1. ¿Tuku xlakata Jehová malakatsukilh tamakgaxtokgat?

 JEHOVÁ wa «xapaxuwana Dios» chu lakaskin pi akinin na napaxuwayaw (1 Tim. 1:11). Kinkamaxkinitan lhuwa tamaskiwin xlakata nalipaxuwayaw latamat (Sant. 1:17). Pulaktum uma tamaskiwin wa tamakgaxtokgat. Akxni chatum chixku chu chatum puskat tamakgaxtokgkgo, lamalaknuni pi nalapaxki, nalamaxki kakni chu nalakuentajtlawa. Akxni lu tlan latalalinkgo kalimini lhuwa tapaxuwan (Prov. 5:18).

2. ¿La wilakgo lhuwa tamakgaxtokgat la uku?

² Lu nitlan, pero kkakilhtamaku lhuwa tamakgaxtokgat ni makgantaxtikgo tamalaknun nema tlawakgolh akxni tamakgaxtokgkgolh. Chu wa xlakata, ni paxuwakgo. Akgtum tamakatsinin xla Organización Mundial de la Salud wan pi lhuwa lakchixkuwin kawilinikgo o kakgaxikgo xpuskatkan, kawanikgo nixatlan tachuwin chu atanu tuku nitlan kalimamakgkatsinikgo. Max tlan kalikatsinikgo akxni lhuwa wilaka, pero akxni xʼakstukan wilakgo nitlan kalikatsinikgo. Nachuna, lhuwa tamakgaxtokgat nitlan kakitaxtunima xlakata xachixku akxilha pornografía.

3. ¿Tuku tlawa pi chatum chixku nitlan nalikatsini xpuskat?

³ ¿Tuku xlakata makgapitsi lakchixkuwin nitlan likatsinikgo xpuskatkan? Max xtlatkan xaluku xwanit, chu wa xlakata lakpuwankgo pi nitu wamputun nalawilinikan. Amakgapitsi lakchixkuwin, nitlan likatsinikgo xpuskatkan xlakata lamakgo kkachikinin niku lakpuwankan pi xlimasiyanitkan puskat tiku mapakgsinan kchiki. O max ni kamasiyanika la namachokgokgo xtasitsikan chu nixatlan xtayatkan. Chu makgapitsi lakchixkuwin lismanikgo akxilhkgo pornografía chu wa xlakata lakpuwankgo pi lakpuskatin kajwatiya kalimaklakaskinkan xlakata nakatatalakgxtumikan. Chu lhuwa tiku lakputsananikgo tuku lama wankgo pi pandemia xla COVID-19, tlakg maliwakalh umakgolh taʼakglhuwit. Pero  maski chuna, ni xlilat pi chixku nitlan nalikatsini xpuskat.

4. ¿Tuku kuenta xlitlawatkan lakchixkuwin tiku kstalaninanin Cristo litaxtukgo, chu tuku xlakata?

⁴ Chixku tiku kstalanina Cristo kuenta xlitlawat xlakata ni natsuku lakpuwan tuku lakpuwankgo tiku xalak kakilhtamaku xpalakata lakpuskatin. a ¿Tuku xlakata? Pulaktum tuku xlakata wa pi tuku lakpuwan chatum lataman wa tuku kitlawa alistalh. Kalilakpuwaw congregación xalak Roma xalak pulana siglo, niku xmakgtapakgsikgo xatalaksakni kstalaninanin Cristo. Akxni xtitaxtunita kilhtamaku lata xlakatsukunit uma congregación, Pablo katsokgnanilh: «Nialh kalikatsitit chuna la latamanin xalak uma kakilhtamaku» (Rom. 12:​1, 2). Umakgolh tachuwin limasiya pi makgapitsi chuntiya xmastamakgo talakaskin pi xtalismanin chu nixatlan xtapuwan uma kakilhtamaku xkapasalh. Wa xlakata, Pablo kawanilh pi xlakgpalikgolh xtayatkan chu la xlakpuwankgo. Uma tastakyaw na xlimakgantaxtitkan lakchixkuwin xala uku. Pero lu nitlan pi la uku, makgapitsi kstalaninanin Cristo mastakgonit talakaskin nakapasa nixatlan xtapuwan chu xtalismanin uma kakilhtamaku chu nitlan kalikatsinikgonit xpuskatkan. b ¿La lakaskin Jehová pi nalikatsini chixku xpuskat? Xatakgalhtin uma takgalhskinin natekgsaw ktexto niku takilhtinit uma artículo.

5. Chuna la wan 1 Pedro 3:​7, ¿la talakaskin nalikatsini chixku xpuskat?

⁵ (Kalikgalhtawakga 1 Pedro 3:7). Jehová kalimapakgsi lakchixkuwin nakamaxkikgo kakni xpuskatkan. Chatum chixku maxki kakni xpuskat akxni tlan likatsini chu paxki. Kʼuma artículo nalichuwinanaw makgapitsi tuku tlan natlawa xachixku xlakata nalimasiyani kakni xpuskat. Pero pulana kaʼakxilhwi makgapitsi tuku ni kamaxki kakni lakpuskatin.

KALAKGMAKGANTI TAYAT NEMA NI MAXKI KAKNI MIMPUSKAT

6. ¿La kaʼakxilha Jehová lakchixkuwin tiku kawilinikgo o kakgaxikgo xpuskatkan? (Colosenses 3:19).

⁶ Akxni kawilinikan o kakgaxikan. Jehová ni kaʼakxilhputun latamanin tiku xalakluku (Sal. 11:5). Chu tuku tlakg nitlan akxilha wa akxni chixku wilini xpuskat (Mal. 2:16; kalikgalhtawakga Colosenses 3:19). Chuna la wan texto niku takilhtinit uma artículo, 1 Pedro 3:​7, komo chatum chixku nitlan likatsini xpuskat, nalaktlawa la talalin Jehová. Max Jehová nialhpara katikgaxmatnilh xʼoración.

7. Chuna la wan Efesios 4:​31, 32, ¿tuku ni xlitlawatkan lakchixkuwin akxni natachuwinankgo xpuskatkan? (Na kaʼakxilhti niku wan «Tuku lu xlakaskinka»).

⁷ Akxni kawanikan laklixkajni tachuwin. Makgapitsi lakchixkuwin xatasitsin katachuwinankgo xpuskatkan chu kawanikgo laklixkajni tachuwin. Pero Jehová ni lakgati tasitsi, takgaw chu tachuwin nema tlawaninan tuku nitlan, c chuna la wan Efesios 4:​31, 32 (kalikgalhtawakga). Jehová putum kgaxmata chu kuenta tlawa la chixku likatsini xpuskat, asta maski amakgapitsin ni kaʼakxilhmakgo. Chatum chixku tiku xatasitsin xakgatli xpuskat chu wani laklixkajni tachuwin, laktlawama xtamakgaxtokgat chu nachuna la talalin Dios (Sant. 1:26).

8. ¿Tuku lakpuwan Jehová xlakata pornografía, chu tuku xlakata?

⁸ Akxni akxilhkan pornografía. ¿Tuku lakpuwan Jehová xlakata pornografía? Lu xkajni. Chatum chixku tiku akxilha pornografía  laktlawa la talalin Jehová chu ni maxki kakni xpuskat, wata maktuju. d Jehová lakaskin pi xachixku ni namakgatsankganani xpuskat, pero ni kajwatiya ni natlawa tuku nitlan, wata na kuenta xlitlawat tuku lakpuwan. Jesús wa pi akxni chatum chixku akxilha chatum puskat chu tatalakgxtumiputun, «tatlawanita talakgxtumit kxnaku tiku ni wa tamakgaxtokga» (Mat. 5:​28, 29). e

9. ¿Tuku xlakata Jehová xkajni akxni chatum chixku lakaskin pi xpuskat wi tuku katlawalh akxni talakgxtumimakgo nema xpuskat nitlan limakgkatsi kxtalakapastakni?

⁹ Akxni xachixku wi tuku matlawiputun xpuskat nema xla ni tlawaputun akxni talakgxtumikgo. Makgapitsi lakchixkuwin kamafuerzajliniputunkgo xpuskatkan pi wi tuku katlawalh akxni talakgxtumimakgo nema xapuskat ni lakgati, maktuju o tlawa pi nalakpuwan pi ni paxkikan. Jehová xkajni akxni chatum chixku chuna tlawa. Xla lakaskin pi lakchixkuwin kakapaxkikgolh xpuskatkan, tlan kakalikatsinikgolh chu kamaxkikgolh kakni tuku xpuskatkan makgkatsikgo chu lakpuwankgo (Efes. 5:​28, 29). ¿Pero tuku tlan natlawa chatum chixku tiku lismaninit tlawa putum tuku lichuwinanitaw kʼumakgolh párrafos? ¿Tuku tlan natlawa xlakata nalakgpali xtapuwan chu xtayat?

¿TUKU TLAN NATLAWAKGO LAKCHIXKUWIN XLAKATA NALAKGMAKGANKGO TUKU NI KAMAXKI KAKNI XPUSKATKAN?

10. ¿La tlan nalitamakgtayakgo lakchixkuwin xliʼakxilhtit Jesús?

¹⁰ ¿Tuku namakgtaya chatum kstalanina Cristo nalakgmakgan tayat nema maktuju xpuskat o nitlan mamakgkatsini? Lu xliskujat xlakata nastalani xliʼakxilhtit Jesús. Maski xla nikxni tamakgaxtokgli, xla lu tlan kalikatsinilh xtamakgalhtawakgen, chu chuna kawilinilh tlan liʼakxilhtit lakchixkuwin tiku makgaxtokgkgo (Efes. 5:25). Kalichuwinaw la kalikatsinilh xʼapóstoles chu la xkatachuwinan, chu la lakchixkuwin tlan nastalanikgo xliʼakxilhtit.

11. ¿La kalikatsinilh Jesús xʼapóstoles?

¹¹ Jesús tlan kalikatsinilh xʼapóstoles chu kamaxkilh kakni. Nikxni katlawanilh tuku nitlan. Maski xla xMakgalhtawakgenakan chu xMalanakan xlitaxtu, nikxni lakpuwa pi xtalakaskin xkalimasiyanilh tiku xmapakgsinan. Wata taktujulh chu kaskujnanilh (Juan 13:​12-17). Jesús kawanilh xtamakgalhtawakgen: «Katlawatit chuna la akit, xlakata akit ni xaluku chu ktaktuju, komo chuna natlawayatit natatliwakglhatit» (Mat. 11:​28-30). Chatum lataman tiku ni xaluku, ni wamputun pi ni tliwakga, wata limasiya pi tlakg tliwakga xlakata ni masta talakaskin pi namakgatlaja xtasitsi o tuku makgkatsima chu ni kaj lakapala wi tuku tlawa.

12. ¿La maklakaskilh Jesús xtachuwin?

¹² Jesús maklakaskilh xtachuwin xlakata tlan xkamamakgkatsinilh amakgapitsin. Nikxni xatasitsin katachuwinalh xtamakgalhtawakgen (Luc. 8:​47, 48). Chu akxni xtalamakgasitsin wanikgolh laklixkajni tachuwin chu nitlan likatsinikgolh, xla «ni kalitakgalhpuspitnilh laklixkajni tachuwin» (1 Ped. 2:​21-23). Asta milh kilhtamaku, ni kgalhtinalh (Mat. 27:​12-14). ¡Lu tlan liʼakxilhtit kawilinilh lakchixkuwin tiku makgaxtokgkgo!

13. ¿La nalimasiya chatum chixku pi akxtum tawi xpuskat? (Mateo 19:​4-6; na kaʼakxilhti dibujo).

¹³ Jesús kawanilh lakchixkuwin pi ni xkaʼakgskgawikgolh xpuskatkan. Maklakaskilh tuku xTlat xlichuwinanita, chu wa: «Chixku […] akxtum natatawila xpuskat» (kalikgalhtawakga Mateo 19:​4-6). Tachuwin xagriego nema unu matitaxtikanit «akxtum natatawila» wamputun «naslamachipa». Uma wamputun pi talakaskin pi xachixku chu xapuskat lu tlan nalatalalin,  xtachuna la wi tuku litaslamakgonit. Komo chatum xtlawalh tuku nitlan, xchatiykan xpatinankgolh. Chatum chixku tiku lu tlan talalin xpuskat, nalakgmakgan pornografía o kaxatukawa atanu tuku lixkajni. Lakapala natalakapanu chu “ni katiʼakxilhli tuku nitu limakwan” (Sal. 119:37). Tlan nawanaw pi tatlawa talakkaxlan xlakgastapu xlakata ni naʼakxilha tiku ni xpuskat chu natatalakgxtumiputun (Job 31:1).

14. ¿Tuku xlitlawat chatum chixku xlakata tlan natalalimpara Jehová chu xpuskat?

¹⁴ Chatum chixku tiku wilini xpuskat o wani laklixkajni tachuwin, wi tuku xlitlawat xlakata tlan natalalimpara Jehová chu xpuskat. ¿Tuku xlitlawat? Pulana, nalitaya pi tlawama tuku lu nitlan. Jehová akxilha putum tuku tlawayaw, nila tuku matsekgnikan (Sal. 44:21; Ecl. 12:14; Heb. 4:13). Xlipulaktiy, talakaskin nialh nawilini xpuskat o nialh nawani laklixkajni tachuwin, talakaskin natalakgpali (Prov. 28:13). Xlipulaktutu, naskini xpuskat pi katapatilh chu nachuna Jehová (Hech. 3:19). Talakaskin natasaskini Jehová pi kamakgtayalh namalakgachokgo tuku lakpuwan, tuku wamputun chu tuku tlawaputun. Na xliskinit pi kamakgtayalh natalakgpaliputun (Sal. 51:​10-12; 2 Cor. 10:5; Filip. 2:13). Xlipulaktati, naliskuja natlawa tuku skin kxʼoraciones chu naxkajni xalixkajni tachuwin chu liluku (Sal. 97:10). Xlipulakkitsis, tunkun xliputsat xtamakgtaykan lakgkgolotsin xalak congregación, xlakan xatapaxuwan namakgtayakgo (Sant. 5:​14-16). Chu xlipulakchaxan, nalakkaxwili xlakata nialh natlawapara tuku lismaninit tlawa. Chatum chixku tiku akxilha pornografía na xlitlawat uma pulakchaxan tuku lichuwinanitaw. Jehová namakgtaya xlakata tlan natalakgpali (Sal. 37:5). Pero ni kajwatiya talakaskin pi xachixku nalakgmakgan tayat nema ni maxki kakni xpuskat, na talakaskin natlawa tuku namaxki kakni. Kalichuwinaw la tlan chuna natlawa.

¿LA TLAN NALIMASIYANIYA KAKNI MIMPUSKAT?

15. ¿La nalimasiya chixku pi paxki xpuskat?

¹⁵ Kalimasiyani tapaxkit. Makgapitsi lakchixkuwin makgtayanankgonit naʼanan tapaxuwan kxtamakgaxtokgatkan xlakata lismanikgonit nalimasiyanikgo xpuskatkan pi lu kapaxkikgo (1 Juan 3:18). Chatum chixku tiku kstalanina Cristo tipalhuwa la tlan nalimasiyani tapaxkit  xpuskat. Akgtum liʼakxilhtit, tlan namakgachipa o naʼakgpixti. Na tlan namalakgachani mensaje chu nawani, «Lu klakapastakan» o «¿La kitaxtuniman?». Tlan xtsokgnanilh maktum carta o maktum lu stlan tarjeta niku nawani pi lu paxki. Akxni chatum chixku tlawa putum uma, maxki kakni xpuskat chu matliwakglha xtamakgaxtokgat.

16. ¿Tuku xlakata xachixku xlipaxtikatsinit xpuskat tuku tlawa?

¹⁶ Kapaxtikatsini xtamakgtay. Chatum chixku maxki kakni xpuskat akxni wani tuku xlakata lu xtapalh liʼakxilha chu akxni tlan mamakgkatsini. Akgtum liʼakxilhtit, ankgalhin paxtikatsini xlakata lu makgtaya (Col. 3:15). Akxni xachixku wani xpuskat pi lu paxki chu xtapalh liʼakxilha, puskat makgkatsi pi lu paxkikan, nitu lipekuan chu akxilha pi maxkikan kakni (Prov. 31:28).

17. ¿La nalimasiya chixku pi maxki kakni xpuskat?

¹⁷ Tlan kalikatsini chu kalimasiyani kakni. Chixku tiku paxki xpuskat liʼakxilha la akgtum lanka xtamaskiwin Jehová nema nitu tuku xtachuna (Prov. 18:22; 31:10). Wa xlakata lu xtapalh liʼakxilha, kuentajtlawa, tlan likatsini chu maxki kakni, asta maski niti kaʼakxilhma. Ni mafuerzajlini natlawa tuku xpuskat ni tlawaputun akxni talakgxtumimakgo. f Chu liskuja xlakata xla na ni natlawa tuku nitlan nalimakgkatsi o nalaktlawa chuna la talalin Jehová (Hech. 24:16).

18. ¿Tuku liwana xlilakkaxwilitkan natlawakgo lakchixkuwin? (Na kaʼakxilhti recuadro « Pulaktati la nalimasiyaya pi maxkiya kakni mimpuskat»).

¹⁸ Lakchixkuwin, kalakapastaktit pi Jehová lu xtapalh liʼakxilha putum tuku tlawayatit xlakata nakalimasiyaniyatit kakni mimpuskatkan. Kalakgmakgantit tayat nema ni kamaxki kakni chu lu kaliskujtit tlan nakalikatsiniyatit, nakapaxkiyatit chu nakamaxkiyatit kakni. Komo chuna natlawayatit, nalimasiyayatit pi kapaxkiyatit chu xtapalh kaliʼakxilhatit. Komo namaxkiyatit kakni mimpuskatkan, kuenta tlawapatit nawan chuna la talalipinatit Jehová (Sal. 25:14).