1, 2. ¿Tuku tuwa titaxtukgo lhuwa xlakskujnin Jehová, chu la kamamakgkatsini uma?

KALILAKPUWAW uma pulaktutu liʼakxilhtit. Chatum tala tiku kgawasaku wanikan pi kgalhi akgtum tajatat nema lu maxlajwani. Chatum tala tiku kgalhi liwaka 50 kata makgatsankga xtaskujut chu ni tekgsa atanu taskujut maski putsama. Chatum tala puskat tiku lina kata makgkatsi pi nialhla tlakg skujnani Jehová.

² Komo nachuna titaxtumaw, max lakpuwanaw pi nialhtu litaxtuyaw. Uma natlawa pi nialh katipaxuwaw chu asta nialh tlan katikatalaliw amakgapitsin.

3. ¿La akxilha latamat Satanás chu tiku tatayakgo?

³ Uma kakilhtamaku limasiya la akxilha latamat Satanás. Xla ankgalhin nitlan kinkalikatsininitan chu nitu kinkaliʼakxilhan. Lu nitlan likatsilh akxni malaknunilh Eva pi tlan xlaksakli tuku xtlawalh, maski liwana xkatsi pi xʼamakgo nikgo komo xkgalhakgaxmatmakgankgolh Dios. Ankgalhin limaklakaskinit política, laklanka stananin chu nixaxlikana takanajla. Wa xlakata ni kaks lilakawanaw pi políticos, laklanka stananin chu xpulalinanin nixaxlikana takanajla ni xtapalh liʼakxilhkgo latamat chu nitu kaliʼakxilhkgo latamanin.

4. ¿Tuku nalichuwinanaw kʼuma artículo?

⁴ Jehová nichuna likatsi, xla lakaskin pi tlan kamakgkatsiw chu kinkamakgtayayan akxni titaxtuyaw tuku tuwa nema max nakinkamalakpuwaniyan pi nitu litaxtuyaw (Sal. 136:23; Rom. 12:3). Kʼuma artículo naʼakxilhaw la kinkamakgtayayan Jehová  akxni titaxtuyaw akgtum tajatat, akxni ni kgalhiyaw tumin chu akxni linawa kata nema max nakinkamalakpuwaniyan pi nitu litaxtuyaw xlakata nialhla lhuwa skujnaniyaw Jehová. Pero pulana kaʼakxilhwi tuku likatsiyaw pi Jehová lanka xtapalh kinkaliʼakxilhan.

5. ¿Tuku likatsiyaw pi Jehová lanka xtapalh kinkaliʼakxilhan?

⁵ Maski Jehová pokgxni kinkalitlawan, akinin tlakg lanka xtapalh litaxtuyaw nixawa pokgxni (Gén. 2:7). Kaʼakxilhwi makgapitsi tuku tlan nalikanajlayaw pi lanka xtapalh litaxtuyaw kxlakatin Jehová. Akgtum liʼakxilhtit, Jehová kinkatlawan xlakata tlan nalimasiyayaw tayat nema xla kgalhi (Gén. 1:27). Chuna tlakg lakgskgalalan kinkatlawan nixawa atanu tuku kamalakatsukilh, wa xlakata kinkalakgayawan nakakuentajtlawayaw animales chu Katiyatni (Sal. 8:4-8).

6. ¿Tuku atanu likatsiyaw pi Jehová lanka xtapalh kinkaliʼakxilhan?

⁶ Maski Adán makglakgalhinalh, Jehová chuntiya lanka xtapalh kaliʼakxilhli latamanin. Xla lu lanka xtapalh kinkaliʼakxilhan, wa xlakata asta makamilh xKgawasa, Jesús, xlakata nakinkalakgmaxtuyan chu nakinkatapatikanan kintalakgalhinkan (1 Juan 4:9, 10). Xlakata xtamakamastan Jesús, Dios nakamalakastakwanipara putum tiku nikgonita, tiku tlan likatsikgolh chu tiku ni lakgapaskgolh (Hech. 24:15). Anta kxTachuwin liwana kinkamasiyaniyan pi ni tlakg xlakaskinka litaxtuyaw komo ni tatatlayaw, komo tlakg kgalhiyaw tumin o komo tlakg lakgtliwakgan akinin (Hech. 10:34, 35).

7. ¿Tuku atanu kinkamasiyaniyan pi lanka xtapalh litaxtuyaw kxlakatin Dios?

⁷ Akinin xlakskujnin Dios lhuwa tuku kinkalimasiyaniyan pi lanka xtapalh litaxtuyaw kxlakatin. Kinkalimin kxkachikin chu liwana akxilhnit la makgamakglhtinaw xalakwan tamakatsinin (Juan 6:44). Akxni tsukuw lakgtalakatsuwiyaw Jehová, xla nachuna kinkalakgtalakatsuwin (Sant. 4:8). Nachuna, lhuwa tuku tlawa xlakata nakinkamasiyaniyan xtalakaskin. Liwana kinkalakgapasan chu katsi tuku tlan tlawayaw. Chu kinkalimasiyaniyan xtapaxkit akxni kinkastakyawayan (Prov. 3:11, 12). ¡Xlikana pi putum uma limasiya pi lanka xtapalh kinkaliʼakxilhan!

8. ¿La tlan nakinkamakgtayayan tuku lichuwinan Salmo 18:27-29 naʼakxilhaw kintaʼakglhuwitkan chuna la xlilat?

⁸ Mapakgsina David liwana xkatsi pi Jehová xpaxki chu xmakgtaya. Chu uma makgtayalh natayani akxni wanika pi nitu xlitaxtu (2 Sam. 16:5-7). Akxni makgkatsiyaw pi nialhla tayaniyaw chu natitaxtuyaw tuku tuwa, Jehová tlan nakinkamakgtayayan naʼakxilhaw kintaʼakglhuwitkan chuna la xlilat chu nakinkamakgtayayan natayaniyaw (kalikgalhtawakga Salmo 18:27-29). Xlakata Jehová nakinkamakgtayayan, nitu katitlawalh pi nialh naskujniyaw (Rom. 8:31). Kaʼakxilhwi pulaktutu tuku max tuwa natitaxtuyaw, chu xlakaskinka nalakapastakaw pi Jehová lanka xtapalh kinkaliʼakxilhan chu lu kinkapaxkiyan.

9. ¿La nakinkamamakgkatsiniyan akgtum tajatat?

⁹ Tajatat max natlawa pi lu nitlan namakgkatsiyaw chu asta max nalakpuwanaw pi nialhtu litaxtuyaw. Max limaxana namakgkatsiyaw pi amakgapitsin naʼakxilhkgo tuku nialhla tlawayaw o pi maklakaskinaw tamakgtay. Chu, maski amakgapitsin ni katsikgo pi tatatlayaw, max limaxananaw pi nialhla tlawayaw tuku tlan xtlawayaw makgasa. Akxni chuna titaxtuyaw, Jehová kinkamaʼakgpuwantiniyan. ¿La tlawa?

10. Chuna la wan Proverbios 12:25, ¿tuku tlan nakinkamakgtayayan akxni tatatlayaw?

 ¹⁰ Akxni tatatlayaw, tlan nakinkamatliwakglhan «lu xatlan tachuwin» (kalikgalhtawakga Proverbios 12:25). Jehová tsokgwilinit kBiblia lakwan tachuwin nema kinkamalakapastakayan pi lu lanka xtapalh kinkaliʼakxilhan maski kgalhiyaw akgtum tajatat (Sal. 31:19; 41:3). Komo makglhuwa nalikgalhtawakgayaw umakgolh tachuwin, xla nakinkamakgtayayan natayaniyaw akxni nitlan makgkatsiyaw xlakata tatatlayaw.

11. ¿La akxilhli xtamakgtay Jehová chatum tala?

¹¹ Kaʼakxilhwi tuku titaxtulh chatum tala tiku wanikan Jorge. Akxni kgawasaku xwanit, wanika pi xkgalhi akgtum tajatat nema lu xmaxlajwani chu lakapala xtaliwakama xtajatat, chu wa xlakata xmakgkatsi pi nitu xlitaxtu. Xla lichuwinan: «Nikxni klilakpuwa pi lu nitlan xakama limakgkatsi kintajatat chu pi limaxana xakama makgkatsi xlakata la xkimakgtayakan. Akxni tlakg taliwakalh kintajatat, xaklilakpuwan la xʼama talakgpali kilatamat. Xakmakgkatsi pi nialhla xaktayani, chu ktasaskinilh Jehová pi xkimakgtayalh». ¿La makgtayalh Dios? Xla lichuwinan: «Tuwa xakmakgkatsi naklakapastaka tuku xaklikgalhtawakga, wa xlakata makgapitsi natalan kiwanikgolh pi tsinu tsinu xaklikgalhtawakgalh Salmos niku lichuwinan pi Jehová lanka xtapalh kaʼakxilha xlakskujnin. Makglhuwa xaklikgalhtawakga umakgolh textos. Lu xkimakgtaya tuku lichuwinankgo chu tlan xakmakgkatsi. Alistalh, amakgapitsin tsukukgolh akxilhkgo pi tlakg xaklitsin. Asta xkiwanikgo pi akit xakkamatliwakglha. Liwana kʼakxilhli pi Jehová xkgalhtinit kioraciones. Xla kimakgtayalh naklakgpali kintapuwan chu kmakgkatsilh pi xlakaskinka klitaxtu. Wa ktsukulh lilakpuwan tuku lichuwinan Biblia xlakata la kiʼakxilha Jehová maski kkgalhi akgtum tajatat».

12. ¿Tuku tlan natlawayaw xlakata naʼakxilhaw xtamakgtay Jehová akxni kgalhiyaw akgtum tajatat?

 ¹² Komo kgalhiyaw akgtum tajatat, liwana kakatsiw pi Jehová katsi tuku titaxtumaw. Katasaskiniw pi kakinkamakgtayan naʼakxilhaw tuku titaxtumaw chuna la xla akxilha. Kalikgalhtawakgaw Biblia xlakata natekgsaw lakwan tachuwin nema Jehová tsokgwilinit xlakata nalitamakgtayayaw. Liwana kaʼakxilhwi tuku kinkamasiyaniyan pi Jehová lanka xtapalh kaʼakxilha xlakskujnin. Komo chuna natlawayaw, naʼakxilhaw pi xla lu tlan kalikatsini tiku ni makgxtakgkgo (Sal. 84:11).

13. ¿Tuku tuwa nakitaxtuni chatum xatlat komo namakgatsankga xtaskujut?

¹³ Putum xanatlatni kamaxkiputunkgo tuku maklakaskinkgo xfamiliajkan. Kalilakpuwaw pi chatum tala makgatsankga xtaskujut. Lu liskuja xlakata natekgsa atanu taskujut, pero ni tekgsa. Akxni chuna titaxtu, max makgkatsi pi nitu litaxtu. ¿La tlan namakgtaya komo wa nalilakpuwan xtamalaknun Dios?

14. ¿Tuku xlakata Jehová makgantaxti tuku malaknu?

¹⁴ Jehová ankgalhin makgantaxti tuku malaknu (Jos. 21:45; 23:14). Pulaklhuwa tuku xlakata makgantaxti. Pulana, komo ni xmakgantaxtilh nitlan xlichuwinanka. Xla liwana kinkawaniyan pi nakakuentajtlawa xlakskujnin tiku ni makgxtakgkgo, wa xlakata xla makgkatsi pi xlimakgantaxtit uma tamalaknun (Sal. 31:1-3). Nachuna, liwana katsi pi lu nitlan xlimakgkatsiw komo ni kuenta xkinkatlawan, tiku makgtapakgsiyaw kxfamilia. Xla liwana kinkawaniyan pi nakinkamaxkiyan tuku maklakaskinaw kkilatamatkan chu kkintakanajlakan, chu nitu katitlawalh pi ni namakgantaxti uma xtachuwin (Mat. 6:30-33; 24:45).

15. 1) ¿Tuku tuwa titaxtukgolh kstalaninanin Cristo xalak pulana siglo? 2) ¿Tuku xlakata lu kinkamatliwakglhan tuku lichuwinan Salmo 37:18, 19?

 ¹⁵ Akxni lakapastakaw tuku xlakata Jehová makgantaxti tuku kinkamalaknuniyan, liwana katsiyaw pi xla nakinkamakgtayayan akxni titaxtuyaw tuku tuwa xlakata ni kgalhiyaw tumin. Kalilakpuwaw tuku titaxtukgolh kstalaninanin Cristo xalak pulana siglo. Akxni tsukuka kaputsastalanikan natalan xalak Jerusalén, «putum kamalakgatumika chu kajwatiya apóstoles tamakgxtakgkgolh» (Hech. 8:1). Wa xlakata, xlikana pi max tuwa tuku titaxtukgolh xlakata ni xkgalhikgo tumin. Max makgatsankgakgolh xchikkan, xtaskujutkan chu tuku xliskujkgo. Pero Jehová nikxni kamakgxtakgli, chu xlakan ankgalhin xpaxuwakgo maski xtitaxtumakgo tuku tuwa (Hech. 8:4; Heb. 13:5, 6; Sant. 1:2, 3). Dios kamakgtayalh umakgolh xlakskujnin tiku ni makgxtakgkgolh, chu akinin nachuna nikxni kintikamakgxtakgni (kalikgalhtawakga Salmo 37:18, 19).

16. ¿Tuku xlakata max nalakpuwanaw pi Jehová ni xtapalh akxilha la skujnaniyaw?

¹⁶ Akxni tsukuyaw kgolonaw, max nalakpuwanaw pi nialhla tlakg naskujnaniyaw Jehová. Mapakgsina David max nachuna xlakpuwan chu uma lu xmakgalipuwan (Sal. 71:9). ¿La kinkamakgtayayan Jehová?

17. ¿Tuku kinkamasiyaniyan tuku titaxtulh chatum tala tiku wanikan Jheri?

¹⁷ Kaʼakxilhwi tuku titaxtulh chatum tala wanikan Jheri. Akgtum kilhtamaku wanika pi xʼalh kʼakgtum curso niku masiyakan la kaxtlawakan Pukgalhtawakga, pero xla ni xʼamputun. Xla lakpuwa: «Akit klina kata, ninita kinchixku chu nitula ktlawa nema Jehová tlan xmaklakaskilh. Nitu klitaxtu». Katsisni, xliputum xnaku tlawanilh oración Jehová. Xlichali, akxni chalh kPukgalhtawakga,  chuntiya xlakpuwan pi ni anta xlitawilat xwanit. Akxni xmastamaka taʼakgchuwin, chatum tala lichuwinalh pi tuku tlakg lanka xtapalh wa pi namaxkiyaw talakaskin Jehová pi chuntiya nakinkamasiyaniyan. Jheri lakapastaka: «Klakpuwa: “Uma tlan ktlawa”. Ktsukulh tasa akxni kkatsilh pi Jehová xkgalhtinit kioración. Klakpuwa pi xakkgalhi tuku tlan xakmaxkilh Jehová chu pi xla lu xkimakgtayaputun». Jheri lichuwinampara: «Lu xakpekuama akxni ktanulh ktamakxtumit, xakmakgkatsi pi nitu xaklitaxtu. Pero akxni ktaxtulh, lu tlan xakmakgkatsi, xakpaxuwa chu xakmakgkatsi pi lanka xtapalh klitaxtu».

18. ¿La kinkamasiyaniyan Biblia pi Jehová chuntiya lanka xtapalh akxilha kintaskujutkan maski linawa kata?

¹⁸ Akxni tlakg linawa kata, liwana kakatsiw pi Jehová tlan chuntiya nakinkalimaklakaskinan (Sal. 92:12-15). Jesús kinkamasiyanin pi Jehová lanka xtapalh liʼakxilha tuku tlawayaw xlakata naskujnaniyaw maski ni lhuwa tuku natlawayaw, o maski lakpuwanaw pi ni lhuwa tuku katsiniyaw tlawayaw (Luc. 21:2-4). Wa xlakata, wa kalilakpuwaw tuku tlan tlawayaw. Akgtum liʼakxilhtit, tlan chuntiya nalichuwinanaw Jehová, natlawayaw oración xpalakatakan kinatalankan chu nakamaʼakgpuwantiniyaw amakgapitsin xlakata ni namakgxtakgkgo Jehová. Xla xtaskujnin kinkaliʼakxilhan, ni wa xlakata komo lhuwa tuku tlan tlawayaw, wata wa xlakata ankgalhin kgalhakgaxmataw (1 Cor. 3:5-9).

19. ¿Tuku liwana kinkawaniyan Romanos 8:38, 39?

¹⁹ Lu paxtikatsiniyaw Jehová pi tlan skujnaniyaw, chatum Dios tiku lanka xtapalh kaliʼakxilha tiku skujnanikgo. Xla kinkatlawan xlakata ankgalhin natlawayaw xtalakaskin, chu xlikana wa uma tuku tlawa pi nakgalhiyaw tapaxuwan kkilatamatkan (Apoc. 4:11). Max latamanin xalak uma kakilhtamaku lakpuwankgo pi nitu litaxtuyaw, pero Jehová lanka xtapalh kinkaliʼakxilhan (Heb. 11:16, 38). Akxni makgkatsiyaw pi nialhla tayaniyaw xlakata kgalhiyaw akgtum tajatat, akxni titaxtuyaw tuku tuwa xlakata ni kgalhiyaw tumin o xlakata linawa kata, kalakapastakwi pi nitu kintikamamakgatlinin xtapaxkit kinTlatkan xalak akgapun (kalikgalhtawakga Romanos 8:38, 39).