1. ¿La litamakgtayayaw akxni lakapastakaw akgatunu kata akxni tinilh Cristo?

 TALAKGMAXTUT akgtum lu tlan tamaskiwin (2 Cor. 9:15). Xlakata Jesús mastalh xlatamat kimpalakatakan, akinin tlan talalinaw Jehová chu kgalhiyaw takgalhkgalhin pi tlan nalatamayaw putum kilhtamaku. Tipalhuwa tuku xlakata kilipaxtikatsinitkan Jehová, tiku kinkamaxkin uma tamaskiwin xlakata lu kinkapaxkiyan (Rom. 5:8). Jesús xkinkamakgtayaputunan ankgalhin napaxtikatsininanaw xlakata talakgmaxtut, wa xlakata limapakgsinalh pi xlakapastakwi akgatunu kata akxni nilh (Luc. 22:​19, 20).

2. ¿Tuku nalichuwinanaw kʼuma artículo?

² Uma kata, nalakapastakaw akxni tinilh Cristo sábado 12 xla abril kata 2025. Xlikana pi putum lakkaxwilimaw naʼanaw uma kilhtamaku. Lu nalitamakgtayayaw komo nalimaxtuyaw kilhtamaku akxni nalakapastakkan Cristo xlakata nalilakpuwanaw a putum tuku Jehová chu xKgawasa tlawakgonit kimpalakatakan. Kʼuma artículo naʼakxilhaw tuku kinkamasiyaniyan talakgmaxtut xlakata Jehová chu Jesús. Chu kʼatanu artículo nalichuwinanaw la litamakgtayayaw talakgmaxtut chu la nalimasiyayaw pi paxtikatsininanaw uma tamaskiwin.

¿TUKU KINKAMASIYANIYAN TALAKGMAXTUT XLAKATA JEHOVÁ?

3. ¿Tuku xlakata kaj chatum chixku tlan xkalakgmaxtulh lhuwa millón latamanin? (Na kaʼakxilhti dibujos).

³ Talakgmaxtut kinkamasiyaniyan pi Jehová paxki tuku xaʼakgstitum (Deut. 32:4). ¿Tuku xlakata chuna wanaw? Xlakata Adán ni kgalhakgaxmatli Dios, putum xkamanan kinkamatitaxtinin talakgalhin chu linin (Rom. 5:12). Jehová malakgachalh Jesús  xlakata xkinkalakgmaxtun ktalakgalhin chu klinin. Pero ¿tlan chatum chixku tiku ni xkgalhi talakgalhin xkalakgmaxtulh lhuwa millón latamanin? Apóstol Pablo lichuwinalh la tlan chuna xtlawaka. Xla wa: «Chuna la lhuwa latamanin lakgalhinanin litaxtukgolh kaj xlakata chatum chixku [Adán] ni kgalhakgaxmatli Dios, nachuna, lhuwa latamanin xaʼakgstitum nalitaxtukgo xlakata chatum chixku [Jesús] kgalhakgaxmatnalh» (Rom. 5:19; 1 Tim. 2:6). Komo putum akinin makglakgalhinanin litaxtuw kaj xlakata chatum chixku tiku ni xkgalhi talakgalhin ni kgalhakgaxmatli Dios, na tlan xkinkalakgmaxtun chatum chixku tiku ni xkgalhi talakgalhin, tiku xkgalhakgaxmatli Dios.

4. ¿Tuku xlakata Jehová nila xmasta talakaskin pi xkamanan Adán tiku xkgalhakgaxmatkgolh tlan xlatamakgolh putum kilhtamaku?

⁴ Pero ¿lu xtalakaskin pi Jesús xnilh xlakata xkinkalakgmaxtun? ¿Ni tlakg tlan xwa pi Jehová xmastalh talakaskin pi xkamanan Adán tiku xkgalhakgaxmatkgolh xlatamakgolh putum kilhtamaku? Xlakata akinin makglakgalhinanin, max nalakpuwanaw pi wa uma tuku tlakg tlan. Pero kalakapastakwi pi Jehová ankgalhin tlawa tuku xaʼakgstitum. Wa xlakata xla nila chuntiya xmakgxtakga tuku Adán xtlawanit chu xlakpuwa pi nitu xlanit.

5. ¿Tuku xlakata liwana kanajlayaw pi Jehová ankgalhin natlawa tuku xaʼakgstitum?

⁵ Pero kalakpuwaw pi Jehová ni xtixokgolh talakgmaxtut, chu xtimastalh talakaskin pi xkamanan Adán tiku xkgalhikgo talakgalhin tlan xlatamakgolh putum kilhtamaku. ¿Tuku xkitaxtulh? Komo Jehová chuna xtitlawalh, xlakatsalalh tuku lakkaxwilinit pi xaʼakgstitum, wa xlakata latamanin max xtsukukgolh lakgaputsakgo chu xlilakpuwankgolh komo Jehová amakgtum xtlawapa tuku ni xaʼakgstitum. Akgtum liʼakxilhtit, ¿xmakgantaxtilh putum tuku xmalaknunit? La uku ni talakaskin nalilakgaputsayaw uma, xlakata katsiyaw pi Jehová tlawalh tuku xaʼakgstitum akxni makamilh xKgawasa tiku lu xpaxki. Wa xlakata liwana katsiyaw pi xla ankgalhin natlawa tuku xaʼakgstitum.

6. ¿La kinkamakgtayayan talakgmaxtut nakatsiyaw pi Jehová lu kinkapaxkiyan? (1 Juan 4:​9, 10).

⁶ Talakgmaxtut limasiya pi Jehová xaʼakgstitum, pero tuku tlakg limasiya wa pi Jehová lu kinkapaxkiyan (Juan 3:16; kalikgalhtawakga 1 Juan 4:​9, 10). Jehová malakgachalh xKgawasa xlakata xnilh kimpalakatakan xlakata lakaskin pi kalatamaw putum kilhtamaku chu na lakaskin pi kamakgtapakgsiw kxfamilia. Kalilakpuwanti uma: akxni Adán makglakgalhinalh, nialh makgtapakgsilh kxfamilia Jehová. Chu wa xlakata putum akinin nialh makgtapakgsiyaw kxfamilia Dios. Pero xlakata mastalh talakgmaxtut, putum tiku nalimasiyakgo takanajla chu nakgalhakgaxmatkgo, namakgtapakgsikgo kxfamilia. Chu maski la uku nina makgtapakgsiyaw kxfamilia,  Jehová tlan kinkatapatiyan kintalakgalhinkan chu tlan talalinaw. Na tlan katalalinaw amakgapitsin tiku na skujnanikgo. ¡Xlikana pi Jehová lu kinkapaxkiyan! (Rom. 5:​10, 11).

7. Komo nalilakpuwanaw putum tuku patilh Jesús, ¿la nakinkamakgtayayan uma naʼakgatekgsaw la xlilhuwa kinkapaxkiyan Jehová?

⁷ Xlakata tlakg liwana naʼakgatekgsaw la xlilhuwa kinkapaxkiyan Jehová, kalilakpuwaw la xlilhuwa xtapalh xwanit tuku makamastalh xlakata xkinkalakgmaxtun. Satanás wan pi komo chatum kskujni Dios natitaxtu tuku lu tuwa, namakgxtakga Jehová. Xlakata Jehová xlimasiyalh pi uma ni xlikana, mastalh talakaskin pi Jesús xpatinalh akxni nina xniy (Job 2:​1-5; 1 Ped. 2:21). Jehová xʼakxilhma akxni latamanin likgalhkgamanankgolh Jesús chu akxni soldados kgesnokgkgolh chu xtokgowakakgolh kkiwi. Na akxilhli la patinalh xKgawasa akxni kxtokgowakakanita (Mat. 27:​28-31, 39). Jehová tlan xtikamalakgachokgolh. Akgtum liʼakxilhtit, Jehová wi tuku tlan xtitlawalh akxni latamanin wankgolh: «Uku kalakgmaxtulh [Dios] komo paxki» (Mat. 27:​42, 43). Pero komo Jehová chuna xtitlawalh, ni xtaxokgolh talakgmaxtut chu la uku latamanin ni xkgalhikgolh takgalhkgalhin. Wa xlakata mastalh talakaskin pi xKgawasa xpatinalh asta akxni nilh.

8. ¿Tuku xlakata katsiyaw pi Jehová lu nitlan limakgkatsilh akxni akxilhli pi xKgawasa xpatinama? (Na kaʼakxilhti dibujo).

⁸ Maski Jehová ni maklakaskilh xlitliwakga xlakata xmalakgachokgolh tuku xpatima xKgawasa, ni wamputun pi nitu xmakgkatsima. Jehová kinkatlawan xlakata lhuwa tuku namakgkatsiyaw, chu xlakata kinkamalakatsukin chuna la xla, xla na makgkatsi chuna la akinin. Biblia wan pi makgasa latamanin “nitlan mamakgkatsinikgolh” chu lu “makgalipuwankgolh” (Sal. 78:​40, 41). Kalilakpuwaw tuku titaxtukgolh Abrahán chu Isaac. Jehová wanilh Abrahán pi xmakamastalh xkgawasa (Gén. 22:​9-12; Heb. 11:​17-19). Xlikana pi Abrahán lhuwa tuku xmakgkatsima akxni xʼama makamasta xkgawasa chu lakapala chuna xtlawaputun. Chu Jehová, ¿la makgkatsilh akxni akxilhli pi lu xmakgapatinamaka xKgawasa asta akxni makgnika? Nila lilakpuwankgoyaw talipuwan chu takatsanajwat nema xmakgkatsima Jehová. (Kaʼakxilhti kkisitiojkan xla internet jw.org video Limasiyakgolh takanajla: Abrahán [xlipulaktiy]).

9. ¿Tuku kinkamasiyaniyan Romanos 8:​32, 38, 39 xlakata la xlilhuwa kinkapaxkiyan Jehová?

⁹ Talakgmaxtut kinkamasiyaniyan pi ni anan atanu tiku tlakg kinkapaxkiyan chuna la Jehová, nipara chatum kiʼamigojkan nipara chatum tiku xalak kifamiliajkan tlakg kinkapaxkiyan nixawa Jehová (kalikgalhtawakga Romanos 8:​32, 38, 39). Asta Jehová tlakg kinkapaxkiyan nixawa la kiʼakstukan kinkapaxkikanan. Kalilakpuwanti uma: ¿latapaputuna putum kilhtamaku? Jehová tlakg lakaskin pi kalatapa putum kilhtamaku. ¿Lakaskina pi katapatika mintalakgalhin?  Jehová tlakg lakaskin pi chuna kalalh. Kajwatiya tuku kinkaskiniyan wa pi kamakgamakglhtinaw xtamaskiwin, chu limasiyayaw pi makgamakglhtinanitaw uma tamaskiwin akxni kgalhakgaxmataw chu limasiyayaw pi kanajlaniyaw. Xlikana pi talakgmaxtut liwana kinkamasiyaniyan la xlilhuwa kinkapaxkiyan Dios. Chu kxasasti kakilhtamaku tlakg lhuwa tuku nakatsiniyaw xlakata la kinkapaxkiyan Jehová (Ecl. 3:11).

¿TUKU KINKAMASIYANIYAN TALAKGMAXTUT XLAKATA JESÚS?

10. 1) ¿Tuku tlakg xlilakgaputsama Jesús akxni nina xmakgnikan? 2) ¿La limasiyalh Jesús pi Jehová xaʼakgstitum? (Na kaʼakxilhti recuadro « Xtamakamastan Jesús limasiyalh pi Jehová xaʼakgstitum»).

¹⁰ Jesús lu xlilakgaputsama tuku xlakpuwanka xlakata xTlat (Juan 14:31). Jesús lu xlilakgaputsama pi latamanin nitlan tuku xlakpuwankgolh xlakata xTlat xlakata xʼamaka makgnikan la chatum tiku talalakatawaka Dios chu lixkajni likatsi. Wa xlakata wa: «Tlat, kakintilakatsalalh uma copa komo lakaskina» (Mat. 26:39). Xlakata Jesús ni makgxtakgli Dios asta maski makgnika, liwana limasiyalh pi putum tuku wan Satanás xlakata Jehová ni xlikana.

11. ¿La limasiyalh Jesús pi lu xkapaxki latamanin? (Juan 13:1).

¹¹ Talakgmaxtut na kinkamasiyaniyan pi Jesús lu kalilakgaputsa latamanin, liwaka tiku xtamakgalhtawakgen litaxtukgo (Prov. 8:31; kalikgalhtawakga Juan 13:1). Jesús xkatsi pi unu kKatiyatni xʼama titaxtu tuku lu tuwa chu lu xʼama patinan akxni xmakgnika. Pero makgantaxtilh tuku xlakgayawakanit, ni kaj xlakata chuna xlitlawat xwanit, wata xatapaxuwan kalitachuwinalh Dios latamanin, kamasiyanilh chu kamakgtayalh. Chu kilhtamaku akxni xʼamaka makgnikan limaxtulh kilhtamaku xlakata xkatuchakgelh xʼapóstoles, xkamakgpuwantinilh chu wi tuku lu xlakaskinka xkamasiyanilh (Juan 13:​12-15). Chu akxni kxtokgowakakanitata, tlan mamakgkatsinilh chixku tiku xpaxtuwaka chu  wanilh pi xʼama latama kParaíso. Chu wanilh Juan pi xkuentajtlawalh xtse, María (Luc. 23:​42, 43; Juan 19:​26, 27). Jesús limasiyalh pi lu xkapaxki latamanin akxni xlichuwinan Dios chu akxni makamastalh xlatamat xpalakatakan.

12. ¿Tuku xlakata wanaw pi Jesús chuntiya lhuwa tuku tlawama kimpalakatakan?

¹² Cristo «kaj makgtum nilh chu xapalh talakgalhin», pero lhuwa tuku chuntiya tlawama kimpalakatakan (Rom. 6:10). Xla chuntiya skujma xlakata nakinkamaxkiyan lhuwa tuku tlan, chu xlakata xtamakamastan tlan makgamakglhtinanaw putum uma. Kalilakpuwanti putum tuku Jesús tlawama xlakata Mapakgsina litaxtu, sacerdote tiku tlakg kgalhi limapakgsin chu xʼakgxakga congregación (1 Cor. 15:25; Efes. 5:23; Heb. 2:17). Wa lakgayawakanit nakamamakxtumi tiku xatalaksakni chu lhuwa amakgapitsi borregos, chu uma taskujut namakgalhsputu akxni atsinu tsankga nawan nasputa lhuwa tapatin (Mat. 25:32; Mar. 13:27). b Jesús na lu kuenta tlawa pi kskujnin nakgalhikgo tuku maklakaskinkgo kxtakanajlakan kʼuma xaʼawatiya kilhtamaku (Mat. 24:45). Chu akxni namapakgsinan Akgtum Mil Kata, chuntiya lu naskuja xlakata nakinkamakgtayayan. Putum uma kinkamasiyaniyan pi akxni Jehová makamastalh xKgawasa, ni kajwatiya makamilh xlakata xmastalh xlatamat kimpalakatakan, wata xtamakamastan tlawa pi wi lhuwa tuku atanu natlawa kimpalakatakan.

CHUNTIYA KAKATSINI XLAKATA XTAPAXKIT JEHOVÁ CHU JESÚS

13. ¿Tuku namakgtayayan tlakg nakatsiniya xlakata tapaxkit nema Dios chu Cristo kinkalimasiyanikgoyan?

¹³ Komo nalilakpuwana tuku Jehová chu Jesús tlawakgonit mimpalakata namakgtayayan chuntiya tlakg lhuwa tuku nakatsiniya xlakata la xlilhuwa kinkapaxkikgoyan Jehová chu Jesucristo. Max tlan xlikgalhtawakga akgtum o akgtiy Evangelios akxni nalakapastakkan Cristo uma kata. Pero ni makgtumininka lhuwa capítulos kalikgalhtawakgaputu, wata tsinu tsinu kalikgalhtawakga chu kalilakpuwanti tuku namakgtayayan tlakg napaxkiya Jehová chu Jesús. Chu kalakapastakti: kakalitachuwinanti amakgapitsin tuku katsinitilhapat.

14. Chuna la wan Salmo 119:97 chu nota, ¿tuku kilitlawatkan xlakata chuntiya nakatsiniyaw xpalakata talakgmaxtut chu atanu tamasiy xalak Biblia? (Na kaʼakxilhti dibujo).

¹⁴ Komo wix makgasata lakgapasa xaxlikana max nalakpuwana, ¿wijku tuku xasasti kilikatsinit  xlakata xtapaxkit Dios, xlakata talakgmaxtut chu pi xlakata xaʼakgstitum likatsi Dios? Maski lhuwata tuku katsiniya xlakata umakgolh temas ananku tuku tlan nakatsiniya. ¿Tuku namakgtayayan chuntiya wi tuku nakatsiniya? Kalakputsanani putum kilikgalhtawakgakan nema kgalhiyaw. Komo natekgsa akgtum texto xalak Biblia nema ni liwana akgatekgsa, kalakputsananti. Chu alistalh kalilakpuwanti tuku katsini chu tuku masiyaniyan uma xlakata Jehová, xlakata xKgawasa chu xlakata tapaxkit nema kinkakgalhinikgoyan (kalikgalhtawakga Salmo 119:97 chu nota).

15. ¿Tuku xlakata chuntiya kiliputsatkan tuku lhuwa xtapalh nema min kBiblia?

¹⁵ Komo akxni nalikgalhtawakgaya Biblia ni tekgsa tuku xasasti, ni kalitaxlajwani. Tlan nawanaw pi akxni likgalhtawakgakan Biblia xtachuna la akxni putsakan oro. Lhuwa latamanin limaxtukgo lhuwa horas, asta lhuwa kilhtamaku xlakata natekgskgo oro. Xlakan katsinikgo kgalhkgalhinankgo chu chuntiya putsakgo asta akxni nakitekgskgo xlakata lu xlakaskinka liʼakxilhkgo maski kaj aktsu oro. Tuku lhuwa xtapalh nema min kBiblia tlakg tlan nixawa oro (Sal. 119:127; Prov. 8:10). Wa xlakata ni kalimakgxtakgti chu chuntiya kalikgalhtawakga Biblia (Sal. 1:2).

16. ¿La tlan nastalaniyaw xliʼakxilhtit Jehová chu Jesús?

¹⁶ Akxni nakgalhtawakgaya, na kalilakpuwanti la tlan nalilatapaya tuku katsinipat. Akgtum liʼakxilhtit, tlan kstalani xliʼakxilhtit Jehová chu xaʼakgstitum xkalikatsini amakgapitsin chu ni xkalaksakpaxki. Na tlan nastalaniya xliʼakxilhtit Jesús chu nalimasiyaya pi paxkiya Jehová chuna la xla paxki, xatapaxuwan nalipatinana kaj xpalakata xtukuwani Jehová. Na tlan nalimasiyaya pi kapaxkiya latamanin chuna la Jesús kapaxki akxni xatapaxuwan nakamakgtayaya natalan maski namin kilhtamaku tuwa namakgkatsiya, chu xatapaxuwan nakalitachuwinana amakgapitsin xatlan tamakatsinin xlakata na nalitamakgtayakgo talakgmaxtut.

17. ¿Tuku nalichuwinanaw kʼatanu artículo?

¹⁷ Akxni tlakg liwana akgatekgsaw chu xtapalh liʼakxilhaw talakgmaxtut, tlakg paxkiyaw Jehová chu xKgawasa. Chu xlakan tlakg kinkapaxkikgoyan (Juan 14:21; Sant. 4:8). Wa xlakata kalimaklakaskiw putum tuku Jehová kinkamaxkiyan xlakata tlakg nakatsiniyaw xpalakata talakgmaxtut. Kʼatanu artículo nalichuwinanaw la litamakgtayayaw talakgmaxtut chu tuku tlan natlawayaw xlakata nalimasiyayaw pi paxtikatsiniyaw Jehová xlakata uma.