ARTÍCULO NEMA NATALIKGALHTAWAKGA 3
Jehová tlawa pi tlan kakinkakitaxtunin
«Jehová xmakgtayama José chu Jehová xtlawa pi putum tlan xkitaxtunilh» (GÉN. 39:3).
TAKILHTLIN 30 KiʼAmigo, kinTlat, kiDios
TUKU NATLICHUWINAN a
1, 2. 1) ¿Tuku xlakata ni kaks lilakawanaw akxni titaxtuyaw tuku tuwa? 2) ¿Tuku nalichuwinanaw kʼuma artículo?
AKININ xlakskujnin Jehová, ni kaks kinkamalakawaniyan akxni titaxtuyaw tuku tuwa. Katsiyaw tuku wan Biblia: «Talakaskin natitaxtuyaw lhuwa tapatin xlakata natanuyaw kxTamapakgsin Dios» (Hech. 14:22). Chu na katsiyaw pi makgapitsin kintaʼakglhuwitkan kajwatiya tlan nalakgsputa akxni nalatamayaw kxasasti kakilhtamaku, niku «nialhti katinilh, nialhti katilipuwa, nialhti katitasalh, nialhti katikatsanajwalh» (Apoc. 21:4).
2 Jehová ni mapanu tuku tuwa titaxtumaw, pero kinkamakgtayayan natayaniyaw. Kaʼakxilhwi tuku kawanilh apóstol Pablo kstalaninanin Cristo tiku xlamakgo kRoma. Akxni xlichuwinama tuku tuwa xtitaxtumakgolh xla chu xnatalan, katsokgnanilh: «Xlakata xtamakgtay tiku kinkapaxkin, akinin katlajamaw putum umakgolh» (Rom. 8:35-37). Uma kilhchanima pi Jehová tlan natlawa pi akxni titaxtumaw tuku tuwa tlan kakinkakitaxtunin. Kaʼakxilhwi tuku tlawalh xlakata José tlan xkitaxtunilh chu la tlan nakinkamakgtayayan akinin la uku.
AKXNI WI TUKU KAJ LAKAPALA TALAKGPALI
3. ¿La lakapala talakgpalilh xlatamat José?
3 Jacob lu xpaxki xkgawasa, José (Gén. 37:3, 4). Wa xlakata xnapuxkun José tsukukgolh sitsinikgo. Chu alistalh, xlakan kastamaxkikgolh madianitas. Umakgolh lakchixkuwin linkgolh José kʼEgipto, nema lhuwa ciento kilómetros xlilakgamakgat xwi. Anta ankgolh stamakgankgo, chu stamaxkikgolh Potifar, tiku kskuja kxpumapakgsin faraón. Xlatamat José lu lakapala talakgpalilh: xla chatum kgawasa tiku lu xpaxkikan chu la uku chatum skujni xlitaxtu kʼEgipto (Gén. 39:1).
4. ¿Tuku tuwa natitaxtuyaw nema xtachuna la tuku titaxtulh José?
4 Biblia wan: «Putum kaʼakgspula tuku nitlan» (Ecl. 9:11). Min kilhtamaku kinkalakgchinan taʼakglhuwit nema na kalakgchin putum latamanin (1 Cor. 10:13). O max wi tiku kinkalikgalhkgamananan, chu asta kinkaputsastalanikanan kaj xlakata kstalaninanin Cristo akinin (2 Tim. 3:12). Maski chuna, Jehová natlawa pi tlan kakinkakitaxtunin. Kaʼakxilhwi la makgtayalh José.
Jehová tlawalh pi José tlan xkitaxtunilh akxni staka kxchik Potifar xlakata skujni xlitaxtulh (Kaʼakxilhti párrafo 5).
5. ¿Tuku akxilhli Potifar? (Génesis 39:2-6).
5 (Kalikgalhtawakga Génesis 39:2-6). Potifar akxilhli pi José lu skgalala chu lu skulujwa xwanit. Chu katsilh tuku xlakata chuna xwanit. Akxilhli pi «Jehová xmakgtayama José chu Jehová xtlawa pi putum tlan xkitaxtunilh». b Alh kilhtamaku, Potifar xmakgtayana limaxtulh José chu lakgayawalh putuminika xchik. Wa xlakata, uma chixku makglhtinalh lhuwa tasikulunalin.
6. ¿La max xmakgkatsi José?
6 Kalilakpuwaw tuku xtitaxtuma José. ¿Tuku lu xlakaskin José? ¿Pi Potifar xʼakxilhli xlakata wi tuku xmaxkilh? Tuku xla tlakg xlakaskin wa pi nialh skujni xlitaxtulh chu xtaspitli kxchik xtlat. Maski José lhuwa tuku xlakgayawakanit, chuntiya kskujni xlitaxtu chatum chixku tiku xkakakninani atanu dioses. Jehová ni tlawalh pi José nialh kskujni Potifar xlitaxtulh. Chu alistalh tlakg lu tuwa tu xʼama titaxtu.
KOMO TLAKG NITLAN NAKITAXTU
7. ¿Tuku xlakata wanaw pi tlakg lu nitlan kitaxtunilh José? (Génesis 39:14, 15).
7 Chuna la lichuwinan capítulo 39 xla Génesis, xpuskat Potifar xlakgati José chu makglhuwa tlawaputulh pi xtatalakgxtumilh. Pero José nikxni chuna tlawalh. Xpuskat Potifar lu lisitsilh, wa xlakata limawakalh José pi xlikgamanamputun (kalikgalhtawakga Génesis 39:14, 15). Akxni Potifar katsilh uma, matamaknuninalh akglhuwa kata kpulachin José (Gén. 39:19, 20). ¿La xwanit pulachin anta? Tachuwin xahebreo nema maklakaskilh José xlakata nalichuwinan pulachin kilhchanima «tawaxni» o niku «puwaxnankanit». Uma kinkamakgatekgsniyan pi anta kapukswa xwanit chu lu nitlan xwi (Gén. 40:15; nota). Nachuna, Biblia lichuwinan pi José milh kilhtamaku xlitantuchikanit chu xlipixchikanit cadena (Sal. 105:17, 18). Tlakg lu nitlan la kitaxtunilh: pulana chatum skujni xwanit tiku xlipawankan pero la uku chatum tachin xlitaxtu.
8. ¿Tuku liwana kilikatsitkan maski tlakg tuwa tu natitaxtuyaw?
8 ¿Wi tuku titaxtunitaw nema lu xlilakgaputsayaw chu tlakg nitlan xkinkakitaxtuniman maski xtlawayaw oración? Max chuna xkinkaʼakgspulan. Jehová ni mapanu taputsan nema kgalhiyaw kxkakilhtamaku Satanás (1 Juan 5:19). Pero tlan liwana nakanajlayaw pi kinTlatkan kuenta tlawa putum tuku titaxtuyaw chu kinkalilakgaputsayan (Mat. 10:29-31; 1 Ped. 5:6, 7). Na chuna kinkamalaknuniyan: «Nikxni ktimakgxtakgni chu ankgalhin nakmakgtayayan» (Heb. 13:5). Jehová nakinkamakgtayayan natayaniyaw tuku lakpuwanaw pi nila katitayaniw. Wa uma tuku titaxtulh José.
Jehová ankgalhin xtawi José asta akxni tamaknuka kpulachin, wa xlakata lakgayawaka pi xkakuentajtlawalh tachin (Kaʼakxilhti párrafo 9).
9. ¿Tuku limasiya pi Jehová xtawi José akxni xtanuma kpulachin? (Génesis 39:21-23).
9 (Kalikgalhtawakga Génesis 39:21-23). Jehová tlawalh pi putum tuku xtlawa José tlan xkitaxtunilh maski lu tuwa tuku xtitaxtuma kxlatamat. ¿Tuku lalh? Tiku xkuentajtlawa pulachin tsukulh lipawan José, tiku lakgayawalh xlakata xkapulalilh amakgapitsin tachin. Biblia wan pi «tiku xkuentajtlawa pulachin ni xlilakgaputsa taskujut nema xlakgayawanit José». Taskujut nema lakgayawaka José tlawalh pi atanu tuku nalilakpuwan. ¿Ni xlikana pi lu kaks kinkamalakawaniyan pi maxkika limapakgsin chatum chixku tiku xlimawakakanit pi xlikgamanamputun xpuskat chatum tiku kskuja kxpumapakgsin mapakgsina? Chuna la wan Génesis 39:23, «Jehová xmakgtayama José chu Jehová xtlawa pi tlan xkitaxtulh putum tuku xtlawa».
10. ¿Tuku xlakata José max xmakgkatsi pi ni putum tlan xkitaxtunima?
10 Kalilakpuwamparaw tuku xtitaxtuma José. ¿Makgkatsilh pi putum tlan xkitaxtunima akxni xtanuma kpulachin xlakata nitlan tuku xlimawakakanit?, ¿tuku tlakg xlakaskin José?, ¿kaj xlakaskin pi tiku xkuentajtlawa pulachin tlan xʼakxilhli? Xlikana pi tuku xla xlakaskin wa pi xtamakxtuka kpulachin. José asta skinilh chatum tiku xʼamaja taxtu kpulachin pi xlitachuwinalh faraón xlakata xla na xtamakxtuka (Gén. 40:14). Pero komo ama chixku ni lakapala litachuwinalh faraón, titaxtupa akgtiy kata chu José chuntiya xtanuma kpulachin (Gén. 40:23; 41:1, 14). Pero xlakata Jehová makgtayalh, José chuntiya tlan kitaxtunilh. ¿Tuku xlakata?
11. ¿Tuku tlan xtlawa José xlakata xtamakgtay Jehová, chu la makgtayanalh uma xlakata xkgantaxtulh xtalakaskin Jehová?
11 Akxni José xtanuma kpulachin, Jehová tlawalh pi mapakgsina xalak Egipto makgtiy xmanixnalh. Faraón xkatsiputun tuku xkilhchanima xtamanixnat. Wa xlakata akxni katsilh pi José tlan xwan tuku xkilhchanima tamanixnat, matasaninalh. Xlakata Jehová makgtayalh, José ni kajwatiya wanilh tuku xkilhchanima xtamanixnat, wata na wanilh tuku xlitlawat xwanit. Chu uma lu kaks malakawanilh faraón. Akxni akxilhli pi Jehová xmakgtayama uma kgawasa, lakgayawalh pi wa xpulalilh la xmastokgka liwat kputuminika Egipto (Gén. 41:38, 41-44). Titaxtulh kilhtamaku, akglhuwa kata analh tatsinkstat, chu ni kajwatiya kʼEgipto, nachuna kCanaán, niku xwilakgo xfamilia José. Xlakata talakgatay nema xkgalhi José, tlan kamakgtayalh xfamilia, familia niku xʼama min Mesías.
12. ¿Tuku tlawalh Jehová xlakata José tlan xkitaxtunilh?
12 Kalilakpuwaw putum tuku titaxtulh José. ¿Tiku tlawalh pi Potifar xʼakxilhli José akxni xla kaj chatum skujni xlitaxtu? ¿Tiku tlawalh pi xkuentajtlawana pulachin xkamakuentajlilh amakgapitsin tachin? ¿Tiku tlawalh pi faraón xmanixnalh chu tiku makgtayalh José xlakata xwa tuku xkilhchanima xtamanixnat? ¿Tiku tlawalh pi xlakgayawaka pi namastokga liwat kʼEgipto? (Gén. 45:5). Liwana tasiya pi wa Jehová tiku tlawalh pi putum tuku José xtlawa tlan xkitaxtunilh. Jehová limaklakaskilh tuku nitlan xlakkaxwilikgonit xnatalan José xlakata namakgantaxti xtalakaskin.
TUKU TLAWA JEHOVÁ XLAKATA TLAN NAKINKAKITAXTUNIYAN
13. ¿Ankgalhin wi tuku tlawa Jehová akxni titaxtumaw tuku tuwa?
13 Tuku titaxtulh José kxlatamat wi tuku lu xlakaskinka kinkamasiyaniyan. ¿Ankgalhin wi tuku tlawa Jehová akxni titaxtuyaw tuku tuwa? ¿Ankgalhin tlawa pi tuku ni tlan kinkaʼakgspulaman tlan nakitaxtu? Biblia ni wan komo uma chuna la (Ecl. 8:9; 9:11). Pero wi tuku liwana katsiyaw: akxni titaxtumaw tuku tuwa, Jehová ankgalhin akxilha chu kgaxmata akxni tasaskiniyaw (Sal. 34:15; 55:22; Is. 59:1). Chu ni kajwatiya uma. Kinkamakgtayayan natayaniyaw tuku tuwa titaxtumaw. ¿La tlawa?
14. ¿La kinkamakgtayayan Jehová akxni titaxtuyaw tuku tuwa?
14 Jehová tlan kinkamamakgkatsiniyan chu kinkamakgpuwantiniyan kilhtamaku akxni tlakg maklakaskinaw (2 Cor. 1:3, 4). Wa uma tuku akxilhli Eziz, chatum tala xalak Turkmenistán tiku akgtiy kata tamaknuka kpulachin xlakata xtakanajla. Xla wan: «Tsisa akxni xʼamaka kilakputsananikan, chatum tala kimasiyanilh Isaías 30:15, niku wan: “Lakgtliwakgan nawanatit komo kaks natayayatit chu nakilipawanatit”. Umakgolh tachuwin lu kimakgtayalh nakkgalhi takaksni chu naklipawan Jehová. Uma versículo lu kimatliwakglhli putuminika kilhtamaku nema ktanulh kpulachin». ¿Lakapastakaw akxni xtitaxtumaw tuku lu tuwa niku Jehová tlan kinkamamakgkatsinin chu kinkamakgpuwantinin?
15, 16. ¿Tuku kinkamasiyaniyan tuku titaxtulh Tori?
15 Xlikana pi akxni titaxtuyaw tuku tuwa ni akxilhaw la Jehová kinkamakgtayayan asta akxni titaxtunita kintaʼakglhuwitkan. Chatum tala tiku wanikan Tori akxilhli pi uma chuna la. Xkgawasa, Mason, akgchaxan kata makgapatinalh cáncer chu alistalh nilh. Tori lu makgapatinalh uma. Xla wan: «Ni anan atanu tuku tlakg tuwa natitaxtu chatum tse nixawa nani xkgawasa». Chu wampa: «Putum natlatni na chuna lakpuwankgo la klakpuwan, pi tlakg tuwa naʼakxilha la patinama minkgawasa nixawa wix napatinana».
16 Maski lu tuwa tuku titaxtulh, alistalh Tori lilakpuwa putum tuku xtlawanit Jehová xlakata namakgtaya. Wan: «Akxni klilakpuwan uma kilhtamaku, tlan kakxilha la Jehová kinkuentajtlawalh chu kilimasiyanilh tapaxkit putum kilhtamaku akxni Mason xtatatla. Klakapastaka pi asta akxni kinkgawasa tlakg xtaliwakani xtajatat, natalan akgtiy hora xlimakgat niku xminkgoyacha xlakata nachinkgo kʼhospital. Ankgalhin anta xtawilakgo xlakata nakinkamakgtayakgoyan. Chu nachuna kinkalimakgtayakgon xtuminkan. Asta akxni xaktitaxtumaw tuku lu tuwa, nitu kinkatsankganin». Jehová kamaxkilh Tori chu Mason tuku lu xmaklakaskimakgo xlakata tlan xtayanikgolh (kaʼakxilhti recuadro « Jehová kinkamaxkin tuku lu xakmaklakaskimaw»).
KAʼAKXILHWI TASIKULUNALIN NEMA KINKAMAXKINITAN JEHOVÁ
17, 18. ¿Tuku nakinkamakgtayayan naʼakxilhaw chu napaxtikatsiniyaw Jehová xlakata tamakgtay nema kinkamaxkiyan akxni titaxtuyaw tuku tuwa? (Salmo 40:5).
17 (Kalikgalhtawakga Salmo 40:5). Tuku makgantaxtiputun tiku tawaka kʼakgtum sipi wa pi nachan kxʼakgspun. Pero chuna la natawakatilha lakalhuwa niku tlan natachokgo xlakata tlan naʼakxilha tuku lu lakglilakgatit tasiya. Xtachuna la uma liʼakxilhtit, ankgalhin talakaskin nalilakpuwanaw la Jehová kinkamakgtayaman xlakata tlan natayaniyaw tuku tuwa titaxtumaw. Akgatunu kilhtamaku kalilakpuwanti uma takgalhskinin: «¿Tuku tasikulunalin kimaxkilh Jehová uma kilhtamaku? Maski chuntiya kkgalhi taʼakglhuwit, ¿tuku tlawama Jehová xlakata chuntiya naktayani?». Kaʼakxilhwi tasikulunalin nema kinkamaxkiyan Jehová akgatunu kilhtamaku.
18 Tlan naskiniyaw Jehová pi xmasputulh kintaʼakglhuwitkan nema titaxtumaw (Filip. 4:6). Pero ni kapatsankgaw tasikulunalin nema kgalhiyaw la uku. Katsiyaw pi Jehová kinkamalaknuniyan pi xla nakinkamaxkiyan litliwakga chu kinkamakgtayayan tlan natayaniyaw. Wa xlakata ankgalhin kapaxtikatsiniw xlakata tamakgtay nema kinkamaxkiyan. Komo chuna natlawayaw, naʼakxilhaw pi Jehová kinkamakgtayaman xlakata tlan nakinkakitaxtuniyan maski lu tuwa tuku titaxtumaw, chuna la makgtayalh José (Gén. 41:51, 52).
TAKILHTLIN 32 ¡Katataya Dios!
a Akxni titaxtuyaw tuku tuwa, max nalakpuwanaw pi nitlan kinkakitaxtuniman. Max nalakpuwanaw pi kajwatiya akxni titaxtunita kintaʼakglhuwitkan tlan nawanaw pi tlan kinkakitaxtunin. Pero tuku titaxtulh José wi tuku lu xlakaskinka kinkamasiyaniyan: Jehová tlan natlawa pi tlan kakinkakitaxtunin asta maski lu tuwa tuku titaxtumaw. ¿La tlawa? Naʼakxilhaw kʼuma artículo.
b Maski ni akglhuwa versículos xalak Biblia lichuwinan tuku lalh kxlatamat José akxni skujni xlitaxtu, max tuku titaxtulh kxlatamat akxni skujni xwanit akglhuwa kata makgapalalh.
