ARTÍCULO NEMA NATALIKGALHTAWAKGA 3
TAKILHTLIN 35 Kakatsiw tuku pulana nawiliyaw
Kalaksakti tuku namakgapaxuwa Jehová
«Skgalala wankan akxni tsukukan pekuanikan Jehová, chu kgalhikan taʼakgatekgsni akxni lakgapaskan Tiku lu xasanto» (PROV. 9:10).
TUKU NAʼAKXILHAW
Nalichuwinanaw la tlan nalimaklakaskinaw takatsin, taʼakgatekgsni chu nakatsiniyaw namaklakaskinaw kintalakapastaknikan xlakata nalaksakaw tuku tlan.
1. ¿Tuku kilitlawatkan putum akinin, chu tuku xlakata tuwa makgkatsiyaw natlawayaw uma?
CHALI chali wi tuku kililaksakatkan. Makgapitsi tuku laksakaw ni tuwa, chuna la akxni laksakaw tuku naliwayanaw o tuku hora nalhtatayaw. Pero na anan tuku tuwa nema kililaksakatkan. Akgtum liʼakxilhtit, tuku nalaksakaw max xkinkamakgatatatlan o xlaktlawalh kintapaxuwankan, kifamiliajkan o chuna la kakninaniyaw Dios. Lakaskinaw pi tuku nalaksakaw, tlan kakinkakitaxtunin akinin chu kifamiliajkan, pero tuku tlakg lakaskinaw wa pi tuku nalaksakaw kamakgapaxuwalh Jehová (Rom. 12:1, 2).
2. ¿Tuku nakinkamakgtayayan nalaksakaw tuku tlan?
2 Kʼuma artículo nalichuwinanaw pulaktutu tuku nakinkamakgtayayan nalaksakaw tuku tlan: 1) nakatsiyaw putum tuku kilikatsitkan, 2) kuenta natlawayaw tuku lakpuwan Jehová xlakata tuku laksakputunaw chu 3) liwana nalilakpuwanaw tuku tlakg tlan xlaksakwi. Na nalichuwinanaw tuku tlan natlawayaw xlakata nakatsiniyaw namaklakaskinaw kintalakapastaknikan (Prov. 2:11).
KAKATSI PUTUM TUKU MILIKATSIT
3. Kalichuwinanti akgtum liʼakxilhtit nema limasiya pi xlakaskinka pulana nalakputsananiya putum tuku milikatsit akxni nina wi tuku laksaka.
3 Tuku pulana militlawat xlakata nalaksaka tuku tlan wa pi nakatsiya putum tuku milikatsit. ¿Tuku xlakata lu xlakaskinka uma? Kalilakpuwaw pi chatum lataman lakgan makuchina xlakata lu tatatla. ¿Makuchina tunkun nawani tuku likuchun nawa komo nina kgalhskin tuku lanima? Nichuna katitlawalh. Xtachuna la uma, wix tlan tuku nalaksaka komo pulana nakatsiya putum tuku milikatsit xlakata tuku tlawaputuna. ¿La tlan chuna natlawaya?
4. Chuna la wan Proverbios 18:3, ¿tuku militlawat xlakata liwana nakatsiya putum tuku milikatsit? (Na kaʼakxilhti dibujos).
4 Komo nakgalhskininana namakgtayayan nakatsiya tuku milikatsit. Akgtum liʼakxilhtit, kalilakpuwanti pi nawanikana napina kʼakgtum convivio. ¿Miliʼanat? Komo ni liwana lakgapasa tiku natlawa convivio chu ni liwana katsiya tuku natlawa, tlan nawan komo natlawaniya umakgolh takgalhskinin: «¿Niku chu tuku kilhtamaku natlawakan uma convivio? ¿La xlilhuwa latamanin naʼankgo? ¿Tiku nakuentajtlawa tuku nala anta? ¿Tiku naʼankgo? ¿Tuku natlawakan? ¿Namastakan kuchu?». Xtakgalhtin umakgolh takgalhskinin namakgtayayan nalaksaka tuku tlan (kalikgalhtawakga Proverbios 18:13).
Kakgalhskininanti xlakata nakatsiya putum tuku milikatsit (Kaʼakxilhti párrafo 4). a
5. ¿Tuku militlawat akxni katsiyata putum tuku milikatsit?
5 Akxni katsiyata putum tuku milikatsit, liwana kalilakpuwanti putuminika tuku tlan xlalh anta. Akgtum liʼakxilhtit, ¿tuku natlawaya komo nakatsiya pi kʼuma convivio naʼankgo latamanin tiku ni lilatamakgo xtastakyaw Biblia o ni kuenta natlawakan la xlilhuwa namastakan kuchu? ¿Tuku natlawaya komo nakatsiya pi tuku natlawakan kʼuma convivio natlawa pi lu natachilikan o akglakgwa tuku natlawakan? (1 Ped. 4:3). ¿O tuku militlawat komo uma convivio natlawa pi nila napina ktamakxtumit o nila napina lichuwinana Dios? Komo nalilakpuwana putum uma, nalaksaka tuku tlan. Pero wi atanu tuku militlawat. Wix katsiyata tuku milikatsit; pero ¿tuku lakpuwan Jehová? (Prov. 2:6).
KUENTA KATLAWA TUKU LAKPUWAN JEHOVÁ
6. Chuna la wan Santiago 1:5, ¿tuku xlakata miliskinit Jehová pi kamakgtayan?
6 Kaskini Jehová pi kamakgtayan naʼakgatekgsa tuku xla lakpuwan. Xla malaknu pi “xatapaxuwan nakamaxki liskgalala tiku skinikgo chu ni katikasitsinilh” (kalikgalhtawakga Santiago 1:5). Uma liskgalala namakgtayayan naʼakgatekgsa komo tuku nalaksaka nalakgati o ni nalakgati.
7. ¿La nakatsiya tuku lakpuwan Jehová? Kalichuwinanti akgtum.
7 Akxni skininitata Jehová xtapulalit, kuenta katlawa la nakgalhtiyan. Akgtum liʼakxilhtit, kalilakpuwanti pi komo wix pinita paxialhnana chu tsankgaya, max naskiniya xtamakgtay chatum tiku anta lama. Pero ¿tunkun xtapanu akxni xla nina waniyan niku napina? ¿Ni xlikana pi tlakg tlan xwa pi kaks xkgaxpatti tuku xla nawaniyan? Xtachuna la uma, akxni skininitata xliskgalala Jehová, kakgaxpatti tuku nawaniyan. Xlakata nakgaxpatniya, kaputsa tastakyaw xalak Biblia nema namakgtayayan nalaksaka tuku tlan. Kalilakpuwamparaw convivio niku wanika pi napina. Akxni nina laksaka komo napina o ni, kuenta katlawa tuku wan Biblia xlakata paskua niku lu tachilikan o akglakgwa tuku tlawakan, xlakata katalalinkan tiku nitlan likatsikgo chu xlakata la xlilakaskinka pulana nawiliyaw xTamapakgsin Dios nixawa tuku akinin lakgatiyaw (Mat. 6:33; Rom. 13:13; 1 Cor. 15:33).
8. ¿Tuku tlan natlawaya komo maklakaskina pi wi tiku namakgtayayan xlakata natekgsa tuku putsapat? (Na kaʼakxilhti dibujos).
8 Max namin kilhtamaku namaklakaskina pi wi tiku namakgtayayan natekgsa tuku putsapat. Max chatum tala nawaniyan makgapitsi tastakyaw xalak Biblia o nawaniyan niku tlan nalakputsanana. Pero na talakaskin pi wix miʼakstu nalakputsanana. Wilakgo lhuwa likgalhtawakga nema tlan namaklakaskina xlakata tlakg nalakputsanana, chuna la Liputsan xla xtatayananin Jehová chu libro Xtastakyaw Biblia kamakgtaya kstalaninanin Cristo. Kalakapastakti pi tuku tlakg xlakaskinka wa pi tuku nalaksaka namakgapaxuwa Jehová.
Kuenta katlawaw tuku lakpuwan Jehová (Kaʼakxilhti párrafo 8). b
9. ¿La nalikatsiyaw pi tuku nalaksakaw namakgapaxuwa Jehová? (Efesios 5:17).
9 ¿La nalikatsiyaw komo tuku nalaksakaw namakgapaxuwa Jehová? Pulana, liwana kililakgapasatkan Jehová. Proverbios 9:10 wan pi «kgalhikan taʼakgatekgsni akxni lakgapaskan Tiku lu xasanto». Uma wamputun pi xlakata nakgalhiyaw taʼakgatekgsni liwana kililakgapasatkan xtayat Jehová, tuku lakpuwanit natlawa, tuku xla paxki chu tuku xkajni. Kalilakpuwanti uma: «Xlakata kkatsi tuku lakgati chu tuku ni lakgati Jehová, ¿namakgapaxuwa uma tuku naklaksaka?» (kalikgalhtawakga Efesios 5:17).
10. ¿Tuku xlakata tlakg xlakaskinka liʼakxilhaw xtastakyaw Biblia nixawa tuku lismanikgo kifamiliajkan o tiku xalak kinkachikinkan?
10 Xlakata namakgapaxuwayaw Jehová, namin kilhtamaku natalakaskin natlawayaw tuku ni katilakgatikgolh kifamiliajkan o kiʼamigoskan. Akgtum liʼakxilhtit, max xnatlatni chatum tsumat lakaskinkgo pi katatamakgaxtokgli tiku kgalhi lhuwa tumin o chatum tiku lhuwa tuku nakamaxki, maski ni tliwakga kgalhi xtakanajla. Lu tlan pi lilakgaputsamakgo pi xtsumatkan nakgalhi putum tuku namaklakaskin, ¿pero tiku namatliwakglhni xtakanajla? ¿Tuku lakpuwan Jehová xlakata uma? Tekgsaw xatakgalhtin kMateo 6:33, niku kamakgpuwantinikan kstalaninanin Cristo pi “pulana kaputsakgolh xTamapakgsin Dios”. Maski kamaxkiyaw kakni kinatlatnikan chu latamanin xalak kkinkachikinkan, tuku tlakg xlakaskinka wa pi namakgapaxuwayaw Jehová.
KALILAKPUWANTI TUKU TLAKG TLAN XLAKSAKTI
11. Chuna la wan Filipenses 1:9, 10, ¿tuku namakgtayayan liwana nalakpuwana tuku tlakg tlan nalaksaka?
11 Akxni lilakpuwanitata tastakyaw xalak Biblia nema lichuwinan tuku wix tlawaputuna, kalilakpuwanti tuku tlakg tlan xlaksakti (kalikgalhtawakga Filipenses 1:9, 10). ¿La tlan chuna natlawaya? Kamaklakaskinti mintalakapastakni xlakata naʼakxilhlakachipina tuku max nakitaxtuniyan. Namin kilhtamaku ni tuwa katimakgkatsi wi tuku nalaksaka, pero namin kilhtamaku ni katikatsi tuku tlakg tlan xlaksakti. Komo liwana namaklakaskina mintalakapastakni, namakgtayayan nalaksaka tuku tlan maski lu tuwa tuku mililaksakat.
12, 13. Komo liwana namaklakaskina mintalakapastakni, ¿la namakgtayayan uma nalaksaka tuku naliskuja?
12 Kalakpuwanti uma: wix putsapat taskujut xlakata namaxkiya mifamilia tuku maklakaskinkgo chu tekgsa akgtiy taskujut. Liwana lakputsananiya tuku milikatsit, chuna la tuku naliskuja, la xlilhuwa horas naskuja, la xlilakgamakgat wi chu atanu. Max umakgolh taskujut ni lakatsala tuku wan Biblia. Max wix laksakputuna taskujut nema tlakg lakgatiya o niku tlakg lhuwa naxokgonikana. Pero wi atanu tuku kuenta militlawat akxni nina laksaka niku naskuja.
13 Kalilakpuwanti umakgolh takgalhskinin: komo nalaksaka uma taskujut, ¿nialh katikgalhi kilhtamaku napina ktamakxtumit? ¿Nialh katikgalhi kilhtamaku xlakata namaxkiya mifamilia tuku maklakaskinkgo xlakata napaxuwakgo chu tlan natalalinkgo Jehová? Umakgolh takgalhskinin namakgtayayan xlakata pulana nawiliya tuku tlakg xlakaskinka, uma wamputun nakakninaniyatit Jehová chu namaxkiya mifamilia tuku maklakaskinkgo, nixawa nakgalhiya lhuwa tumin. Komo chuna natlawaya, Jehová nasikulunatlawa tuku nalaksaka.
14. Xlakata kapaxkiyaw amakgapitsin chu liwana maklakaskinaw kintalakapastaknikan, ¿la kinkamakgtayayan uma ni nakama’akgchakgxniyaw amakgapitsin?
14 Komo liwana namaklakaskinaw kintalakapastaknikan, na nakinkamakgtayayan nalilakpuwanaw la nalimakgkatsikgo amakgapitsin tuku nalaksakaw, chu kuenta natlawayaw “ni nakamaʼakgchakgxniyaw” (Filip. 1:10). Uma tlakg xlakaskinka akxni laksakaw tuku akinin lakgatiyaw, chuna la akxni laksakaw la nalhakgananaw chu la natakaxtayayaw. Akgtum liʼakxilhtit, max akinin lakgatiyaw la lhakgananaw chu la takaxtayayaw. Pero ¿chu komo amakgapitsin tiku xalak congregación o tiku xalak kinkachikinkan ni lakgatikgo? Komo liwana namaklakaskinaw kintalakapastaknikan nakinkamakgtayayan kuenta natlawayaw tuku makgkatsikgo amakgapitsin. Chu tapaxkit nakinkamakgpuwantiniyan naputsayaw tuku “nalitamakgtayakgo amakgapitsin” chu nalimasiyayaw pi liwana lakapastaknanaw akxni laksakaw la nalhakgananaw (1 Cor. 10:23, 24, 32; 1 Tim. 2:9, 10). Komo chuna natlawayaw, tuku nalaksakaw nalimasiya pi kapaxkiyaw chu kamaxkiyaw kakni amakgapitsin.
15. ¿Tuku mililakpuwanat xlakata tlan namakgantaxtiya tuku lu xlakaskinka laksaknita?
15 Komo lu xlakaskinka tuku nalaksaka, kalilakpuwanti putum tuku natalakaskin xlakata namakgantaxtiya. Jesús kinkamasiyanin pi xlakaskinka “naʼakxilhaw komo nakinkaʼakchaniyan” tuku namaklakaskinaw (Luc. 14:28). Wa xlakata kalilakpuwanti la xlilhuwa kilhtamaku, tumin chu litliwakga natalakaskin xlakata namakgantaxtiya tuku laksaknita. Namin kilhtamaku, tlan nawan pi nakalitachuwinana mifamilia tuku tlan xtlawakgolh chatunu chatunu xlakata xmakgtayanankgolh nakgantaxtu tuku laksaknita. ¿Tuku xlakata lu tlan nakitaxtu komo chuna natlawaya? Xlakata uma namakgtayayan naʼakxilha komo wi tuku mililakgpalit o komo wi atanu tuku tlakg tlan xlaksakti. Nachuna, komo nakakgalhskina tuku lakpuwankgo tiku xalak mifamilia chu nakgaxpata tuku nawankgo, xlakan tlakg xatapaxuwan namakgtayanankgo xlakata tuku laksaknita tlan nakitaxtu (Prov. 15:22).
KALAKSAKTI TUKU TLAN NAKITAXTUNIYAN
16. ¿Tuku militlawat xlakata tlan nakitaxtu tuku nalaksaka? (Na kaʼakxilhti recuadro « Tuku tlan natlawaya xlakata nalaksaka tuku tlan»).
16 Komo tlawanitata putum tuku lichuwinanitaw kʼuma artículo, tlantiya nalaksaka tuku tlan. Liwana katsiyata tuku milikatsit chu lakputsananinitata tastakyaw xalak Biblia nema namakgtayayan nalaksaka tuku namakgapaxuwa Jehová. Wa xlakata, la uku kajwatiya tsankganiyan naskiniya xtamakgtay Jehová xlakata tlan nakitaxtuniyan tuku laksakti.
17. ¿Tuku talakaskin xlakata nalaksaka tuku tlan?
17 Maski makgasata tlan tuku laksaknita chu tlan kitaxtuninitan, kalakapastakti pi xlakata ankgalhin nalaksaka tuku tlan, talakaskin ni miʼakstu nalipawankana. Wata nalipawana xliskgalala Jehová. kajwatiya xla tlan namaxkiyan xaxlikana takatsin, taʼakgatekgsni chu namakgtayayan liwana namaklakaskina mintalakapastakni. Wa uma tuku talakaskin xlakata nakgalhiya liskgalala (Prov. 2:1-5). Chuna, Jehová tlan namakgtayayan nalaksaka tuku namakgapaxuwa (Sal. 23:2, 3).
TAKILHTLIN 28 La tlan xʼamigo Jehová nawanaw
