ARTÍCULO NEMA NATALIKGALHTAWAKGA 3
TAKILHTLIN 124 Putum kilhtamaku katataya Dios
Jehová namakgtayayan akxni natitaxtuya tuku tuwa
«Xla tlawa pi tliwakglh natayaya» (IS. 33:6).
TUKU NAʼAKXILHAW
Nakatsiniyaw tuku kilitlawatkan xlakata nalitamakgtayayaw tuku Jehová tlawa kimpalakatakan akxni titaxtuyaw tuku tuwa.
1, 2. ¿Tuku taʼakglhuwit max natitaxtuyaw xlakskujnin Jehová?
MAX wi tuku lu nitlan nakinkaʼakgspulayan nema natlawa pi natalakgpali kilatamatkan. Kalichuwinaw makgapitsi liʼakxilhtit. Akgtum kilhtamaku, chatum makuchina wanilh chatum tala tiku wanikan Luis a pi xkgalhi cáncer chu nialh makgas kilhtamaku xʼama latama. Monika chu xchixku, tiku kgolotsin xalak congregación xwanit, akxtum kskujnanimakgo Jehová, pero akgtum kilhtamaku xla katsilh pi xchixku akglhuwata kata lata xmakglakgalhinama. Olivia, tiku nina tamakgaxtokgnit, tsalataxtulh kxchik xlakata xtalakatsuwima akgtum lanka unisen. Akxni taspitli, akxilhli pi xchik xmalakgsputukanit. Lakapala talakgpalilh xlatamatkan. ¿Wix na titaxtunita tuku tuwa kmilatamat?
2 Xtachuna la amakgapitsi latamanin, xlakskujnin Jehová na titaxtuyaw tuku tuwa chu tatatlayaw. Nachuna, kilitayanitkan akxni kinkaputsastalanikgoyan tiku ni akxilhputunkgo xkachikin Dios. Maski Jehová masta talakaskin pi katitaxtuw tuku nitlan, xla malaknunit pi nakinkamakgtayayan (Is. 41:10). Xlakata Jehová kinkatawilan, tlan napaxuwayaw, tlan tuku nalaksakaw chu ni katimakgxtakgwi maski natitaxtuyaw tuku lu tuwa. Kʼuma artículo nalichuwinanaw pulaktati tuku tlawa Jehová xlakata nakinkamakgtayayan natayaniyaw tuku tuwa natitaxtuyaw kkilatamatkan. Na nalichuwinanaw tuku kilitlawatkan xlakata nalitamakgtayayaw tuku xla tlawa kimpalakatakan.
JEHOVÁ NAKINKAMAKGTAKGALHAN
3. ¿Tuku max tuwa namakgkatsiyaw natlawayaw komo titaxtumaw tuku lu tuwa?
3 Komo titaxtumaw tuku lu tuwa, max nila liwana lakapastaknanaw chu ni katsiyaw tuku nalaksakaw. ¿Tuku xlakata? Xlakata tuku titaxtumaw max lu kinkamakgalipuwanan, chu tuku lilakgaputsamaw tlawa pi nialh liwana nalakapastaknanaw chu nialh nakatsiyaw tuku natlawayaw. Chuna makgkatsikgolh chatiy natalan lakpuskatin tiku kalichuwinaw kxapulana párrafo. Olivia wan: «Akxni lanka unisen malakgsputulh kinchik, nialh xakkatsi tuku xakama tlawa». Monika lichuwinan la xmakgkatsi xlakata xchixku akgskgawilh: «Lu nitlan xakmakgkatsi, xtachuna la xkililhtukukanit akgtum cuchillo kkinaku. Nialhla xaktlawa kintaskujut nema xaktlawa chali chali. Nikxni klakpuwa pi chuna xʼama kiʼakgspula». ¿Tuku malaknunit Jehová pi natlawa kimpalakatakan akxni namakgkatsiyaw pi nialhla tayaniyaw?
4. ¿Tuku kinkamalaknuniyan Jehová kFilipenses 4:6, 7?
4 Tuku tlawa Jehová. Xla malaknu pi nakinkamaxkiyan «takaksni» (kalikgalhtawakga Filipenses 4:6, 7). Uma takaksni tlawa pi skayaj namakgkatsiyaw kaj xlakata tlan talalinaw Jehová. Uma ni anan tuku xtachuna chu «latamanin nila akgatekgskgo». ¿Minit kilhtamaku tlawaninita oración Jehová chu alistalh kaks lilakawanita xlakata skayaj makgkatsinita? Wa uma «takaksni» nema Dios masta.
5. ¿La kuentajtlawa kintapuwankan chu kinakujkan «takaksni» nema masta Dios?
5 Filipenses 4:7 na wan pi «takaksni» nema Dios masta nakuentajtlawa kinakujkan chu kintapuwankan. Tachuwin nema unu matitaxtikan «nakuentajtlawa», akgtum tachuwin nema xmaklakaskinkan xlakata nakalichuwinankan soldados tiku xkuentajtlawakgo akgtum kachikin. Tiku xlamakgo kʼuma kachikin tlan klhtatakgo xlakata xkatsikgo pi soldados xkuentajtlawamakgo kachikin. Xtachuna la uma, «takaksni» nema Dios masta kuentajtlawa kinakujkan chu kintapuwankan, skayaj kinkamamakgkatsiniyan chu ni pekuanaw (Sal. 4:8). Chu maski ni lakapala nalakkaxla kintaʼakglhuwitkan, tlan nakgalhiyaw takaksni chuna la akgspulalh Ana (1 Sam. 1:16-18). Akxni chuna nala, ni tuwa katimakgkatsiw liwana nalakapastaknanaw chu nalaksakaw tuku tlan.
Katlawa oración asta akxni namakgkatsiya «takaksni» nema Dios masta, nema nakuentajtlawa minaku chu mintalakapastakni (Kaʼakxilhti párrafos 4 asta 6).
6. ¿Tuku kilitlawatkan xlakata namakgkatsiyaw xtakaksni Dios? (Na kaʼakxilhti dibujos).
6 Tuku kilitlawatkan akinin. Xtachuna la tiku xlamakgo kʼakgtum kachikin tlan kskinikgo chatum soldado pi xkakuentajtlawalh, akinin na tlan naskiniyaw Jehová pi kakinkakuentajtlawan. Chuntiya katlawaniw oración Jehová asta akxni namakgkatsiyaw «takaksni» (Luc. 11:9; 1 Tes. 5:17). Wa uma tuku tlawakgolh Luis chu xpuskat, Ana, akxni kamakatsinika pi xla nialh makgas kilhtamaku xʼama latama. Luis wa: «Akxni titaxtukan uma, lu tuwa tamakgkatsi nalaksaka tuku nalimakuchikana chu tuku atanu natlawaya. Pero oración kinkamakgtayanitan xlakata nakkgalhiyaw takaksni». Xchatiykan wankgolh pi xtlawanikgo oración Jehová chu kskinikgo pi xkamaxkilh takaksni, tlan xmakgkatsikgolh chu xkamaxkilh liskgalala xlakata xlaksakkgolh tuku tlan. Chu Jehová kakgaxmatnilh xʼoracioneskan. Komo wix titaxtupat tuku tuwa, chuntiya katlawa oración. Naʼakxilha la Jehová namaxkiyan takaksni, nakuentajtlawa minaku chu mintapuwan (Rom. 12:12).
JEHOVÁ NATLAWA PI TLIWAKGLH NATAYAYAW
7. ¿La max namakgkatsiyaw komo titaxtumaw tuku lu tuwa?
7 Komo titaxtumaw tuku lu tuwa, max tuwa namakgkatsiyaw tliwakglh natayayaw chu tuwa namakgkatsiyaw nalakpuwanaw chuna la lakpuwanaw akxni ni kgalhiyaw taʼakglhuwit. Max namakgkatsiyaw pi kintaʼakglhuwitkan kinkalakchikimiyan xtachuna la akxni taʼakgayawana tawakaniyacha akgtum barco chu lakchiki. Wa uma tuku akgspulalh xpuskat Luis akxni xla nilh. Ana wan: «Xmin kilhtamaku lu xaklakgaputsa chu xakmakgkatsi pi nitu xaklitaxtu. Pero na xmin kilhtamaku xaksitsi xlakata Luis nialh xkintawi». Na wan pi xmin kilhtamaku xʼakstu xmakgkatsikan chu nitlan xlimakgkatsi xlakata xlilaksakat xwanit tuku Luis xlakgchan nalaksaka akxni xlama. Xla xmakgkatsi xtachuna la xwi kxʼitat pupunu kʼakgtum lanka unisen. ¿La kinkamakgtayayan Jehová akxni nitlan makgkatsiyaw chu nialh katsiyaw tuku natlawayaw?
8. ¿Tuku kinkamalaknuninitan Jehová kʼIsaías 33:6?
8 Tuku tlawa Jehová. Xla malaknunit pi natlawa pi tliwakglh natayayaw (kalikgalhtawakga Isaías 33:6). Akxni akgtum barco wi kxlakʼitat lanka unisen, max tlakg tsuku tachiki. Xlakata nichuna nala, kxpaxtunin lhuwa barcos kgalhikgo tuku tliwakglh kawili. Chuna barco ni lu tachiki chu tiku anta ankgo ni lu pekuankgo chu tlan makgkatsikgo. Pero uma tuku kamakgtaya tliwakglh natawilakgo, tlakg tlan skuja akxni matlawanimaka barco. Xtachuna la uma, komo lakaskinaw pi Jehová nakinkamakgtayayan tliwakglh natayayaw akxni titaxtuyaw tuku tuwa, talakaskin pi ni natachokgotayayaw, uma wamputun pi chuntiya naskujnaniyaw.
Kilikgalhtawakgakan tlan namakgtayayan tliwakglh natayaya (Kaʼakxilhti párrafos 8 chu 9).
9. ¿La tlawa pi tliwakglh natayayaw tamakgtay nema kinkamaxkiyan xkachikin Jehová? (Na kaʼakxilhti dibujos).
9 Tuku kilitlawatkan akinin. Komo titaxtumaw tuku tuwa, talakaskin chuntiya natlawayaw oración, naʼanaw ktamakxtumit chu nalichuwinanaw Dios. Xlikana pi max la uku nialhla tlawayaw tuku xtlawayaw xapulana, pero kalakapastakwi pi Jehová kinkaʼakgatekgsniyan (katamalakxtupi Lucas 21:1-4). Kaliskujti xlakata nalimaxtuya kilhtamaku miʼakstu nakgalhtawakgaya chu nalilakpuwana tuku likgalhtawakgapat. Jehová limaklakaskima xkachikin xlakata nakinkamaxkiyan artículos chu lu xalakstlan videos nema kinkamakgtayakgoyan natayaniyaw tuku tuwa titaxtuyaw. Xlakata natekgsa tuku namakgtayayan, tlan xlimaklakaskinti aplicación JW Library®, Índice de las publicaciones Watch Tower chu Liputsan xla xtatayananin Jehová. Monika, tiku lichuwinawa, wa pi xlimaklakaskin umakgolh tamakgtay akxni nitlan xmakgkatsi. Xmin kilhtamaku xputsa tachuwin tasitsi, akgskgawinankan o ni makgxtakgnankan, chu xlikgalhtawakga tuku xtekgsa asta akxni tlakg tlan xmakgkatsi. Xla wan: «Xaktsuku lakputsanan maski lu xaklakgaputsama, chu alistalh skayaj xakmakgkatsi, xtachuna la komo Jehová xkiʼakgpixtima. Chuna la xakkgalhtawakgatilha, xakakxilha pi Jehová xʼakgatekgsa tuku xakmakgkatsima, chu pi xkimakgtayama». Jehová na tlan natlawa pi wix tliwakglh natayaya chu natayaniya asta akxni natitaxtukgo tuku tuwa (Sal. 119:143, 144).
JEHOVÁ NAKINKAPAKGACHIPALINAN
10. ¿La max namakgkatsiyaw akxni natitaxtuyaw tuku tuwa?
10 Akxni titaxtuyaw tuku lu tuwa, max namakgkatsiyaw pi nialh kgalhiyaw litliwakga chu lu nalakgaputsayaw. Max namakgkatsiyaw xtachuna la chatum tiku pulana lu lakapala xkgosnan pero xlakata wi tuku nitlan lanilh, la uku lunkxnan. Max tuwa namakgkatsiyaw natlawayaw tuku xapulana ni tuwa xtlawayaw o nialh katitlawaputuw tuku xlakgatiyaw. Xtachuna la Elías, max kaj tamaputunaw chu lhtataputunaw (1 Rey. 19:5-7). ¿Tuku malaknu Jehová pi natlawa akxni taxlajwaninitaw?
11. ¿Tuku atanu tlawa Jehová xlakata nakinkamakgtayayan? (Salmo 94:18).
11 Tuku tlawa Jehová. Xla kinkamalaknuniyan pi ni kintikamakgxtakgni (kalikgalhtawakga Salmo 94:18). Xtachuna la tiku kgosnan tiku laninit tuku nitlan maklakaskin tamakgtay xlakata natlawan, max akinin namaklakaskinaw tamakgtay xlakata chuntiya naskujnaniyaw Jehová. Akxni chuna natitaxtuyaw, kalakapastakwi tuku xla kinkawaniyan: «Akit, Jehová miDios, kchipanit mimpakgastakat; akit tiku waniyan: “Ni kapekuanti. Akit nakmakgtayayan”» (Is. 41:13). Akxni xtalamakgasitsin mapakgsina David putsastalanikgolh chu titaxtulh atanu taʼakglhuwit, akxilhli pi Jehová xtachuna la xpaxtuya, wa xlakata wanilh: «Mimpakgastakat kilipakgachipalipina» (Sal. 18:35). Pero ¿la limasiya Jehová pi kinkapakgachipalinan?
Kamakgamakglhtinanti xtamakgtay mifamilia, miʼamigos chu lakgkgolotsin xalak congregación (Kaʼakxilhti párrafos 11 asta 13).
12. Akxni lu nitlan makgkatsiyaw, ¿tiku tlan nakalimaklakaskin Jehová xlakata nakinkamakgtayayan?
12 Makglhuwa, Jehová limasiya pi kinkapakgachipalinan akxni kamalakpuwani amakgapitsi latamanin pi nakinkamakgtayaputunkgoyan. Akgtum liʼakxilhtit, akgtum kilhtamaku akxni David xtaxlajwaninit, xʼamigo, Jonatán, alh lakgapaxialhnan xlakata xmatliwakglhli chu xmakgpuwantinilh (1 Sam. 23:16, 17). Chu xpalakata Elías, Jehová maklakaskilh Eliseo xlakata xmakgtayalh (1 Rey. 19:16, 21; 2 Rey. 2:2). Jehová na tlan kalimaklakaskin kifamiliajkan, kiʼamigoskan chu lakgkgolotsin xalak congregación xlakata nakinkamatliwakglhan. Xlikana pi akxni nitlan makgkatsiyaw kaj kiʼakstukan tawilaputunaw. Chu uma taʼakgatekgsa. Pero ¿tuku kilitlawatkan xlakata nalitamakgtayayaw tuku Jehová tlawa kimpalakatakan?
13. ¿Tuku kilitlawatkan xlakata nalitamakgtayayaw tuku Jehová tlawa kimpalakatakan? (Na kaʼakxilhti dibujos).
13 Tuku kilitlawatkan akinin. Kaliskujwi xlakata ni kiʼakstukan natawilayaw. Akxni kiʼakstukan tawilayaw, kaj kiʼakstukan kinkalilakpuwankanan chu kaj lilakpuwanaw kintaʼakglhuwitkan. Chu uma tlan natlawa pi nalaksakaw tuku nitlan (Prov. 18:1). Xlikana, kimputumkan lakgachunin maklakaskinaw kiʼakstukan natawilayaw, liwaka akxni titaxtuyaw tuku nitlan. Pero komo makgas kilhtamaku kiʼakstukan natawilayaw, max nalakgmakganaw tuku Jehová limaklakaskin xlakata nakinkamakgtayayan. Wa xlakata, maski tuwa namakgkatsiyaw, kamakglhtinaw xtamakgtaykan kifamiliajkan, kiʼamigoskan chu lakgkgolotsin. Kakaʼakxilhwi chuna la xlilat: tamakgtay nema Jehová kinkamalakgachaniman xlakata nakinkapakgachipalinan (Prov. 17:17; Is. 32:1, 2).
JEHOVÁ NAKINKAMAKGOXAMIXIYAN
14. ¿Tuku max nakinkamakgapekuanan?
14 Max namin kilhtamaku lu napekuanaw. Anta kBiblia tekgsaw xliʼakxilhtitkan lhuwa xlakskujnin Dios tiku xpekuamakgo xpalakata xtalatlawanakan o laklanka taʼakglhuwit nema xkgalhikgo (Sal. 18:4; 55:1, 5). ¿Chu akinin? ¿Na pekuanaw? ¿Patinamaw xlakata nitlan kinkalikatsinikgoyan tiku kataʼanaw kʼescuela, tiku kataskujaw, kifamiliajkan o mapakgsinanin? ¿Lilakgaputsamaw xlakata kgalhiyaw akgtum xasnun tajatat chu lakpuwanaw pi naniyaw? Akxni chuna titaxtumaw, max namakgkatsiyaw la aktsu kgawasa tiku ni kgalhi lhuwa litliwakga. ¿Tuku tlawa Jehová xlakata nakinkamakgtayayan?
15. Chuna la wan Salmo 94:19, ¿tuku malaknu Jehová natlawa?
15 Tuku tlawa Jehová. Xla kinkamakgoxamixiyan chu tlan kinkamamakgkatsiniyan (kalikgalhtawakga Salmo 94:19). Kalilakpuwaw chatum aktsu tsumat tiku lu pekuama chu nila lhtata xlakata lu senama, makglipnama chu jilima. Xtlat lakgan, akgpixti chu tlan mamakgkatsini, chu tsumat lhtata. Maski chuntiya tliwakga senama, xla tlan makgkatsi xlakata xtlat akgpixtinit. Xtachuna la aktsu tsumat, akxni lu pekuamaw, max namaklakaskinaw pi kinTlatkan xalak akgapun nakinkaʼakgpixtiyan asta akxni tlan namakgkatsiyaw. ¿Tuku kilitlawatkan xlakata Jehová nakinkamakgoxamixiyan?
Kamasta talakaskin pi minTlat xalak akgapun nalimakgoxamixiyan xTachuwin (Kaʼakxilhti párrafos 15 chu 16).
16. Komo lakaskinaw pi Jehová nakinkamakgoxamixiyan, ¿tuku kilitlawatkan? (Na kaʼakxilhti dibujos).
16 Tuku kilitlawatkan akinin. Lu xlakaskinka pi nalismaniyaw natlawaniyaw oración Jehová chu nalikgalhtawakgayaw xTachuwin (Sal. 77:1, 12-14). Komo chuna natlawayaw, akxni natitaxtuyaw tuku lu tuwa, max tuku pulana nalakpuwanaw wa natlawaniyaw oración kinTlatkan xalak akgapun. Kalitachuwinaw Jehová tuku lilakgaputsamaw chu tuku kinkamakgapekuanan, kamaxkiw talakaskin nakinkalimakgoxamixiyan chu nakinkalikgalhtiyan xTachuwin (Sal. 119:28). Makgapitsi tuku lichuwinan Biblia kinkamakgpuwantiniyan akxni titaxtumaw tuku tuwa, chuna la libro xla Job, Salmos chu Proverbios, chu xtachuwin Jesús nema min kMateo capítulo 6. Komo wix natlawaniya oración Jehová chu nalikgalhtawakgaya xTachuwin, naʼakxilha la xla namakgoxamixiyan.
17. ¿Tuku ankgalhin kililakapastakatkan?
17 Ankgalhin kalakapastakwi uma: maski natitaxtuyaw tuku tuwa kkilatamatkan, Jehová ankgalhin nakinkamakgtayayan. Nikxni kiʼakstukan kintikamakgxtakgni (Sal. 23:4; 94:14). Kalakapastakwi pi xla kinkamalaknuniyan pi ankgalhin nakinkakuentajtlawayan, nakinkamakgtayayan tliwakglh natayayaw, nakinkapakgachipalinan chu nakinkamakgoxamixiyan. Isaías wanilh Jehová: «Nakakuentajtlawaya tiku wix lipawankgoyan, nakamaxkiya takaksni nema ni sputa, xlakata wix lipawankgoyan» (Is. 26:3). Wa xlakata kalipawanti Jehová chu kamaklakaskinti putum tamakgtay nema xla maxkiyan. Komo chuna natlawaya, nakgalhiya litliwakga xlakata natayaniya tuku tlakg tuwa natitaxtuya kmilatamat.
¿TUKU XKGALHTINANTI?
-
¿Tukuya kilhtamaku tlakg maklakaskinaw xtamakgtay Jehová?
-
¿Tuku pulaktati tlawa Jehová xlakata nakinkamakgtayayan akxni titaxtumaw tuku tuwa?
-
¿Tuku kilitlawatkan xlakata nalitamakgtayayaw tuku Jehová tlawa kimpalakatakan?
TAKILHTLIN 12 Lanka Dios, Jehová
a Makgapitsi tukuwani kalakgpalikanit.