Makgapitsi lakchixkuwin kamakgastakka niku kamaktujukan lakpuskatin. Akgtum liʼakxilhtit, chatum superintendente de circuito xalak Bolivia tiku wanikan Hans, wan pi makgapitsi lakchixkuwin kamakgastakka niku masiyakan pi lakchixkuwin tlakg xlakaskinka litaxtukgo nixawa lakpuskatin. Wa xlakata nitlan kalikatsinikgo lakpuskatin chu ni kamaxkikgo kakni. Shengxian, chatum kgolotsin xalak Taiwán, wan: «Niku klama, lhuwa lakchixkuwin lakpuwankgo pi lakpuskatin ni xlimakgtanutkan tuku tlawakgo lakchixkuwin. Komo chatum chixku lichuwinan tuku lakpuwan chatum puskat, max nialh katimaxkika kakni». Amakgapitsi lakchixkuwin atanu la kalakgmakgankgo lakpuskatin. Akgtum liʼakxilhtit, akxni kgalhkgamanankgo wankgo tuku kamaktuju o ni kamaxki kakni lakpuskatin.

Pero maski chatum chixku chuna limakgastakkanit, tlan natalakgpali chu nialh nalakpuwan pi lakchixkuwin tlakg xlakaskinka litaxtukgo nixawa lakpuskatin (Efes. 4:​22-24). ¿La tlan chuna natlawa? Nastalani xliʼakxilhtit Jehová. Kʼuma artículo naʼakxilhaw la kalikatsini Jehová lakpuskatin, tuku xlitlawatkan natalan lakchixkuwin xlakata nakalikatsinigo lakpuskatin chuna la tlawa Jehová, chu tuku xlitlawatkan lakgkgolotsin xlakata nawilikgo xatlan liʼakxilhtit.

¿LA KALIKATSINI JEHOVÁ LAKPUSKATIN?

Jehová kinkawiliniyan lu xatlan liʼakxilhtit xlakata la nakalikatsiniyaw lakpuskatin. Xla chatum xalakgalhamanina Tlat tiku kapaxki putum xfamilia (Juan 3:16). Lakpuskatin tiku skujnanikgo, la xlaktsuman kaliʼakxilha. Kaʼakxilhwi makgapitsi liʼakxilhtit nema limasiya pi kapaxki chu kamaxki kakni.

 Ni kalaksakpaxki. Jehová katlawalh lakchixkuwin chu lakpuskatin chuna la xla (Gén. 1:27). Ni tlakg skgalala tlawalh chixku nixawa puskat, na ni maxkilh chixku tuku tlakg tlan nixawa puskat. Katlawalh chuna la tlan naʼakgatekgskgo tuku masiya Biblia chu tlan nalimasiyakgo xalakstlan xtayat. Jehová ni tlakg kapaxki lakchixkuwin (2 Crón. 19:7). Takanajla nema limasiyakgo lakpuskatin lu xtapalh xtachuna la xtakanajlakan lakchixkuwin, chu xputumkan kamaxkinit takgalhkgalhin pi nalatamakgo putum kilhtamaku max kKatiyatni o kʼakgapun xlakata mapakgsinanin chu sacerdotes nalitaxtukgo (2 Ped. 1:​1, nota). Liwana litasiya pi Jehová ni kalakgmakgan lakpuskatin.

Kakgaxmatni. Jehová kuenta tlawa tuku makgkatsikgo lakpuskatin chu taʼakglhuwit nema kgalhikgo. Akgtum liʼakxilhtit, kakgaxmatnilh chu kakgalhtilh xʼoracioneskan Raquel chu Ana (Gén. 30:22; 1 Sam. 1:​10, 11, 19, 20). Na tlawalh pi xtsokgwilika kxTachuwin xliʼakxilhtitkan lakchixkuwin tiku kakgaxmatnikgolh lakpuskatin. Chatum wa Abrahán, tiku kgalhakgaxmatnilh Jehová akxni limapakgsilh pi xkgaxmatnilh Sara (Gén. 21:​12-14). Mapakgsina David kgaxmatnilh Abigaíl. Asta wa pi Jehová xmalakgachanit xlakata xtachuwinalh (1 Sam. 25:​32-35). Jesús, tiku liwana limasiya xtayat xTlat, kgaxmatnilh xtse, María (Juan 2:​3-10). Chuna la limasiyakgo umakgolh liʼakxilhtit, Jehová kakgaxmatni lakpuskatin chu chuna limasiya pi kamaxki kakni.

Kalipawan. Jehová limasiyalh pi xlipawan Eva akxni lakgayawalh pi xmakgtayanalh namakgkuentajtlawa putuminika Katiyatni (Gén. 1:28). Xla ni xlakpuwan pi Eva ni xtachuna xlilakaskinka xwanit chuna la Adán, wata chatum tlan makgtayana xliʼakxilha. Na kalakgayawalh palakachuwinanin Débora chu Huldá pi xkastakyawakgolh xkachikin, asta stakyawakgolh chatum juez chu chatum mapakgsina (Juec. 4:​4-9; 2 Rey. 22:​14-20). La uku, Jehová kalipawan xlakskujnin lakpuskatin chu kalakgayawa taskujut. Umakgolh lakpuskatin tiku ni makgxtakgkgo Dios, publicadoras litaxtukgo, precursoras o misioneras. Makgtayanankgo nalakkaxwilikan la xlitatlawat Pukgalhtawakga chu sucursales, chu makgtayanankgo nakatlawakan chu nakakuentajtlawakan. Makgapitsin makgtayanamakgo kBetel o kʼOficinas Remotas de Traducción. Putum umakgolh lakpuskatin litaxtukgo la lhuwa soldados tiku Jehová kamaklakaskin xlakata namakgantaxti xtalakaskin (Sal. 68:11). Liwana litasiya pi Jehová ni lakpuwan pi lakpuskatin ni lakgtliwakgan o ni lhuwa tuku katsinikgo.

NATALAN LAKCHIXKUWIN, KASTALANIW XLIʼAKXILHTIT JEHOVÁ

Natalan lakchixkuwin, xlakata nakatsiyaw komo kalikatsinimaw natalan lakpuskatin chuna la Jehová, kililakputsananitkan tuku lakpuwanaw chu tuku tlawayaw. Pero maklakaskinaw tamakgtay xlakata chuna natlawayaw. Xtachuna la akgtum máquina nema limalakgxkgakgenankan limasiya komo xnaku chatum lataman nitlan skujma, chatum xatlan amigo chu xTachuwin Dios nakinkamakgtayayan nakatsiyaw komo kamaktujumaw natalan lakpuskatin. Kaʼakxilhwi tuku tlan natlawayaw.

Kaskiniw xtamakgtay chatum tlan amigo (Prov. 18:17). Katachuwinaw chatum amigo o amiga tiku lu lipawanaw, tiku tlan talakapastakni kgalhi chu tlan likatsi, chu kakgalhskiw: «¿La akxilha pi kkalikatsini natalan lakpuskatin? ¿Makgkatsikgo natalan lakpuskatin pi kkamaxki kakni? ¿Wi tuku kililakgpalit?». Komo nakinkawaniyan pi wi tuku kilitlawatkan, ni kasitsiw. Wata xatapaxuwan kalakgpaliw tuku natalakaskin.

Kalikgalhtawakgaw xTachuwin Dios. Komo tamalakxtumiyaw tuku wan Biblia tuku lakpuwanaw chu tuku tlawayaw, nakatsiyaw komo tlan o nitlan kalikatsinimaw natalan lakpuskatin (Heb. 4:12). Akxni likgalhtawakgayaw Biblia, lhuwa tuku katsiniyaw xlakata xliʼakxilhtitkan lakchixkuwin tiku tlan kalikatsinikgolh lakpuskatin chu tiku nitlan kalikatsinikgolh. Wa xlakata tlan nalilakpuwanaw tukuya liʼakxilhtit stalanimaw. Nachuna, lu tlan nawan pi natamalakxtumiyaw akgtum texto atanu texto, uma nakinkamakgtayayan ni namaklakaskinaw akgtum texto chuna la ni xlilat kaj xlakata nalimasiyayaw pi wi tuku kgalhmakgtaya tuku nitlan kalakpuwaniyaw lakpuskatin. Akgtum liʼakxilhtit, 1 Pedro 3:7 wan pi xlitamaxkit kakni puskat «xtachuna la tuku lakapala tapakglha». b ¿Wamputun uma pi puskat ni xtachuna chixku, chu ni lu skgalala o lhuwa tuku ni katsini? ¡Nichuna! Xlakata liwana namaklakaskinaw uma texto chu ni nalakgpaliyaw tuku kilhchanima, kalilakpuwaw tuku wan Gálatas 3:​26-29. Anta lichuwinankan pi Jehová kalaksaknit lakpuskatin chu lakchixkuwin xlakata natamapakgsinankgo Jesús kʼakgapun. Komo nalikgalhtawakgayaw  Biblia chu naskiniyaw xtastakyaw chatum xatlan amigo o amiga, nakatsiniyaw la tlan nakalimasiyaniw kakni kinatalankan lakpuskatin chuna la xlilat.

¿LA NAKALIMASIYANIKGO LAKGKGOLOTSIN KAKNI NATALAN LAKPUSKATIN?

Lakgkgolotsin xalak congregación tlan nakawilinikgo xatlan liʼakxilhtit natalan lakchixkuwin, xlakata nakatsinikgo la nakalimasiyanikgo kakni natalan lakpuskatin. ¿La wilikgo xatlan liʼakxilhtit lakgkgolotsin? Kalichuwinaw makgapitsi tuku limasiya pi kamaxkikgo kakni natalan lakpuskatin chu kapaxkikgo.

Kawanikgo pi lu tlan tuku tlawamakgo. Apóstol Pablo kawilinilh akgtum lu tlan liʼakxilhtit lakgkgolotsin xalak congregación. Ktatsokgni nema kamalakgachanilh congregación xalak Roma kalichuwinalh lhuwa lakpuskatin tiku lu tlan taskujut xtlawamakgo (Rom. 16:12). ¿Lilakpuwanaw la paxuwakgolh natalan lakpuskatin akxni likgalhtawakgaka carta kxlakatin congregación? Xtachuna la apóstol Pablo, lakgkgolotsin lismanikgonit kawanikgo laktlan tachuwin natalan lakpuskatin xlakata kgalhikgo lu xalaktlan tayat chu lhuwa tuku tlawakgo xlakata naskujnanikgo Jehová. Akxni chuna tlawakgo, natalan lakpuskatin makgkatsikgo pi kamaxkikan kakni chu xtapalh kaliʼakxilhkan. Xalaktlan xtachuwin chatum kgolotsin max wa tuku maklakaskima chatum tala puskat xlakata chuntiya naskujnani Jehová chu ni namakgxtakga (Prov. 15:23).

Akxni lakgkgolotsin kawanikgo natalan lakpuskatin pi tlawamakgo lu tlan taskujut, liwana kawanikgo pulaktum tuku tlan tlawamakgo. ¿Tuku xlakata? Kaʼakxilhwi tuku wan Jessica: «Xlikana pi akinin lakpuskatin klakgatiyaw pi kakinkawanikan: “Lu tlan taskujut tlawapat”. Pero tlakg kinkamakgpuwantiniyan akxni kinkawanikanan tuku lu tlan ktlawamaw. Akgtum liʼakxilhtit, max lu tlan kkamakgtayamaw kinkamanankan xlakata kaks natawilakgo ktamakxtumit o max kkiputsaw chatum kintamakgalhtawakgenkan xlakata xmilh ktamakxtumit». Akxni lakgkgolotsin kawanikgo natalan lakpuskatin pulaktum tuku lu tlan tlawamakgo, kamakgtayakgo xlakata namakgkatsikgo pi lu talakaskin xtamakgtaykan kcongregación chu lu xtapalh kaliʼakxilhkan.

 Kakgaxmatnikgo. Lakgkgolotsin tiku taktujukgo katsikgo pi ni kajwatiya xlakan tlan wi tuku tlawakgo. Wa xlakata kakgalhskinkgo natalan lakpuskatin tuku tlan xtlawakgolh chu kaks kakgaxmatnikgo akxni xlakan chuwinankgo. Akxni chuna tlawakgo, xputumkan litamakgtayakgo. Xtakanajlakan natalan lakpuskatin tatliwakglha. ¿Chu la litamakgtayakgo lakgkgolotsin uma? Chatum kgolotsin tiku skuja kBetel, tiku wanikan Gerardo, wan: «Kakxilhnit pi tuku kiwanikgo natalan lakpuskatin pi kaktlawalh, kimakgtayanit tlakg tlan naktlawa kintaskujut. Min kilhtamaku natalan lakpuskatin tlakg makgasata liskujmakgo uma taskujut nixawa amakgapitsi natalan lakchixkuwin». Anta kcongregación wilakgo lhuwa natalan tiku precursoras litaxtukgo, wa xlakata lu liwana lakgapasnankgo niku lichuwinankan Dios. Chatum kgolotsin tiku wanikan Bryan, wan: «Natalan lakpuskatin lhuwa tuku tlan nalimakgtayanankgo kxkachikin Jehová. ¡Kastalaniw xliʼakxilhtitkan!».

Lakgkgolotsin kuentajtlawakgo tuku wankgo natalan lakpuskatin. ¿Tuku xlakata lu tlan kitaxtu akxni chuna tlawakgo? Chatum kgolotsin tiku wanikan Edward, wan: «Tuku lakpuwan chu tuku katsini tlawa chatum tala puskat tlan namakgtaya chatum tala chixku liwana naʼakxilha putuminika tuku lama chu makgtaya tlakg nakaʼakgatekgsni amakgapitsin» (Prov. 1:5). Asta maski min kilhtamaku nila tlawakgo tuku kawani chatum tala puskat, lakgkgolotsin lu xtapalh liʼakxilhkgo xlakata uma tala kawanima tuku lakpuwan.

Kamasiyanikgo natlawakgo akgtum taskujut. Lakgkgolotsin limasiyakgo pi lakgskgalalan litaxtukgo akxni lakputsakgo la nakamasiyanikgo natalan lakpuskatin natlawakgo akgtum taskujut. Tlan nakamasiyanikgo la tlawakan tamakxtumit akxni ankan lichuwinankan Dios xlakata umakgolh natalan lakpuskatin tlan natlawakgo uma akxni ni anan chatum tala chixku tiku tamununita. Na tlan nakamasiyanikgo la maklakaskinkan makgapitsi liskujni o máquinas xlakata namakgtlawakgo o namakgkuentajtlawakgo Pukgalhtawakga. Anta kBetel, superintendentes kamasiyanikgonit natalan lakpuskatin la tlan namakgtayanankgo ktipalhuwa taskujut, chuna la namakgkuentajtlawakgo edificios, natamawanankgo, namaklakaskinkgo computadoras chu naliskujkgo contabilidad. Lakgkgolotsin tiku kamasiyanikgo natalan lakpuskatin, limasiyakgo pi kalipawankgo.

Lhuwa natalan lakpuskatin maklakaskinkgo putum tuku lakgkgolotsin kamasiyanikgonit xlakata nakamakgtayakgo amakgapitsin. Makgapitsin natalan tiku kamasiyanikanit la namakgtlawakgo akgtum Pukgalhtawakga makgtayanankgo akxni kakaxtlawakan xchikkan natalan akxni wi tuku masputunan. Amakgapitsin stalanikgo tastakyaw nema kamaxkika xlakata la nalichuwinankgo Dios niku wilakgo lhuwa latamanin chu kamakgtayakgo amakgapitsin natalan lakpuskatin na nakatsinikgo uma taskujut. ¿Tuku lakpuwankgo natalan lakpuskatin xpalakatakan lakgkgolotsin tiku kamasiyanikgonit la natlawakgo akgtum taskujut? Jennifer wan: «Akxni xakmakgtayanama niku xtlawamaka akgtum Pukgalhtawakga, chatum tala chixku tiku xlakgaya uma taskujut limaxtulh kilhtamaku nakimasiyani. Uma tala lu kuenta xtlawa tuku akit xakliskuja, chu akxni wi tuku tlan xkintaxtuniyacha xkiwani pi lu tlan taskujut xaktlawama. Lu xaklakgati xaktaskuja xlakata xakakxilha pi xkilipawan chu xakmakgkatsi pi xtapalh xaklitaxtu».

TUKU TLAN KITAXTU AKXNI KALIʼAKXILHKAN CHUNA LA FAMILIA

Xtachuna la Jehová, kapaxkiyaw kinatalankan lakpuskatin. Kalikatsiniyaw xtachuna la kifamiliajkan (1 Tim. 5:​1, 2). Akgtum lanka talakgalhaman pi akxtum katakakninaniyaw Jehová. Chu lu paxuwayaw akxni akxilhaw pi xlakan makgkatsikgo pi kapaxkiyaw chu kamakgtayayaw. Vanessa wan: «Lu kpaxtikatsini Jehová xlakata kimaxkinit talakaskin nakmakgtapakgsi kʼakgtum kachikin niku anankgo lhuwa lakchixkuwin tiku tlan kilikatsinikgo». Chatum tala puskat xalak Taiwán, wan: «Lu kpaxtikatsini Jehová chu xkachikin xlakata lu xtapalh kinkaliʼakxilhkgoyan chu xlakaskinka liʼakxilhkgo tuku kmakgkatsiyaw. Uma matliwakglha kintakanajla chu tlawa pi tlakg lanka xtapalh nakliʼakxilha pi kmakgtapakgsi kxkachikin».

Jehová lu paxuwa akxni akxilha pi natalan lakchixkuwin liskujkgo xlakata nakalikatsinikgo natalan lakpuskatin chuna la xla kalikatsini (Prov. 27:11). Chatum kgolotsin xalak congregación xalak Escocia, tiku wanikan Benjamin, wan: «Kkakilhtamaku lhuwa lakchixkuwin nipara tsinu kamaxkikgo kakni lakpuskatin. Wa xlakata akxni lakpuskatin natanukgo kPukgalhtawakga klakaskinaw pi naʼakxilhkgo pi akinin nichuna klikatsiyaw». Lu kaliskujwi nastalaniyaw xliʼakxilhtit Jehová chu nakalimasiyaniyaw kinatalankan lakpuskatin pi kapaxkiyaw chu kamaxkiyaw kakni chuna la xlilat (Rom. 12:10).