1. ¿La lakpuwana wix pi tasiya Jehová?

 ¿MINIT kilhtamaku lilakpuwanita la tasiya Jehová? Akxni tlawaniya oración, ¿la lakpuwana pi tasiya? Maski nila akxilhaw, Biblia tipalhuwa la limapakuwi. Akgtum liʼakxilhtit, wan pi «chichini chu escudo», chu «lhkuyat nema putum malakgsputu» (Sal. 84:11; Heb. 12:29). Palakachuwina Ezequiel lichuwinalh pi Jehová xtasiya la akgtum chiwix xazafiro, akgtum chiwix nema lu maxkgakgenan chu na xtasiya la xmakgxkgakganat chamakxkulit (Ezeq. 1:​26-28). Kaks lilakawanaw o max tsinu pekuanaw akxni lilakpuwanaw pi chuna tasiya.

2. ¿Tuku xlakata makgapitsi tuwa makgkatsikgo natalakatsuwinikgo Dios?

² Xlakata nila akxilhaw Jehová, max tuwa makgkatsiyaw nakanajlayaw pi xla kinkapaxkiyan. O max xlakata kintlatkan nikxni kinkapaxkin, uma tlawa pi nalakpuwanaw pi Dios nikxni kintikapaxkin. Pero lu tlan pi Jehová akgatekgsa la makgkatsiyaw chu katsi tuku xlakata tuwa makgkatsiyaw natalakatsuwiniyaw. Xlakata nakinkamakgtayayan naʼakgatekgsaw pi xla kinkapaxkiyan, kBiblia kinkalitachuwinanan la likatsi.

3. ¿Tuku xlakata tlakg nalichuwinanaw xlakata Jehová chu xtapaxkit?

³ Tapaxkit akgtum tachuwin nema limasiya la likatsi Jehová (1 Juan 4:8). Wa uma tayat nema tlakg lilakgapaskan; putum tuku xla tlawa chuna tlawa xlakata paxkinan. Xtapaxkit lu lanka chu tliwakga, chu asta kapaxki tiku ni paxkikgo (Mat. 5:​44, 45). Kʼuma artículo, nalichuwinanaw xlakata Jehová chu xtapaxkit. Komo tlakg nalakgapasaw, tlakg napaxkiyaw.

JEHOVÁ LU KINKAPAXKIYAN

4. ¿La makgkatsiya wix akxni lilakpuwana pi Jehová paxkinan? (Na kaʼakxilhti dibujo).

⁴ «Jehová lu xapaxkina» (Sant. 5:11). Biblia tamalakxtumi Jehová la chatum xapaxkina tse (Is. 66:​12, 13). Kalilakpuwanti chatum tse tiku kuentajtlawa chu limasiyani tapaxkit kskgata. Xatapaxuwan chaxa chu akxni tachuwinan ni lakakilhni. Akxni aktsu skgata tasa o wi tuku katsani, xatse lakapala an akxilha  chu maxki tuku maklakaskin. Xtachuna la uma tse, Jehová nakinkamakgtayayan akxni lipuwamaw o lakgaputsamaw. Wa xlakata salmista wa: «Akxni lu xaklilakgaputsama tuku nitlan xaktitaxtuma, wix xkimakgoxamixiya chu skaya xkimamakgkatsiniya» (Sal. 94:19).

5. ¿Tuku lakpuwana wix pi kilhchanima xtapaxkit Jehová nema ni makgxtakgnan?

⁵ Jehová ni makgxtakgnan (Sal. 103:8). Xla chuntiya kinkapaxkiyan maski tlawayaw tuku nitlan. Israelitas makglhuwa nitlan mamakgkatsinikgolh Jehová; pero akxni nitlan xlimakgkatsikgo xtalakgalhinkan, xla xkalimasiyani pi chuntiya xkapaxki. Makgtum, Jehová wanilh xkachikin: «Lu xlakaskinka kakxilhni, makglhtinanti kakni, chu akit kpaxkiyan» (Is. 43:​4, 5). Chu Jehová ni talakgpalinit. Tlan nalipawanaw pi na kinkapaxkiyan. Asta maski natlawayaw akgtum lanka talakgalhin, xla ni kintikamakgxtakgni. Komo xlikana nitlan nalimakgkatsiyaw tuku tlawanitaw chu naputsayaw xtamakgtay, xla chuntiya nakinkapaxkiyan. Kinkawaniyan pi xatapaxuwan nakinkatapatiyan (Is. 55:7). Biblia wan pi akxni Jehová tapatinan, tlawa pi nakgalhiyaw takaksni (Hech. 3:19).

6. ¿Tuku kinkamasiyaniyan Zacarías 2:8 xlakata Jehová?

⁶ (Kalikgalhtawakga Zacarías 2:8). Jehová wan pi litaxtuyaw chuna la xlakgastapu o xpupila. Lakgastapu lu xlakaskinka chu lu xlitakuentajtlawat. Wa xlakata, xtachuna la komo xkinkawanin: «Akxni wi tiku katlawaniyan tuku nitlan, tlawanima tuku nitlan tuku lu xlakaskinka kliʼakxilha». Xlakata Jehová lu kinkapaxkiyan, nitlan limakgkatsi tuku akinin nitlan limakgkatsiyaw chu kinkakuentajtlawaputunan. Akxni patinanaw xla na patinan. Wa xlakata tlan nawaniyaw: «Kakimakgtakgalhti chuna la makgtakgalha milakgastapu» (Sal. 17:8).

7. ¿Tuku xlakata talakaskin namakanajliyaw kinakujkan pi Jehová kinkapaxkiyan?

⁷ Jehová lakaskin pi wix kakanajla pi xla paxkiyan. Xla akgatekgsa pi makgapitsi tuku titaxtunita kmilatamat o taʼakglhuwit nema kgalhiya la uku max malakpuwaniyan pi xla ni paxkiyan. Wa xlakata lu xlakaskinka pi miʼakstu namakanajliya minaku pi xla paxkiyan. ¿Tuku namakgtayayan chuna natlawaya? Kalilakpuwanti la limasiya Jehová pi paxki Jesús, pi kapaxki tiku xatalaksakni chu pi  kinkapaxkiyan putum akinin. Wa uma tuku nalichuwinanaw la uku.

JEHOVÁ LIMASIYA XTAPAXKIT

8. ¿Tuku xlakata Jesús liwana xkatsi pi xTlat xpaxki?

⁸ Jehová chu xKgawasa akglhuwata kata akxtum skujkgonit. Wa xlakata lu tlan latalalin chu lu lapaxki. Wa tiku tlakg makgasa latamakgonit chu lu tlan latalalinkgo. Anta kMateo 17:​5, Jehová liwana wa pi xpaxki Jesús. Xla ni kajwatiya wa «lu tlan kimamakgkatsini», wata xlakata xlakaskin pi xkatsiw la xlilhuwa xpaxki Jesús chu pi lu xmakgapaxuwa tuku xʼama tlawa, wa: «Wa uma kinKgawasa, tiku lu kpaxki» (Efes. 1:7). Jesús liwana xkatsi pi Jehová xpaxki. Wa xlakata makglhuwa lichuwinalh pi xTlat xpaxki (Juan 3:35; 10:17; 17:24).

9. ¿Tuku limasiya pi Jehová kapaxki tiku xatalaksakni? (Romanos 5:5).

⁹ Jehová na kalimasiyani xtapaxkit tiku xatalaksakni (kalikgalhtawakga Romanos 5:5). Tachuwin nema maklakaskinka akxni tsokgwilika uma versículo, ma’akgatekgsninan pi tapaxkit nema Jehová kakgalhini tiku xatalaksakni lu tliwakga chu asta tlan tamalakxtumikan chuna la xlitliwakga tlawan akgtum kgalhtuchokgo. Tiku xatalaksakni katsikgo pi “Dios kapaxki” (Jud. 1). Putum tiku xatalaksakni nachuna lakpuwankgo la apóstol Juan: «¡Kaʼakxilhtit lu lanka tapaxkit nema kinkakgalhiniyan xaTlat xlakata kinkalimapakuwikanan xkamanan Dios!» (1 Juan 3:1). Pero ¿kajwatiya kapaxki Jehová tiku xatalaksakni? Ni. Chuna la naʼakxilhaw, Jehová limasiyanit pi kapaxki putum kskujnin.

10. ¿Tuku limasiya pi Jehová lu kinkapaxkiyan?

¹⁰ ¿Tuku limasiya pi Jehová lu kinkapaxkiyan? Wa talakgmaxtut. Uma limasiya pi ni anan atanu tiku tlakg kinkapaxkiyan nixawa Jehová (Juan 3:16; Rom. 5:8). Jehová makamastalh xKgawasa xlakata xnilh kimpalakatakan chu chuna tlan xkinkatapatin kintalakgalhinkan chu tlan xʼamigos xlitaxtuw (1 Juan 4:10). Akxni tlakg lilakpuwanaw la xlilhuwa xtapalh tuku lixokgonankgolh Jehová chu Jesús, tlakg liwana akgatekgsaw la xlilhuwa kinkapaxkikgoyan kinchatunukan (Gál. 2:20). Jehová ni mastalh talakgmaxtut kaj xlakata xmakgantaxtilh akgtum limapakgsin, wata chuna tlawalh xlakata kinkapaxkiyan. Limasiyalh xtapaxkit akxni makamastalh xKgawasa, tuku tlakg lhuwa xtapalh xkgalhi, chu mastalh talakaskin pi xmakgapatinanka chu xmakgnika kimpalakatakan.

11. ¿Tuku kinkamasiyaniyan Jeremías 31:3?

¹¹ Chuna la akxilhnitaw, Jehová ni kajwatiya wan pi kinkapaxkiyan, wata limasiya (kalikgalhtawakga Jeremías 31:3). Xla tlawanit pi natalakatsuwiniyaw xlakata kinkapaxkiyan (katamalakxtupi Deuteronomio 7:​7, 8). Ni anan tiku o tuku natlawa pi Dios nialh nakinkapaxkiyan (Rom. 8:​38, 39). ¿La makgkatsiya wix akxni lilakpuwana uma? La uku nalikgalhtawakgayaw Salmo 23. Chuna la nalikgalhtawakgatilhayaw, kaʼakxilhti la xlimakgkatsi David tapaxkit nema Jehová xkgalhini chu la namamakgkatsiniyan wix uma tapaxkit.

¿LA MAKGKATSIYA AKXNI LILAKPUWANA LA XLILHUWA PAXKIYAN JEHOVÁ?

12. ¿Tuku tlan xwanti xpalakata Salmo 23?

¹² (Kalikgalhtawakga Salmo 23:​1-6). Anta kSalmo 23, David lichuwinalh pi xlipawan pi Jehová xpaxki chu xkuentajtlawa. Anta wa pi Jehová xlitaxtu chuna la xMapuchwayanina, chu lichuwinalh la xlatalalin. David nitu xlipekuan xlakata xkatsi pi Jehová xpulalima. Ankgalhin xputsa xtamakgtay. Xkatsi pi Jehová ankgalhin xʼama paxki. Kaʼakxilhwi tuku xlakata David lu xlipawan Dios.

13. ¿Tuku xlakata David xkatsi pi Jehová xkuentajtlawa?

 ¹³ «Nitu kintitsankganilh». David xmakgkatsi pi Jehová lu liwana xkuentajtlawa xlakata ankgalhin xmaxkinit tuku xmaklakaskin. Na xkatsi pi xmakgapaxuwama Jehová chu pi xla xʼamigo xliʼakxilha. Wa xlakata, David liwana xkatsi pi kaxatukawa tuku xtitaxtulh kxlatamat, Jehová ankgalhin xʼama maxki tuku xmaklakaskilh. Xlipawan pi tapaxkit nema Jehová xkgalhini, tlakg lanka xwanit nixawa tuku xla xlilakgaputsa, chu uma xmakgapaxuwa chu tlan xmamakgkatsini (Sal. 16:11).

14. ¿La kinkalimasiyaniyan Jehová pi kinkapaxkiyan?

¹⁴ Jehová xatapaxuwan kinkakuentajtlawayan, liwaka akxni titaxtuyaw tuku tuwa. Kalichuwinaw tuku titaxtulh Claire, a tiku liwakaya 20 kata skujma kBetel. Xla lichuwinan pi lu nitlan limakgkatsilh akxni xfamilia tsukulh akgspula tuku nitlan: kaj xalan xʼakskitit xtlat nialh liwana skujli, xtala tsumat tamakxtuka kcongregación, xfamilia makgasputli xtumin chu makgatsankgakgolh xchikkan. ¿La limasiyalh Jehová pi xkakuentajtlawama? Claire wan: «Jehová kamaxkilh kifamilia putum tuku xmaklakaskinkgo chali chali. Tlakg lhuwa tuku kamaxkilh nixawa tuku akit xaklakpuwanit. Ni xmakgasni, klakapastaka la Jehová kilimasiyaninit xtapaxkit. Uma kimakgtaya naktayani akxni ktitaxtu tuku tuwa».

15. ¿Tuku makgtayalh David natatliwakglhpara? (Na kaʼakxilhti dibujo).

¹⁵ «Kimatliwakglhpara». David xtitaxtuma lhuwa tuku tuwa chu wa xlakata xmin kilhtamaku xlakgaputsa (Sal. 18:​4-6). Pero akxni xʼakxilha la Jehová xmakgtayama chu xlimasiyanima tapaxkit, xmakgtaya natatliwakglhpara. Makgkatsilh pi Jehová,  tiku xʼamigo xwanit, xtachuna la xmajaxa «kxakatlan kasakgatni» chu niku xʼanan «lhuwa chuchut». Uma matliwakglhi chu makgtayalh chuntiya xatapaxuwan naskujnani (Sal. 18:​28-32).

16. ¿La makgkatsinita wix pi Jehová matliwakglhparanitan?

¹⁶ Akxni titaxtuyaw tuku tuwa, akinin na tlan nawanaw: «Xlakata Jehová limasiyanit tapaxkit nema ni makgxtakgnan ni sputnitaw» (Lam. 3:22; Col. 1:11). Kalichuwinaw tuku akgspulalh Rachel. Lu lilipuwa akxni xchixku akgxtakgwililh chu makgxtakgli Jehová akxni xlamajku pandemia xla COVID-19. ¿Tuku tlawalh Jehová xlakata xmakgtayalh? Xla wan: «Kimalakapastakalh pi lhuwa tiku kimpaxkikgo. Kimaxkilh lhuwa amigos tiku xkilimaxtunikgo kilhtamaku, xkilinikgo liwat, xkimalakgachikgo mensajes chu textos nema lu xkimakgpuwantini, xkintalitsinkgo chu xkimalakapastakakgo pi Jehová xkinkuentajtlawama. Lu kpaxtikatsini Jehová pi kimaxkinit uma lanka familia tiku lu paxkinankgo».

17. ¿Tuku xlakata David tlan wa: «Ni ktipekuanilh tuku nitlan»?

¹⁷ «Ni ktipekuanilh tuku nitlan». David lhuwa xtalamakgasitsin xkgalhi chu makglhuwa kalipekua tawi xlatamat. Pero tapaxkit nema Jehová xkgalhini xmakgtaya nialh napekuan chu namakgkatsi pi xkuentajtlawamaka. Xmakgkatsi xtachuna la komo Jehová ankgalhin xpaxtuwi. Wa xlakata tlan wa: «Tlawalh pi nialhtu xakpekuanilh» (Sal. 34:4). Maski xmin kilhtamaku David lu xpekuan, tapaxkit nema Jehová xkgalhini tlakg tliwakga xwanit nixawa uma tapekua.

18. Akxni titaxtuyaw tuku tuwa nema kinkamakgapekuanan, ¿la kinkamakgtayayan xlakata katsiyaw pi Jehová kinkapaxkiyan?

¹⁸ Akxni titaxtuyaw tuku tuwa nema kinkamakgapekuanan, ¿la kinkamakgtayayan xlakata katsiyaw pi Jehová kinkapaxkiyan? Chatum precursora tiku wanikan Susi lichuwinan la makgkatsikgolh xla chu xchixku akxni xkgawasakan xʼakstu makgnika. Xla wan: «Akxni naʼakgspulayan uma tuku lu nitlan, namakgkatsiya pi nila tiku makgtayayan chu nila tuku tlawaya. Pero tapaxkit nema Jehová kinkalimasiyaninitan kinkamalakapastakanitan pi xla kinkakuentajtlawaman». Rachel, tiku lichuwinaw kpárrafo 16, wan: «Akgtum katsisni, akxni lu xaklipuwama chu lu xakpekuama chu xakmakgkatsi pi nialhla xaktayani, ktlawanilh oración Jehová chu ktsukulh tasa. Tunkun tlan kmakgkatsilh. Xtachuna la komo xkinchaxli chu xtsukulh kimakgoxamixi, xtachuna la chatum tse makgoxamixi kskgata. Alistalh  klhtatalh. Ankgalhin naklakapastaka uma kilhtamaku». Chatum kgolotsin xalak congregación tiku wanikan Tasos. Akgtati kata tamaknuka kpulachin xlakata ni soldado litaxtuputulh. Xla wan pi Jehová kuentajtlawalh chu limasiyanilh tapaxkit: «Tlakg lhuwa kimaxkilh chu ni kajwatiya tuku xakmaklakaskin, chu uma tlawalh pi tlakg xaklipawa. Nachuna, kimaxkilh xʼespíritu santo xlakata xakpaxuwalh maski lu nitlan tuku xaktitaxtuma. Uma kimasiyanilh pi komo akit tlakg xaklipawa, tlakg xakkama akxilha pi kimpaxki. Wa xlakata maski xakwi kpulachin, precursor regular klitaxtulh».

KATALAKATSUWINIW XAPAXKINA KIDIOSKAN

19. 1) Komo kanajlayaw pi Jehová kinkapaxkiyan, ¿tuku nawaniyaw kki’oracioneskan? 2) ¿Tukuya textos nema lichuwinankgo xlakata xtapaxkit Jehová tlakg tlan mamakgkatsiniyan? (Kaʼakxilhti recuadro « Textos nema kinkamakgtayayan nakatsiyaw pi Jehová kinkapaxkiyan»).

¹⁹ Tuku titaxtukgonit natalan tiku kalichuwinanitaw limasiya pi Jehová chatum «Dios tiku paxkinan» (2 Cor. 13:11). Xla kinkalilakgaputsayan chatunu akinin. Liwana katsiyaw pi kinkastiliwilinitan «xtapaxkit nema ni makgxtakgnan» (Sal. 32:10). Akxni tlakg nalilakpuwanaw la Jehová kinkalimasiyaninitan xtapaxkit, tlakg nakanajlayaw pi xla kinkakuentajtlawayan chu tlakg natalakatsuwiniyaw. Wa xlakata tlan natlawaniyaw oración chu tlan nawaniyaw xliputum kinakujkan pi lu maklakaskinaw xtapaxkit. Tlan nawaniyaw putum tuku lilakgaputsayaw chu tlan nalipawanaw pi xla kinkaʼakgatekgsniyan chu kinkamakgtayaputunan (Sal. 145:​18, 19).

20. ¿La kinkamakgtayayan xtapaxkit Jehová?

²⁰ Chuna la lhkuyat kinkamatsitsijwiyan akxni lonkgnan, xtapaxkit Jehová tlan kinkamamakgkatsiniyan akxni titaxtuyaw taputsan chu tuku tuwa. Wa xlakata kamakgamakglhtinanti xtapaxkit Jehová nema tlan namamakgkatsiniyan chu namaxkiyan takaksni. Chu putum akinin na kalimasiyaniw tapaxkit chu kawaw: «Kpaxki Jehová» (Sal. 116:1).