ARTÍCULO NEMA NATALIKGALHTAWAKGA 5
TAKILHTLIN 108 Xtapaxkit Dios nema ni makgxtakgnan
¿La litamakgtayayaw xtapaxkit Jehová?
«Cristo Jesús milh kkakilhtamaku xlakata nakalakgmaxtu lakgalhinanin» (1 TIM. 1:15).
TUKU NAʼAKXILHAW
Naʼakxilhaw la litamakgtayayaw talakgmaxtut chu la nalimasiyaniyaw Jehová pi paxtikatsiniyaw.
1. ¿Tuku kilitlawatkan xlakata namakgapaxuwayaw Jehová?
KALILAKPUWAW pi wi tiku maxkiyaw akgtum tlan tamaskiwin nema lu namakgtaya. ¿Ni xlikana pi lu xkinkamakgalipuwan pi uma lataman kajwatiya xmakilh chu xpatsankgalh? Pero lu xpaxuwaw komo uma lataman xmaklakaskilh chu chuna xkinkalimasiyanin pi kinkapaxtikatsiniyan. ¿Tuku kinkamasiyaniyan uma liʼakxilhtit? Jehová mastalh xKgawasa kimpalakatakan. ¡Xlikana pi lu paxuwa akxni akinin limasiyayaw pi lu paxtikatsiniyaw xlakata kinkamaxkin tamaskiwin xla xtalakgmaxtut chu kinkalimasiyanin tapaxkit! (Juan 3:16; Rom. 5:7, 8).
2. ¿Tuku nalichuwinanaw kʼuma artículo?
2 Max lu paxuwayaw xlakata kgalhiyaw talakgmaxtut, pero chuna la titaxtuma kilhtamaku max nialh xlakaskinka xtsukuw akxilhaw, xtachuna la xmakiw chu xpatsankgaw. Xlakata nichuna nakinkaʼakgspulayan, talakaskin ankgalhin nalilakpuwanaw tuku Jehová chu Jesús tlawakgonit kimpalakatakan. Uma artículo nakinkamasiyaniyan la tlan chuna natlawayaw. Nalichuwinanaw la litamakgtayayaw talakgmaxtut la uku chu la tlan nalitamakgtayayaw kkilhtamaku nema aku mima. Na naʼakxilhaw la tlan nalimasiyaniyaw pi paxtikatsiniyaw Jehová xtapaxkit, liwaka akxni nalakgchan akxni nalakapastakkan Cristo.
¿LA LITAMAKGTAYAYAW TALAKGMAXTUT LA UKU?
3. Kalichuwinanti pulaktum la litamakgtayayaw talakgmaxtut la uku.
3 La uku litamakgtayamaw xtalakgmaxtut Cristo. Akgtum liʼakxilhtit, xlakata talakgmaxtut, Jehová kinkatapatiyan kintalakgalhinkan. Xla ni kinkatapatiyan kaj xlakata chuna xlitlawat, wata chuna tlawaputun. Kʼakgtum takilhtlin David wa: «Wix Jehová, tlan likatsiya chu lu tapatinamputuna» (Sal. 86:5; 103:3, 10-13).
4. ¿Tiku xpalakata makamilh Jehová talakgmaxtut? (Lucas 5:32; 1 Timoteo 1:15).
4 Wi tiku lakpuwankgo pi ni kalakgchan pi Jehová nakatapati. Pero nipara chatum kinkalakgchanan nakinkatapatikanan. Apóstol Pablo wa: «Ni kiminini apóstol nakilimapakuwikan». Pero alistalh wampa: «Pero tlan ktlawa uma taskujut xlakata Dios kilimasiyanilh talakgalhaman nema ni anan xtachuna» (1 Cor. 15:9, 10). Akxni makgxtakgaw tuku nitlan tlawanitaw, Jehová kinkatapatiyan. ¿Tuku xlakata? Ni kaj xlakata kinkalakgchanan nakinkatapatikanan, wata chuna tlawa xlakata kinkapaxkiyan. Wa xlakata komo nitlan limakgkatsiyaw xlakata lakpuwanaw pi ni kinkalakgchanan pi Jehová nakinkatapatiyan, kalakapastakwi pi xla ni makamastalh talakgmaxtut xpalakata tiku ni kgalhikgo talakgalhin, wata mastalh talakgmaxtut xpalakata tiku nitlan limakgkatsikgo xtalakgalhinkan chu makgxtakgkgo (kalikgalhtawakga Lucas 5:32; 1 Timoteo 1:15).
5. ¿Tuku ni kililakpuwanatkan xlakata xtalakgalhaman Jehová?
5 Maski lhuwata kata skujnanimaw Jehová, nikxni kililakpuwanatkan pi tuku tlawanitaw wa tuku tlawa pi Jehová nakinkalakgalhamanan. Xlikana pi xla xlakaskinka akxilha putum tuku tlawanitaw xpalakata (Heb. 6:10). Pero xla ni makamastalh xKgawasa kaj xlakata nakinkaxokgoniyan putum tuku tlawanitaw xpalakata, wata uma akgtum tamaskiwin. Komo xlakpuwaw pi Jehová kinkalakgalhamanan kaj xlakata tuku akinin tlawayaw, xtachuna la xwaw pi ni xmaklakaskinaw pi Cristo xnilh kimpalakatakan (katamalakxtupi Gálatas 2:21).
6. ¿Tuku xlakata Pablo lu palha skujnanilh Jehová?
6 Pablo xkatsi pi tuku xtlawa xpalakata Jehová ni wa tuku xtlawa pi xlakgalhamanka. Pero ¿tuku xlakata lu palha xliskuja naskujnani Jehová? Xlakata xla xlimasiyaputun pi xpaxtikatsini xtalakgalhaman Dios nema ni xlakgchan (Efes. 3:7). Akinin na xatapaxuwan skujnaniyaw Jehová ni wa xlakata lakpuwanaw pi chuna nakinkalimasiyaniyan talakgalhaman, wata chuna tlawayaw xlakata limasiyaniputunaw pi paxtikatsiniyaw xtalakgalhaman.
7. Kalichuwinanti atanu la litamakgtayayaw talakgmaxtut la uku (Romanos 5:1; Santiago 2:23).
7 Atanu la litamakgtayayaw talakgmaxtut wa pi tlan talalinaw Jehová. a Chuna la akxilhwi kʼartículo nema titaxtulh, akxni lakachinaw xtalamakgasitsin Dios litaxtuyaw. Pero xlakata talakgmaxtut tlan “talalinaw Dios” chu tlan talakatsuwiniyaw (kalikgalhtawakga Romanos 5:1; Santiago 2:23).
8. ¿Tuku xlakata kilipaxtikatsinitkan Jehová pi tlan tlawaniyaw oración?
8 Kalilakpuwaw pulaktum tuku tlan tlawayaw xlakata tlan talalinaw Jehová: wa pi tlan tlawaniyaw oración. Xla ni kajwatiya kgaxmata oraciones nema tlawakan ktamakxtumit, wata nachuna kgaxmata nema tlawayaw chatunu chatunu akinin. Xlikana pi akxni tlawayaw oración tlan kinkamamakgkatsiniyan chu kinkamaxkiyan takaksni, pero uma ni wa tuku tlakg xlakaskinka wata wa pi kinkamakgtayayan tlakg tlan natalalinaw Dios (Sal. 65:2; Sant. 4:8; 1 Juan 5:14). Akxni Jesús xlama unu kKatiyatni, ankgalhin xtlawa oración xlakata xkatsi pi Jehová xkgaxmatma chu pi umakgolh oraciones xʼama makgtaya tlakg tlan xtalalilh (Luc. 5:16). Lu paxtikatsiniyaw pi xlakata xtalakgmaxtut Jesús, tlan xʼamigos Jehová litaxtuyaw chu tlan tlawaniyaw oración.
¿LA NALITAMAKGTAYAYAW TALAKGMAXTUT KKILHTAMAKU NEMA AKU MIMA?
9. ¿La nalitamakgtayakgo talakgmaxtut kskujnin Jehová kkilhtamaku nema aku mima?
9 ¿La nalitamakgtayakgo talakgmaxtut kskujnin Dios kkilhtamaku nema aku mima? Jehová nakamaxki latamat nema ni kgalhi xlisputni. Lhuwa latamanin lakpuwankgo pi nila latamakan putum kilhtamaku xlakata lata makgasa latamanin nikgo. Pero Jehová kamalakatsukilh latamanin xlakata tlan xlatamakgolh putum kilhtamaku. Chu maski la uku tuwa makgkatsiyaw nakanajlayaw pi tlan nalatamayaw putum kilhtamaku, tlan namakglhtinanaw uma latamat xlakata Jehová lixokgonalh tuku tlakg xtapalh xkgalhi: xlatamat xKgawasa (Rom. 8:32).
10. ¿Tuku lu kgalhkgalhimakgo tiku xatalaksakni chu atanu borregos?
10 Maski la uku nina kgalhiyaw latamat nema ni kgalhi xlisputni, Jehová lakaskin pi xatapaxuwan kaʼakxilhlakachaw. Tiku xatalaksakni lu kgalhkgalhimakgo naʼankgo kʼakgapun chu akxtum natamapakgsinankgo Cristo unu kKatiyatni (Apoc. 20:6). Chu amakgapitsi borregos kgalhkgalhimakgo nalatamakgo kParaíso unu kKatiyatni, niku nialh naʼanan takatsanajwat chu nipara tapatin (Apoc. 21:3, 4). ¿Kgalhkgalhipat wix nalatapaya putum kilhtamaku kKatiyatni? Tiku nalatamakgo kKatiyatni ni wamputun pi ni lu xlakaskinka litaxtukgo nixawa tiku naʼankgo kʼakgapun. Latamanin kamalakatsukika xlakata tlan xlatamakgolh putum kilhtamaku unu kKatiyatni. Wa xlakata uma lu nakinkaliminiyan lhuwa tapaxuwan.
11, 12. Kalichuwinanti makgapitsi tasikulunalin nema lu lakaskina pi kakgantaxtulha. (Na kaʼakxilhti dibujos).
11 Kalilakpuwanti la nawan milatamat anta kParaíso. Nialh katililakgaputsa tajatat chu linin (Is. 25:8; 33:24). Jehová namaxkiyan putum tuku tlan nema wix lakaskina. ¿Tuku xlakgati nakatsiniya? ¿Tlakg katsiniputuna xlakata animales? ¿Xlakgati natlakgnana o nadibujarlinana? Uma kilhtamaku natamaklakaskin arquitectos, tiku natlawakgo chiki, tiku nachananankgo chu tiku natlawakgo liwat. Na natalakaskin tiku natlawakgo liskujni chu nakuentajtlawakgo jardines (Is. 35:1; 65:21). ¡Nakgalhiya lhuwa kilhtamaku xlakata wi tuku xasasti nakatsiniya!
12 ¡Lu napaxuwayaw akxni nakamakgamakglhtinanaw tiku nalakastakwanankgo! (Hech. 24:15). Chu na lu nalipaxuwayaw xlakata chuntiya nakatsiniyaw xlakata Jehová chu xlakata putum tuku malakatsukinit (Sal. 104:24; Is. 11:9). Pero tuku tlakg tlan wa pi tlan nakakninaniyaw Jehová chu nialh katitlawaw talakgalhin. ¿Xlilakgpali putum tuku Jehová malaknuninitan kaj xlakata “puntsu xlipaxuwa talakgalhin”? Xlikana pi ni (Heb. 11:25). Tasikulunalin nema namakglhtinanaw tlakg tlan nixawa tuku nalimakgxtakgaw la uku. Kalakapastakti pi nachin kilhtamaku akxni nialh katikgalhkgalhiw pi Katiyatni akgtum Paraíso nawan xlakata antiya lamaw nawan. Chu putum uma nakgantaxtu kaj xlakata Jehová lu kinkapaxkin chu mastalh xKgawasa xlakata xnilh kimpalakatakan.
¿Tuku tasikulunalin lu makgamakglhtinamputuna anta kParaíso? (Kaʼakxilhti párrafos 11 chu 12).
KALIMASIYANIW JEHOVÁ PI PAXTIKATSINIYAW XTAPAXKIT
13. ¿La nalimasiyaniyaw Jehová pi paxtikatsiniyaw xtapaxkit? (2 Corintios 6:1).
13 ¿La nalimasiyaniyaw Jehová pi paxtikatsiniyaw talakgmaxtut? Nalimasiyaniyaw pi tuku tlakg xlakaskinka kkilatamatkan wa pi nakskujnaniyaw (Mat. 6:33). Kalakapastakwi pi Jesús nilh «xlakata tiku lamakgolh nialh xʼakstukan nakamakgapaxuwakan, wata namakgapaxuwakgo tiku nilh xpalakatakan chu malakastakwanika» (2 Cor. 5:15). Akxni tlawayaw putum tuku matlaniyaw xlakata naskujnaniyaw Jehová, limasiyayaw pi akgatekgsaw putum tuku tlawanit kimpalakatakan chu limasiyayaw pi paxtikatsiniyaw xlakata xtalakgalhaman chu xlakata kinkatapatinitan (kalikgalhtawakga 2 Corintios 6:1).
14. ¿La nalimasiyayaw pi lipawanaw tuku wan Jehová?
14 Atanu la tlan napaxtikatsiniyaw Jehová xlakata kinkapaxkiyan wa pi nalipawanaw chu natlawayaw tuku wan. ¿La tlan chuna natlawayaw? Akxni wi tuku laksakaw. Akgtum liʼakxilhtit, akxni lilakpuwamaw la xlilhuwa nakgalhtawakgayaw o tuku taskujut namakgamakglhtinanaw, talakaskin kuenta natlawayaw tuku lakaskin Jehová pi katlawaw (1 Cor. 10:31; 2 Cor. 5:7). Akxni limasiyayaw pi lipawanaw Jehová, kintakanajlakan tlakg tatliwakglha chu na tlakg tlan talalinaw. Chu na tlakg kanajlayaw pi tlan nalatamayaw putum kilhtamaku (Rom. 5:3-5; Sant. 2:21, 22).
15. ¿La nalimasiyayaw pi paxtikatsiniyaw Jehová akxni nalakapastakkan Cristo?
15 Atanu la tlan nalimasiyayaw pi lu paxtikatsiniyaw Jehová xlakata talakgmaxtut chu xtapaxkit, wa pi tlakg nalichuwinanaw Dios akxni nalakapastakkan Cristo. Ni kajwatiya nalakkaxwiliyaw pi naʼanaw uma kilhtamaku, wata na talakaskin nakawaniyaw makgapitsin pi na kakinkatatamakxtumikgon uma kilhtamaku (1 Tim. 2:4). Akxni nakaʼinvitarliyaw, tlan nakawaniyaw tuku tlawakan kʼuma tamakxtumit. Tlan nakamasiyaniyaw videos nema min kjw.org ¿Tuku xlakata nilh Jesús? chu Kalakapastakwi akxni tinilh Cristo. Lakgkgolotsin na nakaʼinvitarlikgo tiku nialh lichuwinankgo Dios. Xlikana pi lu napaxuwakgo ángeles xalak akgapun chu kskujnin Jehová xalak katiyatni komo chatum tiku tamakgatlininit Jehová nalakpuwan nalakgtaspita (Luc. 15:4-7). Akxni nalakapastakkan Cristo, kalakkaxwiliw pi ni kajwatiya nakapakgachipayaw tiku kalakgapasaw, wata nachuna tiku xlimakgtumku kinkalakgapaxialhnamakgon o tiku makgasata ni xminkgo ktamakxtumit. ¡Lu xatapaxuwan kakamakgamakglhtinaw putum tiku naminkgo! (Rom. 12:13).
16. ¿Tuku xlakata lu tlan xwa pi tlakg xlichuwinaw Dios akxni nalakapastakkan Cristo?
16 ¿Tlan tlakg xlichuwinaw Dios akxni nalakapastakkan Cristo? Komo chuna natlawayaw, nalimasiyayaw pi paxtikatsiniyaw putum tuku Jehová chu Jesús tlawakgonit kimpalakatakan. Akxni tlakg nalichuwinanaw Jehová, tlakg naʼakxilhaw xtamakgtay chu tlakg nalipawanaw (1 Cor. 3:9). Nachuna, kalikgalhtawakgaw capítulos xalak Biblia nema natalikgalhtawakga Akxni natalakapastaka akxni tinilh Cristo, nema min kfolleto Texto nema Nalikgalhtawakgayaw chali chali chu krecuadro nema min Tuku natalikgalhtawakga Xlatamat chu xtaskujut kstalanina Cristo. Na tlan tlakg nalakputsananiyaw umakgolh textos xalak Biblia akxni kiʼakstukan kgalhtawakgayaw.
17. ¿Tuku tlawa pi Jehová napaxuwa? (Na kaʼakxilhti recuadro « ¿La tlan napaxtikatsiniyaw Jehová xlakata kinkapaxkiyan?»).
17 ¿Chu komo nila makgantaxtiya putum tuku lichuwinanitaw kʼuma artículo? Ni kalilakgaputsa. Kalakapastakti pi Jehová ni tamalakxtumi tuku tlawakgo amakgapitsin chu tuku wix tlawaya. Xla akxilha tuku wi kminaku chu lu paxuwa xlakata katsi pi wix lu paxtikatsiniya tamaskiwin xla talakgmaxtut (1 Sam. 16:7; Mar. 12:41-44).
18. ¿Tuku xlakata lu kapaxtikatsiniyaw Jehová chu Jesús?
18 Kajwatiya talakgmaxtut kinkamakgtayayan nakinkatapatikanan kintalakgalhinkan, tlan natalalinaw Jehová chu tlan nalatamayaw putum kilhtamaku. Ankgalhin kalimasiyaw pi paxtikatsiniyaw xtapaxkit Jehová, xlakata wa tuku makgpuwantinilh pi xkinkamaxkin putum umakgolh tasikulunalin (1 Juan 4:19). Chu na kalimasiyaw pi lu paxtikatsiniyaw Jesús xlakata lu kinkapaxkin chu mastalh xlatamat kimpalakatakan (Juan 15:13).
TAKILHTLIN 154 Tapaxkit wa tuku makgapala
