1, 2. ¿Tuku max xakstukan xkakgalhskinka apóstoles akxni Jesús alh k’akgapun?

APÓSTOLES tawilakgolh xmakgalhtawakganakan chu x’amigojkan Jesús anta ksipi xla Olivos. Xalan akxilhkgolh pi Jesús, tsuku an k’akgapun asta litatsekga puklhni (Hech. 1:9, 10). Max akgtiy kata, Jesús lhuwa tuku kamasiyanilh chu kamakgpuwantinilh chu kapulalilh. Pero ¿tuku xtlawakgolh xlakata nialh wi?

² Akxni Jesús nina x’an k’akgapun kawanilh kstalaninanin: «Nalichuwinanatit kJerusalén kimpalakata, chu xlikatlanka kJudea, chu kSamaria, chu asta awatiya kxtankgana tiyat» (Hech. 1:8). ¿La x’amakgolh makgantaxtikgo uma taskujut? Jesús kamalaknunilh pi x’amakgolh makglhtinankgo xtamakgtay espíritu santo (Hech. 1:5). Pero ¿tiku x’ama pulalin chu x’ama lakkaxwili la natalichuwinan Dios xlikalanka katiyatni? Apóstoles xkatsikgo pi makgasa, Jehová xkalimaklakaskinit lakchixkuwin, xlakata nakapulalin israelitas. Wa xlakata max xkakgalhskinkan komo Jehová x’ama laksaka xasasti pulalina.

3. 1) Akxni Jesús x’anita k’akgapun ¿tuku lu xlakaskinka laksakkgolh apóstoles? 2) ¿Tuku takgalhskinin nakakgalhtiyaw k’uma artículo?

 ³ Akxni Jesús x’anita k’akgapun kstalaninanin lakputsananikgolh tatsokgni chu skinkgolh xtamakgtay Dios, chu laksakkgolh Matías xlakata xlakgxokgo xwa Judas Iscariote. Chuna takgatsipa kgalhkutiy apóstoles (Hech. 1:15-26). ¿Tuku xlakata lu xlakaskinka xpalakatakan chu xpalakata Jehová? Kstalaninanin akxilhkgolh pi lu xlakaskinka xwanit pi xtawi kgalhkutiy apóstoles * (Kaʼakxilhti nota). Jesús xkalaksaknit apóstoles chu kamasiyanilh xlakata tlan xmakgantaxtikgolh xlakaskinka taskujut kxkachikin Dios. ¿Tuku xwanit ama taskujut? ¿La kamakgtayalh Jehová chu Jesús xlakata xmakgantaxtikgolh tuku xkalakgayawakanit? ¿Wi tiku la uku nachuna tlawama uma taskujut la xkachikin Dios? ¿La tlan nakalakapastakaw «skujni xalipaw chu xaskgalala» tiku pulalimakgolh xkachikin Dios? (Heb. 13:7; Mat. 24:45). Ka’akxilhwi.

4. ¿Tuku xkuentajtlawakgo apóstoles chu lakgkgolotsin xalak Jerusalén?

⁴ Apóstoles tsukukgolh pulalinkgo congregación kPentecostés kata 33. Biblia wan pi «cha nchu ntayalh mPedro, chu xkgalhakawitukan» chu lhuwa latamanin kamakgatekgsnilh tuku xaxlikana nema xkalakgmaxtulh xlatamatkan (Hech. 2:14, 15). Lhuwa kstalaninanin Cristo litaxtukgolh. Alistalh umakgolh xalaksasti kstalaninanin Cristo «ankgalhin tliwakglh xwilakgo kxtakanajlakan ntu xmasiyunikgoy [apóstoles]» (Hech. 2:42). Apóstoles liwana xlimaklakaskinkgo tumin xalak congregación (Hech. 4:34, 35). Nachuna xkamasiyanikgo xkachikin Dios chu xpalakaskinkgo k’oración. Xlakan wankgolh «ankgalhin naktlawayaw nkioracionkan, chu nakskujaw nakmastayaw ntachuwin» (Hech. 6:4). Apóstoles xkamalakgachakgo kstalaninanin Cristo tiku tlakg xkatsinikgo xlakata nalichuwinankgo Dios niku ni x’alichuwinankan (Hech. 8:14, 15). Alistalh, amakgapitsi lakgkgolotsin tiku xatalaksakni tsukukgolh makgtayakgo apóstoles xlakata nakuentajtlawakgo congregaciones. Putum xlakan litaxtukgolh Lakgkgolotsin tiku Pulalinkgo xKachikin Jehová (Hech. 15:2).

5, 6. 1) ¿La kamaxkilh litliwakga espíritu santo Lakgkgolotsin tiku Pulalinkgo xTatayananin Jehová? (Kaʼakxilhti xapulana dibujo). 2) ¿La kamakgtayakgolh ángeles Lakgkgolotsin tiku Pulalinankgo? 3) ¿La kapulalilh xTachuwin Dios Lakgkgolotsin tiku Pulalinankgo?

⁵ Kxapulana siglo, kstalaninanin Cristo xkatsikgo pi Jehová wa xkapulalima Lakgkgolotsin chu xlimaklakaskima Jesús. ¿Tuku xlakata liwana xkatsikgo? Pulana, xlakata espíritu santo maxkilh litliwakga Lakgkgolotsin tiku xpulalinkgo xkachikin Dios (Juan 16:13). Maski uma paks kamaxkika kstalaninanin Cristo, wa tiku tlakg kamasiyanika wa apóstoles chu lakgkgolotsin xalak Jerusalén, chuna tlan xpulalinkgolh congregación. Akgtum li’akxilhtit, kkata 49, espíritu santo kapulalilh lakgkgolotsin xlakata nalaksakkgo tuku natlawakgo xlakata circuncisión. Congregaciones tlawakgolh tuku xlakan lakkaxwilikgolh chu «xta[’a]kgatanksmakgo kxtakanajlakan, na chali chali xtaliwakatilhama»  (Hech. 16:4, 5). Carta xla circuncición nema makglhtinankgolh congregaciones limasiyakgolh pi Lakgkgolotsin tiku xpulalinkgo xkachikin Jehová xkgalhikgo takanajla chu tapaxkit, tayat nema masta espíritu santo (Hech. 15:11, 25-29; Gál. 5:22, 23).

⁶ Xlipulaktiy, tuku xlikatsikgo kstalaninanin Cristo wa pi ángeles xkamakgtayama Lakgkgolotsin tiku xpulalinkgo xkachikin Jehová. Akgtum li’akxilhtit, chatum ángel wanilh Cornelio pi xputsalh apóstol Pedro. Cornelio ni judío chu ni xtacircuncidarlinit. Alistalh akxni Pedro kalitachuwinalh xTachuwin Dios, xlakan makglhtinankgolh espíritu santo maski ni xtacircuncidarlikgonit. Cornelio wa pulana tiku ni judío, kstalanina Cristo litaxtulh maski ni xtacircuncidarlinit. Akxni apóstoles chu amakgapitsi natalan kgaxmatkgolh xtalakaskin Dios, xatapaxuwan makgamakglhtinankgolh kcongregación tiku ni judíos chu tiku xtacircuncidartlawakgonit (Hech. 11:13-18). Nachuna, ángeles xpulalinkgo xlakata natalichuwinan Dios, nema xkuentajtlawamakgolh Lakgkgolotsin tiku xPulalinkgo xkachikin Jehová (Hech. 5:19, 20). Xlipulaktutu, tuku xlikatsikgo kstalaninanin Cristo wa pi xTachuwin Dios kapulalilh Lakgkgolotsin tiku Pulalinkgo xkachikin Jehová. Uma natalan ankgalhin xputsakgo xtapulalin Biblia, akxni xlaksakkgo tuku lu xlakaskinka, xlakata takanajla chu xlakata la napulalinkgo congregación (Hech. 1:20-22; 15:15-20).

7. ¿Tuku xlakata tlan wanaw pi wa Jesús xkapulalima xapulana kstalaninanin xakgasiya siglo?

⁷ Lakgkgolotsin tiku xpulalinkgo xkachikin Dios xkgalhikgo limapakgsin kcongregación, xkatsikgo pi xPuxkukan wa Jesús. ¿La likatsiyaw? Apóstol Pablo wa pi Cristo wa tiku xkalaksaka makgapitsi lakchixkuwin xlakata «apóstoles kalimaxtulh». Na wa pi Cristo wa x’akgxakga congregación (Efes. 4:11, 15). Dios wa tiku tlawalh pi xkalimapakuwika kstalaninanin Cristo chu ni xkalilakgapaska xtukuwani chatum apóstol (Hech. 11:26). Pablo xkatsi pi xlakaskinka natlawayaw tuku xmasiyakgo apóstoles chu amakgapitsin lakgkgolotsin xpulalinkgo congregación, xlakata xkilhtikgo kxTachuwin Dios. Maski chuna, Pablo wa: «Klakaskin mpi nakatsiyatit mpi wa nCristo, xapuxku lantla xlipaks nchixkuwin». Uma na kakilhchanima Lakgkgolotsin tiku Pulalinkgo xkachikin Jehová. Chu alistalh wampa: «Wa Dios, xpuxku nCristo» (1 Cor. 11:2, 3). Xlikana Jehová xlaksaknit xKgawasa Jesucristo, xlakata napulalin congregación.

8, 9. ¿Tuku lu xlakaskinka taskujut tlawalh tala Russell?

⁸ Kata 1870 Charles Taze Russell chu tiku xmakgtayakgo, liskujkgolh xlakata nalakkaxwilikgo tuku xaxlikana takaknin. Xkamakgtayaputun latamanin na chuna xtlawakgolh, chu tiku xchuwinankgo tanu tachuwin. Wa xlakata kkata 1884 liwana talakkaxwililh Zion’s Watch Tower Tract Society. Chu tiku xpulalima wa tala Russell * (kaʼakxilhti nota). Xla, xlikgalhtawakgana Biblia xwanit chu lu xlakgapaskan, chuna ni pekualh xlakata nawan pi ni xlikana tuku xmasiyakan xlakata Trinidad chu linin. Na chuna, akgateskgsli pi akxni nataspita Cristo niti kati’akxilhli asta akxniku «nakikgantaxtunikgoy nkilhtamaku  ntu lakchankgoy xakgmakgat chixkuwin» x’ama sputa kata 1914 (Luc. 21:24). Limaxtulh kilhtamaku, xlitliwakga chu xtumin xlakata nalichuwinan tuku xaxlikana. Uma liwana tasiya pi Jehová chu Jesús limaklakaskinkgolh tala Russell k’uma xlakaskinka kilhtamaku.

⁹ Russell ni xlakaskin pi lakchixkuwin xmalankikgolh. Kkata 1896, tsokgwililh, ni klakaskinaw pi nakinkamaxkikanan kakni chu nipara kiakstukan naktatlankiyaw chu na ni klakaskinaw pi namalankikan kintukuwanikan. Alistalh wampa «Uma taskujut ni xla chatum chixku».

10. 1) ¿Tuku kilhtamaku Jesús wililh «skujni xalipaw chu xaskgalala»? 2) Kalichuwinanti la ni tatalakxtumi Lakgkgolotsin tiku Pulalinankgo chu Sociedad Watch Tower.

¹⁰ Alistalh kkata 1919, akxni xtitaxtunita akgtutu kata la tala Russell nilh Jesús lakkaxwililh «skujni xalipaw chu xaskgalala». ¿Tuku xlakata? Xlakata nakamaxki amakgapitsi kskujnin «taway kilhtamaku akxni xlilat» (Mat. 24:45). Ama kata, kBrooklyn (Nueva York) ni lhuwa natalan xwilakgolh tiku xatalaksakni tiku xlakkaxwilikgo taway xa’espiritual chu xkamaxkikgo kstalaninanin Jesús. Tachuwin «Lakgkgolotsin tiku Pulalinankgo» tsukuka wilikan kilikgalhtawakgakan kkata 1940. Ama kilhtamaku xtakgatekgsa pi «Lakgkgolotsin tiku Pulalinankgo» xkilhchanima tiku xpulalinkgo Watch Tower Bible and Tract Society. Pero, kkata 1971 liwana takatsilh pi Lakgkgolotsin tiku Pulalinankgo, chu tiku pulalinkgo Sociedad Watch Tower ni watiya xwanit xlakata xlakan kaj watiya xlakkaxtlawakgo ta’akglhuwit. Lata ama kilhtamaku, makgapitsi natalan tiku xatalaksakni tiku ni xpulalinkgo Sociedad Watch Tower tlan xlitaxtukgolh Lakgkgolotsin tiku Pulalinankgo. Nina akglhuwa kata «amakgapitsi borregos», wa tiku pulalimakgolh Sociedad Watch Tower chu atanu tuku na kalakgayawakanit taskujut nema maklakaskin xkachikin Dios. Uma tlawa pi Lakgkgolotsin tiku Pulalinankgo xman wa na lilakgaputsakgo xlakata takanajla (Juan 10:16; Hech. 6:4). Makatsinina 15 xla julio kata 2013 lichuwinalh pi «skujni xalipaw chu xaskgalala» kaj ni xalhuwa natalan tiku xatalaksakni tiku litaxtukgo Lakgkgolotsin tiku Pulalinankgo.

11. ¿La skujkgo Lakgkgolotsin tiku Pulalinankgo?

¹¹ Lakgkgolotsin tiku Pulalinankgo makxtum laksakkgo tuku lu xlakaskinka akgatunu semana. Uma tlawa pi tlan nalalikatsini chu makxtum nalakgo (Prov. 20:18). Ni chatum tlakg xlakaskinka litaxtu nixawa amakgapitsin. Wa xlakata tiku pulalin uma tamakxtumit akgatunu kata talakgpalitilhakgo (1 Ped. 5:1). Nachuna tlawakgo kgalhchaxan comités xla Lakgkgolotsin tiku Pulalinankgo. Ni chatum tiku makgtapakgsi la Lakgkgolotsin tiku Pulalinankgo lakpuwan pi wa kapulalin xnatalan. Chatunu xlakan na makgtapakgsikgo «amakgapitsi skujnin» (Kaʼakxilhti recuadro «¿Tuku kilhchanima?»). Na makglhtinankgo taway xa’espiritual, chu mastakgo talakaskin pi nakapulalin skujni xatalipaw.

12. ¿Tuku takgalhskinin nakgalhtiyaw?

¹² Lakgkgolotsin tiku Pulalinankgo ni katachuwinan Dios, chu na makglakgalhinanin. Wa xlakata, min kilhtamaku akgtsankgakgo akxni wi tuku masiyakgo xlakata Biblia  o akxni masta akgtum tastakyaw. Akgtum liʼakxilhtit, wa Índice de las publicaciones Watch Tower limin niku wan «Aclaración de creencias». Niku wi akgtum lista la talakgpalitilhanit la ta’akgatekgstilhanit xTachuwin Dios lata kata 1870. Jesús ni wa pi skujni xatalipaw liwana x’ama kinkamaxkiyan taway. Wa xlakata, ¿tiku uma «xaxlikana skujni xalipaw chu xaskgalala» tiku lichuwinalh Jesús? (Mat. 24:45). ¿Tuku likatsiyaw pi Lakgkgolotsin tiku Pulalinankgo wa uma skujni xatalipaw? Ka’akxilhwi pulaktutu tuku na wa kapulalilh Lakgkgolotsin tiku xPulalinankgo kxapulana siglo.

13. ¿La kamakgtayanit espíritu santo Lakgkgolotsin tiku Pulalinkgo xTatayananin Jehová?

¹³ Espíritu santo kamakgtaya Lakgkgolotsin tiku Pulalinankgo. Kamakgtayanit espíritu santo xlakata na’akgatekgskgo tuku xaxlikana xalak Biblia nema ni xta’akgatekgsa. Akgtum li’akxilhti, lista xla takanajla nema lichuwinaw kpárrafo nema titaxtulh. Ni chatum lataman tlan x’akgatekgsli chu xlichuwinalh «ntu luwa [laktuwa]  xtalakapastakna Dios» (kalikgalhtawakga 1 Corintios 2:10). Lakgkgolotsin tiku Pulalinankgo nachuna lakapastakkgo tuku wa apóstol Pablo: «Na klichuwinanaw, wampi ni wa kmaklakaskinaw ntachuwin ntu masiyuy xtastakatkan nchixkuwin, wampi lantla nkinkamasiyuniyan spíritu» (1 Cor. 2:13). Lhuwata ciento kata ni xaxlikana takanajla ka’akgskgawilh latamanin chu ni liwana kamasiyanilh. ¿Tuku xlakata lu talhuwinit la ta’akgatekgstilhanit Biblia asta akxni kata 1919? Xlakata Jehová kalimakgtayama x’espíritu santo.

14. Chuna la wan Revelación 14:6, 7, ¿la makgtayamakgolh ángeles la uku, Lakgkgolotsin tiku Pulalinankgo chu xkachikin Dios?

¹⁴ Ángeles kamakgtaya Lakgkgolotsin tiku Pulalinankgo. Xlakata lhuwa taskujut kgalhikgo napulalinkgo la lichuwinankan Dios xlikalanka katiyatni liwaka akgtsayan millones tiku lichuwinankgo Dios. ¿Tuku xlakata lu tlan kitaxtuma uma taskujut? Xlakata kgalhikgo xtamakgtaykan ángeles (kalikgalhtawakga Revelación 14:6, 7). Lakgachunin, ángeles kapulalinkgonit tiku lichuwinankgo Dios, xlakata nakatachuwinankgo tiku aku skinikgonit xtamakgtay Dios * (Ka’akxilhti nota). La talichuwinan Dios chu tamasiya xlakata Biblia chuntiya talhuwima niku natalan lhuwa kaputsastalanimaka. Ángeles na makgtayanankgo akxni chuna la.

15. Kawili akgtum li’akxilhtit tuku ni tatalakxtumi Lakgkgolotsin tiku Pulalinankgo chu tiku pulalinkgo atanu takanajla.

¹⁵ Lakgkgolotsin tiku Pulalinankgo kapulalin xTachuwin Dios (kalikgalhtawakga Juan 17:17). Kalilakpuwaw tuku lalh kata 1973. La Atalaya 15 xla octubre xla ama kata kgalhskininalh: «¿Makgantaxtikgo latamanin tuku taskin xlakata tamunut maski ni’amakgxtakgkgo lixkuli?». Xatakgalhtin wan pi ni, chu anta takilhtinit kBiblia. Revista lichuwinalh lhuwa textos xalak Biblia niku xwan tuku xlakata xtamakaxtuka kcongregación tiku ni makgxtakga la kxkuli (1 Cor. 5:7; 2 Cor. 7:1). La Atalaya xwan pi tuku xmaxtukan ni kaj xlakata chuna la xwankgo latamanin, wata xlakata chuna «Dios wililh anta kxtachuwin». Xman wa xtatayananin Jehová tiku makgantaxtikgo tuku wi kxTachuwin Dios. Chu chuna tlawakgonit maski lakgachunin tuwa makgkatsikgo. Nina makgas, maktum libro xla takanajla xalak Estados Unidos wa: «Tiku pulalinkgo atanu takanajla lakputsananikgo tuku kanajlakgo chu lakkaxwilikgo xlakata tlakg nakgalhikgo tiku nakanajlakgo chu putum tiku makgtapakgsikgo». Lakgkgolotsin tiku Pulalinankgo ni wa tlawakgo tuku lhuwa latamanin wankgo. Wata mastakgo talakaskin pi wa nakapulalin xtachuwin Dios. Uma limasiya pi wa Jehová tiku pulalima xkachikin.

16. ¿La tlan nakalakapastakkgoyaw Lakgkgolotsin tiku Pulalinankgo?

¹⁶ (Kalikgalhtawakga Hebreos 13:7). Biblia wan pi kililakapastakatkan tiku «mimpuxkunaninkan» uma wamputun tiku kinkapulalinkgoyan. Pulaktum la tlan natlawayaw wa oración xpalakata Lakgkgolotsin tiku Pulalinankgo (Efes. 6:18). Xlakan lhuwa taskujut nema lakgayakgolh. Akgtum li’akxilhtit, kinkamaxkiyan liwat xa’espiritual,  pulalimakgolh la talichuwinama Dios xlikalanka katiyatni chu liwana nalimaklakaskinkgo tumin nema xatapaxuwan mastakan. Xlikana, talakaskin pi natlawayaw oración xpalakatakan.

17, 18. 1) ¿La kamakgtayayaw Lakgkgolotsin tiku Pulalinankgo? 2) ¿Tuku xlakata kilitlawatkan putum tuku matlaniyaw akxni lichuwinanaw Dios?

¹⁷ Na limasiyayaw pi kalakapastakaw Lakgkgolotsin tiku Pulalinankgo akxni kgalhakgaxmataw xtastakyawkan chu la kinkapulalinkgoyan. Lakgkgolotsin tiku Pulalinankgo limaklakaskinkgo likgalhtawakga, tamakxtumit chu laklanka tamakxtumit xlakata nakinkapulalinkgoyan. Nachuna, kalaksakkgo tiku superintendentes de circuito nalitaxtukgo, chu xlakan laksakkgo tiku lakgkgolotsin nalitaxtukgo kcongregación. Tiku superintendentes de circuito chu lakgkgolotsin limasiyakgo pi lakapastakkgo Lakgkgolotsin tiku Pulalinankgo xlakata liwana tlawakgo xtastakyawkan. Putum akinin kalimasiyaw pi maxkiyaw kakni Kimpulalinakan Jesús, akxni kgalhakgaxmataw kinatalankan tiku kalimaklakaskima la uku (Heb. 13:17).

¹⁸ Atanu la nakalakapastakaw Lakgkgolotsin tiku Pulalinankgo wa akxni lichuwinanaw xtachuwin Dios. Hebreos 13:7 kinkamakgpuwantiniyan nakgalhiyaw takanajla chuna la natalan tiku pulalinamakgolh. Lakgkgolotsin tiku Pulalinankgo limasiyakgonit pi lhuwa takanajla kgalhikgo akxni xatapaxuwan lichuwinankgo Dios chu la pulalimakgolh la talichuwinama xalakwan xalaksasti xla Tamapakgsin. ¿Nakamakgtayayaw uma lu xlakaskinka taskujut? Komo chuna natlawayaw, lu nalipaxuwayaw akxni Jesús nakinkawaniyan: «Xlikana kit kkawaniyan pi lantla kaxatukawa litlan tu wixin tlawanikgotit, kitaxtuy xtachuna lantla pala kit kintlawanitit» (Mat. 25:34-40).

19. ¿Tuku xlakata lakpuwanitaw pi wa nastalaniya kimpulalinakan, Jesús?

¹⁹ Akxni Jesús taspitli k’akgapun, ni xakstukan kamakgxtakgli kstalaninanin (Mat. 28:20). Xla xkatsi pi espíritu santo, ángeles chu xTachuwin Dios xmakgtayanit nakapulalin kstalaninanin akxni xlama unu kKatiyatni. La uku nachuna xla kamakgtayama skujni xatalipaw. Lakgkgolotsin tiku Pulalinankgo «wa nti stalanikgo nkgalhnilu nkani kawa ntani an» (Rev. 14:4). Wa xlakata akxni tlawayaw tuku kinkawanikgoyan Lakgkgolotsin tiku Pulalinankgo, wa stalanimaw kimPulalinakan, Jesús. Nialh makgas, xla «napulaliyankgo ntani anan ntaxtunu nchuchut xla latamat» chu nalatamayaw putum kilhtamaku (Rev. 7:14-17). Ni chatum chixku kgalhi litliwakga xlakata tlan namalaknu la uma.