TACHUWIN xagriego nema matitaxtikan «putlaw» kTraducción del Nuevo Mundo kakilhchanima tanu tanu putlaw (Hech. 8:​28, 29, 38). Max putlaw niku xʼan etíope ni akgtum putlaw nema xlitlawakan guerras o carreras, wata tlakg lanka xwanit. Kalichuwinaw tuku xlakata chuna wanaw.

Etíope chatum xlakaskinka chixku xlitaxtu chu lakgamakgat niku xminitancha. Xla chatum «chixku tiku xkgalhi limapakgsin chu xlakskujnani mapakgsina puskat Candace xalak Etiopía, chu xla xlakgayawakanit putum tuku lhuwa xtapalh nema xkgalhi» (Hech. 8:27). Uma kilhtamaku, xlitilanka Etiopía xchan asta niku la uku lilakgapaskan Sudán chu kxsur Egipto. Maski etíope tanu tanu putlaw limaklakaskilh, max lhuwa tuku xlin nema xʼama maklakaskin akxni alh kJerusalén. Kxapulana siglo xkalimaklakaskinkan tanu tanu putlaw niku xkalinkan latamanin. Pulaktum putlaw nema xlimaklakaskinkan xkgalhi akgtati rueda chu tlan xkaʼakgtlapakan. Maktum libro nema lakputsanani tuku wan Biblia, wan: «Kʼumakgolh putlaw lhuwa tuku tlan xlinkan, ni lu litlakgwa xwanit xʼankan paxialhnankan chu tlan tlakg lakgamakgat xʼankan» (Acts—An Exegetical Commentary).

Etíope xkgalhtawakgama akxni Felipe talakatsuwinilh. Biblia wan pi «Felipe kgosnalh kxpaxtun putlaw» chu kgaxmatnilh etíope, tiku «pixlanka xlikgalhtawakgama xtatsokgni palakachuwina Isaías» (Hech. 8:30). Putlaw niku xkalinkan tiku wi niku xʼankgo, lakatsuku xkamatlawanikan xlakata ni xkatlawakanit xlakata lakapala natlawankgo. Uma mastalh talakaskin pi etíope tlan xkgalhtawakgalh chu Felipe xmataxtukli.

Etíope «wanilh Felipe pi xtawakalh kputlaw chu akxtum xtatawi» (Hech. 8:31). Tiku xmatlawanikgo putlaw nema xkalitlawakan carreras, kaj xtayakgo. Pero putlaw nema xkalin tiku wi niku xʼankgo xkgalhi laktawilh. Wa xlakata, x’anan niku etíope chu Felipe tlan xtawilakgolh.

Xlakata tuku wan Hechos capítulo 8 chu tuku tekgskgonit historiadores, kkilikgalhtawakgakan niku taxtu etíope, nialh wiliyaw akgtum putlaw nema xlitlawakan guerra o akgtum putlaw nema xlitlawakan carreras, wata wiliyaw akgtum tlakg lanka putlaw.