ARTÍCULO NEMA NATALIKGALHTAWAKGA 4
Tuku xlakata anaw akxni talakapastaka akxni tinilh Cristo
«Chuntiya katlawatit uma xlakata nakililakapastakatit» (LUC. 22:19).
TAKILHTLIN 20 Masta xaPuxku minkgawasa
TUKU NATALICHUWINAN *
1, 2. 1) ¿Tuku kilhtamaku tlakg lakapastakaw tiku makgatsankganitaw kkalinin? 2) ¿Tuku lakkaxwililh Jesús katsisni akxni nina xmakgnikan?
ANKGALHIN lakapastakaw tiku makgatsankganitaw kkalinin, maski lhuwata kilhtamaku titaxtunit lata nilh. Chu liwaka tlakg lakapastakaw akxni katama lata tinilh.
2 Akgatunu kata, lhuwa latamanin kxlikalanka katiyatni tamakxtumiyaw xlakata nalakapastakaw akxni tinilh Jesucristo, tiku lu paxkiyaw (1 Ped. 1:8). Chuna tlawayaw xlakata nalakapastakaw akxni mastalh xlatamat xlakata nakinkalakgmaxtuyan ktalakgalhin chu kkalinin (Mat. 20:28). Jesús xlakaskin pi kstalaninanin xlakapastakkgolh akxni nilh. Katsisni akxni nina xmakgnikan, lakkaxwililh akgtum lu xlakaskinka taway chu mastalh uma limapakgsin: «Chuntiya katlawatit uma xlakata nakililakapastakatit» (Luc. 22:19).
3. ¿Tuku naʼakxilhaw kʼuma artículo?
3 Xliputum tiku ankgo akxni lakapastakkan akxni tinilh Cristo, tlakg lhuwa tiku kgalhkgalhikgo nalatamakgo kKatiyatni chu ni lhuwa tiku kgalhikgo takgalhkgalhin xlakata naʼankgo kʼakgapun. Kʼuma artículo, nalichuwinanaw tuku xlakata umakgolh akgtiy grupos ankgo kata kata akxni lakapastakkan akxni tinilh Cristo. Na nalichuwinanaw la litamakgtayayaw xlakata anaw. Pulana kaʼakxilhwi tuku xlakata tiku xatalaksakni ankgo akxni talakapastaka akxni tinilh Cristo.
¿TUKU XLAKATA ANKGO TIKU XATALAKSAKNI?
4. ¿Tuku xlakata tiku xatalaksakni tlan wakgo kaxtalanchu chu vino akxni talakapastaka akxni tinilh Cristo?
4 Pulaktum tuku xlakata xatalaksakni lu kgalhkgalhikgo naʼankgo akxni talakapastaka akxni tinilh Cristo wa pi tlan nawakgo kaxtalanchu chu vino. ¿Tuku xlakata xlakan tlan wakgo? Xlakata nakatsiyaw xatakgalhtin, kalakapastakwi tuku tlawalh Jesús kxaʼawatiya katsisni akxni latamalh kKatiyatni. Akxni ksputnita Pascua, Jesús lakkaxwililh akgtum taway nema lilakgapaskan xTaway kiMalanakan. Kamaxkilh kaxtalanchu chu vino kgalhkawitu xʼapóstoles chu kawanilh pi xwakgolh chu xlikgotnankgolh. Kalitachuwinalh pulaktiy talakkaxlan: xasasti talakkaxlan chu talakkaxlan xla Tamapakgsin (Luc. 22:19, 20, 28-30). * Umakgolh pulaktiy talakkaxlan kamaxkilh talakaskin apóstoles chu amakgapitsi kstalaninanin Cristo xlakata tlan mapakgsinanin chu sacerdotes nalitaxtukgo kʼakgapun (Apoc. 5:10; 14:1). Tiku xatalaksakni * nalitamakgtayakgo umakgolh pulaktiy talakkaxlan, wa xlakata kajwatiya xlakan tlan wakgo kaxtalanchu chu vino akxni talakapastaka akxni tinilh Cristo.
5. ¿Tuku namakglhtinankgo tiku xatalaksakni?
5 Atanu tuku xlakata tiku xatalaksakni amputunkgo akxni talakapastaka akxni tinilh Cristo wa pi tlan lilakpuwankgo xtakgalhkgalhinkan. Jehová kamaxkinit akgtum lu xlakaskinka takgalhkgalhin: nalatamakgo putum kilhtamaku kʼakgapun chu nitila katikamasputulh, akxtum nataskujkgo Jesucristo chu amakgapitsi tiku xatalaksakni, xliputumkan 144,000 nawankgo chu natayakgo kxlakatin Jehová (1 Cor. 15:51-53; 1 Juan 3:2). Tiku xatalaksakni liwana katsikgo pi makglhtinankgonit uma takgalhkgalhin. Pero xlakata tlan nalatamakgo kʼakgapun talakaskin ni namakgxtakgkgo Jehová (2 Tim. 4:7, 8). Lu lipaxuwakgo akxni lilakpuwankgo xtakgalhkgalhinkan (Tito 2:13). ¿Chu tuku tlan nawanaw xpalakata «amakgapitsi borregos»? (Juan 10:16). ¿Tuku xlakata ankgo akxni talakapastaka akxni tinilh Cristo? Kaʼakxilhwi.
¿TUKU XLAKATA ANKGO AMAKGAPITSI BORREGOS?
6. ¿Tuku xlakata amakgapitsi borregos ankgo akgatunu kata akxni talakapastaka akxni tinilh Cristo?
6 Pulaktum tuku xlakata amakgapitsi borregos ankgo akxni talakapastaka akxni tinilh Cristo wa xlakata anta namakgtawilakgo, ni xlakata nawakgo kaxtalanchu chu vino. Kkata 1938 akxni xapulana kawanika tiku kgalhkgalhikgo nalatamakgo kKatiyatni pi xʼankgolh akxni talakapastaka akxni tinilh Cristo. Revista La Torre del Vigía xla abril kata 1938 lichuwinalh pi «xlilat chu talakaskin» pi amakgapitsi borregos «na anta natawilakgo kʼuma lu xlakaskinka tamakxtumit chu naʼakxilhkgo tuku tlawakan anta». Chu lichuwinampa: «Xpalakatakan, uma kilhtamaku na lu lipaxuw litaxtu». Xtachuna la lu paxuwakgo tiku kawanikan pi kaʼankgolh niku tamakgaxtokgmaka, amakgapitsi borregos xatapaxuwan ankgo akxni talakapastaka akxni tinilh Cristo.
7. ¿Tuku xlakata amakgapitsi borregos lu kgaxmatputunkgo taʼakgchuwin nema mastakan akxni talakapastaka akxni tinilh Cristo?
7 Amakgapitsi borregos na lilakpuwankgo xtakgalhkgalhinkan. Lu kgaxmatputunkgo taʼakgchuwin nema mastakan akxni lakapastakkan akxni tinilh Cristo, xlakata lichuwinankan tuku natlawakgo Cristo chu 144,000 tiku natamapakgsinankgo xpalakatakan latamanin kTamapakgsin xla Akgtum Mil Kata. Jesucristo chu tiku natamapakgsinankgo akgtum Paraíso natlawakgo uma Katiyatni chu nakamakgtayakgo latamanin nialh nakgalhikgo talakgalhin. Amakgapitsi borregos lu lipaxuwakgo akxni lilakpuwankgo la nakgantaxtukgo tuku lichuwinan Biblia, chuna la tuku wan Isaías 35:5, 6; 65:21-23 chu Apocalipsis 21:3, 4. Akxni lilakpuwankgo la makxtum nakatatawila tiku lu kapaxkikgo, tlakg tatliwakglha xtakanajlakan chu kamakgtaya liwana nalakkaxwilikgo chuntiya naskujnanikgo Jehová (Mat. 24:13; Gál. 6:9).
8. Kalichuwinanti atanu tuku xlakata amakgapitsi borregos ankgo akxni talakapastaka akxni tinilh Cristo.
8 Atanu tuku xlakata amakgapitsi borregos ankgo akxni talakapastaka akxni tinilh Cristo wa pi kalimasiyaniputunkgo xtapaxkitkan tiku xatalaksakni chu pi katatayakgo. Biblia lichuwinalh pi xatalaksakni chu tiku kgalhkgalhimakgo nalatamakgo kKatiyatni makxtum xʼamakgo tawilakgo. Kaʼakxilhwi makgapitsi tuku xlichuwinankanit nema chuna limasiya.
9. Chuna la wan Zacarías 8:23, ¿tuku makgkatsikgo amakgapitsi borregos xpalakatakan tiku xatalaksakni?
9 (Kalikgalhtawakga Zacarías 8:23). Uma texto limasiya tuku makgkatsikgo amakgapitsi borregos xlakata xnatalankan, tiku xatalaksakni. Tachuwin «judío» wa kakilhchanima tiku xatalaksakni tiku lamakgolhku kKatiyatni (Rom. 2:28, 29). Unu, «kgalhakaw lakchixkuwin xalak tipalhuwa kachikinin» wa kakilhchanima amakgapitsi borregos. Xlakan kalichipaxnankgo tiku xatalaksakni, uma kilhchanima pi makxtum katalakgo chu ni kamakgxtakgkgo, chu akxtum katakakninanikgo Jehová. Wa xlakata, tiku kgalhkgalhimakgo nalatamakgo kKatiyatni ankgo akxni talakapastaka akxni tinilh Cristo xlakata nakalimasiyanikgo tiku xatalaksakni pi akxtum katalakgo.
10. ¿Tuku tlawanit Jehová xlakata nakgantaxtu tuku lichuwinan Ezequiel 37:15-19, 24, 25?
10 (Kalikgalhtawakga Ezequiel 37:15-19, 24, 25). Jehová tlawanit pi tiku xatalaksakni chu amakgapitsi borregos makxtum nalakgo, chuna kgantaxtunit tuku lichuwinalh Ezequiel. Anta kʼEzequiel talichuwinalh kgantiy kiwi: «Kiwi nema lakgchan Judá» (tribu niku xkalaksakkan tiku xmapakgsinankgo kʼIsrael) wa kilhchanima tiku xatalaksakni, chu kiwi «nema lakgchan Efraín» wa kakilhchanima tiku kgalhkgalhimakgo nalatamakgo kKatiyatni. * Jehová makxtum xʼama katlawa xlakata «kgantum kiwi» xlitaxtukgolh. Uma kilhchanima pi akxtum xʼamakgo skujnanikgo xMapakgsinakan, Cristo Jesús. Akgatunu kata, tiku xatalaksakni chu amakgapitsi borregos ankgo akxni talakapastaka akxni tinilh Cristo. Ni tapapitsikgo, wata “kgamputum borregos litaxtukgo chu kaj chatum mapuchwayanina” kgalhikgo (Juan 10:16).
11. ¿La kamaxkikgo xtamakgtaykan xnatalan Cristo «amakgapitsi borregos» nema kalichuwinankan kMateo 25:31-36, 40?
11 (Kalikgalhtawakga Mateo 25:31-36, 40). Kʼuma parábola, akxni lichuwinankan «borregos» wa kakilhchanima xaʼakgstitum latamanin tiku lamakgolh kxaʼawatiya kilhtamaku chu kgalhkgalhimakgo nalatamakgo kKatiyatni, chu watiya kakilhchanima atanu borregos. Xlakan ni kamakgxtakgkgo chu xatapaxuwan kamakgtayakgo xnatalan Cristo tiku xatalaksakni chu kamakgtayakgo namakgantaxtikgo tuku kalakgayawakanit: nalichuwinankgo Dios chu namasiyakgo (Mat. 24:14; 28:19, 20).
12, 13. ¿Tuku atanu tlawakgo amakgapitsi borregos xlakata nakamakgatayakgo xnatalan Cristo?
12 Akgatunu kata, akxni talakatsuwima akxni nalakapastakkan akxni tinilh Cristo, amakgapitsi borregos limasiyakgo pi katatayakgo xnatalan Cristo. ¿La tlawakgo? Lu liskujkgo xlakata nakawanikgo latamanin pi kaʼankgolh akxni natalakapastaka akxni tinilh Cristo (kaʼakxilhti recuadro « Xlakata talakatsuwima akxni nalakapastakkan akxni tinilh Cristo, ¿tuku tlan natlawayaw?»). Kxlikalanka katiyatni, lakkaxwilikgo tuku talakaskin xlakata namakgtlawakgo akxni talakapastaka akxni tinilh Cristo maski kxcongregacionkan ni anan tiku xatalaksakni. Amakgapitsi borregos lu lipaxuwakgo xlakata kamakgtayakgo xnatalan Cristo. Liwana katsikgo pi tuku xlakan tlawakgo xpalakatakan tiku xatalaksakni xtachuna komo wa xtlawanikgolh Jesús (Mat. 25:37-40).
13 ¿Tuku xlakata kimputumkan anaw akxni talakapastaka akxni tinilh Cristo maski kgalhkgalhimaw naʼanaw kʼakgapun o nalatamayaw kKatiyatni?
¿TUKU XLAKATA KIMPUTUMKAN ANAW?
14. ¿La limasiyakgonit Jehová chu Jesús pi lu kinkapaxkikgoyan?
14 Xlakata kapaxtikatsiniyaw Jehová chu Jesús xtapaxkitkan. Jehová pulaklhuwa la kinkalimasiyaninitan xtapaxkit. Pero akxni makamilh xKgawasa xlakata napati chu naniy kimpalakatakan wa tuku tlakg limasiyalh pi lu kinkapaxkiyan (Juan 3:16). Jesús na limasiyalh xtapaxkit akxni xatapaxuwan mastalh xlatamat kimpalakatakan (Juan 15:13). Xlikana pi nila katikaxokgoniw tapaxkit nema xlakan limasiyakgonit, pero chuna la linaw kilatamatkan tlan nalimasiyayaw pi kapaxtikatsinikgoyaw tuku tlawakgolh kimpalakatakan (Col. 3:15). Akxni anaw akxni talakapastaka akxni tinilh Cristo, limasiyayaw pi kapaxtikatsiniyaw xlakata lu kinkapaxkikgoyan chu kalimasiyaniyaw pi na lu kapaxkiyaw.
15. ¿Tuku xlakata tiku xatalaksakni chu amakgapitsi borregos lu kapaxtikatsinikgo Jehová chu Jesús xlakata talakgmaxtut?
15 Xlakata lu kapaxtikatsinikgoyaw Jehová chu Jesús xlakata talakgmaxtut (Mat. 20:28). Tiku xatalaksakni lu xtapalh liʼakxilhkgo talakgmaxtut xlakata wa tuku kamaxki takgalhkgalhin nalatamakgo kʼakgapun. Xlakata kanajlanikgo tamakamastan nema tlawalh Cristo, Jehová xaʼakgstitum kaliʼakxilha chu kamakgamakglhtinan chuna la xkamanan (Rom. 5:1; 8:15-17, 23). Amakgapitsi borregos na lu lanka xtapalh liʼakxilhkgo talakgmaxtut. Xlakata kgalhni nema Cristo stajmakgalh, Dios tlan kamakgamakglhtinan, tlan skujnanikgo chu tlan nalakgtaxtukgo akxni lama nawan «lhuwa tapatin» (Apoc. 7:13-15). Akxni tiku xatalaksakni chu amakgapitsi borregos ankgo akxni talakapastaka akxni tinilh Cristo akgatunu kata, limasiyakgo pi lu paxtikatsinikgo Jehová chu Jesús xlakata talakgmaxtut.
16. ¿Tuku atanu kinkamakgpuwantiniyan naʼanaw akxni talakapastaka akxni tinilh Cristo?
16 Xlakata kgalhakgaxmatputunaw Jesús. Maski kgalhkgalhimaw naʼanaw kʼakgapun o nalatamayaw kKatiyatni, kimputumkan kgalhakgaxmataw limapakgsin nema Jesús mastalh kkatsisni akxni lakkaxwililh pi xlakapastakka akxni nilh. Xla wa: «Chuntiya katlawatit uma xlakata nakililakapastakatit» (1 Cor. 11:23, 24).
¿TUKU XLAKATA LITAMAKGTAYAYAW KIMPUTUMKAN AKXNI ANAW?
17. ¿Tuku xlakata tlakg lakatsu tawilaniyaw Jehová akxni anaw akxni lakapastakkan akxni tinilh Cristo?
17 Xlakata tlakg talakatsuwiniyaw Jehová (Sant. 4:8). Chuna la akxilhwi, akxni anaw akxni talakapastaka akxni tinilh Cristo lilakpuwanaw takgalhkgalhin nema Jehová kinkamaxkiyan chu tapaxkit nema kinkalimasiyaninitan (Jer. 29:11; 1 Juan 4:8-10). Liwana kanajlayaw pi namakgantaxti tuku malaknunit chu pi xtapaxkit nikxni katisputli. Akxni lilakpuwanaw uma, tlakg paxkiyaw Jehová chu tlakg lakatsu tawilaniyaw (Rom. 8:38, 39).
18. ¿Tuku kitaxtu akxni lilakpuwanaw xliʼakxilhtit Jesús?
18 Xlakata kinkamakgpuwantiniyan nastalaniyaw xliʼakxilhtit Jesús (1 Ped. 2:21). Akxni talakatsuwima kilhtamaku akxni nalakapastakkan akxni tinilh Cristo, likgalhtawakgayaw tuku tlawalh Jesús kxaʼawatiya semana akxni latamalh kKatiyatni, la makgnika chu la lakastakwanalh. Chu akxni lakgchan ama kilhtamaku, anta ktaʼakgchuwin kinkamalakapastakakanan tapaxkit nema Jesús kinkakgalhiniyan (Efes. 5:2; 1 Juan 3:16). Akxni likgalhtawakgayaw pi Jesús xatapaxuwan tamakamastalh chu akxni lilakpuwanaw xlatamat kinkamakgpuwantiniyan nalatamayaw «chuna la Jesús latamalh» (1 Juan 2:6).
19. ¿Tuku kilitlawatkan xlakata chuntiya natamakgxtakgaw kxtapaxkit Dios?
19 Xlakata kinkamakgpuwantiniyan chuntiya natamakgxtakgaw kxtapaxkit Dios (Jud. 20, 21). Akxni lu liskujaw xlakata nakgalhakgaxmataw, namasantujliyaw xtukuwani chu namakgapaxuwayaw xnaku, tamakgxtakgaw kxtapaxkit (Prov. 27:11; Mat. 6:9; 1 Juan 5:3). Akxni anaw akxni talakapastaka akxni tinilh Cristo kinkamakgpuwantiniyan natlawayaw tuku makgapaxuwa Jehová chu xtachuna pi wanimaw: «¡Ankgalhin miʼamigo klitaxtuputun!».
20. ¿Tuku xlakata anaw akxni talakapastaka akxni tinilh Cristo?
20 Maski kgalhkgalhimaw nalatamayaw kʼakgapun o kKatiyatni, anan lhuwa tuku kinkamakgpuwantiniyan naʼanaw akxni talakapastaka akxni tinilh Cristo akgatunu kata. Akxni anaw lakapastakaw chatum tiku lu paxkiyaw: Jesucristo. Chu lakapastakaw tuku tlakg limasiya pi Jehová lu kinkapaxkiyan: akxni mastalh xlatamat xkgawasa xlakata nakinkalakgmaxtuyan. Uma kata, viernes 15 xla abril kata 2022 natalakapastaka akxni tinilh Cristo. Paxkiyaw Jehová chu xKgawasa. Wa xlakata, ni anan atanu tuku tlakg xlakaskinka, nixawa naʼanaw akxni natalakapastaka akxni tinilh Cristo.
TAKILHTLIN 16 Kamalankiw Jehová xlakata xKgawasa
^ Kata kata amputunaw akxni talakapastaka akxni tinilh Cristo, maski kgalhkgalhimaw naʼanaw kʼakgapun o kgalhkgalhimaw nalatamayaw kKatiyatni. Kʼuma artículo nalichuwinanaw tuku xlakata anaw akxni talakapastaka akxni tinilh Cristo chu la litamakgtayayaw.
^ Anta krevista Makatsinina 15 xla octubre kata 2014, kpáginas 15 asta 17 kʼartículo «Nalitaxtukgo “tamapakgsin xla sacerdotes”», tlakg talichuwinan xlakata xasasti talakkaxlan chu talakkaxlan xla Tamapakgsin.
^ TUKU LU XLAKASKINKA: Kʼuma artículo akxni nalichuwinanaw xatalaksakni wa kakilhchanima tiku kalaksakkanit xlakata naʼankgo kʼakgapun chu lamakgolhku unu kKatiyatni.
^ Anta klibro La adoración pura de Jehová: ¡por fin restaurada!, kpáginas 130 asta 135, kpárrafos 3 asta 17 tlakg talichuwinan tuku wan capítulo 37 xla Ezequiel xpalakata kgantiy kiwi.
