1. ¿Tuku tuwa titaxtukgo lhuwa xlakskujnin Jehová?

KXLIKALANKA kakilhtamaku, xlakskujnin Jehová lhuwa tuku tuwa titaxtumakgolh chu asta max lu kamakgapatinan. Chu asta max akxilhaw pi kinatalankan xalak kincongregacionkan nachuna titaxtumakgolh. Lhuwa tiku kgalhikgo tajatat o wi tiku nilh xalak xfamiliajkan. Amakgapitsin lu lipuwankgo xlakata chatum tiku xalak xfamilia o chatum xʼamigo makgxtakga Jehová. Chu wilakgolh tiku lu lipatinamakgolh xlakata lalh tuku masputunan. Putum umakgolh natalan maklakaskinkgo takgoxamixat. ¿La tlan nakamakgtayayaw?

2. ¿Tuku xlakata Pablo lakgachunin xmaklakaskin pi xmaʼakgpuwantinika?

² Makglhuwa katuwa tawi xlatamat Pablo (2 Cor. 11:23-28). Nachuna lu xlipatinan «lhtukun» nema xkgalhi kxmakni, max akgtum tajatat nema lu xmakgapatinan (2 Cor. 12:7). Nachuna, lu nitlan limakgkatsilh akxni Demas, tiku makgas xmakgtayana xlitaxtunit, akgxtakgmakgalh xlakata «tlakg paxkilh uma kakilhtamaku» (2 Tim. 4:10). Maski Pablo ni xpekuan chu ankgalhin xkamakgtaya amakgapitsin, milh kilhtamaku na taxlajwanilh (Rom. 9:1, 2).

3. ¿La maʼakgpuwantinilh Jehová Pablo?

³ Jehová lu maʼakgpuwantinilh Pablo akxni xmaklakaskin. ¿La tlawalh? Limaklakaskilh xʼespíritu santo xlakata namatliwakglha (2 Cor. 4:7; Filip. 4:13). Pero nachuna kamaklakaskilh natalan. Apóstol Pablo lichuwinalh: «Xlakan kimakgoxamixikgonit» (Col. 4:11). Makgapitsi natalan tiku lu makgtayakgolh wa Aristarco, Tíquico chu Marcos, xlakan  lu makgoxamixikgolh chu makgtayakgolh xlakata tlan natayani. ¿Tuku tayat kamakgtayalh umakgolh natalan xlakata tlan xkamakgoxamixikgolh amakgapitsin? ¿La tlan nastalaniyaw xliʼakxilhtitkan akxni nakamaʼakgpuwantiniyaw amakgapitsin?

4. ¿La limasiyalh Aristarco pi ni xmakgxtakgnan?

⁴ Aristarco lu tlan xʼamigo Pablo xwanit. Xla xalak Tesalónica xwanit, akgtum kachikin nema xtapakgsi kMacedonia. Akxni xlipulana talichuwinan kBiblia xtawi Pablo kʼEfeso, akxni Pablo xlimakgtutu xʼanit lichuwinantapuli Dios. Anta, latamanin chipakgolh Aristarco (Hech. 19:29). Akxni makgxtakgkgolh, ni lakpuwa pi natsala, wata xla ni makgxtakgli Pablo chu anta tatamakgxtakgli. Alistalh, anta kʼGrecia, akxni makgapitsin latamanin xmakgniputunkgo Pablo, Aristarco chuntiya xtawi Pablo (Hech. 20:2-4). Kkata 58, akxni xlimaka Pablo kpulachin anta kRoma, Aristarco taʼalh akxni xpatakutmakgolh pupunu chu xchatiykan patikgolh lanka unisen nema laktlawalh barco niku xʼankgo (Hech. 27:1, 2, 41). Anta kRoma, max na lakxtum tatamaknuka kpulachin apóstol Pablo (Col. 4:10). Xlikana pi Pablo lu tlan xlimakgkatsi xlakata xkgalhi uma lu xatlan amigo.

5. Chuna la wan Proverbios 17:17, ¿la tlan xaxlikana amigos nalitaxtuyaw?

⁵ Chuna la Aristarco, akinin na tlan lu xalaktlan amigos nalitaxtuyaw komo ankgalhin akxtum nakatatawilayaw kinatalankan, asta maski «akxni titaxtumakgolh talakgaputsit» (kalikgalhtawakga Proverbios 17:17). Max kinatalankan chuntiya namaklakaskinkgo tamakgtay maski titaxtukgonita nawan tuku tuwa. Akgtum liʼakxilhtit, xnatlatni Frances * xkgalhikgo cáncer chu xliʼakgtutu papaʼ nikgolh. Xla lichuwinan: «Talipuwan nema kgalhiyaw lu makgas makgapala. Lu tlan klimakgkatsi pi kkgalhi lu xalaktlan amigos tiku lakapastakkgo pi chuntiya klipuwan maski makgasa la nikgolh kinatlatni».

6. ¿Tuku natlawayaw komo ni nakamakgxtakgaw kiʼamigoskan?

 ⁶ Amigos tiku ni makgxtakgnankgo wi tuku tlawakgo xpalakatakan xnatalankan. Kaʼakxilhwi akgtum liʼakxilhtit. Chatum tala tiku wanikan Peter wanika pi xkgalhi akgtum lu xatuwa tajatat. Xpuskat, Kathryn, lichuwinan: «Akgtum tamakgaxtokgat xalak kincongregación kinkalinkgon kpumakuchin, chu uma kilhtamaku Peter wanikan pi xkgalhi uma tajatat. Akxni kinkawanikan uma, xlakan kinkawanikgon pi ni xʼamakgolh kinkamakgxtakgkgoyan, chu xlikana xlakan ankgalhin kinkamakgtayakgonitan akxni kmaklakaskinitaw». ¡Xlikana pi lu tlan limakgkatsiyaw pi kgalhiyaw amigos tiku ni kinkamakgxtakgkgoyan akxni tlakg maklakaskinaw!

7, 8. Chuna la wan Colosenses 4:7-9, ¿la limasiyalh Tíquico pi xaxlikana amigo xlitaxtu?

⁷ Tíquico xalak Asia xwanit chu lu xatlan xʼamigo Pablo litaxtulh (Hech. 20:4). Kkata 55, apóstol Pablo lakkaxwililh pi natalan wi tuku xkalimakgtayakgolh natalan xalak Judea, max Pablo skinilh Tíquico pi xmakgtayanalh (2 Cor. 8:18-20). Alistalh, akxni xapulana linka Pablo kRoma, Tíquico wa tiku xlin xcartas Pablo kcongregaciones xalak Asia (Col. 4:7-9).

⁸ Tíquico ankgalhin lu xatlan xʼamigo Pablo litaxtulh (Tito 3:12). Ni putum natalan chuna xwankgonit la Tíquico. Akgtum liʼakxilhtit, akxni Pablo xlimakgtiy xtamaknukanit kpulachin anta kRoma, max kkata 65, tsokgwililh pi lhuwa kstalaninanin Cristo xalak Asia ni xlakgtalakatsuwiputunkgo, max xlakata xkapekuanikgo tiku nitlan xkalikatsinikgo (2 Tim. 1:15). Pero Tíquico nichuna xwanit, wa xlakata Pablo ankgalhin lipawa chu tlakg lakgayawalh taskujut (2 Tim. 4:12). Xlikana pi apóstol Pablo lu lanka xtapalh liʼakxilhli uma lu xatlan xʼamigo.

9. ¿La tlan nastalaniyaw xliʼakxilhtit Tíquico?

⁹ ¿La tlan xaxlikana amigos nalitaxtuyaw chuna la Tíquico? Pulaktum tuku tlan natlawayaw wa pi ankgalhin nakamakgtayayaw tiku maklakaskinkgo chu ni kaj xman nawanaw pi nakamakgtayayaw (Mat. 5:37; Luc. 16: 10). Tiku maklakaskinkgo tamakgtay lu tlan makgkatsikgo akxni kinkalipawankgoyan. Chatum tala lichuwinan: «Lu tlan tamakgkatsi xlakata liwana katsiya pi namakgantaxti tuku wanin chatum tala».

10. Chuna la wan Proverbios 18:24, ¿tiku tlan nakamakgtayakgo tiku titaxtumakgolh tuku tuwa?

¹⁰ Tiku titaxtukgo tuku tuwa lu skaya makgkatsikgo akxni kalitachuwinankgo chatum amigo tuku makgkatsimakgo (kalikgalhtawakga Proverbios 18:24). Chuna makgkatsilh chatum tala tiku wanikan Bijay akxni xkgawasa makgxtakgli Jehová, xla wan: «Xakmaklakaskin pi wi tiku xakwanilh tuku xakmakgkatsima». Atanu tala tiku wanikan Carlos, tlawalh tuku nitlan chu makgatsankgalh akgtum taskujut kcongregación nema lu lanka xtapalh xliʼakxilha. Xla lichuwinan: «Xakmaklakaskin pi wi tiku tlan xaktachuwinalh, tiku ni xkiwanilh tuku nitlan xaklimakgkatsilh». Lakgkgolotsin wa tiku tlan makgtayakgolh natayani tuku tuwa xtitaxtuma. Nachuna, lu tlan xlimakgkatsi xlakata liwana xkatsi pi xlakan ni xʼamakgo kalitachuwinankgo amakgapitsin tuku xkawaninit.

11. ¿La tlan xaxlikana amigos nalitaxtuyaw?

¹¹ Talakaskin pi liwana nakakgaxmatniyaw kiʼamigoskan. Xchixku chatum tala tiku wanikan Zhanna makgxtakgli. ¿Tuku makgtayalh Zhanna natayani? Lu makgtayalh nakalitachuwinan xʼamigos tuku xmakgkatsi. Xla lichuwinan: «Maski max watiya tachuwin xakkawani, xlakan ankgalhin liwana xkinkgaxmatnikgo». Akinin na tlan amigos nalitaxtuyaw komo liwana nakakgaxmatniyaw kiʼamigoskan.

12. ¿Tiku xwanit Marcos, chu la limasiyalh pi lu xkamakgtayaputun amakgapitsin?

¹² Marcos judío xwanit chu xtapakgsi kJerusalén. Xtapuxnimat Bernabé xwanit, tiku misionero xwanit (Col. 4:10). Xfamilia Marcos max xkgalhi tumin, pero xla ni wa tlakg xlakaskinka xʼakxilha tumin. Ankgalhin limasiyalh pi lu xkamakgtayaputun amakgapitsin chu pi lu xlipaxuwa akxni xkamakgtaya. Akgtum liʼakxilhtit, makglhuwa kataʼalh apóstol Pablo chu Pedro akxni xtlawakgo taskujut nema xlakgayakgo. Xla xtamawa liwat, xputsa niku tlan xtamakgxtakgkgolh o atanu tuku xkalimakgtayakgo (Hech. 13:2-5; 1 Ped. 5:13). Pablo lichuwinalh pi Marcos xmakgtayana litaxtulh «xlakata natalichuwinan xTamapakgsin Dios» chu pi xla lu “makgoxamixilh” (Col. 4:10, 11, nota).

13. ¿La masiya 2 Timoteo 4:11 pi Pablo lu lanka xtapalh xliʼakxilha tuku tlawalh Marcos?

¹³ Marcos chu Pablo lu tlan latalalinkgolh. ¿Tuku xlakata chuna wanaw? Akxni apóstol Pablo xaʼawatiya xtanuma kpulachin anta kRoma, kkata 65, malakgachanilh xlimaktiy carta Timoteo. Kʼuma carta, Pablo skinilh Timoteo pi xʼalh kRoma chu pi xtaʼalh Marcos (2 Tim. 4:11). Xlikana pi Pablo lu lanka xtapalh xliʼakxilha taskujut nema tlawalh Marcos, chu wa xlakata skilh pi akxtum xtatawi akxni xtitaxtuma uma tuku lu tuwa. Marcos pulaklhuwa la makgtayalh, max xlini liwat o tuku xmaklakaskin xlakata natsokgnan. Apóstol Pablo max lu tatliwakglhli xlakata maʼakgpuwantinika akxni atsinu xtsankga namakgnikan.

14, 15. ¿Tuku kinkamasiyaniyan Mateo 7:12 xlakata la nakamakgtayayaw amakgapitsin?

¹⁴ (Kalikgalhtawakga Mateo 7:12). Akxni titaxtuyaw tuku tuwa, lu tlan limakgkatsiya pi kinkamakgtayakanan. Ryan, chatum tala tiku nilh xtlat xlakata wi tuku nitlan akgspulalh, lichuwinan: «Max tuku ankgalhin tlawaya nialhla katitlawa xlakata lu lipuwampat. Lu tlan tamakgkatsi akxni wi  tiku makgtayayan, maski ni lhuwa tuku natlawa».

¹⁵ Komo liwana naʼakxilhaw tuku titaxtumakgo amakgapitsin, natekgsaw la tlan nakamakgtayayaw. Kaʼakxilhparaw xliʼakxilhtit Peter chu Kathryn, tiku kalichuwinaw kpárrafo 6. Chatum tala puskat lakkaxwililh pi nakamakgtaya akxni xʼankgo kpumakuchin. Xlakata xlakan nialhla xmatlawanikgo putlaw, uma tala puskat lakkaxwililh pi natalan xalak congregación tiku xmakgtayanamputunkgo xkalinkgolh kpumakuchin. ¿Tuku tlan kitaxtulh? Kathryn lichuwinan: «Lu tlan klimakgkatsiw xtamakgtaykan». Ankgalhin kalakapastakwi pi tuku natlawayaw xpalakatakan tiku patinamakgolh lu nakamakgoxamixi, maski ni lhuwa tuku natlawayaw.

16. ¿Tuku lu xlakaskinka kinkamasiyaniyan xliʼakxilhtit Marcos?

¹⁶ Kalichuwinamparaw xliʼakxilhtit Marcos, tiku xlama kxapulana siglo. Xlikana pi xla lu lhuwa taskujut xkgalhi. Jehová xlakgayawanit lu xlakaskinka taskujut: natsokgwili maktum libro. Maski xkgalhi lhuwa taskujut, limaxtulh kilhtamaku namaʼakgpuwantini Pablo, chu xla lu xlipawan. Chatum tala tiku wanikan Ángela, makgnika chatum tiku xalak xfamilia, chu xla lu paxtikatsini pi tiku makgoxamixikgolh nachuna likatsikgolh la Marcos. Xla lichuwinan: «Akxni natalan xlikana makgtayaputunkgoyan, ni tuwa katimakgkatsi nakatachuwinana. Xlakan lu makgtayaputunkgoyan». Wa xlakata, kalilakpuwaw: «¿Amakgapitsin natalan lakpuwankgo pi ankgalhin tlan nakkamakgtaya?».

17. ¿La kinkamakgtayayan 2 Corintios 1:3, 4 xlakata tlan nakamaʼakgpuwantiniyaw amakgapitsin?

¹⁷ Wilakgolh lhuwa natalan tiku maklakaskinkgo pi nakamakgoxamixikan. Max nachuna tlan nakamaʼakgpuwantiniyaw kinatalankan chuna la kinkamaʼakgpuwantinikan akinin. Nino, chatum tala tiku nilh xnana, lichuwinan: «Komo namaxkiyaw talakaskin, Jehová tlan nakinkamaklakaskinan xlakata nakamakgoxamixiyaw natalan»  (kalikgalhtawakga 2 Corintios 1:3, 4). Chu Frances, tiku lichuwinaw kpárrafo 5, lichuwinan: «Lu xlikana tuku lichuwinan 2 Corintios 1:4. Tlan nakamakgoxamixiyaw amakgapitsin chuna la akinin kinkamakgoxamixikanan».

18. 1) ¿Tuku xlakata makgapitsin pekuankgo namastakgo takgoxamixit? 2) ¿La tlan nakamakgoxamixiyaw amakgapitsin? Kawili akgtum liʼakxilhtit.

¹⁸ Talakaskin pi nalakputsayaw la tlan nakamakgtayayaw kinatalankan tiku patinamakgolh maski pekuanaw. Akgtum liʼakxilhtit, max pekuanaw xlakata ni katsiyaw tuku tlan nawaniyaw tiku patinama. Chatum kgolotsin tiku wanikan Paul lakapastaka tuku tlawakgolh natalan akxni nilh xtlat. Xla lichuwinan: «Xakakxilha pi tuwa xmakgkatsikgo nakintachuwinankgo. Ni xkatsikgo tuku nakiwanikgo. Pero chuntiya kkapaxtikatsini xlakata xkimakgtayaputunkgo». Chu atanu tala tiku wanikan Tajon lichuwinalh akxni tachikikgolh tiyat niku xwi: «Ni liwana klakapastaka tuku xwankgo mensajes nema kimalakgachanikgolh natalan akxni aku xtachikikgonit tiyat. Pero tuku liwana kkatsi wa pi kimalakgachanikgolh umakgolh mensajes xlakata xkililakgaputsakgo». Xlikana pi komo lu nakalilakgaputsayaw amakgapitsin, xlakan lu tlan namakgkatsikgo.

19. ¿Tuku xlakata liwana lakpuwanitaw pi nakamakgoxamixiyaw amakgapitsin?

¹⁹ Chuna la talakatsuwitilhama xlisputni uma kakilhtamaku, tlakg nataliwaka tuku tuwa natitaxtuyaw kkilatamatkan (2 Tim. 3:13). Nachuna, akinin makglakgalhinanin chu wa xlakata chuntiya max natlawayaw tuku nitlan. Wa xlakata, chuntiya namaklakaskinaw takgoxamixat. Apóstol Pablo tlan tayanilh asta akxni nilh xlakata amakgapitsin natalan lu makgtayakgolh. Wa xlakata, kastalaniw xliʼakxilhtit Aristarco tiku nikxni makgxtakgli Pablo, xaxlikana amigos kalitaxtuw chuna la Tíquico chu kakamakgtayaw amakgapitsin chuna la tlawalh Marcos. Komo chuna natlawayaw, lu nakamakgtayayaw kinatalankan nikxni namakgxtakgkgo Jehová (1 Tes. 3:2, 3).