu santo kPentecostés xla kata 33. Watiya uma kilhtamaku, max liwaka 3,000 latamanin makglhtinankgolh espíritu santo nema Jesús xmalaknunit. Makgapitsi umakgolh latamanin kalilaksakka espíritu santo akxni tamunukgolh (Hech. 2:37, 38, 41). Pero, ni putum kalaksakka akxni tamunukgolh. Samaritanos kalaksakka akxni xtamunukgonita (Hech. 8:14-17). Pero Cornelio chu tiku xwilakgolh kxchik kalaksakka akxni nina xtamunukgo (Hech. 10:44-48).
5. Chuna la wan 2 Corintios 1:21, 22, ¿tuku la akxni wi tiku lilaksakkan espíritu santo?
5 La uku kalichuwinaw tuku la akxni wi tiku lilaksakkan espíritu santo. Xapulana, max tiku kalilaksakkan espíritu santo tuwa makgkatsikgo naʼakgatekgskgo pi Jehová kalaksakli xlakata natamapakgsinankgo Cristo kʼakgapun chu max lilakpuwankgo tuku xlakata kalaksakka. Amakgapitsin max tanu tuku makgkatsikgo. Apóstol Pablo liwana lichuwinan tuku makgkatsikgo tiku kalilaksakkan espíritu santo: «Akxni wixin kanajlatit, kaliwilinin akgtum sello * espíritu santo nema xmalaknunit, nema liwana limasiya tasikulunalin nema nakinkamaxkikanan» (Efes. 1:13, 14; nota). Xlikana, Jehová maklakaskin xʼespíritu santo xlakata liwana nakamakatsini tiku kalaksaka. Wa xlakata, espíritu santo «limasiya» o kalimasiyani pi nakgalhikgo latamat kʼakgapun, chu ni anta kKatiyatni (kalikgalhtawakga 2 Corintios 1:21, 22).
6. ¿Tuku xlitlawat chatum tiku xatalaksakni xlakata tlan naʼan kʼakgapun?
6 Komo chatum kstalanina Cristo xatalaksakni, ¿kilhchanima uma pi talakkaxwilinita pi naʼan kʼakgapun? Ni. Kajwatiya kilhchanima pi laksakka xlakata tlan naʼan kʼakgapun. Pero lu xlakaskinka pi nalakapastaka uma: «Natalan, tlakg kaliskujtit xlakata ni namakgatsankgayatit la kalaksakkanitantit xlakata, komo chuntiya natlawayatit uma, ankgalhin tlan nakakitaxtuniyan» (2 Ped. 1:10). Wa xlakata, maski chatum tala xatalaksakni, kajwatiya tlan namakglhtinan uma talakgalhaman komo nikxni namakgxtakga Jehová (Filip. 3:12-14; Heb. 3:1; Apoc. 2:10).
¿TUKU LIKATSI CHATUM TALA PI XATALAKSAKNI?
7. ¿Tuku likatsi chatum tala pi laksakkanit xlakata naʼan kʼakgapun?
7 Wa xlakata, ¿tuku likatsi chatum tala pi laksakkanit xlakata naʼan kʼakgapun? Pablo mastalh xatakgalhtin akxni katsokgnanilh umakgolh tachuwin tiku xwilakgolh kRoma chu xkgalhikgo talakgalhaman xlakata «xasantos» nawankgo. Xla kawanilh: «Wixin ni makglhtinantit akgtum espíritu nema xatachin nakawiliyan nema natlawa pi chuntiya napekuanatit, wata makglhtinantit akgtum espíritu nema tlawa pi xkamanan nalitaxtuyatit, akgtum espíritu nema kinkamaʼakgpuwantiniyan nawanaw: “¡Abba, Tlat!”. Espíritu liwana masiya pi xkamanan Dios akinin» (Rom. 1:7; 8:15, 16). Wa xlakata, Dios limaklakaskin xʼespíritu santo xlakata nakamakatsini natalan pi kalaksaknit xpalakata naʼankgo kʼakgapun (1 Tes. 2:12).
8. Chuna la wan 1 Juan 2:20, 27, ¿tuku xlakata tiku xatalaksakni ni maklakaskinkgo pi wi tiku nakawani pi Dios kalaksaknit xlakata naʼankgo kʼakgapun?
8 Jehová liwana kamakatsini natalan tiku kalaksaka pi nakamaxki talakaskin naʼankgo kʼakgapun (kalikgalhtawakga 1 Juan 2:20, 27). Xlikana pi, chuna la amakgapitsin xlakskujnin Dios, umakgolh natalan lakaskinkgo pi Jehová nakamasiyani. Pero ni maklakaskinkgo pi wi tiku nakawani pi xatalaksakni. Jehová limaklakaskin xʼespíritu santo xlakata nakamakatsini pi xlikana kalaksaknit.
«NALAKACHIMPARAKGO»
9. Chuna la wan Efesios 1:18, ¿tuku talakgpali kxtalakapastaknikan tiku Jehová kalaksaknit xlakata naʼankgo kʼakgapun?
9 Max putum xlakskujnin Jehová tuwa makgkatsikgo naʼakgatekgskgo tuku la akxni wi tiku Jehová laksaka. Chu xlikana, xlakata xlakan ni xatalaksakni. Dios katlawalh latamanin xlakata anta kKatiyatni nalatamaputunkgo, ni anta kʼakgapun (Gén. 1:28; Sal. 37:29). Pero kalaksaknit makgapitsin latamanin xlakata anta nalatamakgo kʼakgapun. Wa xlakata, akxni wi tiku laksaka, tlawa pi xtakgalhkgalhin chu xtalakapastakni natalakgpali chu anta nalatamaputun kʼakgapun (kalikgalhtawakga Efesios 1:18).
10. ¿Tuku kilhchanima Biblia akxni wan pi tiku xatalaksakni «nalakachimparakgo»?
10 Akxni kstalaninanin Cristo kalilaksakkan espíritu santo, Biblia wan pi xlakan «nalakachimparakgo» o «amakgtum nalakachimparakgo». * Jesús na lichuwinalh pi tiku ni xatalaksakni lu tuwa naʼakgatekgsa tuku makgkatsikgo tiku kalaksakkan o tiku «amakgtum nalakachin» (Juan 3:3-8, nota).
11. ¿Tuku talakgpali kxtalakapastakni tiku xatalaksakni?
11 ¿Tuku talakgpali kxtalakapastakni tiku xatalaksakni? Xapulana, xla lu lanka xtapalh xliʼakxilha nalatama kKatiyatni xliputum kilhtamaku. Lu xkgalhkgalhima kilhtamaku akxni Jehová akgtum Paraíso xtlawalh Katiyatni chu xmasputulh tuku nixatlan. Max xlilakpuwan akxni xkamakgamakglhtinalh tiku xalak xfamilia o chatum xʼamigo akxni xmalakastakwaniparaka. Pero, akxni laksakka xlakata naʼan kʼakgapun, xtalakapastakni talakgpalilh. ¿Tuku xlakata? Nichuna lalh xlakata nialhtu liʼakxilha latamat unu kKatiyatni. O xlakata lhuwa taʼakglhuwit anan o lu patinan, o xlakata lakgachanikgo nalatamakgo xliputum kilhtamaku unu kKatiyatni. Wata Jehová limaklakaskilh xʼespíritu santo xlakata nakalakgpalini xtalakapastaknikan chu kamaxkilh xasasti takgalhkgalhin.
12. Chuna la wan 1 Pedro 1:3, 4, ¿tuku makgkatsi chatum tiku xatalaksakni akxni lilakpuwan xtakgalhkgalhin?
12 Tiku xatalaksakni max lakpuwan pi ni lakgchan namakglhtinan uma lanka talakgalhaman, pero liwana katsi pi wa Jehová tiku laksaknit. Akxni lilakpuwan xtakgalhkgalhin lu paxuwa chu lu paxtikatsini Jehová (kalikgalhtawakga 1 Pedro 1:3, 4).
13. ¿Tuku lakpuwankgo tiku xatalaksakni xpalakata xlatamatkan unu kKatiyatni?
13 ¿Kilhchanima uma pi tiku xatalaksakni niputunkgo? Apóstol Pablo kgalhti uma takgalhskinin. Akxni katamalakxtumilh xtiyatliwakan tiku xatalaksakni chuna la akgtum chiki xla xuwa, wa: «Tiku wilaw kʼuma chiki xla xuwa talipuwan wilaw chu lu lakgaputsamaw, ni wa xlakata komo makgxtakgputunaw uma chiki, wata wa xlakata kgalhiputunaw atanu, xlakata latamat nakgotwa tuku niy» (2 Cor. 5:4). Wa xlakata, uma ni kilhchanima pi kaj nialhtu liʼakxilhkgo xlatamatkan chu lakaskinkgo pi lakapala ksputli. Xlakan lu lipaxuwakgo xlatamatkan chu ankgalhin limaklakaskimputunkgo xlakata naskujnanikgo Jehová chu akxtum nakatatawilakgo xfamiliajkan chu xʼamigoskan. Maski chuna, lata tuku tlawakgo, ankgalhin lakapastakkgo talakgalhaman nema kgalhikgo (1 Cor. 15:53; 2 Ped. 1:4; 1 Juan 3:2, 3; Apoc. 20:6).
¿WIX XATALAKSAKNI?
14. ¿Tuku ni limasiya pi chatum tala lilaksakkanit espíritu santo?
14 Max wix lilakpuwana komo Jehová lilaksaknitan xʼespíritu santo. Komo chuna, xlakaskinka pi natlawanikana umakgolh takgalhskinin: «¿Lu ktlawaputun xtalakaskin Dios? ¿Lu klipaxuwa klichuwinan xTachuwin Dios? ¿Lu klipaxuwa klikgalhtawakga Biblia chu nakkatsini tuku tlakg xalaktuwa xlakata Biblia? ¿Klakpuwan pi Jehová sikulunatlawanit kintaskujut chuna la klichuwinan xTachuwin? ¿Kmakgkatsi pi xlakaskinka nakkamakgtaya amakgapitsin tlakg tlan natalalinkgo Jehová? ¿Kakxilhnit la kimakgtayalinit Jehová kkilatamat?» (1 Cor. 2:10). Komo wix kgalhtinanti pi chuna, ¿wamputun pi xatalaksakni wix? Nichuna, xlakata putum xlakskujnin Jehová, maski xatalaksakni o ni, chuna makgkatsikgo. Nachuna, Jehová tlan limaklakaskin xʼespíritu santo xlakata nakamaxki litliwakga putum xlakskujnin. Komo wix ni liwana katsiya pi laksakkanita xlakata napina kʼakgapun, uma limasiya pi ni xatalaksakni wix. Tiku kalilaksakkanit espíritu santo ni lilakpuwankgo komo xlakan xatalaksakni o ni; wata ¡liwana katsikgo pi xatalaksakni!
Jehová limaklakaskilh xʼespíritu santo xlakata nakamaxki litliwakga Abrahán, Sara, David chu Juan tiku xMununan xlakata chuna tlan xtlawakgolh xtaskujutkan, pero ni limaklakaskilh xlakata nakalaksaka xlakata naʼankgo kʼakgapun (Kaʼakxilhti párrafos 15 chu 16). *
15. ¿Tuku likatsiyaw pi ni putum tiku makglhtinankgo espíritu santo kalaksakkanit naʼankgo kʼakgapun?
15 Biblia kalichuwinan lhuwa latamanin tiku makglhtinankgolh espíritu santo pero nitu xkalaksakkanit xlakata naʼankgo kʼakgapun. Akgtum liʼakxilhtit, David lipulalinka espíritu santo (1 Sam. 16:13). Uma makgtayalh xlakata liwana xakgatekgsli xtalakaskin Dios chu pulalilh xlakata natsokgwili makgapitsi capítulos xalak Biblia (Mar. 12:36). Maski chuna, apóstol Pedro lichuwinalh pi David «ni alh kʼakgapun» (Hech. 2:34). Nachuna, Juan tiku xMununan «xlitatsamanit espíritu santo» (Luc. 1:13-16). Chu Jesús lichuwinalh xpalakata: «Ni ananit achatum tiku xtachuna Juan tiku Mununan». Maski chuna, liwana lichuwinalh pi Juan ni xʼama makgtapakgsi kTamapakgsin xalak akgapun (Mat. 11:10, 11). Jehová limaklakaskilh xʼespíritu santo xlakata nakamaxki litliwakga umakgolh lakchixkuwin chu chuna tlan xtlawakgolh xtaskujutkan, pero ni limaklakaskilh xlakata nakalaksaka xlakata naʼankgo kʼakgapun. ¿Wamputun uma pi xlakan ni lu xaʼakgstitum xwankgonit xlakata tlan xtamapakgsinankgolh Cristo kʼakgapun? Nichuna, wata kilhchanima pi Jehová nakamaxki lu xatlan latamat kʼakgtum Paraíso unu kKatiyatni (Juan 5:28, 29; Hech. 24:15).
16. ¿Niku kgalhkgalhikgo nalatamakgo xlakskujnin Dios xala uku?
16 La uku, lhuwa xlakskujnin Dios tiku lamakgo kKatiyatni ni kgalhkgalhikgo pi anta nalatamakgo kʼakgapun. Xtachuna la Abrahán, Sara, David, Juan tiku xMununan chu lhuwa lakchixkuwin chu lakpuskatin xala makgasa, kgalhkgalhikgo pi anta nalatamakgo kKatiyatni, niku namapakgsinan xTamapakgsin Dios (Heb. 11:10).
17. ¿Tuku takgalhskinin nakgalhtiyaw kʼatanu artículo?
17 La uku wilakgolhku unu kKatiyatni makgapitsin tiku kalaksakkanit naʼankgo kʼakgapun. Wa xlakata, max lilakpuwana makgapitsin takgalhskinin (Apoc. 12:17). Akgtum liʼakxilhtit: ¿la xlikatsitkan tiku xatalaksakni? ¿La nalikatsiniyaw tala tiku tsuku way kaxtalanchu chu vino Akxni lakapastakkan akxni tinilh Cristo? ¿Kililakgaputsatkan komo kata kata tlakg taliwaka tiku wankgo pi xatalaksakni? Kʼatanu artículo naʼakxilhaw xatakgalhtin umakgolh takgalhskinin.
^ párr. 5 Lata kPentecostés kkata 33, Jehová kamaxkinit tasikulunalin makgapitsi latamanin xlakata natamapakgsinankgo xKgawasa kʼakgapun. Pero ¿tuku likatsikgo umakgolh natalan pi kalaksakkanit xlakata naʼankgo kʼakgapun? ¿Tuku lay akxni kalaksakkan? Uma artículo, nema takilhtinit krevista Makatsinina xla enero kata 2016, nakgalhti umakgolh lu xlakaskinka takgalhskinin.
^ párr. 2 TUKU LU XLAKASKINKA: Kalilaksakkan espíritu santo. Jehová maklakaskin xʼespíritu santo xlakata namakatsini chatum lataman pi laksaknit xlakata natamapakgsinan Cristo kʼakgapun. Limaklakaskin xʼespíritu santo xlakata namaxki tuku «nalimasiya» pi xatalaksakni (Efes. 1:13, 14). Wa xlakata, umakgolh natalan tlan nawankgo pi espíritu santo «kalimasiyani» pi nalatamakgo kʼakgapun, uma wamputun pi espíritu santo tlawa pi xlikana nakanajlakgo pi xatalaksakni.
^ párr. 5 TUKU LU XLAKASKINKA: Uma sello kajwatiya tlan xliputum kilhtamaku nakgalhikgo komo ni namakgxtakgkgo Jehová asta akxni nanikgo o akxni natsuku lanka takatsanajwat, uma kilhchanima pi max tlan namakgatsankgakgo xtalakgalhamankan (Efes. 4:30; Apoc. 7:2-4; kaʼakxilhti «Tuku katsiputunkgo tiku likgalhtawakgakgo» krevista Makatsinina xla abril kata 2016).
^ párr. 10 Komo tlakg katsiputuna, kaʼakxilhti revista La Atalaya 1 xla abril kata 2009, páginas 3-4, 5, 5-6, 7-8, 8-9, 10-11, 11-12.
TAKILHTLIN 27 Natakatsi tiku xkamanan Dios
^ párr. 57 TUKU TASIYA KDIBUJO: Maski tanumaw kpulachin o kgalhiyaw talakaskin nalichuwinan xtachuwin Dios, liwana kakatsiw pi Jehová xlikana nalimin xTamapakgsin chu akgtum paraíso natlawa uma Katiyatni.
