1. ¿Tuku tlakg lilakgaputsakgo la uku lhuwa latamanin?

 LA UKU lhuwa latamanin kaj xʼakstukan kalilakgaputsakan. Akgtum liʼakxilhtit, wilakgolh tiku limaklakaskinkgo redes sociales xlakata amakgapitsi latamanin nakaʼakxilhkgo chu nakatsikgo tuku xlakan tlawamakgo. Pero ni lhuwa latamanin malankikgo Jehová Dios. Kʼuma artículo, naʼakxilhaw tuku kilhchanima malankikan Jehová chu tuku xlakata xlilat chuna natlawayaw. Na nakatsiniyaw la tlan namalankiyaw Dios chu tuku xla natlawa xlakata namalanki xtukuwani nialh makgas kilhtamaku.

¿TUKU KILHCHANIMA NAMALANKIYAW JEHOVÁ?

2. ¿La limasiyalh Jehová xlilanka ksipi Sinaí? (Na kaʼakxilhti dibujo).

² Anta kBiblia, tachuwin lilanka maklakaskinkan akxni lichuwinankan tiku lu kaks malakawaninan. Akxni nina makgas xkalakgmaxtunit israelitas kʼEgipto, Jehová limasiyalh xlilanka nema lu kaks malakawaninan. Kalilakpuwaw tuku lalh: lhuwa israelitas makxtum xyakgo lakatsu ksipi Sinaí xlakata xkgaxmatkgolh tuku Dios xʼama kawani. Kxʼakgspun sipi xtasiya akgtum lanka chu tsitsakga puklhni. Tsukulh tachiki tiyat chu ksipi tsukulh taxtu jini. Israelitas akxilhkgolh pi tsukulh makglipnan chu tsukulh jili chu pixlanka xtakgaxmata chuna la xmakasanama akgalokgot (Éx. 19:​16-18; 24:17; Sal. 68:8). Xlikana pi israelitas lu kaks lilakawankgolh putum tuku xlama nema xlimasiya xlilanka Jehová.

3. ¿Tuku tlan nalimalankiyaw Jehová?

 ³ ¿Chu akinin? ¿Tlan namalankiyaw Jehová? Chuna. Pulaktum tuku tlan nalimalankiyaw wa pi nakalitachuwinanaw amakgapitsin putum tuku xla tlawanit chu xalakstlan xtayat. Na maxkiyaw lilanka akxni wanaw pi putum tuku tlan kinkakitaxtuniyan wa Jehová kinkamakgtayanitan (Is. 26:12). Mapakgsina David lu liskujli namalanki Jehová. Akxni tlawalh akgtum oración kxlakatin putum kachikin, xla wa: «Oh Jehová, wix tapakgsiniyan lilanka, litliwakga, kakni chu limapakgsin, xlakata wix tapakgsiniyan putum tuku anan kʼakgapun chu kkatiyatni». Akxni David tlawakgolh xʼoración, «putum kachikin malankikgolh Jehová» (1 Crón. 29:​11, 20).

4. ¿La limasiyalh Jesús pi xmalanki Jehová?

⁴ Akxni Jesús xlama kKatiyatni, tipalhuwa la malankilh xTlat. Akgtum liʼakxilhtit, akxni xtlawa milagros ankgalhin xwan pi wa Jehová tiku xmaxkinit litliwakga (Mar. 5:​18-20). Na xmalanki Jehová chuna la xchuwinan chu la xkalikatsini amakgapitsin. Akgtum kilhtamaku, akxni Jesús xmasiyama kʼakgtum sinagoga, kxlakgstipan latamanin xwi chatum puskat tiku xtitaxtunita 18 kata lata xlaktanuma demonio. Uma demonio xtlawanit pi uma puskat xtapunksli o xtakilhputalh chu nila xtaʼaktsajli. ¡Lu nitlan tuku xʼakgspulama! Akxni Jesús akxilhli la xlilhuwa xpatinama uma puskat, lakgalhamalh chu wanilh: «Puskat mapaksanikana mintajatat». Alistalh, xamalh uma puskat, chu xla taʼaktsajli chu «tsukulh malanki Dios» (Luc. 13:​10-13). Uma puskat xmapaksakanit chu nialh xʼanan tuku xlimaxanalh, wa xlakata tsukulh malanki Jehová. Akinin na lhuwa tuku tlan nalimalankiyaw Jehová.

¿TUKU XLAKATA KILIMALANKITKAN JEHOVÁ?

5. ¿Tuku xlakata lakgchan namalankiyaw Jehová?

⁵ Malankiyaw Jehová xlakata wa lakgchan namalankikan. Anan lhuwa tuku xlakata kilimalankitkan Jehová. Xla kgalhi putum litliwakga, chu xlitliwakga nikxni sputa (Sal. 96:​4-7). Liwana tasiya xliskgalala kxtamalakatsukin. Kinkamaxkinitan latamat chu tuku maklakaskinaw xlakata nalatamayaw (Apoc. 4:11). Xla ni makgxtakgnan (Apoc. 15:4). Putum tuku tlawa tlan kitaxtu chu ankgalhin makgantaxti xtamalaknun (Jos. 23:14). Wa xlakata palakachuwina Jeremías wa: «Xliputum lakgskgalalan lakchixkuwin xalak kachikinin chu kxliputum tamapakgsin nema anankgo ni anan tiku chuna la wix» (Jer. 10:​6, 7). Putum uma limasiya pi lhuwa tuku xlakata kilimalankitkan kinTlatkan xalak akgapun. Pero xla ni kajwatiya lakgchan namalankiyaw, wata xatlan tayat nema kgalhi tlawa pi napaxkiyaw.

6. ¿Tuku xlakata paxkiyaw Jehová?

⁶ Malankiyaw Jehová xlakata paxkiyaw xliputum kinakujkan. Jehová kgalhi lhuwa xatlan tayat nema tlawa pi napaxkiyaw. Akgtum liʼakxilhtit, xla lu xalakgalhamana (Sal. 103:13; Is. 49:15). Akxni patinanaw, kinkaʼakgatekgsniyan chu nitlan limakgkatsi akxni akxilha pi patinanaw (Zac. 2:8). Kinkamakgtayayan natalakatsuwiniyaw chu xʼamigos nalitaxtuyaw (Sal. 25:14; Hech. 17:27). Nachuna, xla taktuju chu «takilhputa xlakata naʼakxilha akgapun chu katiyatni, xlakata nayawa tiku taktuju» (Sal. 113:​6, 7). Putum uma tlawa pi lu namalankiputunaw kiDioskan (Sal. 86:12).

7. ¿Tuku tlan natlawayaw xlakata namalankiyaw Jehová?

⁷ Malankiyaw Jehová xlakata lakaskinaw pi latamanin kalakgapaskgolh. Lhuwa latamanin ni katsikgo tuku xaxlikana xlakata Dios. ¿Tuku xlakata? Xlakata Satanás malakgatuminit taʼakgsanin xpalakata Jehová chu kamalakgatsininit xtalakapastaknikan (2 Cor. 4:4). Kamakanajlinit pi Jehová malakgaxokgenan tuku nitlan tlawakan chu ni kinkalilakgaputsayan.  Na masiya pi wa Dios lin kuenta putum tuku nitlan lama kkakilhtamaku. Pero akinin katsiyaw tuku xaxlikana, chu tlan nakamakgtayayaw latamanin nakatsikgo tuku xaxlikana xlakata kiDioskan, chu chuna na namalankikgo (Is. 43:10). Kʼuma artículo nalichuwinanaw makgapitsi versículos xla Salmo capítulo 96, nema lu malankikgo Jehová. Tuku nalakputsananiyaw nakinkamakgtayayan nakatsiyaw la tlan namaxkiyaw Dios lilanka nema lakgchan.

¿LA TLAN NAMAXKIYAW JEHOVÁ LILANKA NEMA LAKGCHAN?

8. ¿Tuku tlan nalimalankiyaw Jehová? (Salmo 96:​1-3).

⁸ (Kalikgalhtawakga Salmo 96:​1-3). Tlan nalimalankiyaw Jehová kintachuwinkan. Kʼumakgolh versículos kawanikan kskujnin Dios pi kakilhtlinikgolh, kamalankikgolh xtukuwani, kalichuwinankgolh xatlan tamakatsinin xla lakgtaxtut, chu kamalankikgolh kxlakgstipan kachikinin. Akxni tlawayaw putum uma, malankiyaw kinTlatkan xalak akgapun. Kskujnin Jehová xalamakgasa tiku ni makgxtakgkgolh, xpalakachuwinankgo chu lu xkalitachuwinamputunkgo amakgapitsin putum tuku Dios xtlawanit xpalakatakan (Dan. 3:​16-18; Hech. 4:29). ¿La tlan nachuna natlawayaw?

9, 10. ¿Tuku kinkamasiyaniyan tuku titaxtulh Angelina? (Na kaʼakxilhti dibujo).

⁹ Kalichuwinaw tuku akgspulalh chatum tala xalak Estados Unidos tiku wanikan Angelina. a Xla ni pekualh chu kgalhmakgtayalh xtukuwani Jehová kxputaskujut. Xlakata aku xtsukunit makgskuja anta, wanika pi xʼamaka tlawakan akgtum tamakxtumit niku putum tiku aku xtsukukgonit makgskujkgo kʼuma taskujut, xlichuwinankgolh tsinu xlakata xlatamatkan xlakata amakgapitsin xkalakgapaskgolh. Xla laksakli makgapitsi fotos xlakata xkamasiyanilh xcompañeros pi xla lu xpaxuwa xlakata xtatayana Jehová xlitaxtu. Pero pulana lakgchalh achatum xcompañero nachuwinan, chu xla wa pi xnatlatni xtatayananin Jehová xlitaxtukgo chu xmasiyanikgonit xlakata Jehová, pero nitlan tsukulh lichuwinan tuku kanajlayaw xtatayananin Jehová. Angelina wan: «Lu kpekualh, makgkatsilh pi xʼama kgostaxtu kinaku. Pero klilakpuwa: “¿Nakmasta talakaskin pi wi tiku nawan tuku ni xaxlikana xlakata Jehová, o nakkgalhmakgtaya?”».

¹⁰ Akxni xcompañero chuwinankgolh, Angelina tsekg tlawalh akgtum oración. Alistalh wa: «Chuna la uma kincompañerojkan, kinatlatni  na xtatayananin Jehová. Na kimasiyanikgolh xlakata Jehová lata aktsujku xakwanit, chu la uku chuntiya xtatayana Jehová klitaxtu». Maski lu tuwa tuku xtitaxtuma, Angelina nialh pekualh. Pulana masiyalh makgapitsi fotos niku xtasiya pi xla chu amakgapitsi xʼamigos xatapaxuwan kskujnanimakgo Jehová chu alistalh kalitachuwinalh tuku kanajlayaw (1 Ped. 3:15). Akxni Angelina chuwinankgolh, xcompañero nialh lu ksitsima chu asta wanilh pi xla na xlakapastaka makgapitsi tuku lu xlipaxuwanit kxkachikin Jehová akxni aktsujku xwanit. Angelina wan: «Jehová lakgchan nakgalhmakgtayayaw xtukuwani. ¡Uma akgtum lanka talakgalhaman!». Akinin na akgtum lanka talakgalhaman liʼakxilhaw namalankiyaw chu namaxkiyaw kakni Jehová, liwaka akxni amakgapitsin nitlan lichuwinankgo.

11. Chuna la titaxtunit kilhtamaku, ¿la makgantaxtikgonit xlakskujnin Dios tuku wan Salmo 96:8?

¹¹ (Kalikgalhtawakga Salmo 96:8). Tlan nalimalankiyaw Jehová tuku xtapalh kgalhiyaw. Kskujnin Jehová ankgalhin limalankikgonit tuku kgalhikgo (Prov. 3:9). Akgtum liʼakxilhtit, israelitas xatapaxuwan mastakgolh tuku xkgalhikgo xlakata xlitlawaka templo (2 Rey. 12:​4, 5; 1 Crón. 29:​3-9). Makgapitsi kstalaninanin Cristo kalimakgtayakgolh «tuku xkgalhikgo» Jesús chu xʼapóstoles (Luc. 8:​1-3). Chu kxapulana siglo, kstalaninanin Cristo na kalimakgtayakgolh xnatalankan tuku xmaklakaskinkgo (Hech. 11:​27-29). La uku, akinin na tlan nalimalankiyaw Jehová akxni xatapaxuwan mastayaw kintuminkan.

12. ¿La limalankiyaw Jehová tumin nema xatapaxuwan mastayaw? (Na kaʼakxilhti dibujo).

¹² Kalichuwinaw pulaktum tuku limasiya pi malankiyaw Jehová akxni xatapaxuwan mastayaw kintuminkan. Kkata 2020, anta kZimbabue, xʼanan tatsinksni xlakata sputli chuchut. Chatum tiku na xtitaxtuma uma tuku lu tuwa wa chatum tala tiku wanikan Prisca. Pero maski ni xʼanan tuku nawakan, xla chuntiya xlichuwinan Dios miércoles chu viernes, asta maski amakgapitsin latamanin xlakgwaxwilimakgo xtiyatkan. Xtalakatsunin xlikgalhkgamanankgo xlakata xla xlichuwinama Dios chu ni xlakgwaxwilima xtiyat xlakata xkgalhilh tuku nawa, chu xwanikgo: «¡Natsinksniya puskat!». Pero xla xkakgalhti: «Jehová nikxni kamakgxtakgnit kskujnin». Ni lhuwa kilhtamaku titaxtulh, xkachikin Jehová maklakaskilh tumin nema xatapaxuwan mastayaw xlakata xkamalakgachanilh tuku xmaklakaskinkgo kinatalankan xalak  uma kachikin. Makgapitsi xtalakatsunin lu kaks lilakawankgolh akxni akxilhkgolh uma chu wanikgolh: «Dios nikxni makgxtakgnitan. Tlakg klakgapasputunaw». Kgalhtujun xtalakatsunin tsukukgolh ankgo ktamakxtumit.

13. Chuna la wan Salmo 96:​9, ¿tuku kilitlawatkan xlakata namalankiyaw Jehová?

¹³ (Kalikgalhtawakga Salmo 96:9). Tlan nalimalankiyaw Jehová kintayatkan. Xtalakaskin pi sacerdotes tiku kskujkgo ktabernáculo chu ktemplo xmakgachakgankgolh chu xtuchakgankgolh, chu nitu xlixkajwanankgolh akxni xtanukgolh xlakata xtlawakgolh xtaskujutkan (Éx. 40:​30-32). Akinin na kiliskujatkan xlakata nitu nalixkajwananaw kkimaknikan, pero tuku tlakg xlakaskinka wa pi nitu nalixkajwananaw kkilatamatkan (Sal. 24:​3, 4; 1 Ped. 1:​15, 16). Lu kiliskujatkan xlakata nalakgmakganaw “xamakgan kintayatkan” chu nalilhakgananaw «xasasti tayat». Uma wamputun pi lu naliskujaw nalakgmakganaw tapuwan nema Jehová xkajni, chu nakatsiniyaw nalakpuwanaw chu nalikatsiyaw chuna la Jehová (Col. 3:​9, 10). Xlakata Dios kamakgtayanit, lhuwa latamanin tiku asta lu lixkajni xlinkgo xlatamatkan chu lu lakluku xwankgonit, talakgpalikgonit chu lilhakganankgonit xasasti tayat.

14. ¿Tuku kinkamasiyaniyan xliʼakxilhtit Jack? (Na kaʼakxilhti dibujo).

¹⁴ Kalichuwinaw xliʼakxilhtit Jack, chatum chixku tiku lu xaluku xwanit chu lu xpekuanikan, xlimapakuwikan Demonio. Xlakata lhuwa tuku nitlan xtlawanit, jueces wankgolh pi xlakgchan namakgnikan. Pero xlakata nina xlakgchan kilhtamaku namakgnikan, Jack mastalh talakaskin pi chatum tala tiku xlakgapaxialhnan pulachin xlimakgalhtawakgelh Biblia. Maski lhuwa tuku lu nitlan xtlawanit makgasa, Jack talakgpalilh, chu chuna la titaxtulh kilhtamaku tamunulh chu xtatayana Jehová litaxtulh. Lu lhuwa tuku lakgpalilh kxlatamat chu wa xlakata akxni lakgchalh kilhtamaku namakgnikan, makgapitsi tiku xkuentajtlawanankgo kpulachin lakgtasakgolh. Chatum sargento tiku kskuja anta, wa: «Jack wa tachin nema tlakg xmakgapekuanan. Pero la uku wa tiku tlakg tlan xlikatsi». Akxni xtitaxtunita akgtum semana lata xmakgnikanit, natalan taspitkgolh kpulachin xlakata xtlawakgolh tamakxtumit, chu anta akxilhkgolh pi xwi chatum tachin tiku nikxni xʼanit ktamakxtumit. ¿Tuku xlakata alh uma kilhtamaku? Xlakata lu kaks xlilakawanit putum tuku Jack xlakgpalinit kxlatamat, chu xkatsiputun tuku xlitlawat xwanit xlakata tlan  xkakninanilh Jehová. Uma liʼakxilhtit limasiya pi tlan nalimalankiyaw kintayatkan kinTlatkan xalak akgapun (1 Ped. 2:12).

¿LA NAMALANKI JEHOVÁ XTUKUWANI NIALH MAKGAS KILHTAMAKU?

15. ¿Tuku natlawa Jehová nialh makgas kilhtamaku xlakata namalanki xtukuwani? (Salmo 96:​10-13).

¹⁵ (Kalikgalhtawakga Salmo 96:​10-13). Xaʼawatiya versículo xla Salmo 96 lichuwinan pi Jehová litaxtu chatum Mapakgsina tiku xaʼakgstitum lakputsanan. ¿La namalanki Jehová xtukuwani nialh makgas kilhtamaku? Chuna natlawa akxni xaʼakgstitum nalakputsanan. Nialh makgas namasputu xaLanka Babilonia xlakata maxkajwinit xasanto xtukuwani (Apoc. 17:​5, 16; 19:​1, 2). Makgapitsi tiku naʼakxilhkgo la namasputukan ni xaxlikana takanajla max na natsukukgo kakninanikgo Jehová. Alistalh, anta kʼArmagedón, Jehová namasputu xkakilhtamaku Satanás. Nakamasputu putum tiku ni akxilhputunkgo chu maxkajwikgo xtukuwani, pero nakalakgmaxtu putum tiku paxkikgo, kgalhakgaxmatkgo chu ni limaxanankgo akxni malankikgo (Mar. 8:38; 2 Tes. 1:​6-10). Akxni sputnita nawan xTamapakgsin Cristo xaʼAkgtum Mil Kata, akxni titaxtunita nawan xaʼawatiya taputsan, Jehová masantujlinita nawan xtukuwani (Apoc. 20:​7-10). Ama kilhtamaku, «katiyatni nalitatsama xtamasiy xlilanka Jehová chuna la chuchut matsamanit pupunu» (Hab. 2:14).

16. ¿Tuku lakpuwanita natlawaya? (Na kaʼakxilhti dibujo).

¹⁶ ¡Lu tlan nawan akxni putum latamanin namaxkikgo lilanka nema lakgchan xtukuwani Jehová! Xlakata nina chan uma kilhtamaku, akinin lu liskujputunaw xlakata namalankiyaw xtukuwani kiDioskan. Xlakata nakinkamalakapastakakanan pi uma lu xlakaskinka, Lakgkgolotsin tiku Pulalinankgo laksakkgonit Salmo 96:8 xlakata wa texto xla kata 2025 nalitaxu: «Kamaxkitit lilanka nema lakgchan xtukuwani Jehová».